TUVOSENA twasaka kutusolwela likoji kuli vakwetu, kaha nawa tweji kwivwanga kuwaha kachi nge vakwetu navatuzakama. Hakuwana nge tuvosena twasaka kutusolwela likoji, jino vyuma muka navitukafwa nayetu tupwenga namuchima kana?

Likoji lyalumbununa kuzakama vakwetu kuhichila mumazu namuvilinga vyetu. Kusolwela vakwetu likoji chasakiwa kulinga vyuma vyavivulu keshi kuhanjika kaha hakanwako. Chasakiwa kuzanga vakwetu chakufuma kwishi yamichima yetu nakupwa namuchima wakutetela. Kaha nawa Mbimbiliya yamba ngwayo likoji himuhako washipilitu yajila yaKalunga uze valweza vaka-Kulishitu vasololenga. (Ngale. 5:22, 23) Tuvosena twatela kupwa namuchima walikoji. Shikaho tukekesenu tumone omu Yehova naMwanenyi vanasololanga muchima kana nomu tunahase kuvalondezeza.

Yehova eji kusolwelanga likoji nakuzakama vatu vosena kuhakilako vene “[na]vaka-kuhona kusakwilila navaka-kuhuka.” (Luka 6:35) Chakutalilaho, Yehova eji “kututwisanga likumbi lyenyi hali vaka-kuhuka nahali vatu vamwaza, nakunokesa vula hali vaka-kwoloka nahali vaka-kuhenga.” (Mateu 5:45) Echi chili nakusolola nge navatu vaze kavatachikiza Yehovako veji kunganyalanga kuvyuma atuhana mwomwo yalikoji lyenyi, kaha nawa veji kulivwisanga kuwaha kuyoya.

Yehova asolwele likoji lyalinene hachuma alingilile Alama naEve. Omu Alama naEve valingile shili, “vatongele mafwo amukuyu nakuvwala.” Chipwe ngocho, Yehova atachikijile ngwenyi vapwile nakusakiwa uvwalo wakukola mwomwo vatelelele jino kuyoyela kuweluka waEtene, nakulima hamavu aze vashingile ngwavo nahasokanga “mingonga namituvapoko.” Shikaho Yehova avazakamine hakuvatungila “uvwalo wausuku wavilambu.”—Kupu. 3:7, 17, 18, 21.

Numba tuhu Yehova eji kusolwelanga likoji ‘vaka-kuhuka navatu vamwaza,’ olozenyi eji kusolwelanga likoji lyalinene vangamba jenyi vakushishika. Chakutalilaho, mumakumbi akapolofweto Zekaliya, kangelo umwe apihililile chikuma mwomwo vatu valitwaminyinyine kutungulula tembele muYelusalema. Yehova atengelekele matwitwi nakwivwila kuvihula amuhulishile uze kangelo, kaha amukumbulwile “namazu alikoji, akuvendejeka.” (Zeka. 1:12, 13) Kaha nawa Yehova alingile mwomumwe nakuli kapolofweto Elija. Lwola lumwe, omu ahombele ou kapolofweto, alwezele Yehova mangana amujihe. Yehova kamutenukilileko oloze atumine kangelo mangana ayenga nakumukolezeza. Kalunga afwelelesele ou kapolofweto ngwenyi kapwile uka wenyiko. Omu Elija evwile awa mazu alikoji, amukolezezele chikuma, ngocho atwalileho lika kuzata mulimo wenyi. (Vamya. 1, 19:1-18) Havangamba jaKalunga vosena, mutu muka nasololanga chikuma muchima walikoji uze atwama nawo Yehova?

Omu Yesu apwile hano hamavu, asolwelenga likoji nakuzakama vatu, kaha nawa kapwilenga wamukalu muchimako. Muchima wakeke  wamulingishile alweze vatu ngwenyi: “Twayenu kuli ami enu muvosena muli nakufulyangila nakulemuwa naviteli, kaha ami nangumihizumuna. . . Mwomwo toka yami yayashi kumbata.” (Mateu 11:28-30) Kupwa namuchima kana, chalingishile vatu vahase kumukavangizanga kwosena kuze ayilenga. Hakuwana nge Yesu “avevwililile keke,” ngocho avalishile, nakuka vaze vapwile nakuviza navitonji, nakuvanangula “vyuma vyavivulu” kutalisa kuli Ise.—Mako 6:34; Mateu 14:14; 15:32-38.

Yesu evwishishilenga kanawa vatu nakuvazakama chikuma, kahechi chasolwele chikupu nge apwile nalikoji lyalinene. Numba tuhu shimbu jimwe vatu vahulishilenga Yesu vihula vyakuhingama, oloze vosena vaze vejilenga kuli ikiye mangana avakafwe, avatambwilenga “nalikoji.” (Luka 9:10, 11) Chakutalilaho, omu pwevo uze apwile nakuhita manyinga akwachile kulihina lyaYesu lyahelu nakushinganyeka ngwenyi mwayoya, ikiye kamutenukilileko. (Levi 15:25-28) Hakuwana nge ou pwevo ayanjile hamyaka 12, ngocho Yesu amwivwililile keke nakumulweza ngwenyi: “Ove mwanami, lufwelelo lwove lunakuhindula. Yakonga mukuunda, likangule kumusongo wove waupi.” (Mako 5:25-34) Chikupu vene, eli lyapwile hilikoji lyalinene.

Muvyakutalilaho tunavuluka kwilu, tunashimutwila nge tunahase kusolola likoji lyamwenemwene kuhichila muvilinga vyetu. Yesu asolwele chishina kana muchishimo chakaSamaliya chize ahanjikile. Numba tuhu vaka-Samaliya navaYuleya vapwile nachijindo, oloze ou lunga wakaSamaliya vanavuluka muchishimo kana, evwililile keke lunga uze vapupile nakulezumuna mwomwo yakumuveta. Muchima walikoji walingishile ou kaSamaliya alinge vyuma vyamwaza. Ahingunwinyine maji hajimbandu jauze lunga nakumutwala kuzuvo yavangeji mangana vakamulame. Ou kaSamaliya ahanyine jimbongo uze mwenya zuvo mangana amulame nakumufwelelesa nawa ngwenyi jeshojo jimbongo mwahakilaho mwakamufwetajo.—Luka 10:29-37.

Hakuwana nge likoji tweji kulisololanga namuvilinga, shikaho tunahase cheka kulisolola namumazu akukolezeza aze tweji kuhanjikanga. Numba tuhu, “kulizakamina chamutu [cheji kulemuwisanga] muchima wenyi,” oloze Mbimbiliya yamba ngwayo “mazu amwaza nawahizumuna muchima wenyi.” (Vishi. 12:25) Kachi nge natusolwelanga vakwetu likoji nakuwaha, kaha tunahase kuvakolezeza chikuma. * Kuhanjikanga mazu alikoji nachisolola nge twavazakama chikuma. Kaha kulinga ngocho nachivakafwa vahase kupwa vakumika mukala vyeseko navamona.—Vishi. 16:24.

Vatu vosena vanahase kupwa namuchima walikoji mwomwo vavatenga “muchifwanyisa [chaKalunga].” (Kupu. 1:27) Chakutalilaho, Yulyu mukulwane wamaswalale javaLoma “asolwelele Paulu likoji [hakumusuula] ayenga kuli masepa jenyi vakamuzakame” omu ahetele munganda yaShitone. (Vili. 27:3) Halwola lukwavo nawa, omu Paulu navakwavo vavombele hakalungalwiji, vatu vahalitungu lyaMelita vavasolwelele “likoji lyakulipwila.” Kaha nawa vavawikililile kakahya mangana votenga. (Vili. 28:1, 2) Nganomu tunamono muvyakutalilaho kana, likoji kalyasakiwa kulisolola kaha halwola lumweko.

Hakusaka Kalunga atwivwilenga kuwaha, twatela kutwalaho lika kupwa namuchima walikoji mukuyoya chetu chosena. Evi vikiko Yehova atulwezela ngwenyi ‘tuvwalenga’ likoji. (Kolo. 3:12) Kuhanjika muchano, kachapwa chachashi lwola lwosena kusolola ou muhakoko. Mwomwo ika? Mwomwo yakwivwa sonyi, nakushinganyeka ngwetu katwatelemoko, nakutufumbukila namuchima walifwi. Chipwe ngocho, tunahase kuhonesa ukalu kana hakupendamina  hashipilitu yajila nakulondezeza Yehova uze eji kusololanga likoji.—Koli. 1, 2:12.

Kutala kuliko vyuma vimwe vize mwatela kuzachilaho mangana musolole chikuma likoji tahi? Twatela kulihulisa ngwetu: ‘Kutala ngweji kwivwililanga kanawa nge mukwetu ali nakungulweza ukalu ali nawo tahi? Uno ngwafwila kutachikiza ukalu vali nakumona vakwetu tahi? Lwola muka ngwasolwelele likoji mutu uze kapwa kausoko kami chipwe sepa lyamiko?’ Nge tunalihulisa lyehi vihula kana, kaha tunahase jino kulitomena vyakulinga vyakufwana nge kufwila kutachikiza kanawa vatu vamungalila yetu chikumanyi vandumbu muchikungulwilo. Echi nachitukafwa tutachikize ukalu vali nakumona navyuma vali nakusakiwa kuvakafwa. Kufumaho, twatela jino kuvalingila vyuma vize natusaka vakwetu vatulingile kachi nge yetu twapwanga muukalu kana. (Mateu 7:12) Chamakumishilo, nge natulombanga Yehova atukafwe tupwenga namuchima walikoji, kaha chikupu vene mwatukafwa tupwenga namuchima kana.—Luka 11:13.

Kaposetolo Paulu avulukile vyuma vize vyamusolwelenga kupwa muka-kuzachila Kalunga, kaha havyuma kana avulukileho “nalikoji.” (Koli. 2, 6:3-6) Vatu vavavulu vazangile chikuma Paulu mwomwo avasolwelelenga likoji kuhichila muhanjikiso namuvilinga vyenyi. (Vili. 28:30, 31) Nayetu tunahase kukafwa vatu vezenga mumuchano kuhichila muvilinga vyetu vyalikoji. Kachi nge natusolwelanga likoji vatu vaze vatuhunga, kaha tunahase kuvakafwa vahonese muchima wamatoto. (Loma 12:20) Kaha mukuhita chalwola, vatu kana vanahase kwitavila kulinangula Mbimbiliya.

Mayevuyevu avatu vaze navakasanguka nakutwama hano hamavu muPalachise, navakatachikiza jino kanawa omwo lyapwa likoji lyamwenemwene. Vamwe pamo elu lukiko nalukapwa lwola lwatete kutachikiza chuma kana. Hakusaka kusolola muchima wakusakwilila, navakiko navakafwila kusolwela vakwavo likoji. Halwola kana vosena vaze kaveshi kukapwa namuchima kanako nakuhona kuzakama vakwavo, kaveshi kukatwama muWangana waKalungako. Oloze vosena vaze mwaketavila Kalunga mangana vakayoye haya myaka yosena, navakazakamanga vakwavo mujila yalikoji. (Samu 37:9-11) Chikupu vene, vatu navakatwama mukuunda nakupwa vakukingiwa mukaye kakahya. Jino natunganyala ngachilihi nge natusolwelanga vakwetu likoji oholyapwa?

Mbimbiliya yamba ngwayo: “Mutu walikoji eji kulinganyalisanga ivene.” (Vishi. 11:17) Nge mutu apwa walikoji, vakwavo veji kumuzanganga nakumusolwela likoji. Yesu ambile ngwenyi: “Chesekelo chize muli nakwesekelanga nacho vakwenu, chikiko navakamyesekela nacho nayenu nawa.” (Luka 6:38) Kaha nawa chapwa chachashi kuli mutu walikoji kuwana washi masepa vavilinga vyamwaza.

Kaposetolo Paulu akolezezele vandumbwenyi vamuchikungulwilo chamuEfwesu mangana vapwenga ‘valikoji kuli vakwavo, nakulivwilanga keke, nakulikonekelanga navakwavo namuchima wakusuuluka.’ (Efwe. 4:32) Muvikungulwilo mweji kupwanga kuunda kachi nge namupwa vandumbwetu vaze veji kusolwelanga vandumbwavo likoji nakufwila kuvakafwa. Vandumbwetu kana kavatwama nahanjikiso yakasautuko, kaha nawa kavahunga vandumbwavoko. Kaha nawa muchishishisa chakuyongola vakwavo, veji kufwilanga kuzachisa lilimi lyavo hakukolezeza vakwavo. (Vishi. 12:18) Kulinga ngocho, cheji kukafwanga chikungulwilo chizame kushipilitu.

Chikupu vene, twatela kusololanga likoji muhanjikiso namuvilinga vyetu. Kachi nge natusolwelanga vakwetu likoji, kaha natusolola ngwetu tuli nakulondezeza Yehova Kalunga uze atwama namuchima kana. (Efwe. 5:1) Kaha nawa natuzamisa chikungulwilo chetu nakukafwa vatu veka vezenga mukulemesa chamuchano. Shikaho tutwalenuho lika kusolwelanga vakwetu likoji.