Avalwezele ngwenyi: “Vamyangana javaka-mafuchi veji kulilingisanga kupwa vakaka javo, kaha vaze vatwama nangolo jakuvayula veji kuvavulukanga ngwavo Vambwembwa. Oloze enu kamwatela kupwa ngochoko.”—Luka 22:25, 26.

Jino veya vapwile Vambwembwa vaze avulukile Yesu? Kweseka najimbongo jachichele, navyakusonejeka vyakushikulu, vyasolola nge vaHelase navaLoma vapwile nachisemwa chakuvumbikanga vatu vavalemu navaka-kuyula vaze vavulukilenga ngwavo Euergetes chipwe ngwetu Vambwembwa. Vatu kana vavavumbikilenga mwomwo valingilenga vyuma vize vyanganyalishilenga vatu.

Vamyangana vavavulu vavavulukilenga ngwavo Vambwembwa. Havamyangana kana hapwile navaka-kuyula vavaEjipitu vakufwana nge Ptolemy III Euergetes (uze ayulile kafwe kufuma mu 247 B.C.E., nakuheta mu 222 B.C.E.,) naPtolemy VIII Euergetes II (uze ayulile kafwe kufuma mu 147 B.C.E., nakuheta mu 117 B.C.E.). Hapwile nawa vaka-kuyula vavaLoma vakufwana nge Yulyu Kesale (uze ayulile kufuma mu 48 B.C.E., nakuheta mu 44 B.C.E.,) naAngusutu (uze ayulile kufuma mu 31 B.C.E., nakuheta mu 14 C.E.,) naHelote Wamunene, mwangana waYuleya. Helote pamo vaputukile kumuvumbika omu alanjile tiliku mangana alise vatu halwola kwapwile zala yakalombolombo, nakuhana vyakuvwala kuli vaze vakalikijile.

Mutu umwe uze alinangula chikuma vyaMbimbiliya, Adolf Deissmann wakuGerman ambile ngwenyi, vatu vazachishilenga chikuma vulukiso yakwamba ngwavo Vambwembwa. Asonekele ngwenyi: “Nge natutala havyakusonejeka vyakushikulu, kaha tunahase kuwana [lizu kana] vanalisoneka mapapa kakavulu.”

Jino Yesu atwalile mulihi hakulweza tumbaji twenyi ngwenyi, “Oloze enu kamwatela kupwa ngochoko”? Uno apwile nakuvalweza vazeneke kuzakama vatu nakuvakanyisa kuhaka mangana hachiyoyelo chavakwavo tahi? Nduma. Chasoloka nge Yesu asakile kuvakafwa vatachikize chuma chachilemu chatelelele kuvalingisa vasolwele vakwavo likoji.

Mumakumbi aYesu, vapichi vavavulu vayilenga fuma hakuhana jimbongo vatu mangana vazachise mukuhemahema namuvilika vyeka vyakulisezaseza. Mujimbu umwe wavuluka ngwawo: “Numba tuhu vapichi vamwe kavapwile nou muchimako, oloze vavavulu vakafwilenga vakwavo mwomwo yakusaka kupwa naulemu.” Muchima kana ukiko Yesu alwezele vaka-kumukavangiza ngwenyi kavatela kupwa nawoko.

Omu mwahichile myaka, kaposetolo Paulu ashindakanyine hachihande chochimwe omu asonekelele vandumbwenyi vamuKolinde ngwenyi: “Mutu himutu alinge nge omwo najinyi mumuchima wenyi, keshi nge nakunyengetelako, chipwe nakulishinjilako, mwomwo Kalunga azanga muka-kuhana nakuwahilila.”—Koli. 2, 9:7.