Uno Mukwechi Vishinganyeka Ngana Vize VyaYehova Tahi?
“Alumukenu hakulingisa vishinganyeka vyenu kupwa vyavihya.”—LOMA 12:2.
1, 2. Kuzovoloka kushipilitu nachitukafwa tulingenga ika? Hanenu chakutalilaho.
ACHISHINGANYEKENU chisemi nahane mwanenyi wana nakumulweza ngwenyi, “Hanjika ngwove ngwasakwililako.” Ou mwana mwononoka chisemi chenyi numba tuhu keshi chakufuma kumuchima wenyiko. Oloze omu mwaya nakukola, mwaputuka jino kumona kulema chavyuma amunangwile chisemi chenyi. Ngocho mwaputuka jino kusakwililanga vakwavo chakufuma kumuchima wenyi. Mwomwo ika? Mwomwo ali jino namuchima wakusakwilila vatu havyuma navamulingila.
2 Chochimwe nawa, omu twaputukile kulinangula muchano, twalinangwile ovyo chapwila chachilemu kwononoka jishimbi jaYehova. Kahomu twaputukile kuzovoloka kushipilitu, twaputukile kumona vyuma nganomu avimona ikiye, nakutachikiza nawa vyuma vize asaka navize ahunga. Shikaho nge natusakulanga kanawa vyuma, nakulinga vyuma vize vyalitombola namwaya kujina chaYehova, kaha natusolola nge tuli navishinganyeka ngana vyaikiye.
3. Mwomwo ika chapwila chachikalu kupwa navishinganyeka ngana vyaYehova?
3 Numba tuhu kupwa navishinganyeka ngana vize vyaYehova chapwa chamwaza, oloze kachapwa chachashiko. Hakuwana nge katwakupukako, shimbu jimwe tunahase kukavangiza vishinganyeka vyautu. Chakutalilaho, chinahase kutukaluhwila kumona vyuma nganomu avimona Yehova. Vyuma kana shina ujila, naluheto, namulimo wakwambulula, nakuzachisa manyinga mujila yayipi navyuma vyeka vyangana. Chuma muka nachitukafwa tumonenga vyuma kana nganomu avimona ikiye? Kaha kulinga ngocho nachitunganyalisa ngachilihi oholyapwa nakulutwe?
VYUMA TWATELA KULINGA MANGANA TUPWENGA NAVISHINGANYEKA NGANA VIZE VYAYEHOVA
4. Chuma muka twatela kulinga mangana tukavangize mazu aPaulu akwamba ngwenyi: ‘Lingisenu vishinganyeka vyenu kupwa vyavihya’?
4 Tangenu Wavaka-Loma 12:2. Kaposetolo Paulu asonekele vyuma twatela kulinga numba tupwenga navishinganyeka ngana vize vyaYehova. Muchihande chinafumuho, twalinangulanga nge katwatela kwivwililanga kuvishinganyeka vyavaka-kayeko kuchina ‘katwamino kamyaka yino nakatwalumuna.’ Paulu asonekele nawa ngwenyi twatela ‘kulingisa vishinganyeka vyetu kupwa vyavihya.’ Echi chasakiwa kulinangulanga Mazu aKalunga, nakufwila kutachikiza vishinganyeka vyenyi, nakuhunananaho mangana nayetu tupwenga navishinganyeka ngana vize vyaikiye.
5. Lumbununenu chihandwa chatwama hakutanga nakulinangula.
5 Kulinangula kachapwa kutanga kaha mangana tuwane mwakukumbulwila vihulako. Oloze twatela kufwila kuwana vyuma natulinangula hali Yehova, nakutachikiza jijila jenyi navishinganyeka vyenyi. Kaha nawa twatela kufwila kutachikiza ovyo Kalunga atukanyishila kulinga vyuma vimwe. Twatela nawa kutachikiza vyuma vize twatela kwalumunako mukuyoya chetu namuvishinganyeka vyetu. Numba tuhu vyuma kana katweshi kulinangulavyo mulikumbi lyangongoko, oloze nge natuwanangako lwola lwakuhunanana havyuma tunatange, kaha natunganyala chikuma.—Samu 119:97; Chimo. 1, 4:15.
6. Vyuma muka navifumamo nge natuhunanananga havishinganyeka vyaYehova?
6 Kachi nge natushinganyekanga haMazu aKalunga lwola lwosena, kaha natutachikiza ngwetu chikupu vene vishinganyeka vyaYehova vyapwa vyakukupuka. Natuputuka nawa kumona vyuma nganomu avimona ikiye nakumona vishinganyeka vyenyi kupwa vyakwoloka. Echi nachitukafwa ‘tulingise’ vishinganyeka vyetu kupwa vyavihya nakufwila kutwalaho lika kuzovoloka mangana tupwenga navishinganyeka ngana vize vyaYehova.
VILINGA VYETU VYAPENDAMINA HAVYUMA TWEJI KUSHINGANYEKANGA
7, 8. (a) Uno Yehova amona ngachilihi luheto? (Talenu mivwimbimbi yakulivanga.) (b) Nge natumonanga luheto nganomu alumona ikiye, kaha chuma muka natuhakanga kulutwe?
7 Twatela kutachikiza ngwetu vyuma tweji kushinganyekanga vikiko tweji kulinganga nawa. (Mako 7:21-23; Yako. 2:17) Hakusaka twivwishise chishina kana, tutalenu havyakutalilaho vimwe. Mikanda yaMujimbu Wamwaza yatulumbunwina vishinganyeka vyaYehova kutalisa kuluheto. Chakutalilaho, Kalunga asakwile Yosefwe naMaliya vatu vakuhutwa mangana vamulelele mwanenyi. (Levi 12:8; Luka 2:24) Omu asemukile Yesu, Maliya ‘amusavalikile muulilo wavimuna mwomwo muzuvo yavangeji kamwapwile namumwe mwakusavala vakikoko.’ (Luka 2:7) Nge Yehova asakile kachi awahishile chihela chamwaza mangana mwanenyi asemukilemo. Echi chasolola nge chuma chapwile chachilemu kuli ikiye shina mwanenyi kusemukila kuvatu vakuhya kushipilitu vaze navamuzakama nakumulela kanawa.
8 Mujimbu wakusemuka chaYesu unahase kutunangula tumonenga luheto nganomu alumona Yehova. Numba tuhu Yehova amona vyuma vyakushipilitu kupwa vyavilemu, oloze visemi vamwe veji kushinjilanga vana vavo vapwenga naluheto nakuvalingisa jino vahone kuzovoloka kushipilitu. Kutala mweji kupendaminanga havishinganyeka vyaYehova tahi? Uno mweji kuchisololanga namuvilinga vyenu tahi?—Tangenu WavaHepeleu 13:5.
9, 10. Natusolola ngachilihi ngwetu twamona kuhukanyisa vakwetu nganomu achimona Yehova?
9 Chakutalilaho chikwavo shina omwo Yehova amona vaze veji kuhukanyisanga vakwavo. Yesu ambile ngwenyi: “Weshowo mwahukanyisa umwe hali ava vavandende vaze vali nalufwelelo, nachiwaha kachi nge navamukashilila lilolwa lyakuchekesa unga mushingo nge lize eji kunyengumunanga chimbulu, nakumumbila mukalungalwiji.” (Mako 9:42) Mazu kana apwa amalemu. Hakuwana nge Yesu alondezezelenga ise, ngocho twatela kufwelela chikupu ngwetu naYehova eji kwivwanga kupihya navatu vaze veji kuhukanyisanga vaka-kukavangiza mwanenyi Yesu.—Yowa. 14:9.
10 Kutala nayetu tweji kwivwanga nganomu eji kwivwanga Yehova naYesu tahi? Kutala twatwama navishinganyeka ngana vize vyaYehova tahi? Uno tweji kuchisololanga namuvilinga vyetu tahi? Chakutalilaho, pamo kuliko vwaliso yimwe chipwe muyachi wakulilenga tunazange, vize navihukanyisa vandumbwetu muchikungulwilo chipwe kulingisa vatu vatwivwile peha yakusaka kulisavala. Kutala kuzanga vandumbwetu nachitulingisa tuhone kulinga munayi muchima wetu tahi?—Chimo. 1, 2:9,10.
11, 12. Uno kupwa namuchima wakulikanyisa nakukavangiza vishinganyeka vyaYehova nachitukinga ngachilihi kuvilinga vyakuhenga?
11 Chamuchitatu, Yehova ahunga vilinga vyakuhenga. (Isa. 61:8) Numba tuhu atachikiza ngwenyi tukwechi vishinganyeka vyakuhenga mwomwo yakuhona kukupuka, oloze atukolezeza tumulondezezenga hakuhunga vilinga vyakuhenga. (Tangenu Samu 97:10.) Kushinganyeka havyuma vyalingisa Yehova ahunge vilinga vyakuhenga nachitukafwa nayetu tumulondezeze. Nachituhana nawa ngolo jakufungulula vyeseko.
12 Kumona vilinga vyakuhenga nganomu avimona Yehova nachitukafwa tutachikize vilinga vimwe kupwa vyakuhenga numba tuhu kavavivuluka muMazu aKalungako. Chakutalilaho, mukaye muli wino vanasungumuka uze vanakuvuluka ngwavo lap dance. Vatu vamwe vanahase kushinganyeka ngwavo wino kana kawapwa waupiko mwomwo kawalifwana nakulinga ujilako. * Kutala vilinga kana vyalitombola navishinganyeka vyaKalunga uze ahunga vilinga vyakuhenga vyosena tahi? Shikaho twatela kupwa namuchima wakulikanyisa nakuhunga nawa vyuma vize ahunga Yehova.—Loma 12:9.
SHINGANYEKENU HAVYUMA NAMUKASAKULA KULINGA KULUTWE
13. Mwomwo ika twatela kushinganyeka hanganyo yatwama hakupwa navishinganyeka ngana vize vyaYehova?
13 Nge tuli hachilongesa chauka, kaha twatela kushinganyeka omwo kupwa navishinganyeka ngana vize vyaYehova chinahase kukatukafwa kulutwe tukasakule kulinga vyuma vyakwoloka. Echi chinahase kutukafwa tuhone kusakula vyuma mujila yakuhenga oholyapwa. (Vishi. 22:3) Tuchitalenu havyakutalilaho vimwe.
14. Vyuma muka tunalinangula kuli Yosefwe hakukana kulisavala napwevo lyaPotefwale?
14 Yosefwe asolwele nge amwenenga ulo nganomu aumona Yehova omu akanyine kulisavala napwevo lyaPotefwale. (Tangenu Kuputuka 39:8, 9.) Kaha nawa amukumbulwile ngwenyi: “Nanguhasa ngachilihi kulinga upi waunene ngana nakulinga shili kuli Kalunga?” Mazu kana asolola nge apwile navishinganyeka ngana vize vyaKalunga. Nyi ngachilihi yetu? Namulinga ngachilihi nge mukwenu muka-milimo ali nakumisengelela mulinge ujila? Nyi ngachilihi nge vanamitumina mujimbu chipwe muvwimbimbi wauselesele hashinga yenu? * Cheseko kana tunahase kuchifungulula kachi nge natushinganyekela chimweza nakupwa navishinganyeka vyaYehova nakusakula vyuma natulinga nge cheseko chinatuwane.
15. Natuhasa ngachilihi kufungulula cheseko chakutuhonesa kupwa vakushishika kuli Yehova ngana muze valingile vaHepeleu vatatu?
15 Tutalenu nawa chakutalilaho chamalunga vatatu vavaHepeleu, Shatalake, naMeshake naAvete-nengo. Hakukana kulifukula kulikombelo lyaulu lize ajikile Mwangana Nevukataneza namazu vahanjikile hakumukumbulula, vasolwele nge vashinganyekelenga hakulema chakupwa vakushishika kuli Yehova. (Kulo. 20:4, 5; Ndanye. 3:4-6, 12, 16-18) Jino namulinga ngachilihi nge mukulwane wenu wamilimo mwamilweza muhane jimbongo jakukundwiza chilika chimwe chavaka-kwitava chamakuli? Muchishishisa chakuvandamina vyuma kana visolokele, nachiwaha nge namushinganyekelanga chimweza mwakulingila nakukekesa omwo Yehova amona vyuma kana. Echi nachikatukafwa kufungulula cheseko kana nge chinatuwane ngana muze valingile vaze vaHepeleu vatatu.
Kutala munahehwojola lyehi, nakusoneka lipapilo lyakusolola mwakumyukila nakulweza nawa ndotolo yenu tahi? (See paragraph 16)
16. Uno kutachikiza kanawa vishinganyeka vyaYehova nachitukafwa ngachilihi tupwenga vakulizanga kachi nge tunaviji?
16 Kushinganyekelanga chimweza ngwetu twatela kupwa vakushishika nachitukafwa nawa nahachihande chakusakula mwakutukila nge tunaviji. Numba tuhu katwasaka kutuhaka manyingako, oloze mutu ivene nahase kusakula jila yakumukilamo kweseka najindongi jamuMbimbiliya jize jasolola vishinganyeka vyaYehova. (Vili. 15:28, 29) Shikaho katwatela kuvandamina kuvanga nge tunavijiko mwomwo kulinga ngocho nachikatulingisa tukasakule vyuma mulumbushi. Luno lukiko lwola lwamwaza twatela kuhehwojola jindongi jamuMbimbiliya nakusoneka lipapilo lyakusolola mwakumyukila nakulweza nawa ndotolo yenu mangana atachikize. *
17-19. Mwomwo ika twatela kulinangwila vishinganyeka vyaYehova oholyapwa? Hanenu chakutalilaho chavyuma vize vinahase kutusolokela.
17 Chamakumishilo, tutalenu hajila yize Yesu akumbulwililemo Petulu omu ambile ngwenyi: “Litetele ove Mwata.” Chasoloka nge Yesu ashinganyekelenga chimweza havyuma ajinyine Kalunga hakumutuma ezenga hano hamavu, nahaVisoneka vize vyahanjikile hakuyoya chenyi nakufwa chenyi. Kutachikiza vyuma kana chamukafwile atwaleho kupwa wakushishika nakupwa namuchima wakulisuula.—Tangenu Mateu 16:21-23.
18 Makumbi ano, Kalunga ajina ngwenyi vatu vatunge usepa naikiye nakwazana chikuma mumulimo wenyi. (Mateu 6:33; 28:19, 20; Yako. 4:8) Oloze vatu vaze twafwelela vanahase kutulingisa tuhone kulinga vyuma kana ngana muze Petulu alingile kuli Yesu. Chakutalilaho, namulinga ngachilihi nge mukulwane wenu wamilimo mwamilweza ngwenyi mwamihakilako kufweto nge namuzatanga nahamakumbi aze mweji kuzatanga milimo yakushipilitu? Kaha nawa nge mwapwa muvaka-shikola, namulinga ngachilihi nge vaka-fulumende navamilweza ngwavo vali nakusaka kumifwetela jimbongo mangana muyenga kumashikola akwakusuku mukahakileko chinyingi? Kutala namuvangila kulomba, nakuhehwojola, nakuhulisako vaka-tanga yenu chipwe vakulwane muchikungulwilo shimbu kanda musakule vyakulinga tahi? Nachiwaha nge namuvangila kulinangula oholyapwa omwo vyapwa vishinganyeka vyaYehova nakufwila kumulondezeza. Kulinga ngocho nachikapwa chachashi kufungulula cheseko kana nge chinamiwane. Kachi nge mwalitomena kuzata vyuma vyakushipilitu nakusakwila chimweza mwakulingila nge muli mucheseko, kaha chuma nachisalako shina kutesamo vyuma kana.
19 Pamo kuli vyuma vikwavo vize vinahase kusoloka mukukasumuna vize mwatela kushinganyekela chimweza. Kuhanjika muchano, katweshi kuhasa kupwa vakulizanga kuhonesa kala cheseko nachituwanako. Chipwe ngocho, nge natuhunanananga havishinganyeka vyaYehova halwola tuli nakulinga chilongesa chauka, kaha nachikapwa chachashi kwanuka vyuma tunalinangula halwola natukapwa mucheseko. Shikaho, tufwilenu kulinangula vishinganyeka vyaYehova, nakuvikavangiza nakushinganyeka omwo vinahase kutunganyalisa oholyapwa nakulutwe.
PWENUNGA NAVISHINGANYEKA NGANA VIZE VYAYEHOVA MUKAYOYE
20, 21. (a) Mwomwo ika natukevwila kuwaha kupwa nalisesa lyakulisakwila vyakulinga mukaye kakahya? (b) Chuma muka nachitukafwa tupwenga vakuwahilila oholyapwa?
20 Tuli nakutalilila kaye kakahya. Etu vavavulu tuli nakutalilila kukayoya haya myaka yosena mupalachise hano hamavu. Muchiyulo chaWangana, vatu kaveshi kukamona ukalu tuli nakumona mukatwamino kamyaka yinoko. Chipwe ngocho, nahalwola kana vatu navakapwanga lika nalisesa lyakulisakwila vyakulinga. Mutu himutu mwakalisakwilanga ivene vyuma vize navikamwivwisa kuwaha.
21 Chipwe ngocho, lisesa kana kalyeshi kukapwa lyakulinga kala chumako. Vatu vavavwovu navakasakulanga kulinga vyuma vyakwoloka hakukavangiza jishimbi jaYehova navishinganyeka vyenyi. Echi nachikanehela vatu kuwahilila chachinene nakuunda chamwenemwene. (Samu 37:11) Namakumbi ano, tunahase kupwa nakuwahilila kana kachi nge natufwilanga kupwa navishinganyeka ngana vyaYehova.
^ par. 12 Wino walap dance wapwa “wino uze veji kukinanga chikumanyi kumutu uze kavwalile mukavumbiko chipwe vene ali uselesele, kaha himwatwama nakukinyina hajitungi jamutu uze neza nakutalako omu ali nakukina.” Vilinga kana vanahase kuvimona kupwa chochimwe nakulinga ujila, kaha mutu vanahase kumutungila komiti yakusopa. Kachi nge muka-Kulishitu nazananga mukukina wino kana, kaha atela kuya kuli vakulwane vamukafwe.—Yako. 5:14, 15.
^ par. 14 Kulitumina mijimbu, namivwimbimbi najivindiyo jauvumbi kuzachisa shinga nawa chapwa chachipi, kaha chinahase kulingisa mutu vamutungile komiti yakusopa. Lwola lumwe vanyike vaze vanazananga mutato kana vanavawanenga namulonga kuli vaka-fulumende. Nge munakusaka mijimbu yikwavo kaha yenunga hakeyala ya jw.org hachihanda chakwamba ngwavo “Vakweze Veji Kuhulisa Ngwavo—Vyuma Muka Ngwatela Kulinga haChihande Chakutuma Mijimbu yaUvumbi haShinga?” (Talenu havanavuluka ngwavo VYUMA YANANGULA MBIMBILIYA > VAKWEZE.) Chipwe talenu chihande chakwamba ngwavo “Mwakuhanjikila naVana Venu haChihande Chakutuma Mijimbu Yauvumbi haShinga” muTonenu! yaJanuary 2014, mafwo 15-16.
^ par. 16 Tukwechi mikanda yayivulu yize yahanjika hajindongi jamuMbimbiliya. Chakutalilaho, talenu mukanda ‘waTwamenunga Muzangi yaKalunga’, mafwo 215-218.
