1, 2. (a) Yesu amwenenga ngachilihi Jishimbi jaKalunga? (b) Vyuma muka vyasolola nge vaka-kusoneka navaFwaliseu vahonene kukavangiza kanawa Jishimbi?

YESU azangile Jishimbi jaMose, mwomwo jafumine kuli Ise Yehova. Ngocho mukanda waSamu 40:8 wahanjikile chimweza hali Yesu ngwawo mwakazanga jishimbi jaKalunga. Wamba ngwavo: “Ove Kalunga kami, ngwasaka kulinga mwaya muchima wove, jishimbi jove jili mumuchima wami.” Vilinga vyaYesu navyuma ahanjikilenga vyasolwele nge amwene Jishimbi jaKalunga kupwa jakukupuka, janganyo, kaha nawa jeji kutesangamo.—Mateu 5:17-19.

² Yesu evwile kupihya chikuma hakumona vaka-kusoneka navaFwaliseu vanakuhona kukavangiza kanawa Jishimbi jaIse. Avambile ngwenyi: “Mweji kuhananga chakusokesa mulikumi chalwenyi, namuseki, nakumine,” kulumbununa nge vakavangijilenga tujishimbi twatundende twosena. Uno kulinga ngocho chapihililile halihi? Yesu ambile cheka ngwenyi: “Oloze munaleununa vyuma vyavilemu kuJishimbi, vikiko vene chiyulo chakwoloka nakutetela nakushishika.” (Mateu 23:23) Yesu kapwile ngana mwavaka-kusoneka navaFwaliseu vaze valimwenenga kupwa vakwolokako, oloze ikiye ejivile ovyo  Kalunga ahakilileko Jishimbi, nomu vilinga vyaYehova vavisolola muJishimbi kana.

3. Vyuma muka natushimutwila muchihande chino?

³ Etu vaka-Kulishitu twakasunuka lyehi kuJishimbi. (Loma 7:6) Chipwe ngocho, Yehova alama Jishimbi kana muMazu enyi Mbimbiliya. Kasaka tukavangizenga Jishimbi kana munona munonako, oloze asaka tukavangize “vyuma vyavilemu,” kulumbununa jindongi jize jazama haJishimbi kana. Chakutalilaho, jindongi muka natulinangula hakuhakako jize jinganda jakuswamamo? Chihande chinafumuho chinatunangula vishina vyavilemu kuvyuma alingile mutu uze ajihile mukwavo chakuhona kuchisakula kumuchima wenyi. Muchihande chino natulinangula omwo apwa Yehova nomu tunahase kulondezeza vilinga vyenyi. Kaha nawa natukumbulula vihula vino vitatu: Uno jinganda jakuswamamo jasolola ngachilihi nge Yehova atwama nakeke? Jatukafwa tumone ngachilihi kuyoya nganomu achimona Yehova? Uno jasolola ngachilihi chiyulo chenyi chakwoloka? Kahomu namukekesa vihula kana, fwilenu kuwana jijila jakulondezezelamo Senu wamwilu.—Tangenu Wavaka-Efwesu 5:1.

4, 5. (a) Vyuma muka vyakafwile vatu vawane washi jinganda jakuswamamo? (b) Kaha echi chatunangula ika hali Yehova?

⁴ Jize jinganda 6 jakuswamamo japwile jajashi kuchinyinako. Yehova alwezele vaIsalele vasakule jinganda jitatu musali yaKalwiji Yotau, kaha jitatu musali yikwavo. Mwomwo ika? Mangana chipwenga chachashi kuli mutu kujiwana nakuswamamo. (Kula. 35:11-14) Jijila jakuya kujinganda kana vajiwahishilenga kanawa. (Lushi. 19:3) Kweseka nachisemwa chavaYuleya, vahakilenga tutachikijilo mujijila jakuya kujinganda kana kuchina mutu uze najihi mukwavo mwajimbala. Echi chakafwilenga uze mutu ahone kuya kuchihela chaungeji kuze pamo nahase kukaputuka kulemesa tulunga vamakuli.

⁵ Achishinganyekenu hachuma kanechi: Yehova uze ahakileko lushimbi lwakuzangamisa mutu mwajiha mukwavo chakuchisakula kumuchima, ikiye nawa ahakileko lushimbi lwakwivwila keke mutu uze mwajiha mukwavo chakuhona kuchisakula kumuchima. Mutu umwe alinangula chikuma vyaMbimbiliya asonekele ngwenyi: “Vyuma vyosena vaviwahishile kanawa mujila yayashi. Echi chasolwele nge Kalunga apwa wakeke.” Yehova kapwa nge chambamilonga wakuhona keke uze asaka kuzangamisa vatuko. Oloze apwa “muka-kutetela chikuma.”—Efwe. 2:4.

6. Muchima wavaFwaliseu walihandunwine ngachilihi namuchima waKalunga wakeke?

⁶ VaFwaliseu kavevwilililenga vatu kekeko. Chakutalilaho, nge mutu navulumuna mulonga woumwe kuhambakana mapapa katatu kavamukonekelelengako. Yesu asolwele muchima wavo hakuvalweza chifwanyisa chakaFwaliseu  uze apwile nakulomba kwakamwihi namuka-kutambula mitelo. Uze kaFwaliseu alombele ngwenyi: “Ove Kalunga, ngunakusakwilila, ami kangwapwa ngana mwavatu vekako. Kangwapwa ngana mwavaka-kulyapula, vaka-kuhenga, vaka-ukoji, chipwe vene ngana mwayou muka-kutambula miteloko.” Mwomwo ika vaFwaliseu vahonenenga kwivwila vatu keke? Mbimbiliya yamba ngwayo “vamwenenga vakwavo kupwa vamokomoko.”—Luka 18:9-14.

7, 8. (a) Uno namulondezeza ngachilihi Yehova kachi nge mutu namilingi mwamupi? (b) Mwomwo ika kulinyisa chasakiwila numba tuhase kukonekela vakwetu?

⁷ Londezezenunga Yehova keshi vaFwaliseuko. Sololenunga muchima wakutetela. (Tangenu Wavaka-Kolose 3:13.) Munahase kusolola muchima kana hakupwa vavashi kuhanjikisa mangana vakwenu vachiwane kupwa chachashi kwiza kuli yenu valikonekele. (Luka 17:3, 4) Shikaho lihulisenu ngwenu: ‘Uno ngweji kukonekelanga vakwetu numba tuhu vanangulingi mwamupi mapapa kakavulu tahi? Kutala ngwafwila kutwama mukuunda namutu uze nangulingi mwamupi tahi?’

⁸ Twatela kupwa vakulinyisa numba tukonekele vakwetu. VaFwaliseu kavapwile vakulinyisako mwomwo vamwenenga vakwavo kupwa vamokomoko. Oloze etu vaka-Kulishitu twatela ‘kumona vakwetu ngwetu vatuhambakana’ nakufwila kuvakonekela. (Fwili. 2:3) Kutala namulondezeza Yehova nakupwa vakulinyisa tahi? Sololenu ngwenu mwafwila kukonekela vakwenu mangana vachiwane kupwa chachashi kwiza kuli yenu muvakonekele. Anguhwenunga kusolwela vakwenu keke nakushipwokela kukwata utenu.—Kwambu. 7:8, 9.

9. Yehova akafwile ngachilihi vaIsalele vamone ngwavo kuyoya chapwa chachilemu?

⁹ Chuma chachilemu vahakilileko jinganda jakuswamamo shina kukinga vaIsalele kumulonga wamanyinga. (Lushi. 19:10) Yehova amona kuyoya kupwa chachilemu, ngocho ahunga “mavoko akumwanga manyinga amutu wakuzeneka mulonga.” (Vishi. 6:16, 17) Hakupwa Kalunga wajila kaha nawa wachiyulo, kahumbwile namulonga wamutu uze mwajiha mukwavo chakuhona kuchisakula kumuchimako. Ngocho mutu uze ajihile mukwavo chakuhona kuchisakula kumuchima vamwivwililile keke. Oloze atelelele kutwala chihande chenyi kuvakulwane vakachisope. Kaha nge vawanyine ngwavo mulonga avulumwine kawapwile wakujina mumuchima wenyiko, vamulwezele atwamenga lika munganda yakuswamamo palanga noho mwakafwila kapilishitu wakulitulaho. Vamwe vatwaminenga kuze mukuyoya chavo chosena. Vyuma kanevi vyalingishile vaIsalele vosena vamone kuyoya kupwa chachilemu. Ngocho vatelelele kulihenda kukala vyuma vize navihaka kuyoya muponde, mangana vasolole nge vavumbika Muka-kuhana Kuyoya.

10. Kweseka namazu ahanjikile Yesu, vaka-kusoneka navaFwaliseu vasolwele ngachilihi nge kavamwene kuyoya kupwa chachilemuko?

¹⁰ Vaka-kusoneka navaFwaliseu kavamwene kuyoya nganomu achimwene Yehovako. Tunejiva ngachilihi? Yesu avalwezele ngwenyi:  “Mwafumishileko sapi yachinyingi. Enu vavene kamwengililemoko, kaha nawa vaze vasakile kwingilamo mwavajikililile.” (Luka 11:52) Vatelelele kukafwa vatu vatachikize Mazu aKalunga mangana vakahase kuyoya haya myaka yosena. Oloze vahungumwishile vatu vahone kutachikiza Yesu uze apwa “Twamina Wamunene wakuyoya,” nakuvalingisa jino vakanonge. (Vili. 3:15) Vaka-kusoneka navaFwaliseu vapwile vakulivwimba nakulizanga vavene, ngocho kavazakaminenga kuyoya chavakwavoko. Ou wapwile hiukenya chikupu!

11. (a) Kaposetolo Paulu asolwele ngachilihi nge amwene kuyoya nganomu achimona Kalunga? (b) Ika nayitukafwa tuzange mulimo wakwambulula nganomu auzangile Paulu?

¹¹ Natulondezeza ngachilihi Yehova nakulihenda kumuchima wavaka-kusoneka navaFwaliseu? Twatela kumona kuyoya kupwa chachilemu. Kaposetolo Paulu alingile ngocho hakwambulula mujimbu natwima. Shikaho ambile ngwenyi: “Ngunatomo lyehi kumanyinga avatu vosena.” (Tangenu Vilinga 20:26, 27.) Paulu kambulwile mujimbu mwomwo ngwenyi navamuhana mulonga kuli Kalungako. Oloze alingile ngocho mwomwo azangile vatu nakumona kuyoya chavo kupwa chachilemu. (Koli. 1, 9:19-23) Shikaho, nayetu nawa twatela kumona kuyoya nganomu achimona Yehova. Mwomwo ikiye “azanga vosena vapihilile nakwalumuka.” (Petu. 2, 3:9) Uno mukiko mwasaka nayenu tahi? Nge namupwa namuchima wakeke, kaha nachimilingisa muzate chikuma mumulimo wamuwande nakupwa vakuwahilila.

12. Mwomwo ika vatu jaKalunga vatela kulikinga kuponde?

¹² Twamona nawa kuyoya nganomu achimona Yehova hakulikinga kuponde. Twatela kulikinga kuponde hakutambukisa kanawa minyau nakuzata kanawa milimo yetu, nahalwola natuwahisanga chipwe kutunga vihela vyakulemesela Kalunga. Twatela kumona kuyoya kupwa chachilemu kuhambakana jimbongo chipwe kulahila lwola. Kalunga ketu wachiyulo eji kulinganga vyuma mukwoloka shimbu yosena. Ngocho twatela kumulondezeza. Vakulwane muchikungulwilo vatela kumona kuyoya chavo nechi chavakwavo kupwa chachilemu. (Vishi. 22:3) Shikaho, nge mukulwane mwamyanukisa mulikinge kuponde, kaha mwatela kwivwilila vyuma mwamilweza. (Ngale. 6:1) Monenunga kuyoya nganomu achimona Yehova, kaha “kamweshi kukapwa namulonga wamanyingako.”

13, 14. Vakulwane muIsalele valondezezele ngachilihi chiyulo chaYehova chakwoloka?

¹³ Yehova alwezele vakulwane muIsalele valondezeze chiyulo chenyi chakwoloka. Vatelelele chatete kuwana unjiho wakutamo shimbu kanda vavatule chihande. Kufumaho vatelelele kukekesa vyuma vyalingishile mutu kana numba ajihe mukwavo, nakutala havilinga vyenyi. Hakusaka vayule mwakwoloka, vatelelele kukekesa numba nge ajihile mukwavo “mwomwo yachijindo” chipwe “mwomwo yakole.” (Tangenu Kulava 35:20-24.) Vatelelele nawa kuhulisa vinjiho vavali vamone numba nge mutu kana ajihile mukwavo mwomwo yakuchisakula kumuchima wenyi chipwe nduma.—Kula. 35:30.

¹⁴ Nge vanawane lyehi unjiho, vakulwane vatelelele kutala jino hamuchima wauze mutu keshi hamulonga nalingi kahako. Vatelelele kupwa vakunangakana numba vavatule kanawa chihande kana. Kaha nawa vatelelele kupendamina hashipilitu yajila yaYehova yivakafwe vapwenga vakunangakana nakuyula chihande mujila yakeke nachiyulo.—Kulo. 34:6, 7.

15. Yesu navaFwaliseu vamwenenga ngachilihi vaka-shili? Lumbununenu.

¹⁵ VaFwaliseu vatalilenga kaha hashili alingile mutu keshi hamuchima wenyiko. Omu vaFwaliseu vamwene Yesu ali nakulya vyakulya muzuvo yaMateu, vahulishile tumbaji twenyi ngwavo: “Mwomwo ika ou muka-kuminangula eji kulilanga hamwe navaka-kutambula mitelo navaka-shili?” Yesu avakumbulwile ngwenyi: “Vatu vavakangule kaveshi kusakiwa chimbukeko, kuvanga vaka-kuviza kaha. Ngocho yenunga  mukalinangule mwalumbunukila mazu awa: ‘Ami ngunasake keke keshi vimuna vakuvatulako.’ Mwomwo ami kangwejile nakusanyika vaka-kwolokako, oloze shina vaka-shili.” (Mateu 9:9-13) Uno echi chalumbunwine nge Yesu apwile nakuhakwila vaka-shili tahi? Nduma. Mwomwo Yesu asakilenga vaka-shili vapihilile nakwalumuka. (Mateu 4:17) Yesu atachikijile ngwenyi vatu vamwe hali vaze “vaka-kutambula mitelo navaka-shili” vanakusaka kwalumuka. Vatu kana kavejile kuzuvo yaMateu nakulya kahako, oloze ‘vapwile nakukavangiza Yesu.’ (Mako 2:15) Chaluvinda, vaFwaliseu vavavulu kavatachikijile chuma kanako. Numba tuhu valitukwojwelenga ngwavo valemeselenga Kalunga, oloze kavapwile ngana mwaKalunga wakekeko, mwomwo vamwenenga vakwavo kupwa vaka-shili, kaha nawa vamokomoko.

16. Vakulwane vaze navasopa chihande vatela kukekesa havyuma muka?

¹⁶ Makumbi ano, vakulwane vatela kulondezeza Yehova uze “azanga chiyulo.” (Samu 37:28) Chatete, vatela kukekesa chihande ‘nakuchihehwojola kanawa’ vamone chikupu nge mutu kana navulumuna mulonga. Nge vanawane unjiho wamuchano, kaha vatela kusopa chihande kana kweseka najindongi jamuVisoneka. (Lushi. 13:12-14) Vakulwane vaze navasopa chihande vatela kumona nge mutu kana napihilila nakwalumuka nyi chiku. Chapwa chachikalu kutachikiza numba nge mutu nalingi ngocho. Hakusaka mumone nge mutu napihilila nakwalumuka namumona omu mwevwa havyuma nalingi navyuma vili kumuchima wenyi. (Kuso. 3:3) Ngocho hakusaka Kalunga amwivwile keke, atela kupihilila nakwalumuka. *

17, 18. Vakulwane navatachikiza ngachilihi ngwavo mutu napihilila nakwalumuka? (Talenu muvwimbimbi wakulivanga.)

¹⁷ Vakulwane muchikungulwilo kaveshi kuhasa kutachikiza vili mumuchima wamutu ngana muze chapwa kuli Yehova naYesuko. Nge mwapwa muvakulwane, kaha vyuma muka navimikafwa mwijive ngwenu mutu napihilila chikupu nakwalumuka? Chatete, lombenu Kalunga amihane mangana nakunangakana. (Vamya. 1, 3:9) Chamuchivali, kekesenu Mazu aKalunga namikanda yakufuma kuli ndungo wakushishika mangana vimikafwe mutachikize chihandwa chatwama ‘hakulinyenga chakukaye,’ ‘nakulinyenga mujila yakwivwisa Kalunga kuwaha’ chize nachimikafwa mumone ngwenu mutu napihilila nakwalumuka. (Koli. 2, 7:10, 11) Monenu omu Visoneka vyasolola kupihilila nakwalumuka chamuchano nechi chamakuli. Uno Mbimbiliya yasolola ngachilihi vilinga namuchima wamutu kana?

¹⁸ Chamuchitatu, tachikizenu omu apwa mutu kana. Shinganyekenu havilinga vyenyi namuchima atwama nawo. Mbimbiliya yahanjika hali Yesu uze apwa mutwe wachikungulwilo, ngwayo: “Mwakayulanga mwakwoloka vihande vyavaka-kukalikiza, mwakahanjikila vatu mukusungama mangana vatu vavavwovu vahamavu vakatokwelemo.” (Isa. 11:3, 4) Hakuwana nge enu vakulwane mwapwa tufunga vali mwishi yakafunga wamunene Yesu, shikaho mwamikafwa muyule mujila yakwoloka ngana muze eji kulinganga ikiye. (Mateu 18:18-20) Twawahilila chikuma hakupwa natufunga vaze vafwila kutukafwa. Ngocho tweji kuvasakwililanga hakeke yavo veji kusololanga muchikungulwilo.

19. Vishina muka vyakupandama kujinganda jakuswamamo vize munakufwila kuzachisa?

¹⁹ Jishimbi vahanyine Mose jasolwele “mwaya chinyingi namwaya muchano” waYehova najindongi jenyi jakwoloka. (Loma 2:20) Chakutalilaho, jinganda jakuswamamo janangula vakulwane omu vanahase kuyula “mwaya chiyulo chakwoloka,” kaha nawa jatunangula tuvosena omu tunahase kulinga ‘mwalikoji kuli vakwetu nakuvatetela.’ (Zeka. 7:9) Numba tuhu etu katwatwama muJishimbi jaMoseko, oloze Yehova kalumukako, kaha namakumbi ano amona keke nachiyulo kupwa vyavilemu. Shikaho chapwa hikutokwa kulemesa Kalunga kanou. Tufwilenu kulondezeza vilinga vyenyi mangana atukinge.