1. Mwomwo ika tuvosena twasakiwa kutuvendejeka?

TUVOSENA twasakiwa kutuvendejeka. Etu vamwe pamo tunakulizakamina havyuma vimwe vyamukuyoya, nakuhomba mwomwo yaushinakaji, namisongo chipwe mwomwo yakufwisa mutu twazanga. Etu veka nawa pamo vali nakutuyanjisa. Kaha nawa mukaye munazale naulyanyi. Chikupu vene, hakuwana nge tuli nakuyoyela ‘mulwola lwalukalu’ echi chili nakusolola nge tuli ‘mumakumbi akukuminyina’ kaha nawa kaye kakahya kalinwomu kezenga. (Chimo. 2, 3:1) Etu vamwe pamo tunavandaminanga hatando yayisuku ngwetu Yehova mwatesamo jishiko jenyi, oloze ukalu uli nakuya nakutohwelako lika. Jino iya nahase kutuvendejeka?

2, 3. (a) Vyuma muka twatachikiza hali Hambakuke? (b) Mwomwo ika twatela kushimutwila mukanda waHambakuke?

² Hakusaka tukumbulule chihula kana, tuchikekesenu mukanda waHambakuke. Numba tuhu Mbimbiliya kayahanjika vyachiyoyelo chaHambakuke namulimo azachilengako, oloze mukanda asonekele nautukolezeza chikuma. Lijina lyaHambakuke pamo lyalumbununa “Kulipakata chaTwima.” Ulumbunwiso kana  unahase kutalisa kujila eji kutuvendejekelangamo Yehova nausoko uze vaka-kumulemesa vatunga naikiye. Hambakuke ahanjikile naKalunga, kaha amuhulishile vihula. Hakuwana nge Yehova ahwiminyinyine Hambakuke asoneke vihula kana muMbimbiliya, ngocho vinahase kutukafwa nayetu.—Hamba. 2:2.

³ Mumukanda waHambakuke kamwatwama mijimbu yeka yahanjika hachiyoyelo chaHambakukeko, oloze vasonekamo kaha vyuma ashimutwilile naYehova. Kaha nawa kakweshi chisoneka cheka chahanjika hali ou kapolofwetoko. Mukanda wenyi naukiko ukwechi vyuma “vize vasonekele hakavanga,” kaha vavisoneka muMbimbiliya yize yapwa Mazu aKalunga “mangana kuhichila mukukakachila chetu namukuvendejeka chamuVisoneka tuhase kupwa nalutalililo.” (Lom 15:4) Uno mukanda waHambakuke unahase kutunganyalisa ngachilihi? Nautukafwa tutachikize omwo chalumbunukila kufwelela Yehova. Kaha nawa upolofweto waHambakuke watukolezeza tuhase kupwa vakuunda numba tuhu tuli nakumona ukalu. Shikaho tushimutwilenu jino mukanda waHambakuke munona munona.

4. Mwomwo ika Hambakuke ahombelelele?

⁴ Tangenu Hambakuke 1:2, 3. Hambakuke ayoyelele mulwola lwalukalu chikuma, kaha ahombelenga mwomwo vatu vapwile navilinga vyaulyanyi. Kutala atachikijile lwola watelele kukuma ulyanyi kana tahi? Mwomwo ika Yehova echelelele ulyanyi utwaleho? Hambakuke amwenenga vatu vaze vatwaminenga vakwavo chivwoto nakuyula mujila yakuhenga. Chikupu vene, vyuma kana vyamuhombesele. Ngocho alombele kuli Yehova mangana amukafwe. Hambakuke pamo ashinganyekele ngwenyi Yehova kevwilenga kupihya havilinga kanako, kaha nawa ngwenyi pamo keshi kunongesa vatu kana muwashiwashiko. Kutala nayenu mweji kwivwanga nganomu evwile ou ngamba yaKalunga tahi?

5. Chishina muka chachilemu chatwama mumukanda waHambakuke? (Talenu muvwimbimbi wakulivanga.)

⁵ Kutala Hambakuke kafwelelele Yehova navyuma ashikile kumulingilako tahi? Nduma. Hakuwana nge alwezele Yehova ukalu wenyi wosena echi chasolwele nge kapwile nakukakasanako. Hambakuke pamo ahombele mwomwo katachikijile lwola luze Kalunga atelele kukumisa ukalu kanako, novyo nawa amwechelelele atwaleho lika kumona ukalu kana. Yehova ahwiminyinyine Hambakuke asoneke vyuma ahichilemo mangana nayetu tulinanguleko chishina chachilemu. Shikaho, katwatela kwivwanga woma kumulweza ukalu wetuko. Atulweza ngwenyi tumulwezenga vyuma vyosena vili mumichima yetu. (Samu 50:15; 62:8) Mukanda waVishimo 3:5 watukolezeza ‘tufwelelenga Yehova namichima yetu yosena,’ nakuhona “kupendamina hakunangakana [chetu.]” Chasoloka nge Hambakuke anukile awa mazu amuchisoneka kana.

6. Mwomwo ika kulomba chapwila chachilemu?

⁶ Hambakuke alingilenga vyuma vize vyamukafwile apandame kuli Yehova uze apwile Ise, kaha nawa Sepa lyenyi wamwenemwene. Echi chasolola nge kalizakaminyine nakupendamina hangolo jenyiko. Oloze alombele Kalunga nakumulweza ukalu wenyi wosena, ngocho nayetu twatela kulondezeza chakutalilaho chenyi. Yehova nawa asaka tusololenga lufwelelo lwetu hakumulwezanga ukalu tuli nawo. (Samu 65:2) Nge natulinganga ngocho, kaha mwatutwaminyinanga mukuyoya chetu. (Samu 73:23, 24) Mwatukafwa tutachikize vyuma ajina kulingila vatu chamokomoko nakala ukalu natumona. Kulomba chakufuma kwishi yamuchima yapwa hijila yakusolwelamo ngwetu chikupu vene twafwelela Kalunga.

7. Yehova akumbulwile ngachilihi kulomba chaHambakuke?

⁷ Tangenu Hambakuke 1:5-7. Omu Hambakuke akumishile kulomba kuli Yehova, pamo apwile nakushinganyeka havyuma mwalinga Yehova mangana akumise ukalu wenyi. Hakuwana nge Yehova apwa chisemi wakeke, ngocho kamutenukilileko. Kalunga atachikijile ngwenyi ngamba yenyi apwile muukalu waunene. Ngocho amulwezele jino vyuma mwalinga kuli vaYuleya vakuhona kushishika. Hambakuke pamo ikiye apwile mutu watete uze valwezele kuli Yehova ngwenyi kalinwomu anongese vatu kana.

8. Mwomwo ika mazu akumbulwile Yehova akomwesele Hambakuke?

⁸ Yehova alingile vyuma vize vyakafwile Hambakuke afwelele ngwenyi mwamukafwa. Kunongesa vatu vakuhuka chapwile hakamwihi chikuma. Yehova hakuhanjika ngwenyi “kumakumbi enu,” apwile nakulumbununa ngwenyi kusopesa nachiza oku Hambakuke achili wamutonyi chipwe vatu veka vaze vapwile nakuyoyela hamwe naikiye. Hambakuke kashinganyekele ngwenyi Yehova mwamukumbulula mujila kanako. Vyuma amulwezele Yehova vyasolwele nge kuyanda nachitanda muYuta mwosena. * VaKalateya (vaka-Mbavilone) vapwile vikenya chikuma kuhambakana vaIsalele vaze vatachikijile jishimbi jaYehova. Jino mwomwo ika Yehova azachishilile ava vatu vaukenya ngana vanehe lupi hali vatu jenyi? Kachi nge yenu valwezele mazu kana kachi mwevwile ngachilihi?

9. Vihula muka vize Hambakuke pamo alihulishile?

⁹ Tangenu Hambakuke 1:12-14, 17. Numba tuhu Hambakuke atachikijile ngwenyi Yehova mwazachisa vaka-Mbavilone hakusopesa nakuzangamisa vatu vavilinga vyavipi, oloze atwalileho lika kuhomba. Chipwe ngocho, alinyishile nakulweza Yehova ngwenyi ikiye “Lilolwa lyenyi.” (Lushi. 32:4; Isa. 26:4) Hambakuke atwalileho lika kufwelela ngwenyi Kalunga apwa wazangi kaha nawa walikoji. Echi chamulingishile ahamuke nakuhulisa cheka Yehova vihula. Mwomwo ika Kalunga etavishilile vyuma vipihileko lika muYuta? Mwomwo ika azenekelele kufumisako vyuma kana hahaze vene? Mwomwo ika Kalunga waNgolo Josena etavishilile kuyanda chavatu chitohweleko lika? Mwomwo ika ‘aholelelenga kulu’ omu vaka-kuhuka vayanjishilenga vaka-kwoloka? Yehova apwa “Wajila,” kaha nawa apwa ‘utoma, keshi kumona vyuma vyavipiko.’

10. Vyuma muka vinahase kutulingisa twivwenga ngana muze evwile Hambakuke?

¹⁰ Lwola lumwe nayetu tunahase kwivwa ngana muze evwile Hambakuke. Oloze tweji kwivwililanga kuli Yehova. Hakuwana nge twamufwelela, tweji kutanganga Mazu enyi, kahechi cheji kutuhananga lutalililo. Kaha nawa eji kutwanukisanga vyuma atushika kuhichila muliuka lyenyi. Chipwe ngocho, pamo tunahase kulihulisa ngwetu, ‘Kutala ukalu tuli nakumona naukakuma tahi?’ Tutalenu chuma chikwavo natulinangula kuli Hambakuke.

11. Chuma muka afwililile kulinga Hambakuke omu akumishile kushimutwila naYehova?

¹¹ Tangenu Hambakuke 2:1. Kushimutwila naYehova chakafwile Hambakuke aunde muchima. Ngocho afwililile jino kuvandamina Yehova nakufwelela ngwenyi chikupu vene mwalingaho mumwe. Chikupu vene, apwile nalufwelelo mwomwo nomu hahichile lwola ambile ngwenyi, “nanguvandamina likumbi kaneli lyavihuli.” (Hamba. 3:16) Kwapwile  vangamba jaKalunga veka vakushishika vaze vapwile nalufwelelo ngana luze apwile nalwo Hambakuke, kaha vyakutalilaho vyavo vinahase kutukafwa nayetu tupwenga namuchima wakutalilila chikoki.—Mika 7:7; Yako. 5:7, 8.

12. Vyuma muka tunalinangula kuli Hambakuke?

¹² Vyuma muka natulinangula kuli Hambakuke? Chatete, katwatela kulitwamina kulomba kuli Yehovako chamokomoko nakala vyeseko natumona. Chamuchivali, twatela kukavangiza vyuma mwatulweza Yehova kuhichila muMazu enyi naliuka lyenyi. Chamuchitatu, twatela kuvandaminanga Yehova nakufwelela ngwetu mwakumisa ukalu wetu halwola lwakutamo. Kachi nge natulwezanga Yehova ukalu wetu wosena nakupwa namuchima wakutalilila chikoki ngana muze alingile Hambakuke, kaha michima yetu nayiunda nakutulingisa tutwaleho lika kupwa nalukakachila. Kushinganyeka havyuma twatalilila nawa nachitukafwa tupwenga vakuwahilila chamokomoko naukalu natumona. Lutalililo nalutukafwa tufwelele ngwetu chikupu vene Yehova mwatukafwa.—Loma 12:12.

13. Mazu muka akuvendejeka aze atwama hali Hambakuke 2:3?

¹³ Tangenu Hambakuke 2:3. Chikupu vene, Yehova awahililile naHambakuke hamuchima wenyi wakutalilila chikoki. Atachikijile ukalu apwile nakumona ngamba yenyi. Ngocho amuvendejekele hakumufwelelesa ngwenyi kalinwomu akumise ukalu apwile nakumona. Chapwile kwijiva nge Kalunga ali nakulweza Hambakuke ngwenyi: “Unda muchima nakungufwelela. Ukalu wove nanguukumisa numba tuhu nahahita lwola.” Echi chamukafwile atachikize ngwenyi Yehova atongola lwola lwakutesamo jishiko jenyi. Shikaho amukolezezele atwaleho lika kuvandamina kutesamo chajishiko kana. Chikupu vene, kutesamo chavyuma kana chavendejekele Hambakuke.

14. Chuma muka twatela kufwila kulinga kachi nge tuli muukalu?

¹⁴ Kupwa namuchima wakutalilila chikoki nakukavangiza vyuma mwatulweza Yehova, nachizamisa lufwelelo lwetu nakutukafwa tuunde michima chamokomoko nakutufumbukila nakumona vihuli. Yesu ahanjikile ngwenyi katwatela kuhaka mangana “[ku]lwola chipwe jingonde” jize kanda tumoneko oloze twatela kufwelela Yehova uze apwa Muka-kulama Lwola Wamunene. (Vili. 1:7) Shikaho kanda natuzeyako, oloze tutwalenuho lika kuvandamina oku tuli nakuzachisa kanawa lwola lwetu hakuzachila Yehova kweseka noho hakumina ngolo jetu.—Mako 13:35-37; Ngale. 6:9.

15, 16. (a) Vyuma muka twatalilila vize vasoneka mumukanda waHambakuke? (b) Kaha vyuma kana vyatunangula ika?

¹⁵ Yehova afwelelesa vaka-kwoloka vaze vamufwelela ngwenyi: “Muka-kwoloka mwayoyanga mwomwo yakushishika chenyi,” kaha nawa ngwenyi, “hamavu hosena nahakazala chinyingi chakutachikiza upahu waYehova.” (Hamba. 2:4, 14) Chikupu vene, vaze veji kutalililanga kuli Kalunga navakayoya.

¹⁶ Mazu atwama hali Hambakuke 2:4 anahase kusoloka nge kaweshi nanganyoko. Oloze kaposetolo Paulu awamwene kupwa amalemu ngocho awazachishile mapapa katatu. (Loma 1:17; Ngale. 3:11; Hepe. 10:38) Ngocho chamokomoko nakala ukalu mwamona mutu, oloze nge mwatwalaho lika kupwa nalufwelelo, kaha mwakamona omu Kalunga mwakatesamo vyuma ajina. Yehova atulweza tushinganyekenga havyuma navikasoloka kulutwe.

17. Mukanda waHambakuke watufwelelesa vyuma muka?

¹⁷ Mukanda waHambakuke watunangula vishina vyavilemu etu tuli nakuyoyela mumakumbi akukuminyina. Yehova afwelelesa vaka-kwoloka  vaze veji kumufwelelanga ngwenyi navakayoya. Shikaho tutwalenuho lika kuzamisa lufwelelo lwetu nakupendamina hali Kalunga chamokomoko nakala ukalu natumona. Yehova atufwelelesa kuhichila muli Hambakuke ngwenyi mwatukafwanga nakutufumisa mukala ukalu. Ngocho atulweza tumufwelele nakupwa namuchima wakutalilila chikoki havyuma mwakalinga halwola atongola omu Wangana wenyi naukalingisa hamavu hakapwe vatu vakuwahilila kaha nawa vavavwovu.—Mateu 5:5; Hepe. 10:36-39.

18. Uno mazu ahanjikile Yehova akafwile ngachilihi Hambakuke?

¹⁸ Tangenu Hambakuke 3:16-19. Mazu ahanjikile Yehova akafwile Hambakuke. Ashinganyekele hajila Yehova akafwililengamo vatu jenyi kushikulu. Echi chamukafwile apwenga nalufwelelo lwakukola nakutachikiza ngwenyi kalinwomu Yehova afumiseko vatu vavilinga vyavipi. Numba tuhu atachikijile ngwenyi ukalu apwile nakumona nautwalaho hakashimbu kakandende, oloze kahombele chekako. Apwile jino nalufwelelo lwakukola nakwinjikiza ngwenyi Kalunga mwamukafwa. Ahanjikile mazu akutukolezeza aze kanda vahanjikengaho lyehi kuli kala mutu. Vaka-kulinangula vamwe vamba ngwavo mazu amuvesi 18 alumbununa nge “nangusambwojokanga nakuwahilila muli Mwata nakukinyinyina muli Kalunga kami.” Chikupu vene, mazu kana atukolezeza etu tuvosena. Shikaho Yehova katushika kukatulingila kaha vyuma vimweko, oloze atufwelelesa ngwenyi kalinwomu atesemo vyuma kana.

19. Yehova nahase kutuvendejeka ngachilihi ngana muze alingile kuli Hambakuke?

¹⁹ Chishina chachinene tunalinangula mumukanda waHambakuke shina chakufwelela Yehova. (Hamba. 2:4) Tunahase kupwa nalufwelelo kana nge natuzamisa usoko wetu naYehova hakulinga vyuma vino: (1) Kulombanga kuli Yehova nakumulweza ukalu wetu wosena. (2) Kutanganga Mazu enyi nakukavangiza vyuma mwatulweza kuhichila muliuka lyenyi. (3) Kupwa namuchima wakutalilila chikoki nakuvandamina Yehova alinge vyuma halwola lwakutamo. Omu mukiko alingile naHambakuke. Numba tuhu mukanda wenyi waputuka namazu akulishona oloze kumakumishilo kwatwama mazu akuwahilila aze asolola nge apwile nalufwelelo. Shikaho tufwilenu kumulondezeza mangana nayetu tumone omwo Yehova mwatukafwa. Chikupu vene, twasakiwa mazu akutukolezeza omu tuli nakuyoyela muno mukaye kamilima.