Kutala Muli Nakuchinyina Muli Yehova Tahi?
“Yehova eji kusokolanga myono yavangamba jenyi. Kaha kakweshi mutu mwachinyina muli ikiye navahana mulongako.”—SAMU 34:22.
MYASO: 49, 65
1. Vangamba jaKalunga vakushishika veji kwivwanga ngachilihi nge vanalingi shili?
VANGAMBA jaKalunga vakushishika vavavulu veji kuhanjikanga mazu aze ahanjikile kaposetolo Paulu ngwenyi: “Omu ngwavindama ami!” (Loma 7:24) Tuvosena tweji kumonanga ukalu mwomwo yashili twaswana, ngocho nge vilinga vyetu kavyeshi kwivwisa Yehova kuwahako, kaha tweji kwivwanga kumuchima kupihya. Vaka-Kulishitu vamwe vaze valingile shili yayinene vashinganyekele ngwavo Kalunga keshi kuvakonekelako.
2. (a) Mukanda waSamu 34:22 wasolola ngachilihi nge vangamba jaKalunga kavatela kulizakaminako? (b) Vyuma muka natushimutwila muchihande chino? (Talenu lipwata lyakwamba ngwavo, “ Vyuma Natulinangulaho Tahi, Nyi Vyuma Vyemanyinako?”)
2 Visoneka vyatukolezeza ngwavyo vaze veji kuchinyinanga muli Yehova kavatela kulizakaminako. (Tangenu Samu 34:22.) Uno kuchinyina muli Yehova chalumbununa ika? Vyuma muka twatela kulinga mangana Yehova atwivwile keke nakutukonekela? Hakusaka tukumbulule vihula kana, tukekesenu hajinganda jakuswamamo jize japwileko muIsalele yakushikulu. Jinganda kana vajihakileko muLushiko lwamuJishimbi luze vashishishile haPendekoseta 33 C.E. Anukenu ngwenu Jishimbi kana jafumine kuli Yehova. Shikaho jinganda jakuswamamo jasolola omu Yehova amona shili, navaka-shili, navaze navapihilila nakwalumuka. Ngocho tuvangilenu kushimutwila ovyo vahakililileko jinganda kana namulimo jazachilenga.
“LISAKWILENU ENU VAVENE JINGANDA JAKUSWAMAMO”
3. VaIsalele valingilenga ngachilihi nge mutu najihi mukwavo chakufuma kumuchima?
3 Yehova amwenenga mulonga wakumwanga manyinga kupwa waunene muIsalele. Weshowo ajihile mukwavo chakufuma kumuchima vamujihilenga kuli kausoko kauze vajihile, uze vavulukilenga ngwavo “muka-kulinga sambanjinga.” (Kula. 35:19) Echi chapwile kufwika hamanyinga amutu uze ajihile. Kaha nawa valingilenga ngocho kuchina kupihisa Lifuchi lyaLushiko, mwomwo Yehova ambile ngwenyi: “Kanda namukapihisa lifuchi lize muli nakutwamako, mwomwo kumwanga manyinga cheji kupihisanga lifuchi.”—Kula. 35:33, 34.
4. VaIsalele valingilenga ngachilihi nge mutu najihi mukwavo chakuhona kuchisakula kumuchima?
4 VaIsalele valingilenga ngachilihi nge mutu najihi mukwavo chakuhona kuchisakula kumuchima? Numba tuhu chuma kana kachafumine kumuchima wenyiko, olozenyi namwange manyinga amutu wakuhona mulonga. (Kupu. 9:5) Ngocho, mutu kana atelelele kuchinyina kukala nganda yakuswamamo hali jize jinganda 6 vahakileko, mangana ayovole mwono wenyi kuli muka-kulinga sambanjinga. Mutu kana atelelele kutwama munganda kana palanga nakukufwa chakapilishitu wakulitulaho.—Kula. 35:15, 28.
5. Mujila muka jinganda jakuswamamo jatukafwa tutachikize omu apwa Yehova?
5 Kutunga jinganda jakuswamamo kachapwile vishinganyeka vyavatuko. Oloze vyapwile vyaYehova, mwomwo alwezele Yoshuwa ngwenyi: “Lweza vaIsalele ngwove, ‘Lisakwilenu enu vavene jinganda jakuswamamo.’” Yehova ikiye avalwezele vahakeko jinganda kana. (Yoshu. 20:1, 2, 7, 8) Hakuwana nge Yehova ikiye ahanyine lushimbi lwakusakula jinganda kana vajizachise kumulimo wakulipwila, ngocho twatela kulihulisa ngwetu: Uno chuma kana nachitukafwa ngachilihi tutachikize ngwetu Yehova atwama namuchima wakeke? Kaha natuchinyina ngachilihi muli Yehova makumbi ano?
AKALWEZE “VAKULWANE VANGANDA CHIHANDE CHENYI”
6, 7. (a) Lumbununenu vyuma valingilenga vakulwane hakusopa mulonga wamutu uze ajihile mukwavo chakuhona kuchisakula kumuchima. (Talenu muvwimbimbi wakulivanga.) (b) Mwomwo ika chapwililile chachilemu mutu uze ajihile mukwavo chakuhona kuchisakula kumuchima kuya kuli vakulwane?
6 Mutu uze ajihile mukwavo chakuhona kuchisakula kumuchima, atelelele kwimana kuchikolo changanda yize achinyinyine nakulweza “vakulwane vanganda chihande chenyi.” Kaha vaze vakulwane vatelelele kumutambula namavoko avali. (Yoshu. 20:4) Hakuhita chalwola, vamukindulwishile kuli vakulwane vamunganda yize ajihilile mutu mangana vakasope chihande chenyi. (Tangenu Kulava 35:24, 25.) Nge vawanyine ngwavo amujihile chakuhona kuchisakula kumuchima, kaha mutu kana vamukindulwishile kunganda yakuswamamo.
7 Mwomwo ika vihande kana vavitwalilenga kuli vakulwane? Mangana vaIsalele vapwenga vatoma nakukafwa nawa uze najihi mukwavo chakuhona kuchisakula kumuchima vamwivwile keke kuli Yehova. Mutu umwe alinangula chikuma vyaMbimbiliya asonekele ngwenyi, nge mutu uze najihi mukwavo chakuhona kuchisakula kumuchima mwahona kuya nakumona vakulwane, kaha “mwalikokela ponde yayinene chikuma.” Ambile nawa ngwenyi: “Mutu kana mwafwa, kaha nowo navahana mulonga wauchi, mwomwo kakavangijile lushimbi luze Kalunga ahakileko.” Numba tuhu Kalunga ahakileko vyuma vyakukafwa mutu uze mwajiha mukwavo chakuhona kuchisakula kumuchima, oloze mutu kana atelele kulinga vyuma kana numba anganyale. Kachi nge mwahona kuchinyina kujinganda jize asakwile Yehova, kaha kausoko kamutu uze ajihile apwile nalisesa lyakumujiha.
8, 9. Mwomwo ika chapwila chakutamo muka-Kulishitu uze nalingi shili yayinene kulyambulula kuli vakulwane?
8 Makumbi ano, muka-Kulishitu uze mwalinga shili yayinene atela kulyambulula kuvakulwane muchikungulwilo mangana vamukafwe. Mwomwo ika chapwila chachilemu kulinga ngocho? Chatete, Yehova ikiye anoneka jila kaneyi kuhichila muMazu enyi Mbimbiliya. (Yako. 5:14-16) Chamuchivali, jila kana yeji kukafwanga vaze vanapihilila nakwalumuka vatwaleho lika kuvevwila kuwaha kuli Kalunga nakulihenda kutato yakulinganga shili. (Ngale. 6:1; Hepe. 12:11) Chamuchitatu, vakulwane muchikungulwilo vavahana mulimo wakukafwa vaze vanapihilila nakwalumuka nakuvakokweza vafwelele ngwavo Kalunga navakonekela kunahu. Yehova amba ngwenyi ava vakulwane vapwa “uswamo wakuswama vula yamishilinjinji.” (Isa. 32:1, 2) Jila kaneyi yasolola muchima wakeke atwama nawo Kalunga.
9 Vangamba jaKalunga vavavulu vatachikiza ngwavo chapwa chamwaza kulweza vakulwane mangana vavakafwe nge vanalingi shili. Chakutalilaho, ndumbwetu Daniel alingile shili yayinene, oloze kakasunukile kuya nakulyambulula kuli vakulwaneko. Ambile ngwenyi, “Kangwashinganyekele ngwami vakulwane vanahase kungukafwako. Chipwe ngocho, ngwalihanyine mulonga ami ivene hashili ngwalingile. Oloze omu ngwalombele kuli Yehova, ngwashinganyekele jino kuya kuli vakulwane vakangukafwe.” Ngocho, Daniel ayile jino kuli vakulwane vakamukafwe. Kaha ambile ngwenyi, “Hakavanga ngwevwile woma wakulyambulula kuli vakulwane. Oloze kutwala muze ngwevwile jino nakumuchima hwo kwijiva nge mutu uze vanatulu chiteli chachilemu. Oholili ngunapu jino wakukasunuka kulomba kuli Yehova.” Daniel ali jino nachivezu chitoma, kaha vanamutongola kupwa muka-kuzachila.
“AKACHINYINE KUNGANDA YIMWEHAJINGANDA KANA JIZE”
10. Mutu uze ajihile mukwavo chakuhona kuchisakula kumuchima atelelele kulinga chuma muka numba vamutetele?
10 Mutu uze ajihile mukwavo chakuhona kuchisakula kumuchima atelelele kulingako vimwe numba vamutetele. Atelelele kuchinyina kunganda yakuswamamo yize yapwililile kwakamwihi. (Tangenu Yoshuwa 20:4.) Atelelele kuheta washi munganda kana nakutwama muze munganda numba vahone kumujiha. Echi chasakiwile kulisuula. Atelelele kuseza milimo yenyi, nalimbo lyenyi. Kaha atelelele kutwama muze munganda swi nakukufwa chakapilishitu wakulitulaho. * (Kula. 35:25) Oloze kuhona kulinga vyuma kana chasolwele nge uze mutu kazangile mwono wenyiko kaha nawa amwene kuyoya chamutu uze ajihile kupwa chamokomoko.
11. Vyuma muka atela kulinga muka-Kulishitu uze napihilila nakwalumuka mangana asolole nge asakwilila Kalunga hamuchima wenyi wakutetela?
11 Makumbi ano, vatu vaze navapihilila nakwalumuka vatela kulingako vyuma vimwe numba Kalunga avatetele. Twatela kulihenda kushili yayinene nakushili yayindende. Kaposetolo Paulu asonekele vyuma valingile vaka-Kulishitu vamuKolinde vaze vapihililile nakwalumuka. Asonekele ngwenyi: “Achishinganyekenu omu kulinyenga chenu mujila yakwivwisa Kalunga kuwaha chanehele unyongochima muli enu, nakulihakwila enu vavene, nakwivwa kupihya, nawoma, nakufwila kwalumuka, natwima, nakusaka kwolola vyuma vinahenge.” (Koli. 2, 7:10, 11) Chikupu vene nge natuseza vilinga vyashili, kaha natusolola kuli Yehova ngwetu vyuma twapwanga nakulinga vyavipi kaha tuli nakusaka atutetele.
12. Vyuma muka atela kuseza muka-Kulishitu numba Kalunga atwaleho lika kumutetela?
12 Uno vyuma muka atela kuseza muka-Kulishitu numba Kalunga atwaleho lika kumutetela? Atela kuseza vyuma vyosena vize navimulingisa alinge shili numba avizanga tuhu ngachilihi. (Mateu 18:8, 9) Kachi nge kuli masepa jenu vaze vanakumizondola mulinge vyuma vize ahunga Yehova, kaha mwatela kulitwamina kulikata navo. Kachi nge chinakumikaluhwila kunwa wala wamweseke, kaha kamwatela kuhichila kuvihela vyakunwina wala chipwe kulikata navaze vazanga kunwa chikuma walako. Nge munakusaka kuhonesa vishinganyeka vyakusaka kulinga ujila, kaha mwatela kulihenda kumyaso, namivwimbimbi yize nayimilingisa mushinganyeke vyuma kana. Twatela kulisuula kuseza vyuma vyavipi mangana tulame kulonga chetu kuli Yehova. Nachipwa chaluvinda nge Yehova mwatuseza, oloze natwivwa kuwaha chikuma nge Yehova mwatusolwela ‘zangi yakwilila.’—Isa. 54:7, 8.
“JINGANDA KANA JIKAPWE JAKUSWAMAMO”
13. Lumbununenu ovyo vyalingishile uze achinyinyine munganda apwenga wakukingiwa, nakutwama kanawa.
13 Kachi nge mutu nachinyina lyehi muze munganda, kaha kalizakaminyinenga chekako. Yehova ambile ngwenyi: “Jinganda kana jikapwe jakuswamamo.” (Yoshu. 20:2, 3) Yehova ketavishile vatu vasopese cheka uze mutu hamulonga avulumwineko chipwe kumukava muze munganda kuli muka-kulinga sambanjinga mangana amujiheko. Ngocho uze mutu kalizakaminyine ngwenyi navamulemekako mwomwo Yehova amukingilenga. Eyi nganda kayapwile nge njeleko. Uze mutu alizachililenga milimo, nakukafwa vakwavo, nakuzachila Yehova mukuunda. Vatu vaze vachinyinyinenga muze munganda vatwaminenga kanawa.
Fwelelenu ngwenu Yehova mwamikonekela (Talenu palangalafu 14-16)
14. Muka-Kulishitu uze napihilila nakwalumuka atela kufwelela vyuma muka?
14 Vangamba jaKalunga vamwe vaze valingile shili yayinene oloze vapihilila nakwalumuka veji kwivwanga nge vali “munjele” nakushinganyeka ngwavo Yehova kavakonekelako. Nge omu mukiko mweji kwivwanga nayenu, kaha tachikizenu ngwenu Yehova amikonekela chikupu. Daniel uze twavulukanga hakavanga amona mazu kana kupwa amuchano. Omu valingile vakulwane vanamwolola nakumukafwa apwenga cheka nachivezu chitoma, ambile ngwenyi: “Ngwevwile nakumuchima hwo. Omu vakulwane vasopele chihande chami nakuchikumisa, kangwalizakaminyine chekako. Nge mulonga vanakukonekelawo kaha unakumu. Yehova ahanjika ngwenyi, eji kumbatanga milonga yetu yashili nakuyimbila kwakusuku. Kaha keshi kukatusopesela cheka hamilonga kanako.” Uze mutu achinyinyine muze munganda kalizakaminyine cheka hali muka-kumulinga sambanjingako. Chochimwe nawa, nge Yehova natukonekela lyehi, kaha katwatela kulizakamina ngwetu mwatusopesa cheka hamilonga kanako.—Tangenu Samu 103:8-12.
15, 16. Mulimo waYesu hakupwa Muka-kusokola naKapilishitu Wakulitulaho wamikafwa ngachilihi mufwelele ngwenu Kalunga mwamitetela?
15 Etu tukwechi unjiho wauvulu wakutulingisa tufwelele ngwetu Yehova mwatutetela, kuhambakana omu chapwile kuli vaIsalele. Omu Paulu ahanjikile hakulimbenja chenyi hakuhona kwononoka Yehova, ambile ngwenyi: “Ngunamusakwilila Kalunga kuhichila muli Yesu Kulishitu Mwata wetu!” (Loma 7:25) Chamokomoko nashili yize alipikile nayo namilonga avulumwine kunyima, Paulu afwelelele ngwenyi Kalunga namukonekela kuhichila muli Yesu, mwomwo apihililile nakwalumuka. Hakuwana nge Yesu apwa Muka-kusokola, shikaho eji kutomesanga vivezu vyetu nakutuhana kuunda. (Hepe. 9:13, 14) Hakupwa Kapilishitu Wakulitulaho “nahase nawa kulwila kanawa vaze vali nakupandama kuli Kalunga kuhichila muli ikiye, mwomwo ayoya lika shimbu yosena mangana avalembelelengako.” (Hepe. 7:24, 25) Kachi nge vaIsalele vafwelelele ngwavo vanavakonekela shili yavo kuhichila muli kapilishitu wakulitulaho, ngocho nayetu twatela kufwelela chikupu ngwetu Kapilishitu Wakulitulaho Yesu mwatutetela “nakutusolwela likoji lyalinene lyakutukafwa halwola lwakutamo.”—Hepe. 4:15, 16.
16 Shikaho, hakusaka muchinyine muli Yehova, mwatela kufwelela mundando yakusokola yaYesu. Kanda kushinganyeka ngwenu ndando kana yasokola kaha vatu mwalizavuko. Oloze mwatela kufwelela ngwenu yasokola nayenu hauka wenu. (Ngale. 2:20, 21) Tachikizenu ngwenu Yehova mwamikonekela jishili jenu kuhichila mundando yakusokola. Tachikizenu nawa ngwenu ndando yakusokola yamilingisa mukayoye haya myaka yosena. Shikaho ndando yakusokola yaYesu yapwa wana amihana Yehova.
17. Mwomwo ika mwatela kuchinyina muli Yehova?
17 Jinganda jakuswamamo jasolola keke yaYehova. Hakuhakako jinganda kana, Kalunga asolwele nge amona kuyoya kupwa chachilemu kaha nawa asolwele omu vakulwane vanahase kutukafwa, nomu chapwa kupihilila nakwalumuka novyo twatela kufwelala chikupu ngwetu Yehova eji kutukonekelanga. Kutala muli nakuchinyina muli Yehova tahi? Kuli Yehova kaha kukiko twatela kuchinyina. (Samu 91:1, 2) Muchihande nachikavangizaho, natushimutwila omu jinganda jakuswamamo jinahase kutukafwa tulondezeze chakutalilaho chaYehova chakeke nachiyulo.
^ par. 10 Mukanda umwe wavaYuleya wahanjika ngwavo, vatanga jamutu uze ajihile mukwavo chakuhona kuchisakula kumuchima vamukavilenga kunganda yize achinyinyine.
