1, 2. (a) Luheto muka lwapwa lwalulemu chikuma kuli etu? (b) Muchano muka uze twamona kupwa waulemu, kaha mwomwo ika? (Talenu mivwimbimbi yakulivanga.)

LUHETO muka lwapwa lwalulemu chikuma haluheto mwatwama nalwo? Kutala munahase kulutambasana nachuma chamokomoko tahi? Vihula kana vyapwa vyavyashi kukumbulula kuli vaka-kulemesa Yehova. Twatachikiza chikupu ngwetu, luheto lwetu luze lwapwa lwalulemu chikuma shina usoko twatwama nawo naYehova, kaha nawa katweshi kuhasa kulutambasana nakala chumako. Chuma chikwavo twamona kupwa chachilemu shina muchano wamuMbimbiliya uze weji kutukafwanga tutunge usoko wakukola naSetu wamwilu.—Kolo. 1:9, 10.

² Achishinganyekenu havyuma vize anakutunangula Muka-kunangula Wamunene kuhichila muMazu enyi Mbimbiliya. Atulweza ulumbunwiso walijina lyenyi navilinga vyenyi vyakulipwila. Atunangula nawa vyandando yakusokola yaMwanenyi Yesu yize atuhanyine. Kaha nawa atulweza vyaWangana wauMeshiya nakuhana vawavisa lutalililo lwakukayoyela mwilu, kaha “mikoko veka” nawa lutalililo lwakukayoyela muPalachise hano hamavu. (Yowa. 10:16) Atunangula nawa mwakupwila navilinga vyamwaza. Vyuma kana twavimona  kupwa vyavilemu mwomwo vyeji kutupandamisanga kuli Tengi yetu nakutulingisa tulivwise kuwaha kuyoya.

3. Uno kulanda muchano kachalumbununa kulinga ika?

³ Yehova apwa Kalunga muka-kuhana. Vatu vaze vasaka kutachikiza muchano eji kuvanangulangawo namuchima wakusuuluka. Muchima wenyi wakuhana wamulingishile nawa asuule Mwanenyi kwiza nakutufwila. Kalunga kasaka tumuhane jimbongo numba atunangule muchanoko. Chakutalilaho, omu Shimona asakile kuhana kaposetolo Petulu jimbongo mangana vamuhane ngolo jakunangika vatu mavoko mangana vatambule shipilitu yajila, Petulu amutenukilile ngwenyi: “Ojo jimbongo jove japalata jinongele kumwe nayove ivene, mwomwo unashinganyeka ngwove wana waKalunga wakanyombo unahase kuulanda najimbongo.” (Vili. 8:18-20) Jino mazu akwamba ngwavo: “Landa muchano,” alumbununa ika?

4. Vyuma muka natulinangula muchihande chino kutalisa kumuchano?

⁴ Tangenu Vishimo 23:23. Hakusaka tulinangule muchano wamuMbimbiliya, twatela kuzata nangolo. Twatela nawa kulisuula kulinga vyuma vimwe mangana chipwenga chachashi kuulanda. Mukanda waVishimo wamba ngwawo, kachi nge ‘tunalande’ chipwe tunahete “muchano,” twatela kuzangama mokomoko tunahase “kuulandulula” chipwe ngwetu kuujimbalisa. Tushimutwilenu omwo chalumbunukila kulanda muchano navyuma twatela kulinga numba tuulande. Echi nachitukafwa tumonenga muchano kupwa waulemu nakuukinga kuchina ‘natuulandulula.’ Natumona nawa ngwetu chapwa chachilemu kulanda muchano.

5, 6. (a) Tunahase kulanda ngachilihi muchano chakuzeneka kufweta jimbongo? Hanenu chakutalilaho. (b) Uno kutachikiza muchano cheji kutunganyalisanga ngachilihi?

⁵ Tachikizenu ngwenu, nachuma chawana chasakiwa kukilikita numba tuchitambule. Lizu lyachiHepeleu valumuna ngwavo ‘kulanda’ hali Vishimo 23:23, vanahase kulyalumuna nawa ngwavo ‘kuheta’ chuma. Mazu osena avali alumbununa kukilikita nangolo chipwe kulingako chuma chimwe mangana utambule chuma chachilemu chize uli nakusaka. Tutalenu chakutalilaho chino. Twambenu ngwetu hachisakano hali “Makonde awana wakanyombo.” Kutala munashinganyeka ngwenu makonde kana nawalijila avene hembo lyenu tahi? Nduma. Mwatela kutambuka nakuya kuchisakano nakuwasaka. Kutala makonde kana anapu awana tahi? Eyo, oloze mwatela kuzachisa lwola nangolo jenu hakuya nakuwasaka kuchisakano. Chochimwe nayetu, numba tuhu katwasakiwa kufweta jimbongo mangana vatunangule muchanoko, oloze twatela kuzata nangolo mangana tulinangulewo.

⁶ Tangenu Isaya 55:1-3. Mazu aze Yehova ahwiminyinyine Isaya asoneke, anahase kutukafwa tutachikize omwo chalumbunukila kulanda muchano. Kweseka nachisoneka kana, Yehova afwanyisa mazu enyi kumeya, namavele navinyo. Muchano wamuMazu aKalunga weji kutuhizumunanga ngana muze apwa meya. Kaha nawa weji kutujikijisanga nakutukafwa tuzovoloke kushipilitu ngana muze mavele eji kutuhananga ngolo nakulingisa nawa kemba akole kanawa. Mazu aYehova nawa alifwana navinyo. Mujila muka? Mbimbiliya yamba ngwayo vinyo vyeji kulingisanga mutu awahilile. (Samu 104:15) Shikaho Yehova hakulweza vatu jenyi ngwenyi “twayenu mulande vinyo,” chatukafwa tutachikize ngwetu nge natuyoya kweseka namwaya mazu enyi, kaha natuwahililanga. (Samu 19:8) Chakutalilaho kana chamwaza chikuma mwomwo chinatukafwe tumone nganyo yatwama hakulinangula muchano wamuMazu aKalunga. Twatela kutachikiza ngwetu kukilikita chetu kacheshi kuya mwangana veneko. Tushimutwilenu jino havyuma vitanu vize twatela kulisuula kulinga mangana tulande muchano.

7, 8. (a) Mwomwo ika twatela kulisuula kuzachisa lwola lwetu mangana tulande muchano? (b) Vyuma muka alisuuwile kulinga Mariko, kaha anganyalile ngachilihi?

⁷ Kuzachisa lwola. Hakusaka kulanda muchano, tuvosena twatela kulisuula kuzachisa lwola lwetu. Tachikizenu ngwenu, kwivwilila kumujimbu waWangana navamwambulila mutu, nakutanga Mbimbiliya namikanda yahanjika haMbimbiliya, nakulinga chilongesa chauka, nakuwahisa vyakukunguluka nakuya kukukunguluka chasakiwa lwola. Shikaho twatela ‘kulilanjila’ lwola etu vavene kuchina kulinga vyuma vize kavyapwa vyavilemu chikumako. (Tangenu Wavaka-Efwesu 5:15, 16, nakwinyikila chamwishi.) Uno hatela kuhita lwola lupwa halihi numba tupwenga nachinyingi chakwoloka chakunangula chamaputukilo? Echi chapendamina kweseka nomwo vili vyuma. Kulinangula mangana aYehova najijila jenyi, namilimo yenyi kachatwama noho chakuminako. (Loma 11:33) Kaposhi Kakutalila watete afwanyishile muchano ‘kulutemo lwamwaza.’ Vasonekelemo ngwavo: “Kanda kusuuluka nalutemo lumwe kahako, chipwe ngwetu muchano watete unalinangula. Nge kwapwile lutemo lwamuchano lumwe kaha, kachi Yehova katunangula vyuma vikwavoko. Twalaho kutondatonda jikwavo.” Shikaho twatela kulihulisa ngwetu, ‘Kutala ngunalinangula muchano wauvulu tahi?’ Tachikizenu ngwenu kulinangula hali Yehova kacheshi kukakumako. Shikaho twatela kuzachisanga kanawa lwola lwetu mangana tulande muchano wauvulu. Tutalenu chakutalilaho chamutu uze afwililile kulinangula muchano.

⁸ Mariko, * mukweze wapwevo wakuJapan, ayile kushikola munganda yaNew York, mu U.S.A. Halwola kana, Mariko apwilenga muliuka limwe lyakwitava lize lyaputukilile muJapan mu 1959. Likumbi limwe, payiniya umwe wapwevo apwile nakwambulwila kuzuvo hizuvo, kaha aliwanyine naMariko. Mariko aputukile kulinangula muchano wamuMbimbiliya, kaha awahililile chikuma ngocho alwezele uze payiniya amunangulenga kavali muchalumingo. Numba tuhu Mariko apwile kushikola oku nawa apwile nakuzata milimo mangana awaneko vyakulikafwa navyo, oloze aputukile kuya nakukunguluka. Alitwaminyine nawa kwazana muvikilikita vimwe mangana awaneko lwola lwakulinangula muchano. Kulisuula chenyi chamukafwile azovoloke washi kushipilitu. Mwahichile kaha tukweji, kaha vamumbapachishile. Omu mwahichile tukweji 6 kufuma hakumumbapachisa, aputukile kuzata upayiniya swi nakulelo.

9, 10. (a) Uno kulanda muchano nachitukafwa ngachilihi twalumune vishinganyeka vyetu kupandama kuvikumba? (b) Maria alisuwile kulinga chuma muka, kaha nanganyala ngachilihi?

⁹ Kuseza vikumba. Lwola lumwe cheji kusakiwanga kulisuula kuseza milimo yetu yajimbongo jajivulu mangana tulande muchano. Chakutalilaho, omu Yesu alwezele Petulu naAndelei mangana vapwenga “vaka-kuta vatu,” Mbimbiliya yamba ngwayo “hahaze vene vasezele moji avo.” (Mateu 4:18-20) Oloze kacheshi nakulumbununa nge kala mutu mwasaka kulinangula muchano atela kuseza milimo yenyiko. Visoneka vyatulweza tupwenga tuvaka-kuzata. (Chimo. 1, 5:8) Chipwe ngocho, vatu vaze navalinangula muchano vatela kwalumuna vishinganyeka vyavo kupandama kuvikumba navyuma vize vatela kuhaka kulutwe mukuyoya chavo. Yesu ambile ngwenyi: “Litwaminenu kulilunjikila luheto hano hamavu, . . . oloze lilunjikilenu luheto mwilu.” (Mateu 6:19, 20) Tutalenu chakutalilaho cheka chamukweze umwe wapwevo.

¹⁰ Maria aputukile kwazana mukuhema vavuluka ngwavo golf kufuma vene kuunyike wenyi shimbu kanda engile nakushikola. Omu ahetele mujimango jahelu atwalileho lika kuzovoloka mukuhema kanechi, ngocho vamufwelelesele ngwavo navamufwetela jimbongo jakuyunivesiti. Kuhema chagolf achizangile chikuma, kaha nawa  chamulingishile apwenga kuluwa. Kutwala muze Maria aputukile kulinangula Mbimbiliya, kaha azangile vyuma apwile nakulinangula. Muchano wamukafwile alumuneko chiyoyelo chenyi. Ambile ngwenyi: “Kwalumuna chiyoyelo chami navishinganyeka vyami nakukavangiza jishimbi jamuMbimbiliya changukafwile ngupwenga wakuwahilila.” Maria amwene jino ngwenyi keshi kuhasa kuzachila luheto navyuma vyakushipilitu hamweko. (Mateu 6:24) Ngocho, alisuwile kuseza mulimo wenyi uze azangile chikuma wakupwa kuluwa mukuhema chagolf uze watelelele kumuhetesa luheto nakumulingisa ayenga fuma. Oholyapwa jino apwa payiniya, kaha eji kwambanga jino ngwenyi echi chikiko “kuyoya chamwenemwene.”

11. Nge natulanda muchano, kaha vausoko wetu namasepa vanahase kulinga ika?

¹¹ Kuseza masepa navausoko. Nge natusakula kuyoya kweseka namwaya muchano wamuMbimbiliya, kaha masepa jetu navausoko vanahase kutuhunga. Mwomwo ika? Yesu alombeleleko vaka-kumukavangiza ngwenyi: “Vajilike namuchano, mazu ove apwa muchano.” (Yowa. 17:17; kwinyikila chamwishi) Lizu lyakwamba ngwavo “vajilike” lyalumbununa nawa ngwalyo “vahandule.” Shikaho nge tunetavila muchano, kaha tunalihandununa kuli vaka-kaye mwomwo katwasaka kukavangiza vyuma vyamukayeko. Vatu vanahase kutuhunga mwomwo yakwalumunako vyuma vimwe. Tweji kuyoyanga kweseka namuchano wamuMbimbiliya. Numba tuhu katwasaka kuneha vihandwa muli vatuko oloze masepa jetu navausoko vamwe vanahase kulitwamina kulikata nayetu, chipwe vene kutuhunga mwomwo yavyuma twafwelela. Oloze chuma kana kacheshi chaungejiko. Yesu ambile ngwenyi: “Chikupu vene vaka-kole jamutu navakapwa vaze vakuzuvo yenyi.” (Mateu 10:36) Kaha nawa atufwelelesa ngwenyi nganyo yakulinangula muchano yikiko yayilemu kuhambakana vyuma vize natulisuula kulinga.—Tangenu Mako 10:28-30.

12. Chuma muka alisuwile kulinga kaYuleya umwe hakusaka kulanda muchano?

¹² Muka-kusekasana umwe wakaYuleya walijina lyaAaron vamunangwilenga ngwavo katelelele kuzachisa lijina lyaKalungako. Oloze ikiye afwililile kulinangula muchano. Ngocho awahililile chikuma omu Chinjiho umwe amulwezele ngwenyi nge navawanyisa vasona vawana vamuchiHepeleu vaze vemanyinako lijina lyaKalunga, kaha vanahase kumuvuluka ngwavo ikiye “Yehova.” Hakuwana nge azangile vyuma vamunangwile, ngocho akatukile nakuya kusunangonga mangana akalwezeko valapi vyuma alinangwile. Oloze chuma valingile chamukomwesele. Muchishishisa chakuwahilila hakwivwa lijina lyaKalunga, vakiko vamufwijililile nakumumona kupwa himutu wakulikanga. Vatanga jenyi kavamuzangile chekako. Chipwe ngocho, atwalileho lika kulanda muchano nakupwa Chinjiho chaYehova wakumika swi nakukufwa chenyi. Ngana mwaAaron, nayetu twatela kutwalaho kutambuka mumuchano numba tuhu kulinga ngocho nachilingisa vausoko namasepa jetu vatuhunge.

13, 14. Vishinganyeka navilinga muka twatela kwalumunako numba tulande muchano? Hanenu chakutalilaho.

¹³ Kumbila vishinganyeka vyakuhenga navilinga vyavipi. Hakusaka twitavile muchano nakuyoya mwaya jindongi jamuMbimbiliya, twatela kulisuula kwalumuna vishinganyeka navilinga vyetu. Petulu asonekele hakwalumuka kana ngwenyi: “Hakupwa muvana vakwononoka, kanda namwitavila kufwila chize mwapwilenga nacho kunyima omu mwahonene kutachikiza vyuma chimihungumwiseko. Oloze pwenunga vajila mutwamiso yenu yosena.” (Petu. 1, 1:14, 15) Hakuwana nge vatu vamunganda yaKolinde vapwile navilinga vyavipi chikuma, ngocho vasakiwile kwalumuna vilinga navishinganyeka vyavo numba valande muchano. (Koli. 1, 6:9-11) Navatu vamwe nawa makumbi ano vanaseze vilinga vyavipi mangana valande muchano. Petulu atwalileho kulweza vaka-Kulishitu vamumakumbi enyi ngwenyi: “Lwola lwakulinga  mwaya kufwila chavaka-mafuchi lunahichi lyehi, omu mwalingilenga vilinga vyakuzunguma, najipeha jajipi, nakunwa chikuma vinyo, nakulinga viwanyino vyaliuya, nakupenda, nakulemesa makombelo chakwivwisa unyengwe.”—Petu. 1, 4:3.

¹⁴ Devynn napuwenyi Jasmine vapwilenga vitakwa hamyaka yayivulu. Numba tuhu Devynn atachikijile kanawa milimo azachilenga oloze utakwa wamulingishile vamuhange hamilimo kana. Jasmine nawa vamutachikijile kupwa mutu wamatoto naukenya. Likumbi limwe, Jasmine apwile nakutambuka mujila oku napende, kaha aliwanyine navamishonali vavali. Ava vamishonali vamushikile kumukatukila mangana vakamunangule Mbimbiliya. Oloze omu vayile vawanyine ava vapwevo nalunga vanapende mwomwo Jasmine nalunga lyenyi kavashinganyekele ngwavo vaze vamishonali vanahase kuvatambukila hembo lyavoko. Shikaho omu vayileko cheka kamuchivali, vakalinangwile jino. Kufuma vene halwola lwatete vaputukile kulinangula Jasmine naDevynn vapwile jino vaka-kulinangula Mbimbiliya vakwipangweji, ngocho vaputukile kukavangiza vyuma valinangwilenga. Omu mwahichile tukweji vatatu, vechele kunwa wala nakusonekesa nawa ulo wavo. Vatu vavavulu vatachikijile chuma valingile, kaha chavakunywile navakiko vaputuke kulinangula Mbimbiliya.

15. Chuma muka chapwa chachikalu kulisuula kulinga kuli vaze navasaka kulanda muchano, kaha mwomwo ika?

¹⁵ Kuseza visemwa navilika vize vyalimbalaka navisoneka. Kumbila visemwa navilika vize vyalimbalaka naVisoneka chinahase kupwa chachikalu kuli vatu vaze vali nakusaka kulanda muchano. Vamwe cheji kupwanga chachashi kumbila vyuma kana nakwitavila vyuma yahanjika Mbimbiliya. Oloze veka cheji kuvakaluhwilanga mwomwo yakuvashinyinyika kuli vatanga javo, navakwavo vaka-milimo, namasepa, chikumanyi nge vilika kana vyapwa vyakuvumbika vausoko vaze vafwa. (Lushi. 14:1) Chipwe ngocho, vyakutalilaho vyavandumbwetu vakumika vinahase kutukolezeza. Tutalenu chakutalilaho chavaka-Efwesu vamulikulukaji lyamyaka lyakulivanga vaze vomikile.

16. Chuma muka valingile vaka-Efwesu hakusaka valande muchano?

¹⁶ Nganda yaEfwesu yayile fuma muvilinga vyakupanda. Jino chuma muka chakafwile vaze valumukile nakupwa vaka-Kulishitu mangana vaseze vilinga vyakupanda nakulanda muchano? Mbimbiliya ngwayo: “Vavavulu vaze valingilenga visava vanehele mikanda yavo hamwe nakuyochela kumeso avatu vosena. Ngocho valavile jindando jayo, kaha vawanyine nge jinahete mujimbongo japalata 50,000. Ngocho mazu aYehova ayilenga lika nakukula nakuzama nangolo.” (Vili. 19:19, 20) Ava vaka-Kulishitu vakushishika valisuwile kumbila vyuma vyajimbongo jajivulu, kaha Kalunga avakiswile mwamunene.

17. (a) Vyuma muka twatela kulisuula kulinga mangana tulande muchano? (b) Vihula muka natushimutwila muchihande nachikavangizaho?

¹⁷ Vyuma muka mwalisuwile kuseza numba mulande muchano? Tuvosena tweji kuzachisanga lwola lwetu hakuya nakutonda jitemo jamuchano. Veka veji kutokesangamo vikumba vyavo nakulitwamina kulikata namasepa navausoko vaze kavapwa Vinjihoko. Vavavulu nawa veji kumbilanga vishinganyeka navilinga, navisemwa navilika vize vyalimbalaka naVisoneka. Numba tuhu twasezele vyuma vyakulisezaseza, oloze twakunyuka chikupu ngwetu muchano wamuMbimbiliya wapwa waulemu kuhambakana vyuma vize twasezele. Muchano kana ukiko watukafwa tutunge usoko wakukola naYehova, uze wapwa luheto lwalulemu chikuma. Nge natushinganyekanga hanganyo yatwama hakutachikiza muchano, kaha katweshi kushinganyeka kuulandululako. Jino vyuma muka vinahase kutulingisa tulandulule muchano? Kaha natuhasa kulihendako ngachilihi? Vihula kana natuvikumbulula muchihande nachikavangizaho.