1-2. (a) Kweseka namukanda waEfwesu 6:16, mwomwo ika twatela kupwila ‘nakepwe yayinene yalufwelelo’? (b) Vihula muka natushimutwila muchihande chino?

KUTALA mwatwama ‘nakepwe yayinene yalufwelelo’ tahi? (Tangenu Wavaka-Efwesu 6:16.) Eyo, mwatwama nayo. Ngana muze kepwe yayinene yeji kukinganga mujimba waliswalale, mukiko nalufwelelo nawa lweji kumikinganga kuvyuma vyakufwana nge ujila, naulyanyi navyuma vyeka vize vyalimbalaka najishimbi jaKalunga vinalisale mukaye kano kaSatana.

² Chipwe ngocho, tuli nakuyoyela ‘mumakumbi akukuminyina,’ kaha natumonanga lika vyeseko mwomwo yalufwelelo lwetu. (Chimo. 2, 3:1) Tunahase kukekesa ngachilihi kepwe yetu yalufwelelo mangana tumone numba nge yili kanawa? Vyuma muka twatela kulinga mangana tuzamise lufwelelo lwetu? Tuchishimutwilenu jino havihula kana.

3. Uno maswalale valaminenga ngachilihi jikepwe javo, kaha mwomwo ika?

³ Kushikulu, jikepwe jamaswalale vajilamikilenga malambu. Maswalale vakwichilenga maji kujikepwe mangana chilambu chizeneke kulyenyeka nakulingisa nawa vikungo vatungishile jikepwe vihone kukwata shingwe. Kachi nge liswalale namono ngwenyi kepwe yenyi kayeshi kanawako, ayiwahishilenga mangana alizange kulwa jita yikwavo. Uno chakutalilaho kana chinalitombola ngachilihi nalufwelelo lwenu?

4. Mwomwo ika mwatela kukekesela kepwe yalufwelelo lwenu, kaha munahase kulinga ngachilihi ngocho?

⁴ Ngana muze valingilenga maswalale kushikulu, nayenu mwatela kukekesanga kanawa kepwe yalufwelelo lwenu nakuyikinga mangana  mupwenganga vakulizanga kulwa jita yakushipilitu. Etu vaka-Kulishitu tweji kulwanga jita yakushipilitu, kaha tweji kulwanga navaka-kole vavavulu kuhakilako vene navashipilitu vakuhuka. (Efwe. 6:10-12) Naumwe wauchi nahase kumikingila kepwe yalufwelelo lwenu. Vyuma muka mwatela kulinga mangana mumone chikupu ngwenu munalizange kuhita muvyeseko? Chatete, lombenunga kuli Kalunga amikafwe. Kufumaho, zachisenunga Mazu aKalunga mangana mulitachikize kanawa enu vavene ngana muze amitachikiza Kalunga. (Hepe. 4:12) Mbimbiliya yamba ngwayo: “Mufwelelenga Yehova namuchima wove wosena, kanda naupendamina hakunangakana choveko.” (Vishi. 3:5, 6) Shikaho, kekesenu kanawa mumone vyuma munalitomena kulinga. Chakutalilaho, uno munahichi muukalu wakuhona jimbongo tahi? Nge mukiko, kutala mwanukile lushiko lwaYehova vasoneka hali WavaHepeleu 13:5, lwakwamba ngwavo: “Kangweshi kukakusezako, kangweshi kukakumbilako” tahi? Uno lushiko kana lwamilingishile mufwelele ngwenu Yehova mwamikafwa tahi? Nge mukiko, kaha chikupu vene muli nakulama kanawa kepwe yalufwelelo lwenu.

5. Vyuma muka munahase kuwana kachi nge namukekesa kanawa lufwelelo lwenu?

⁵ Kachi nge namukekesa kanawa lufwelelo lwenu, kaha munahase kuwana navyuma vimwe vize mwatela kuzachilaho mukuyoya chenu, vize munahononga kutachikiza halwola lwalusuku. Chakutalilaho, munahase kuwana nge kulizakamina chikuma havyuma vyamakuli veji kuhanjikanga vaka-kusosoloka kulufwelelo nakuhomba vinazeyesa lufwelelo lwenu. Kachi nge mukiko chili kuli yenu, kaha vyuma muka mwatela kulinga mangana mukinge lufwelelo lwenu?

6. Vyuma muka vyakutamo vize tunahase kulizakamina?

⁶ Kulizakamina chimwe kachapwa chakuhengako. Chakutalilaho, chapwa chakutamo mutu kulizakamina mangana afwile kuzata nangolo evwise Yehova naYesu kuwaha. (Koli. 1, 7:32) Kachi nge tunalingi shili, tweji kulizakaminanga nakushinganyeka havyuma twatela kulinga mangana tuzamise cheka usepa wetu naKalunga. (Samu 38:18) Tunahase nawa kulizakamina nakushinganyeka havyuma twatela kulinga mangana twivwise kuwaha muka-mahyetu chipwe kufwila kuzakama vaka-tanga yetu hamwe kaha navandumbwetu.—Koli. 1, 7:33; Koli. 2, 11:28.

7. Kweseka namukanda waVishimo 29:25, mwomwo ika katwatela kwivwa vatu womako?

⁷ Chipwe ngocho, kulizakamina chikuma chinahase kwenyeka lufwelelo lwetu. Chakutalilaho, tunahase kulizakamina chikuma hakufwila kupwa navyakulya navyakuvwala vyavivulu. (Mateu 6:31, 32) Kulizakamina chikuma havyuma kanevi, chinahase kutulingisa tufwile chikuma luheto nakuzanga chikuma jimbongo. Kachi nge natwechelela vyuma kana, kaha lufwelelo lwetu lunahase kuzeya nakulingisa jino usoko wetu naYehova ufwenga. (Mako 4:19; Chimo. 1, 6:10) Lwola lumwe nawa, tunahase kulizakamina chikuma havyuma twatela kulinga mangana vakwetu vatwivwile kuwaha. Kaha echi chinahase kutulingisa twivwenga vatu woma hakushinganyeka ngwetu navatutoleka nakutuyanjisa. Echi nachitulingisa tuhone kwivwa Yehova woma. Hakusaka tuhonese ukalu kana, twatela kulomba Yehova atukafwe tupwenga nalufwelelo lwakukola nakupwa vakumika hakuhita muvyeseko.—Tangenu Vishimo 29:25; Luka 17:5.

8. Vyuma muka twatela kulinga nge vatu navahanjika vyamakuli hali etu?

⁸ Satana uze apwa “ise yamakuli,” eji kuzachisanga vatu vaze veji kumukundwizanga mangana vatandakanyise makuli hali Yehova nahali vandumbwetu nawa. (Yowa. 8:44) Chakutalilaho, vaka-kusosoloka kulufwelelo veji kutandakanyisanga mijimbu yamakuli kutalisa kuliuka lyaYehova hajikeyala javo jahaInternet, nahavisaji vyamivwimbimbi namujijila jeka jakufwana ngana. Makuli kanawa, atwama hamukana ‘wamivwi yakakahya’ yaSatana. (Efwe. 6:16) Vyuma muka twatela kulinga kachi nge mutu mwatulweza vyuma vimwe vyamakuli nge evi tunavuluka lyehi? Katwatela kumwivwililako. Mwomwo  ika? Mwomwo twafwelela chikuma Yehova navandumbwetu. Kaha nawa twatela kulihenda kukuhanjikanga navatu vakusosoloka kulufwelelo. Katwalipula navo jipami chipwe kufwila kutachikiza vyuma navahanjika hali etuko.

9. Uno kuhomba chinahase kuneha ukalu muka?

⁹ Kuhomba chinahase kuzeyesa lufwelelo lwetu. Oloze shimbu jimwe tweji kuhombanga mwomwo yaukalu. Nge tuli naukalu, kaha katweshi kuhasa kuuliula kwijiva nge katweshi nawoko. Oloze katwatela kwechelela chipwe kushinganyekanga haukalu wetu shimbu yosenako. Mwomwo kushinganyekanga haukalu wetu shimbu yosena, chinahase kutulingisa tuvulyame vyuma vyamwaza vize atushika Yehova. (Kuso. 21:3, 4) Ngocho, kuhomba chinahase kutulingisa tulitwamine kuzachila Yehova. (Vishi. 24:10) Oloze kachatela kupwa ngochoko.

10. Vyuma muka munalinangula kuli ndumbwetu wapwevo wakuUnited States uze asonekele mukanda nakuutuma kuchikota chetu?

¹⁰ Achitalenu chakutalilaho chandumbwetu wapwevo wakuUnited States uze anakulama lufwelelo lwenyi chamokomoko nakuzakama lunga lyenyi uze aviza chikuma. Mukanda atumine kuchikota chaVinjiho jaYehova, asonekele ngwenyi: “Shimbu jimwe, misongo yamuka-mahyami yinatuzeyesanga nakutuhombesa, oloze lutalililo lwetu lwapwa lwakukola. Ngweji kwivwanga kuwaha chikuma hakumona vyuma vyosena eji kutuhananga Yehova mangana tupwenga nalufwelelo lwakukola nakutukolezeza. Chikupu vene, twasakiwa vyuma kanevi mwomwo vyeji kutukolezezanga chikuma. Vyuma kana, vyeji kutukafwanga tutwaleho kuzachila Yehova nakutukinga kuvyuma vize eji kuzachisanga Satana mangana azeyese lufwelelo lwetu.” Vyuma nahanjika ou ndumbwetu vinasolola nge kuhomba tunahase kuchifungulula chikupu. Mujila muka? Anukenu ngwenu vyeseko mweji kumonanga vyeji kufumanga kuli Satana. Oloze fwelelenu ngwenu Yehova uze apwa mwenya kuvendejeka mwatwalaho lika kumivendejeka, kaha nawa twalenuho lika kusakwilila hakulya chakushipilitu chize eji kumihananga.

11. Vihula muka twatela kulihulisa mangana tumone numba nge lufwelelo lwetu lunazame?

¹¹ Kutala munamonoko vyuma vimwe vize mwatela kuzachilaho mangana muzamise lufwelelo lwenu tahi? Kutala munalihende kukulizakamina chikuma mutukweji vavandende vanahichimo tahi? Uno munalihende kukwivwilila chipwe kukulipula jipami navaka-kusosoloka kulufwelelo kutalisa kumijimbu yamakuli veji kuhanjikanga  tahi? Uno muli nakumika hakuhita muukalu wakuhomba tahi? Nge mukiko, kaha lufwelelo lwenu lunazame mbe. Chipwe ngocho, twatela kupwa vakuvanguluka chikuma mwomwo Satana akwechi tufuta tweka tuze eji kuzachisanga mangana azeyese lufwelelo lwetu. Tuchishimutwilenu jino hakafuta kamwe eji kuzachisanga.

12. Ukalu muka watwama hakufwila luheto?

¹² Kufwila luheto chinahase kututangula nakutulingisa tuhone kuzachila chikuma Yehova. Kaposetolo Paulu ambile ngwenyi: “Kakweshi mutu ali nakuzata mulimo wauswalale mwalingisa mumilimo yakusekasanako. Keshi kulinga ngochoko mangana evwise kuwaha uze amusonekesele uswalale.” (Chimo. 2, 2:4) Kushikulu maswalale javaLoma kavavetavishile kuzata kala mulimoko. Vyuma muka vyasolokelenga nge liswalale mwahokola lushimbi kana?

13. Mwomwo ika liswalale katela kwazana mukusekasanako?

¹³ Achitalenu hachakutalilaho chino. Lizavu lyamaswalale vali nakulinangula mwakuzungila najipoko jamikwale, oloze liswalale umwe wauchiko. Uze liswalale kana nayi nakulanjisa vyakulya kuchilanjilo. Kuheta nachingoloshi, maswalale vaze vapwanga nakulinangula mwakuzungila vali nakuhotola jipoko javo jamikwale nakukekesa kanawa jikepwe javo. Oloze uze ayanga nakulanjisa vyakulya omu nakotoka mwaputuka cheka kuwahisa vyakulya vyeka mangana akalanjise cheka. Kaha lichako nachimene, nakwiza muka-kole nakuvalukuka. Uno munashinganyeka ngwenu liswalale muka uze mwasoloka nge nalizange kanawa vyajita uze navevwila kuwaha nakuli kapitau kavo? Kachi nge nayenu muli nakuzunga jita kana, liswalale muka namusaka kulihata nenyi, uze apwanga nakulinangula mwakuzungila tahi nyi uze apwanga nakulanjisa vyakulya kuvitanda?

14. Vyuma muka vize twamona kupwa vyavilemu hakupwa tumaswalale jaKulishitu?

¹⁴ Ngana mwamaswalale vaze vapwa vakulizanga shimbu yosena, nayetu katwatela kuzelendenda kuzata mulimo wetu uze wapwa waulemuko, mwomwo kachi nge natulinga ngocho kaha natwivwisa kuwaha Yehova naKulishitu vaze vapwa tupitau twetu. Twafwila kwivwisa kuwaha Yehova naKulishitu, kahechi twachimona kupwa chachilemu chikuma kuhambakana vyuma vyosena tunahase kupwa navyo mukaye kano kaSatana. Shikaho, twatela kuwanangako lwola lwakutamo  nakupwa nangolo jakuzachila Yehova nakulama nawa kepwe yalufwelelo lwetu navyuma vyajita vyakushipilitu vyosena.

15. Paulu atuhuhumwine tulihende kuvyuma muka, kaha mwomwo ika?

¹⁵ Shimbu yosena twatela kupwa vakulizanga. Mwomwo ika? Kaposetolo Paulu ahuhumwine ngwenyi: ‘Vaze veji kufwilanga kupwa naluheto veji kuhungumukanga kulufwelelo.’ (Chimo. 1, 6:9, 10) Lizu lyakwamba ngwavo ‘kuhungumuka’ lyalumbununa nge tunahase kuhungukila kukutonda vikumba vize kavyeshi nakusakiwako. Kulinga vyuma kana nachilingisa michima yetu yiputuke ‘kufwila cheka nacheka chamokomoko chachipi.’ Twatela kulihenda kukufwila kanechi, mwomwo chikiko ali nakuzachisa Satana mangana azeyese lufwelelo lwetu.

16. Mujimbu watwama hali Mako 10:17-22, watela kutulingisa tulihulise vihula muka?

¹⁶ Twambenga ngwetu tuli najimbongo jajivulu, kaha tunahase kulanda vyuma vyavivulu, kutala nachipwa chakuhenga kachi nge natulanda vyuma vize tunazange okunyi kavyeshi nakusakiwa mukuyoya chetuko tahi? Nduma, kacheshi kupwa chakuhengako. Oloze achilihulisenu ngwenu: Numba nge natulanda vyuma kana, kutala tuli nalwola lwakuvizachisa nangolo jakuvilama kanawa tahi? Uno tunahase kuputuka kuzanga chikuma luheto lwetu tahi? Uno kuzanga chikuma luheto chinahase kutulingisa tupwenga nge uze mwanalunga akanyine  hakumusanyika kuli Yesu mangana atohwese mulimo wenyi wakuzachila Kalunga tahi? (Tangenu Mako 10:17-22.) Shikaho, nachipwa chamwaza kuli etu kwashiwisa chiyoyelo chetu mangana tuzachise kanawa lwola lwetu nangolo jetu.

17. Chuma muka chize katwatela kuvulyamako?

¹⁷ Kanda natuvulyama ngwetu tweji kulwanga jita yakushipilituko, kaha nawa twatela kuyizunga hakumbi hakumbi. (Kuso. 12:17) Vandumbwetu kaveshi kuhasa kutumbachila kepwe yalufwelelo lwetuko. Twatela kulimbachilayo etu vavene.

18. Mwomwo ika maswalale kushikulu valinjilililenga jikepwe javo?

¹⁸ Kushikulu, liswalale vamuvumbikilenga kachi nge mwapwa wakuhamuka mujita. Oloze jino vamumwenenga kupwa wamokomoko nge mwakinduluka kwimbo chakuzeneka kepwe yenyi. Muka-kulinangula vyakushikulu wakuLoma Tacitus asonekele ngwenyi: “Chapwilenga chasonyi kuli liswalale kuseza kepwe yenyi.” Echi chikiko chalingishilenga maswalale valinjilile chikuma jikepwe javo.

19. Uno tunahase kulinjilila ngachilihi kepwe yalufwelelo lwetu?

¹⁹ Tweji kulinjililanga kujikepwe jalufwelelo lwetu hakupwanga kukukunguluka shimbu yosena, nakwambululanga vyalijina lyaYehova naWangana wenyi kuli vakwetu. (Hepe. 10:23-25) Kaha nawa twatela kutanganga Mazu aKalunga hakumbi hakumbi nakuzachisa vyuma natutanga mukala vyuma natufwila kulinga. (Chimo. 2, 3:16, 17) Kachi nge natulinga vyuma kanevi, kaha kakweshi chitwa chize mwazachisa Satana nachituhonesa kuzachila Kalungako. (Isa. 54:17) “Kepwe yayinene yalufwelelo” lwetu nayitukinga. Natuzama mbe hakuzachila hamwe navandumbwetu. Echi nachitukafwa tufungulule jita yakushipilitu yize tweji kuzunganga hakumbi hakumbi, nakukapwa nakutokwa chakupwa kusali yaYesu omu mwakafungulula Satana navandemone jenyi.—Kuso. 17:14; 20:10.