1, 2. (a) Uno Yesu akumbulwile ngachilihi Petulu omu amulwezele ngwenyi alitetele? (Talenu muvwimbimbi wakulivanga.) (b) Mwomwo ika Yesu akumbulwile mujila kana?

MAZU ahanjikile Yesu akomwesele tumbaji twenyi. Vashinganyekele ngwavo Yesu mwakindulwishila vaIsalele wangana, oloze valikomokelele hakwivwa mwavalwezele ngwenyi kalinwomu vamuyanjise nakumujiha. Kaposetolo Petulu alwezele Yesu ngwenyi: “Litetele ove Mwata. Vyuma kana kavyeshi kukakusolokelako.” Yesu hakwivwa ngocho, amulweza ngwenyi: “Ove Satana, hita kunyima yami! Unapu uchimbunji chakunguhukanyisa, mwomwo ove kawashinganyeka mwaya vishinganyeka vyaKalungako, oloze mwaya vishinganyeka vyavatu.”—Mateu 16:21-23; Vili. 1:6.

² Mazu ahanjikile Yesu asolola chihandwa chatwama havishinganyeka vyaKalunga navyevi vyamukaye kaSatana. (Yowa. 1, 5:19) Mazu ahanjikile Petulu asolola muchima vatwama nawo vaka-kaye wakuhona kulisuula. Yesu atachikijile ngwenyi vishinganyeka kana vyalihandunwine navishinganyeka vyaKalunga. Atachikijile nawa ngwenyi Ise asakile apwenga wakulizanga kuyanda nakufwa. Shikaho jila yize Yesu akumbulwililemo Petulu yasolola nge akanyine vishinganyeka vyakukaye nakuhakwila vishinganyeka vyaYehova.

3. Mwomwo ika chapwila chachikalu kulihenda kuvishinganyeka vyavaka-kaye?

 ³ Nyi ngachilihi etu? Kutala tukwechi vishinganyeka vyaKalunga nyi vyakukaye? Chikupu vene, tunalumuna vilinga vyetu kweseka nomu asaka Kalunga. Nyi ngachilihi vishinganyeka vyetu? Kutala mweji kukavangizanga vishinganyeka vyaYehova tahi? Kulinga chuma kana chasakiwa kukilikita nangolo. Oloze kukavangiza vishinganyeka vyavaka-kaye kachasakiwa kukilikita nangoloko mwomwo tuli nakuyoya navatu vaze vatwama nashipilitu yakaye. (Efwe. 2:2) Kaha nawa vishinganyeka vyavaka-kaye vyeji kutulingisanga tufwile kulinganyalisa kaha etu vavene. Chikupu vene, kukavangiza vishinganyeka vyaYehova kachapwa chachashiko, oloze kukavangiza vishinganyeka vyavaka-kaye chapwa chachashi.

4. (a) Vyuma muka navisoloka nge natwitavisa kaye kalumune vishinganyeka vyetu? (b) Chino chihande nachitukafwa ngachilihi?

⁴ Nge natwitavila kaye katwalumune, kaha tunahase kuputuka kufwila kulinga vyuma vyavipi. (Mako 7:21, 22) Shikaho twatela kuzata nangolo mangana tupwenga ‘navishinganyeka vyaKalunga’ keshi nge ‘vyavatuko.’ Muchihande chino natushimutwila ovyo chapwila chachilemu kumona vyuma nganomu avimona Yehova nomwo tunahase kunganyala hakulinga ngocho. Nachitukafwa nawa tutachikize vyuma twatela kulinga mangana katwamino kamyaka yino kahone kutwalumuna. Kaha chihande nachikavangizaho nachishimutwila hajijila tunahase kusolwelamo ngwetu tuli nakukavangiza vishinganyeka vyaYehova.

5. Mwomwo ika vatu vamwe veji kukanyinanga kuvalweza vyakulinga kuli vakwavo?

⁵ Vatu vamwe veji kukananga kuvakafwa kuli vakwavo mangana valumune vishinganyeka vyavo. Veji kwambanga ngwavo: “Ngunatachikiza ovyo nguli nakulinga.” Pamo veji kulumbununanga ngwavo kavasaka kuvasakwila vyakulingako. Kavasaka vakwavo vatu vavalweze vyakulinga chipwe kuvakafwa vapwenga ngana mwavatu vosenako. *

6. (a) Lisesa muka atuhana Yehova? (b) Kutala tukwechi lisesa lyakulinga kala vyuma tahi?

⁶ Chikupu vene, kupwa navishinganyeka vyaYehova kachalumbununa nge twatela kulitwamina kulinga vyuma vize tunasakeko. Chisoneka chaWavaka-Kolinde 2, 3:17 chamba ngwacho, “oku kuli shipilitu yaYehova kukiko vene kuli kulihehwa.” Shikaho twapwa vakulihehwa kulisakwila kulinga vyuma vize navitwivwisa kuwaha. Omu mukiko atutenga Yehova. Oloze kulihehwa chetu chatwama noho chakumina. (Tangenu WaPetulu 1, 2:16.) Yehova asaka tukavangizenga vishinganyeka vyenyi hakuhandununa vyuma vyakwoloka nevi vyakuhenga nganomu asolola Mazu enyi. Uno echi chili nakusolola nge kukavangiza vishinganyeka vyaYehova chapwa hichiteli tahi nyi hichuma chize chikwechi nganyo?

7, 8. Mwomwo ika kukavangiza vishinganyeka vyaYehova kachapwa hichiteliko? Hanenu chakutalilaho.

⁷ Tutalenu chakutalilaho chino. Visemi veji kukilikitanga hakunangula vana vavo vapwenga navilinga vyamwaza vyakufwana nge kupwa vakashishi, nakupwa vasamalikita, nakupwa namuchima wakuzakama vakwavo. Echi kacheshi nakulumbununa nge chapwa hichiteli kuli vana vavoko, oloze veji kuvakafwanga vakapwe nachiyoyelo chamwaza nge vanakolo, nakukahasa kulisakwila jino vavene vyakulinga. Kachi nge navakavangiza vyuma vize vali nakuvanangula visemi javo, kaha kaveshi kukasakula kulinga vyuma vize navikavalingisa vakaliveyeko.  Kulinga ngocho nachivalingisa vahone kupwa vakulizakamina.

⁸ Yehova asaka vana venyi vapwenga vakuwahilila mukuyoya ngana muze chisemi wazangi asaka vana venyi vayoyenga. (Isa. 48:17, 18) Shikaho eji kutuhananga jindongi jakutukafwa tupwenga navilinga vyamwaza namwakutwamina navakwetu. Atulweza nawa tushinganyekenga nganomu eji kushinganyekanga ikiye. Kulinga ngocho nachitukafwa tupwenga nauhashi wakushinganyeka kanawa . (Samu 92:5; Vishi. 2:1-5; Isa. 55:9) Cheji kutukafwanga nawa tusakulenga vyuma vize navitulingisa tuwahilile. (Samu 1:2, 3) Chikupu vene, kukavangizanga vishinganyeka vyaYehova chapwa changanyo.

9, 10. Mujila muka vishinganyeka vyaYehova vyapwila vyamwenemwene kuhambakana vyavaka-kaye?

⁹ Chuma chikwavo chalingisa vaka-kulemesa Yehova vafwile kukavangiza vishinganyeka vyaKalunga shina mwomwo vishinganyeka vyenyi vyapwa vyamwenemwene kuhambakana vyavaka-kaye. Mukaye mwatwama vatu vaze veji kunangulanga mwakupwila navilinga vyamwaza, namwakutwamina mutanga, namwakuzachila kanawa milimo navyuma vyeka vyamukuyoya. Oloze vyuma vyavivulu vize veji kunangulanga kavyalitombola navishinganyeka vyaYehovako. Chakutalilaho, veji kunangulanga vatu vapwenga vaka-kulitukwojola nakukundwiza vilinga vyavipi. Kaha nawa veji kulwezanga vaka-kulimbata ngwavo vanahase kupwa vakuwahilila kachi nge navalihandununa chipwe kulilukulula numba vene hamilonga yayindende. Vishinganyeka kana vyalimbalaka naMbimbiliya. Kutala makumbi ano tunahase kuwana kukafwa chamwenemwene kuhambakana chamuMbimbiliya tahi?

¹⁰ Yesu ambile ngwenyi: “Mangana eji kulijimbulanga kupwa akwoloka kumilimo yawo.” (Mateu 11:19) Numba tuhu vatu vanazovoloka muchinyingi chakutunga makina, oloze vanahono kukumisa ukalu uze weji kulingisanga vatu vahone kupwa vakuwahilila wakufwana nge jijita, nakulitala havikova navisemwa nauhwanga. Kaha nawa makina kana ali nakukundwizanga ujila. Chipwe ngocho, vatu vavavulu vanamono jino ngwavo ujila weji kulingisanga vatu valilukulule, nakuneha misongo naukalu weka. Vaka-Kulishitu vaze veji kumonanga vyuma nganomu avimona Kalunga, vakwechi jitanga jakuwahilila, nakupwa navilinga vitoma nakutwama nawa mukuunda navandumbwavo mukaye kosena. (Isa. 2:4; Vili. 10:34, 35; Koli. 1, 6:9-11) Kutala echi kacheshi nakusolola nge vishinganyeka vyaYehova vyapwa vyamwenemwene kuhambakana vyavaka-kayeko tahi?

11. Mose akavangijilenga vishinganyeka vyeya, kaha nganyo muka yafuminemo?

¹¹ Vaka-kulemesa Kalunga vakushikulu navakiko vamwenenga ngwavo vishinganyeka vyaYehova vyapwa vyamwenemwene. Chakutalilaho, numba tuhu Mose “vamunangwile mwayile mangana avaEjipitu osena,” oloze apendaminyinenga hali Kalunga “amuhane muchima wamangana.” (Vili. 7:22; Samu 90:12) Kaha nawa alombele kuli Yehova ngwenyi: “Ngulweze jijila jove.” (Kulo. 33:13) Echi chamukafwile ahase kuzata kanawa mulimo wenyi nakutesamo vyuma ajinyine Kalunga, ngocho Visoneka vyamuvuluka ngwavyo apwile mutu walufwelelo.—Hepe. 11:24-27.

12. Chuma muka chakafwile kaposetolo Paulu azate kanawa mulimo wakwambulula?

¹² Kaposetolo Paulu nawa apwile lunga wachinyingi uze alinangwile chikuma, kaha atachikijile kuhanjika chiHelase nachiHepeleu. (Vili. 5:34; 21:37, 39; 22:2, 3) Chipwe ngocho, kapendaminyinenga hamangana avatuko, oloze apendaminyinenga haVisoneka. (Tangenu Vilinga 17:2; Wavaka-Kolinde 1, 2:6, 7, 13.) Echi chamukafwile azate kanawa mulimo wakwambulula nakupwa nalutalililo lwakukatambula fweto.—Chimo. 2, 4:8.

13. Iya atela kutulweza tukavangizenga vishinganyeka vyaYehova?

 ¹³ Chikupu vene, vishinganyeka vyaKalunga vyapwa vyamwenemwene kuhambakana vyavaka-kaye. Shikaho nge natukavangizanga vishinganyeka kana, kaha natupwa vakuwahilila nakufukila mukuyoya chetu. Chipwe ngocho, Yehova katushinjila tukavangizenga vishinganyeka vyenyiko. Kaha nawa “ndungo wakushishika wakuzangama” natulama muvikungulwilo kaveshi kulinga ngochoko. (Mateu 24:45; Koli. 2, 1:24) Oloze vaka-Kulishitu vosena vatela kusakula vavene kukavangiza vishinganyeka vyaKalunga. Jino tunahase kulinga ngachilihi ngocho?

14, 15. (a) Chuma muka twatela kulinga mangana tupwenga navishinganyeka vyaKalunga? (b) Kweseka nachisoneka chaWavaka-Loma 12:2, mwomwo ika twatela kulihenda kuvishinganyeka vyavaka-kaye? Hanenu chakutalilaho.

¹⁴ Chisoneka chaWavaka-Loma 12:2 chatuhuhumuna ngwacho: “Kanda namwitavila katwamino kamyaka yino kamyalumuneko, oloze alumukenu hakulingisa vishinganyeka vyenu kupwa vyavihya, mangana mutachikize kanawa mwaya muchima waKalunga, ngwenu mwamwaza, mukiko vetavila, kaha mwakukupuka.” Awa mazu asolola nge tunahase kupwa navishinganyeka vyaKalunga chamokomoko nakala vishinganyeka twapwilenga navyo shimbu kanda tulinangule muchano. Shimbu jimwe vishinganyeka vyetu vyeji kwalumukanga mwomwo yavisemi jetu, chipwe mwomwo yavyuma twahichilemo kunyima. Chipwe ngocho, chapwa chachashi kwalumuna vishinganyeka vyetu. Shikaho kwalumuka kana chapendamina havyuma tweji kwivwililanga chikuma navize twasaka kushinganyeka kakavulu. Nge natuhunanananga havishinganyeka vyaYehova nakuvikavangiza, kaha natuputuka kumona vyuma nganomu avimona ikiye. Kaha nawa nachitukafwa tupwenga navishinganyeka vize navilitombola navishinganyeka vyenyi.

¹⁵ Tachikizenu ngwenu hakusaka tupwenga navishinganyeka vyaYehova, katwatela ‘kwitavila katwamino kamyaka yino katwalumuneko.’ Katwatela kukavangiza vishinganyeka vize vyalimbalaka navishinganyeka vyaKalungako. Chuma kana tunahase kuchifwanyisa kuvyakulya. Hakusaka mutu apwenga wakulikangula, atela kulya vyakulya vyamwaza vyakutunga mujimba. Oloze kachi nge mutu kana mwalya vyakulya vyamwaza oku nawa ali nakulya vyakulya vyamajilo, kaha kavyeshi kumunganyalisako. Chochimwe nawa nge natulinangula vishinganyeka vyaKalunga oku nawa tunakwivwilila kuvishinganyeka vyavaka-kaye, kaha tunahase kuhungumuka.

16. Chuma muka twatela kulihendako?

¹⁶ Kutala tunahase kuhonesa vishinganyeka vyavaka-kaye vyosena tahi? Nduma. Shimbu jimwe chinahase kupwa chachikalu mwomwo yakupwa hamwe navatu vakwechi vishinganyeka vyakukaye. (Koli. 1, 5:9, 10) Chakutalilaho, nge tuli muwande, tweji kuwananga vatu vaze vafwelela vyuma vyakuhenga. Chipwe ngocho katwatela kuvitavilako. Twatela kulondezezanga Yesu hakukana washiwashi vishinganyeka vize navikundwiza Satana. Kaha nawa tunahase kuhonesa vishinganyeka kana hakulihenda kukulikata navatu vavilinga vyavipi.—Tangenu Vishimo 4:23.

17. Vyuma muka twatela kulinga mangana tulikinge kuvishinganyeka vyakukaye?

¹⁷ Twatela kusakulanga kanawa masepa. Mbimbiliya yatuhuhumuna ngwayo nge natulikatanga navatu vaze kavalemesa Yehovako, kaha tunahase kukavangiza vishinganyeka vyavo. (Vishi. 13:20; Koli. 1, 15:12, 32, 33) Twatela nawa kusakulanga kanawa vyakuhemahema. Kulihenda kuvyakuhemahema vize vyakundwiza ulyanyi, naujila, nakunangula chakwamba  ngwavo vyuma vyalijilile vivene, nachitukinga kuvishinganyeka vize vyeji ‘kuzungisanga chinyingi chaKalunga.’—Koli. 2, 10:5.

18, 19. (a) Mwomwo ika twatela kulihenda kuvishinganyeka vyakukaye numba nge navisoloka kupwa vyamwaza? (b) Vihula muka twatela kulihulisa, kaha mwomwo ika?

¹⁸ Twatela nawa kulihenda kuvishinganyeka vyakukaye nahalwola luze katweshi nakushinganyeka ngwetu vyavipiko. Chakutalilaho, vaka-kutandakanyisa mijimbu vanahase kwambulula mujimbu mujila yize nayisolola nge vali nakuhakwila liuka limwe lyamapolitiki. Kaha nawa tunahase kutanga mujimbu uze naukundwiza vishinganyeka vyakufwila vyuma vyamukaye vyakufwana nge milimo yahelu navyuma vyeka. Mujivindiyo namumikanda yimwe mwatwama mijimbu yakusolola nge chapwa chakutamo mutu kulizanga ivene. Vishinganyeka kana vyalihandununa navyuma yahanjika Mbimbiliya, mwomwo Mbimbiliya yamba ngwayo nge natuzanga chikuma Yehova, kaha natupwa vakuwahilila chikuma. (Mateu 22:36-39) Kaha nawa mumikanda yimwe yavanyike mweji kupwanga mijimbu yize yinahase kuvalingisa vapwenga navilinga vyavipi.

¹⁹ Oloze echi kacheshi nakulumbununa nge chapwa chakuhenga kulihizumuna mujila yamwazako. Chipwe ngocho, twatela kulihulisa ngwetu: ‘Kutala tweji kukananga kunangula chamukaye numba tuhu kacheshi kusoloka nge chachipiko tahi? Uno tweji kukanyisanga vana vetu chipwe etu vavene tuhone kutala nakutanganga vyuma vimwe vize kavyapwa vamwazako tahi? Kutala tweji kulwezanga vana vetu omwo vyapwa vishinganyeka vyaYehova kachi nge vanaputuka kukavangiza vishinganyeka vyakukaye tahi?’ Nge natutachikiza chihandwa chatwama havishinganyeka vyaKalunga nevi vyavaka-kaye, kaha katweshi ‘kwitavila katwamino kamyaka yino katwalumuneko.’

20. Natutachikiza ngachilihi ngwetu tuli nakukavangiza vishinganyeka vyaKalunga chipwe vyaSatana?

²⁰ Anukenu ngwenu tunahase kwivwilila kuli Yehova chipwe kuli Satana. Jino iya ali nakwalumuna vishinganyeka vyetu? Mijimbu twasaka chikuma yikiko nayisolola owo ali nakwalumuna vishinganyeka vyetu. Kachi nge natwivwililanga kuvishinganyeka vyavaka-kaye, kaha nachitulingisa tulinge vyuma yafwila mijimba yetu nakupwa navilinga vyavipi. Vikiko chapwila chachilemu kusakula kanawa mijimbu natwivwilila navyuma twatela kushinganyekaho.

21. Chuma muka natushimutwila muchihande nachikavangizaho?

²¹ Nganomu tunashimutwila lyehi, hakusaka tupwenga navishinganyeka vyaYehova, twatela kukilikita nangolo keshi nge kulihenda kaha kumijimbu yayipiko. Oloze twatela kuhunanananga havishinganyeka vyaKalunga. Chihande nachikavangizaho nachishimutwila havyuma twatela kulinga mangana twivwilile kuli Kalunga nakukavangiza vishinganyeka vyenyi mukuyoya chetu.