ALLEN * anungulukilile kuchikungulwilo cheka kafwe jikilomita 1,400 kufuma kwimbo lyavo. Ambile ngwenyi: “Hakavanga ngwalizakaminyine, mwomwo kangwashinganyekele ngwami nanguwana masepa veka vaze nanguhasa kulijilila navoko.”

Kachi nge nayenu mwalukila kuchikungulwilo cheka, kaha pamo mweji kwivwanga nganomu evwile Allen. Uno vyuma muka navimikafwa mangana mwijilile? Vyuma muka mwatela kulinga nge chili nakumikaluhwila kulijilila navandumbwenu? Vyuma muka mwatela kulinga mangana mukafwe vangeji vaneza muchikungulwilo chenu vahone kuhomba?

Achishinganyekenu hachakutalilaho echi: Nge mutondo vanauzulu nakuutumba kweka, weji kuzuzanga. Hakuuzula, miji yimwe yeji kuvatukanga. Oloze nge vanautumbulula lyehi weji kusokanga cheka miji yayihya. Omu mukiko cheji kupwanga nakuli muka-Kulishitu uze mwalukila kuchikungulwilo cheka. Muchikungulwilo muze mwapwilenga, mwapwile ‘namiji’ mujila yachifwanyisa, hakupwa namasepa vaze mwalikachilenga navo hakuzata milimo yakushipilitu. Oloze mwatela jino kusoka miji yeka mangana mutwaleho lika kufukila muchikungulwilo munalukila. Jino vyuma muka navimikafwa mulinge ngocho? Kavangizenunga jindongi jamuMbimbiliya. Tuchishimutwilenuko hajindongi jimwe.

Mutu uze eji kutanganga Mbimbiliya lwola lwosena apwa “nge mutondo wakutumba kuvana vatulwiji, mutondo uze weji kwimanga mihako hangonde yawo yakwima. Mafwo awo kaweshi kuzuzako, kaha vyosena mwalinganga navifukilanga.”—Samu 1:1-3.

Ngana muze mutondo wasakiwa meya numba uzame, namuka-Kulishitu nawa atela lwola lwosena kutanganga Mazu aKalunga numba azame kushipilitu. Ngocho mwatela kutanganga Mbimbiliya hakumbi hakumbi, nakuyanga kukukunguluka lwola lwosena. Mwatela kupwanga nachilongesa chaKulemesa Kalunga mwaTanga nachilongesa chahauka. Tachikizenu ngwenu vyuma vyosena mwalingilenga kuchikungulwilo kuze mwapwilenga vikiko mwatela kulinga nakuze munalukila.

“Muka-kuhizumuna vakwavo naikiye navakamuhizumuna.”—Vishi. 11:25.

Chuma nachimikafwa muzame kushipilitu nakulijilila washi navandumbwenu shina kwazananga chikuma mumulimo wakwambulula. Kevin, uze apwa kalama muchikungulwilo ambile ngwenyi: “Chuma chatukafwile napuwami shina kuzata upayiniya wakukafwa hahaze vene twahetele. Echi chatukafwile tulitachikize navandumbwetu, navapayiniya nakutachikiza nawa ngalila yakwambulwila.” Roger uze alukilile kuchihela cheka kafwe jikilomita jakuzomboka 1,600, ambile ngwenyi: “Jila yamwaza yakulijililamo navandumbwetu shina kuyanga muwande lwola lwosena. Munahase nawa kulweza vakulwane muchikungulwilo vamihane kala milimo muzatenga, yakufwana nge kuwahisa haZuvo yaWangana chipwe kuhanjika chihande nge mwenyacho kejileko, chipwe kulisuula kumbata vandumbwenu muminyau hakuya kukukunguluka. Omu vandumbwenu navamona muchima wenu wakulisuula nachivalingisa valikate nenu.”

“Kasununenu chikuma michima yenu.”—Koli. 2, 6:13.

Solwelenunga vandumbwenu chisambo. Omu Melissa natanga yenyi valukilile kuchikungulwilo cheka, vapwile namulimo wakutunga masepa vavahya. Ambile ngwenyi: “Twashimutwililenga navandumbwetu  haZuvo yaWangana, shimbu kanda tuputuke kukunguluka nahanyima yakukunguluka. Echi chatukafwile tushimutwilenga kanawa navandumbwetu nakulijilila navo.” Kulinga chuma kana chakafwile tanga yavo kutachikiza kanawa majina avandumbwavo. Chuma chikwavo chavakafwile shina kusanyikanga vandumbwavo kuzuvo yavo nakulila hamwe vyakulya. Melissa ambile cheka ngwenyi: “Twalihanyine jinambala jajishinga mangana tulituminenga kala lwola nakusakiwa kulihizumuna kushipilitu.”

Kachi nge muli nakwivwa woma wakuhanjika navandumbwenu halwola lwatete, kaha munahase kuputuka kuvahanjikisa hakumwesa kukanwa, numba tuhu kamweshi nakusaka kusehako. Kumwesa kukanwa nachilingisa vakwenu vakasunuke kumihanjikisa. Mbimbiliya ngwayo: “Muchima weji kuwahililanga nge kumeso kunataunuka.” (Vishi. 15:30) Rachel uze anungulukilile kufuma kuchihela kuze akolelelele ambile ngwenyi: “Kufuma vene kukusemuka chami ngwatwama nasonyi. Shimbu jimwe cheji kungukaluhwilanga kuhanjikisa vandumbwami vamuchikungulwilo ngwalukila. Nge ngunayi kuZuvo yaWangana, ngwasaka kutwama namutu uze natwame kaha keshi nakuhanjika navatuko, mwomwo ngweji kushinganyekanga ngwami nayikiye wasonyi ngana mwayami.” Shikaho fwilenu kumenekanga kala mutu muchikungulwilo shimbu kanda kukunguluka chipwe hanyima yakukunguluka.

Kaha nawa shimbu jimwe munahase kwivwa kuwaha kutunga masepa vavahya havyalumingo vyatete namwalukila kuchikungulwilo cheka. Oloze kutwala muze munahase kwivwa uli. Halwola kana mwatela kuzata nangolo mangana mutwaleho kutunga masepa veka.

Mitondo yimwe yize vanatumbulula yeji kumbatanga lwola numba jino yizame. Chochimwe nawa, vaka-Kulishitu vamwe veji kumbatanga lwola numba valijilile navandumbwavo vakuchikungulwilo vanalukila. Kachi nge mwalukile lyehi oloze muchili nakuchiwana kupwa chachikalu kulijilila navandumbwenu, kaha mwatela kukavangiza jindongi jino jamuMbimbiliya:

“Kanda natuzeya kulinganga vyuma vyamwazako, mwomwo kachi nge katweshi kuzeyako, kaha halwola lwakwaha natukaha vene.”—Ngale. 6:9.

Twalenuho lika kukilikita mangana mulijilile navandumbwenu, numba tuhu namulinga ngocho hamakumbi amavulu. Chakutalilaho, vandumbwetu vavamishonali vavavulu veji kutwamanga kumafuchi veji kuvatumanga hamyaka yayivulu numba vayenga nakumeneka vausoko wavo. Echi cheji kuvakafwanga valijilile navandumbwavo vakuchihela kuze vanavatumu nakutachikiza chiyoyelo nachisemwa chavo.

Alejandro uze nanungulukanga chikuma, ejiva ngwenyi heji kuhitanga lwola numba mutu ejilile kuze nalukila. Ambile ngwenyi: “Omu twalukile, puwami ambile ngwenyi, ‘Masepa jami vosena vanasale kuchikungulwilo tunafumu.’” Oloze lunga lyenyi amwanukishile ngwenyi, mukiko ambile cheka kafwe myaka yivali kunyima omu valukilile kungalila yeka. Chuma chamukafwile shina kulikata navandumbwenyi hamwe kaha navaze vavahya vejilenga muchikungulwilo.

“Kanda nawamba ngwove: ‘Mwomwo ika makumbi akunyima apwililile amwaza kuhambakana makumbi ano?’ Mwomwo kacheshi chamangana kuli ove kuhulisa ngochoko.”—Kwambu.

Kanda kwesekesanga chikungulwilo mwapwilenga nachikungulwilo munalukilako. Chakutalilaho, pamo vandumbwenu vamuchikungulwilo munalukila kavahanjika hanjika chikumako, nyi pamo vapwa vaka-kuhanjika chikuma kuhambakana vakuze munafumu. Shikaho talenunga kaha havilinga vyavo  vyamwaza nganomu namusaka valinge ngocho nakuli yenu. Kunungulukila kuvikungulwilo vyeka chinalingisa vandumbwetu vamwe valihulise ngwavo: “Kutala ngwazanga ‘vandumbwami vosena’ tahi”?—Petu. 1, 2:17.

“Lombenunga lika, kaha navakamihana.”—Luka 11:9.

Lombenu kuli Kalunga amikafwe. David uze apwa mukulwane muchikungulwilo ambile ngwenyi: “Kamwatela kupendamina hauhashi wenuko. Yehova ikiye atela kumikafwa. Lwezenu Yehova ukalu wenu kuhichila mukulomba.” Rachel uze twavulukanga hakavanga etavilile mazu kana hakwamba ngwenyi: “Ami nalunga lyami tweji kulombanga kuli Yehova nge tunevu ngwetu katweshi nakulikata chikuma nachikungulwiloko. Tweji kumulwezanga ngwetu, ‘Tukafwe twijive ukalu unakutulingisa tuhone kulikata navandumbwetu.’ Ngocho tweji kufwilanga kushikama navandumbwetu.”

Enu visemi, nge vana venu chinakuvakaluhwila kwijilila kuchikungulwilo munalukila, kaha lombelenu navo hamwe haukalu kana. Vakafwenu vawane masepa vavahya hakunonekangako lwola lwakulihizumuna nakulitunga kushipilitu navandumbwenu muchikungulwilo munalukila.

Vyuma muka mwatela kulinga mangana mukafwe vandumbwenu vaze vananungulukila kuchikungulwilo chenu? Fwilenu kulikata navo chikuma. Chuma nachimikafwa kulinga ngocho shina kushinganyeka havyuma namusaka vakwenu vamilingile nge yenu mwanungulukilanga kuchikungulwilo chavo. (Mateu 7:12) Shikaho munahase kuvasanyika kuKulemesa Kalunga mwaTanga, chipwe hakutala vihande vyaha JW Broadcasting. Munahase nawa kuvalweza mukazachile hamwe mumulimo wakwambulula. Kaha nawa nge namuvasanyikilako vyakulya chinahase kuvalingisa vakamyanukenga lika halikoji lyenu. Vyuma vyeka muka mwatela kuvalingila?

Carlos ambile ngwenyi: “Omu twalukilile kuchikungulwilo cheka, ndumbwetu wapwevo atulwezele vitanda muze veji kulanjisanga vyuma handando yayindende. Echi chatukafwile chikuma.” Vandumbwetu vaze vafuma kuvihela vituta chipwe vizuma, munahase kuvalweza uvwalo vatela kuvwala kweseka najingonde jakungalila yenu. Munahase nawa kuvalweza mijimbu yamulifuchi lyenu chipwe kwitava chatwama mungalila yenu mangana chivakafwe kwambulula kanawa.

Allen uze twavulukanga kumaputukilo achihande chino, ambile ngwenyi: “Hakavanga changukaluhwililenga kulitachikiza navandumbwami. Oloze oholyapwa jino ngwapwa nguwakuwahilila mwomwo vapwa nge hivausoko wami.” Allen amwene jino ngwenyi kunungulukila kuchikungulwilo cheka kachamulingishile ajimbalise masepa jenyiko oloze chamulingishile atunge masepa veka vavahya.