1. Yehova atuhana lisesa lyakulinga ika?

YEHOVA atuhana lisesa lyakulisakwila etu vavene vyakulinga mukuyoya. Kaha eji kutunangulanga mwakusakwila kanawa vyakulinga, kaha kachi nge natusakula kulinga vyuma vize navimwivwisa kuwaha, mwatukafwa tuvitesemo. (Samu 119:173) Kachi nge natuzachisanga vyuma tweji kulinangulanga muMazu aKalunga, kaha nachitukafwa tusakulenga kanawa vyakulinga.—Hepe. 5:14.

2. Ukalu muka unahase kusoloka, numba nge tunasakula kanawa vyakulinga?

² Numba tuhu natusakula kanawa vyakulinga, oloze chinahase kutukaluhwila kuvitesamo. Achishinganyekenu havyakutalilaho vino: Ndumbwetu walunga wamukweze nalitomena kutanga Mbimbiliya yosena yamuundu. Kaha mwaputuka kuyitanga havyalumingo vyavindende, kutwala muze mwalitwamina. Ndumbwetu wapwevo mwafwila kusoneka fwomu yaupayiniya washimbu yosena, oloze ali nakulangisa kulinga ngocho. Lizavu lyavakulwane navalikasa vafungenga chikuma chikungulwilo, oloze namuhita tukweji chakuhona kulinga vyuma valikashile. Numba tuhu vyakutalilaho kana vinalihandununa, oloze vinalifwaneko mujila yimwe, mwomwo vyuma vajinyine vosena kavaviteselemoko. Omu mukiko chapwile nakuli vaka-Kulishitu vamuKolinde mulikulukaji lyamyaka lyakulivanga. Tushimutwilenu vishina natulinangula kuli vaka-Kulishitu kana.

3. Chuma muka vajinyine kulinga vaka-Kolinde, oloze ika yasolokele?

³ Kafwe mu 55 C.E., vaka-Kolinde vasakwile kulinga chuma chimwe chachilemu chikuma. Vevwile ngwavo vandumbwavo muYelusalema namuYuleya vapwile nakumona ukalu nauhutu, kaha vevwile nawa ngwavo vandumbwavo veka vapwile nakukungulula jimbongo mangana vatumine ava vandumbwavo vapwile muukalu. Muchima wavo wazumbu nalikoji wavalingishile vafwile kukungulula vyuma  vimwe nakuhulisa nawa kaposetolo Paulu avalweze mwakulingila ngocho. Kaha Paulu atumine jindongi kuchikungulwilo nakutongola nawa Chituse mangana avakafwe kukungulula wana kana. (Koli. 1, 16:1; Koli. 2, 8:6) Oloze omu mwahichile tukweji vavandende, Paulu evwile ngwavo vaka-Kolinde kavalingile vyuma vajinyineko. Ngocho, halwola vapwile nakukungulula wana kuvikungulwilo mangana ukaye kuYelusalema vakiko pamo kanda vachikungulule wana wavo.—Koli. 2, 9:4, 5.

4. Kweseka namazu ahali Wavaka-Kolinde 2, 8:7, 10, 11, Paulu akolezezele vaka-Kolinde valinge ika?

⁴ Chuma vajinyine kulinga vaka-Kolinde chapwile chachilemu chikuma, kaha naPaulu avasangejekele halufwelelo lwavo namuchima wavo wazumbu. Oloze avakolezezele vakumisenga kulinga vyuma vize navaputukanga kulinga. (Tangenu Wavaka-Kolinde 2, 8:7, 10, 11.) Chuma chasolokele kuli vaka-Kolinde chatunangula nge navaka-Kulishitu vakushishika vanahase kuchiwana kupwa chachikalu kutesamo vyuma vyamwaza vanajinyi kulinga.

5. Vihula muka natukumbulula?

⁵ Ngana muze chapwile kuli vaka-Kolinde, nayetu chinahase kutukaluhwila kutesamo vyuma tunajinyi kulinga. Mwomwo ika? Mwomwo yakuhona kukupuka. Tunahase kulangisa kutesamo vyuma tuli nakufwila kulinga. Chipwe kunahase kusoloka vyuma vize vinahase kutuhonesa kutesamo vyuma vize twasakwile kulinga. (Kwambu. 9:11; Loma 7:18) Uno tunahase kukekesa ngachilihi vyuma twasakwile lyehi kulinga nakumona numba nge twatela kuvyalumuna? Kaha vyuma muka twatela kulinga mangana tutesengamo vyuma natusakula kulinga?

6. Vyuma muka vinahase kutulingisa twalumuneko vyuma vimwe twasakwile kulinga?

⁶ Vyuma vimwe vyavilemu tweji kusakulanga kulinga kavyalumukako. Chakutalilaho, nge tunasakula kuzachila Yehova tweji kutwalangaho lika kumuzachila, kaha nawa nge tunengila lyehi muulo kaha twatela kupwa lika vakushishika kuli vaka-mahyetu. (Mateu 16:24; 19:6) Oloze vyuma vyeka tweji kusakulanga tunahase kuvyalumuna. Mwomwo ika? Mwomwo yakwalumuka chavyuma. Vyuma muka navitukafwa tusakulenga kanawa vyakulinga?

7. Vyuma muka twatela kulomba, kaha mwomwo ika?

⁷ Lombenu Yehova amihane mangana. Yehova ahwiminyinyine Yakova asoneke ngwenyi: “Kachi nge mutu umwe hali enu nahono mangana, alombenga lika Kalunga, mwomwo eji kuhananga vosena namuchima umwe.” (Yako. 1:5) Tunahase kwamba ngwetu tuvosena mujila yimwe ‘twahona mangana.’ Shikaho twatela kupendaminanga hali Yehova hakusakula vyakulinga nahakukekesa vyuma vize twasakwile mangana tumone numba nge twatela kuvyalumunako mweka. Kaha Yehova mwatukafwa mangana tusakule kanawa vyakulinga.

8. Vyuma muka twatela kulinga shimbu kanda tusakule vyakulinga?

⁸ Hehwojolenu. Hehwojolenunga muMazu aKalunga, nakutanga mikanda yamuliuka lyetu nakulwezako vatu vaze mwafwelela vamikafwe. (Vishi. 20:18) Chapwa chachilemu kulinga ngocho shimbu kanda mwalumune milimo mweji kuzatanga, chipwe kwalukila kuchihela cheka chipwe kutachikiza seteko mwatela kukumina mukutanga mangana mukawane vyakulikafwa navyo hakuzata mulimo wakwambulula.

9. Uno kutachikiza ovyo tunakulingila vyuma vimwe nachitukafwa ngachilihi?

⁹ Shinganyekenu ovyo muli nakusakila kulinga vyuma kana. Chuma chachilemu asaka Yehova shina muchima uze weji kutulingisanga tufwile kulinga vyuma vimwe. (Vishi. 16:2) Asaka tupwenga vakashishi muvyuma vyosena. Shikaho nayetu nawa, nge tunakusaka kulinga vyuma vimwe twatela kutachikiza ovyo tunakulingila vyuma kana, kaha vakwetu nawa vatela kutachikiza ovyo tuli nakuvilingila. Oloze nge katwatachikijile kanawa ovyo tunakusakila kulinga vyuma kanako, kaha chinahase kutukaluhwila kulinga vyuma twashinganyekele kutesamo. Chakutalilaho, ndumbwetu walunga wamukweze mwalitomena kuzata upayiniya washimbu yosena. Oloze mukuhita chalwola nachimukaluhwila kutesamo jola jasakiwa, nakuhona jino kupwa wakuwahilila hakuzata mulimo wamuwande. Pamo ashinganyekele  ngwenyi azangile kuzata upayiniya mwomwo yakuzanga Yehova, nyi pamo azachile mulimo kana mwomwo yakufwila kusuulwisa visemi jenyi chipwe kufwila kulondezeza mutu umwe.

10. Chuma muka chinahase kukafwa mutu mangana alumuneko vyuma vimwe?

¹⁰ Achishinganyekenu hali mutu uze ali nakulinangula Mbimbiliya kaha mwafwila kulitwamina kunwa makanya. Muvyalumingo vyavindende mweseka kulitwamina kunwa makanya oloze kutwala muze mwaputuka cheka. Mukuhita chalwola himwalitwamina jino kunwa makanya. Chuma chinakafwe mutu kana alitwamine kunwa makanya, shina kuzanga Yehova nakufwila kumwivwisa kuwaha.—Kolo. 1:10; 3:23.

11. Mwomwo ika mwatela kutachikijila vyuma munalitomena kulinga?

¹¹ Tachikizenu vyuma munalitomena kulinga. Kachi nge namutachikiza kanawa vyuma munalitomena kulinga, kaha nachimikafwa muvitesemo. Chakutalilaho, pamo munajinyi kutanganga Mbimbiliya hakumbi hakumbi, oloze kachi nge kamweshi kunoneka mwakuyitangilako, kaha kamweshi kutesamoko. * Kaha nawa tulama muchikungulwilo vanahase kulikasa kufunga chikuma utanga, oloze mukuhita chalwola navawana nge kavateselemo vyuma valikashile kulingako. Hakusaka vatesemo vyuma valikashile, vatela kulihulisa vihula vyakufwana nge vino: “Vandumbwetu muka vaze vali nakusakiwa chikuma kuvafunga? Uno tunanoneka lwola lwakuvatambukilanga tahi?”

12. Vyuma muka twatela kulinga, kaha mwomwo ika?

¹² Tachikizenu hakumina ngolo jenu. Naumwe wauchi nahase kupwa nangolo, najimbongo nalwola lwakuzata vyeshovyo mwasaka kulingako. Shikaho mwatela kutachikiza hakumina ngolo jenu. Nge chinahase kaha munahase kwalumunako vyuma mwashinganyekele kulinga vize munamono ngwenu kamweshi kuhasa kuvitesamoko. (Kwambu. 3:6) Kachi nge vyuma vimwe vize mwasakwile kulinga munavikekesa kanawa nakuvyalumunako mujila yeka nakumona jino ngwenu munalizange kulinga vyuma kana, kaha vishina vitatu natushimutwila navimikafwa mutesemo vyuma munasakula kulinga.

13. Chuma muka twatela kulinga mangana tupwenga nangolo jakulinga vyuma tunasakula?

¹³ Lombenu Yehova amihane ngolo jakulinga vyuma munasakula. Kalunga nahase kumihana “ngolo jakulinga” vyuma munasakula. (Fwili. 2:13) Shikaho, lombenu Yehova amihane shipilitu yenyi yajila mangana yimikafwe. Numba nge munamono ngwenu Yehova kakumbulwile washi kulomba chenuko, mwatela kutwalaho lika kulomba. Yesu ambile ngwenyi: ‘Lombenunga lika [shipilitu yajila] kaha navakamihanayo.’—Luka 11:9, 13.

14. Uno lundongi lwahali Vishimo 21:5, lunahase kumikafwa ngachilihi mulinge vyuma munalitomena?

¹⁴ Shinganyekenu jijila jize najimikafwa mutesemo vyuma munajinyi. (Tangenu Vishimo 21:5.) Hakusaka kutesamo mulimo uze munalitomena, mwatela kushinganyeka jijila jamwakuzachila mulimo kana. Kufumaho, mwatela kukavangiza jijila kana. Chochimwe nawa, kachi nge munajinyi kulinga chuma chimwe, kaha shinganyekenu jijila jize mwatela kukavangiza mangana mutesamo chuma munalitomena kulinga. Kachi nge munasakula kulinga chuma chachinene, kaha mwatela kuvangila kulingako vyuma vyavindende vize navimikafwa mukatesemo chuma chachinene chize munalitomena kulinga. Paulu akolezezele vaka-Kolinde valamenga jimbongo jimwe “Halikumbi lyatete muchalumingo hichalumingo” mukutela kumuvandamina ikiye akahete numba jino vakakungulule. (Wavaka-Kolinde 1, 16:2) Kachi nge namulinganga tuvyuma twatundende tuze natumikafwa mukatesemo vyuma munajinyi kulinga, kaha nachimikafwa muhone kumona vyuma munalitomena kulinga kupwa vyavikalu chikuma.

15. Vyuma muka mwatela kulinga nge munasakula lyehi vyakulinga?

¹⁵ Nge namusonekanga vyuma munajinyi, kaha nachimyashiwila kutesamo vyuma munasakula. (Koli. 1, 14:40) Chakutalilaho, tulama vavalweza kusakulanga kalama umwe uze mwasonekanga  vyuma vyosena vize navalivwasana, nakusoneka nawa mutu uze mwakalinga vyuma kana nakusolola likumbi mwakakumisa kuzata mulimo kana. Kachi nge tulama navalinganga ngocho kaha nachivakafwa vatesemo vyeshovyo vyuma navalikasa. (Koli. 1, 9:26) Shikaho, nayenu nawa munahase kulinga ngocho mukala chuma namusaka kulinga mukuyoya chenu. Chakutalilaho, munahase kusoneka mukana wavyuma namuzatanga hakumbi hakumbi, nakuvinoneka kweseka namuze namuvizachilamo. Echi nachimikafwa mutesengamo vyuma namulitomenanga kulinga nakuvizata nawa mulwola.

16. Chuma muka twatela kulinga hakusaka tutesemo vyuma tunalitomena, kaha mukanda Wavaka-Loma 12:11 unashindakanya ngachilihi chishina kana?

¹⁶ Zatenu nangolo jenu josena. Mwatela kuzata nangolo numba mulinge vyuma munajinyi nakuvitesamo. (Tangenu Wavaka-Loma 12:11.) Paulu alwezele Chimoteu ngwenyi, hakusaka apwenga muka-kunangula wakwipangweji, atelelele ‘kulihakaho’ nakupwa nawa ‘nalukakachila.’ Nayetu tunahase kukavangiza mazu kana omu natusakulanga kuzata milimo yakushipilitu.—Chimo. 1, 4:13, 16.

17. Uno mukanda Wavaka-Efwesu 5:15, 16 naumikafwa ngachilihi mutesemo vyuma munajinyi kulinga?

¹⁷ Zachisenunga kanawa lwola lwenu. (Tangenu Wavaka-Efwesu 5:15, 16.) Sakulenu lwola lwakulinga vyuma munalitomena kulinga, kaha kamwatela kulwalumunako. Kanda kuvandamina lwola namukamona ngwenu lunatemo kuzata mulimo kanako mwomwo chinahase kupwa chachikalu kuwana lwola kana. (Kwambu. 11:4) Kaha nawa kanda kwechelela vyuma vize kavyapwa vyavilemu vimyenyekele lwola nangolo jenu nakuhona jino kulinga vyuma vyavilemu chikumako. (Fwili. 1:10) Nge chinahase, kaha mwatela kulinganga vyuma munajinyi halwola luze vakwenu kaveshi kuhasa kumitangulako. Kaha nawa munahase kulweza vakwenu vejive ngwavo munakusakiwa lwola lwakuzata milimo yenu chakuzeneka wakumitangula. Halwola lwangana munahase kujima shinga yenu. *

18-19. Chuma muka chinahase kumikafwa mutwaleho lika kulinga vyuma mwalitomena chamokomoko nakala ukalu?

¹⁸ Shinganyekenunga havyuma vyamwaza navikafumamo omu navikatesamo vyuma mwajinyine. Vyuma vyeji kufumanga mukala chuma munajinyi kulinga tunahase kuvifwanyisa kukuheta kuchihela kuze munapunga nakuya. Kachi nge muli nakufwila chikupu kuheta kuchihela muli nakuya, kaha kamweshi kuzeyako numba nge jila munakuhita vanayisoko. Mwomwo munahase kutonda jila yeka yize yili nakuya kuchihela kana. Chochimwe nawa, nge natushinganyekanga havyuma vyamwaza natukalivwisa omu navikatesamo vyuma twajinyine, kaha nachitukafwa tufwile kuzata nangolo mangana tutesemo vyuma kana chamokomoko nakala ukalu.—Ngale. 6:9.

¹⁹ Kusakula kanawa vyakulinga nakuvitesamo chapwa chachikalu, oloze Yehova nahase kumikafwa mupwenga vakunangakana nakumihana ngolo mangana mutesemo vyuma mwajinyine.