1. Kwimba cheji kutulingisa tulinge yika?

MUTU umwe uze aya fuma mukusoneka myaso ambile ngwenyi: “Mazu mwahanjika mutu nawamilingisa mushinganyeke, kaha kwivwilila kumwaso cheji kwivwisanga kuwaha, oloze nge namwimba mwaso, kaha naumiheta kumuchima.” Shikaho, nge natwimba myaso yakwalisa Kalunga, nachilingisa mazu atuhete kumuchima nakutulingisa twalise Setu wamwilu Yehova. Ngocho kwimba chapwa chachilemu mukulemesa chamuchano, numba twimba uka wetu chipwe navakwetu kuchikungulwilo.

2, 3. (a) Vatu vamwe veji kwivwanga ngachilihi kwimbila hamwe nachikungulwilo? (b) Vihula muka natushimutwila?

² Mweji kwivwanga ngachilihi kwimbila hamwe navandumbwenu muchikungulwilo? Kutala mweji kwivwanga sonyi tahi? Muvisemwa vimwe malunga veji kwivwanga sonyi kwimba mukachi kavatu. Muchima kanou unahase kulingisa chikungulwilo chosena chihone kwimbanga myaso, chikumanyi nge vaze veji kutwaminyinanga veji kwazananga mumilimo yeka halwola chikungulwilo chili nakwimba mwaso.—Samu 30:12.

³ Kachi nge twamona kwimba kupwa jila yimwe yakulemeselamo Kalunga, kaha katweshi kulovokanga halwola vakwetu vali nakwimba chipwe kuchelewa nakuwana jino vakwetu  vanembi lyehi mwasoko. Shikaho mutu himutu atela kulihulisa ngwenyi: ‘Kwimba myaso kukukunguluka ngwachimona ngachilihi? Nanguhonesa ngachilihi sonyi mangana ngwimbenganga nakuwahilila? Vyuma muka ngwatela kulinga mangana mazu amumwaso anguhete kumuchima?’

4, 5. VaIsalele vamwenenga ngachilihi kwimba hakulemesa Kalunga?

⁴ Vaka-kulemesa Yehova vakushishika vanazachisanga myaso hakumwalisa. Omu vaIsalele vazachililenga Yehova nakashishi, kwimba vachimwenenga kupwa chachilemu. Chakutalilaho, hakulongesa milimo yahatembele, Mwangana Ndavichi asakwile vaLevi 4,000 mangana vembenga myaso yakwalisa Kalunga. Hali vaze vaLevi hapwile malunga 288 “vaze vanangwile kwimbila Yehova myaso, vaze vapwile vakuluwa.”—Miji. 1, 23:5; 25:7.

⁵ Hakukunjika tembele kwapwilenga nakwimba myaso. Mujimbu wamba ngwawo: “Kahomu vaka-kwimba jineta, navaka-kwimba veka vapwile nakwalishila hamwe Yehova nakumusakwilila, omu chivumo chajineta, najingunga, navisaji vyeka chevwakanyine hakwalisa Yehova, . . . upahu waYehova wazalile muzuvo yaKalunga wamuchano.” Chuma kana chawahile chikuma ngocho vatu vavajikijishile.—Miji. 2, 5:13, 14; 7:6.

6. Lumbununenu omu vaLevi vembilenga halwola Nehemiya apwile nguvulu muYelusalema.

⁶ Omu Nehemiya atetekelele vaIsalele vakushishika mumulimo wakutungulula kembwe yaYelusalema, awahishile nawa vaLevi vembenga navinoma vyakwimbisa. Hakukunjika yize kembwe, vembile myaso yize yevwishile vatu kuwaha. Halwola kana, kwapwile “mazavu avali amanene avaka-kwimba myaso.” Awa mazavu aliwanyinyine kwakamwihi natembele kaha chivumo chevwakanyine nakwakusuku. (Nehe. 12:27, 28, 31, 38, 40, 43) Twafwelela ngwetu Yehova evwile kuwaha hakwivwa vatu jenyi navamulemesa namyaso.

7. Yesu asolwele ngachilihi nge kwimba chapwa chachilemu mukulemesa chamuchano?

⁷ Omu chikungulwilo chavaka-Kulishitu chaputukile, kwimba myaso chapwilenga lika chachilemu mukulemesa chamuchano. Shikaho, kwapwile nakwimba myaso haufuku waulemu chikuma omu Yesu alingile chilika chaKulya chaMwata chaChingoloshi.—Tangenu Mateu 26:30.

8. Vaka-Kulishitu vamulikulukaji lyamyaka lyakulivanga vatuhana ngachilihi chakutalilaho hakwimba myaso yakulemesa Kalunga?

⁸ Vaka-Kulishitu vamulikulukaji lyamyaka lyakulivanga vatuhana chakutalilaho chakwimbilanga hamwe myaso yakwalisa Kalunga. Numba tuhu valikungulwililenga mumazavu amandende, oloze echi kachavalingishile vahone kwimbila Yehovako. Kaposetolo Paulu alweze vandumbwenyi ngwenyi: “Linangulenunga lika navakwenu nakulikolezezanga najisamu, namyaso yakwalisa Kalunga, namyaso yakushipilitu yakwimba nakusakwilila, nakwimbanga myaso mumichima yenu kuli Yehova.” (Kolo. 3:16) Myaso yili mumukanda wetu wamyaso yapwa chikupu “myaso yakushipilitu yakwimba nakusakwilila.” Nayikiko yapwa kulya chakushipilitu chize veji kutuhananga kuli “ndungo wakushishika wakuzangama.”—Mateu 24:45.

9. (a) Chuma muka chinahase kulingisa vandumbwetu vamwe vahone kwimba nakuwahilila hakukunguluka chetu? (b) Twatela kwimba ngachilihi, kaha veya vatela kuhana chakutalilaho chamwaza? (Talenu muvwimbimbi wakulivanga.)

⁹ Namulinga ngachilihi nge mutanga yenu chipwe muchisemwa chenu chipwe mungalila yenu kavamona kwimba kupwa chachilemuko?  Hakuwana nge makumbi ano kaye kanakuzovoloka, ngocho munahase kwivwilila kuli vakuluwa vaka-kwimba. Chipwe ngocho, munahase kwivwa kupihya chipwe sonyi nge namwesekesa lizu lyenu kuli vaze vakuluwa vamukaye. Chuma kana kachatela kumihonesa kwimba myaso yakwalisa Yehovako. Shikaho mwatela kukwachila mukanda wenu wamyaso helu, nakwandula mutwe helu nakwimba namuchima wenu wosena. (Ezela 3:11; tangenu Samu 147:1.) Makumbi ano, mujiZuvo jaWangana jajivulu, myaso veji kuyisololanga hamakina nakukafwa vatu vembenga kanawa. Kaha nawa chinapu hikutokwa mwomwo muShikola yaMulimo yaWangana yavakulwane makumbi ano muli jino nakwimbanga myaso. Echi chili nakukolezeza vakulwane mangana vahanenga chakutalilaho chamwaza hakwimba myaso hakukunguluka.

10. Vyuma muka twatela kwanuka nge tweji kwivwanga sonyi kwimba?

¹⁰ Chuma chimwe cheji kulingisanga vandumbwetu vamwe vembile kumiliu shina sonyi. Vanahase kwivwa sonyi kwimbila helu kuchina ngwavo navavaseha mwomwo yalitangu. Oloze twatela kwanuka ngwetu, “tuvosena tweji kuhukananga kakavulu” muhanjikiso. (Yako. 3:2) Chipwe ngocho katweshi kulitwamina kuhanjikako. Shikaho katwatela kulitwamina kwimba nakwalisa Yehova mwomwo ngwetu lizu lyetu lyalitanguko.

11, 12. Vyuma muka navitukafwa mangana twimbenganga kanawa?

¹¹ Lwola lumwe tunahase kwivwa sonyi kwimba mwomwo katwejiva mwakwimbilako. Oloze tunahase kulinangula mwakwimbila hakukavangiza jindongi jamwakwimbila. *

¹² Munahase kulinangula mwakwimbila nalizu lyangolo lyakutamo hakuhwimanga kanawa. Nganomu kakahya kakezi keji kulingisanga linongo limunyike kanawa, mukiko nakuhwima nawa cheji kulingisanga mutu ahanjike  chipwe kwimba nalizu lyangolo. Mwatela kwimba nakutambakana kuhambakana haseteko yize mweji kuhanjikanga. (Talenu mukanda waNganyalenu Kukunangula chaShikola yaMulimo waTeokalasi, mafwo 181 nakuheta ku 184, hakamutwe kakandende kakwamba ngwavo, “Eseka Kuhwima Kanawa.”) Shimbu jimwe Visoneka vyeji kukolezezanga vaka-kulemesa Yehova ‘vatwenga jingunda’ nakwimba myaso yakwalisa Yehova.—Samu 33:1-3.

13. Lumbununenu omu tunahase kwimba kanawa.

¹³ Halwola lwakulemesa Kalunga mwatanga, chipwe hauka wenu esekenu kukavangiza vyuma vino: Sakulenu mwaso uze mwazanga chikuma. Tangilenu helu mazu amumwaso kana nalizu lyangolo. Kufumaho, tangenu mazu amumukuku chakuhona kuhwimina hakachi. Kaha imbenu mukuku wosena nalizu lyangolo lyakutambakana kanawa. (Isa. 24:14) Ngocho lizu lyenu nalivwakanyina helu. Oloze kamwatela kwivwa sonyi nge lizu lyenu linatambakanako, twalenuho kaha kwimba.

14. (a) Uno kwasama chikuma mukanwa nachitukafwa ngachilihi nge tuli nakwimba? (Talenu lipwata lyakwamba ngwavo, “ Vyuma Navimikafwa Mwimbenga Kanawa.”) (b) Vyuma muka mwatela kukavangiza mangana mwimbenga kanawa?

¹⁴ Hakusaka mwimbenga kanawa, mwatela nawa kwasama chikuma mukanwa kuhambakana muze mweji kulinganga nge munakuhanjika. Namulinga ngachilihi nge mweji kwimbilanga mwishi, chipwe nge mukwechi lizu lyakutezuka chikuma? Munahase kuwana vyuma vyakumikafwa mumukanda waNganyalenu Kukunangula chaShikola yaMulimo waTeokalasi lifwo 184 mulipwata lyakwamba ngwavo, “Mwakuhonesela Ukalu Umwe.”

15. (a) Vyuma muka vavilikile kukuliwana chapwileko mu 2016? (b) Mwomwo ika vanalowela mukanda wamyaso wauhya?

¹⁵ Mu 2016, kukuliwana chize cheji kupwangako mwaka himwaka muliuka lyetu, ndumbwetu Stephen Lett wamuLizavu Lyakutwaminyina avilikile ngwenyi, natuputuka  kuzachisa mukanda wamyaso wauhya wakwamba ngwavo, ‘Imbilenu Yehova Nakuwahilila.’ Ndumbwetu Lett alumbunwine ngwenyi tunalovola mwaso kana mangana ulitombole naMbimbiliya yaVisoneka vyaKaye Kakahya yize vasononwene. Vanafumisamo mazu aze kaweshi muMbimbiliya kaneyi vasononweneko. Kaha nawa vanahakilako myaso yize yahanjika hamulimo wetu wakwambulula nayize yasolola kusakwilila chetu handando yakusokola. Hakuwana nge kwimba chapwa chachilemu mukulemesa Kalunga, ngocho Lizavu Lyakutwaminyina linalovola mukanda uze ukwechi lipapilo lyahelu lyakulifwana nalize lyaMbimbiliya yaKaye Kakahya.

16, 17. Vyuma muka vanalumunako mumukanda wamyaso wauhya?

¹⁶ Ou mukanda wamyaso wauhya uli nachinyikilo chavihande mangana chikafwe vandumbwetu kuwana washi myaso. Chakutalilaho, myaso 12 yakulivanga yahanjika hali Yehova, kaha yinakavangizaho 8 yahanjika hali Yesu nandando yakusokola. Echi chinyikilo chavihande nachikafwa nawa vandumbwetu hakusakula mwaso uze unalite nachihande chalikungumbuwa.

¹⁷ Hakusaka kukafwa vatu vosena vembenga kanawa namuchima wavo wosena, mazu amwe vanawalumuna mangana ulumbunwiso wivwakane kanawa, kaha nawa vanafumisamo mazu aze vatu kaveshi nakuzachisa chikuma makumbi anoko. Chakutalilaho, mwaso wakwamba ngwavo “Kupwanga Vakwononoka” vanawalumuna jino ngwavo “Kupwanga Vakushishika,” kaha mazu amumwaso kana nawakiko vanawalumunako. Mwaso wakwamba ngwavo, “Lamenunga Muchima Wenu” vanawalumuna ngwavo, “Tulamenunga Michima Yetu.” Mwomwo ika? Mwomwo hakavanga hakwimba mwaso kana chapwile kwijiva nge tuli nakulweza vakwetu vyakulinga. Ngocho vatu vavahya vaze veji kwizanga kukukunguluka chetu hamwe kaha navandumbwetu vamapwevo navanyike chavakaluhwililenga kukasunuka kwimba mwaso kana. Shikaho mutwe wamwaso namazu awo vanawalumuna.

18. Mwomwo ika twatela kwijiva myaso yili mumukanda wetu wauhya? (Talenu kwinyikila chamwishi.)

¹⁸ Myaso yayivulu mumukanda ‘[wa]Imbilenu Yehova Nakuwahilila’ vanayisoneka mujila yize yinasolola nge mutu ali nakulomba kuli Kalunga. Ngocho hakuyimba nachisolola nge munakuhanjika vili kumuchima wenu kuli Yehova. Myaso yeka nayimikafwa ‘mukolezeze vakwenu nakuvasolwela zangi navilinga vyamwenemwene.’ (Hepe. 10:24) Shikaho twatela kuzata nangolo mangana twijive mazu amumyaso nakukavangiza kanawa mwakwimbila myaso kana. Munahase kulinangula kwimba hakwivwilila kumyaso yamazu yili ha jw.org. Nge namuhitulukilanga chimweza mumyaso kuzuvo, kaha nachimyashiwila kwimba namuchima wenu wosena. *

19. Vatu vosena muchikungulwilo vanahase kulemesa ngachilihi Yehova?

¹⁹ Anukenu ngwenu kwimba chapwa chachilemu mukulemesa chamuchano. Cheji kusololanga zangi twazanga Yehova nakumusakwilila. (Tangenu Isaya 12:5.) Nge namwimba nakuwahilila, kaha namukolezeza navakwenu vembenga nakuwahilila. Tuvosena muchikungulwilo, vanyike, navakulwane navaze vakuwahilila, twatela kwimbila hamwe mangana twalise Yehova. Shikaho kanda kwivwa sonyi kwimbako. Oloze kavangizenu mazu ahanjikile muka-kwimba jisamu ngwenyi: “Imbilenu Yehova.” Eyo twatela kwimba nakuwahilila.—Samu 96:1.