Kushikulu kaselwa apwile mutu uze alaminenga zuvo chipwe vikumba vyamukwavo. MuchiHepeleu nachiHelase lizu lize valumuna ngwavo “kaselwa,” kakavulu lyatalisa kuli muka-kulama chipwe mukulwane wakuzuvo.

Omu Yosefwe mwanaYakova apwile muufunge muEjipitu, vamutongwele kupwa kaselwa chipwe muka-kulama zuvo yakaka yenyi. Kaha kaka yenyi amuhanyine kulama ‘vyuma vyenyi vyosena mumavoko enyi.’ (Kupu. 39:2-6) Kutwala muze, omu Yosefwe apwile muka-kuyula wamunene muEjipitu, atongwele mutu wakumulamina zuvo yenyi.—Kupu. 44:4.

Mumakumbi aYesu nawa, vanjimi vavulilenga kutwama mujinganda jize japwilenga kwakusuku namande avo. Ngocho, vatongwelenga tuselwa mangana vatalenga milimo yosena navazatanga vatu vaze vengishile milimo.

Uno Kaselwa atelelele kupwa mutu wakufwana ngachilihi? Muka-kusoneka wamuLoma wamulikulukaji lyamyaka lyakulivanga walijina lyaColumella, ambile ngwenyi, ndungo uze vatongwelenga kupwa muka-kulama chipwe kaselwa shina “mutu uze atachikijile kanawa mwakuzachila milimo.” Mutu kana nawa atelele kupwa uze “mwahasa kutwaminyina kanawa vaka-kuzata mangana vazate kanawa, oloze katelelele kulinga ngocho mujila yaukenyako.” Ou muka-kusoneka ambile nawa ngwenyi: “Chuma chikwavo chapwile chachilemu kuli kaselwa, shina kuhona kulimona nge atachikiza chikuma milimo yosena. Oloze atelelele kufwila lika kulinangula milimo yeka yayivulu.”

Mazu aKalunga esekesa kaselwa namulimo uze eji kuzatanga, kumilimo yize yatwama muchikungulwilo chavaka-Kulishitu. Chakutalilaho, kaposetolo Petulu akolezezele vaka-Kulishitu vazachisenga uhashi wavo uze avahana Kalunga ‘hakuzachila vakwavo kupwa tuselwa vamwenemwene vaze vasolwela likoji lyalinene lyaKalunga.’—Petu. 1, 4:10.

Yesu naikiye azachishile chakutalilaho chakaselwa omu ahanjikile mazu atwama hali Luka 16:1-8. Kahomu ahanjikile upolofweto wakuvuluka vinjikizo vize navikasolola hakupwako chenyi mwaMwangana, afwelelesele tumbaji twenyi ngwenyi mwakatongola “ndungo wakushishika wakuzangama” chipwe ngwetu “kaselwa wakushishika.” Kaha mulimo waunene mwakazata ou kaselwa shina, wakuhana vaka-kukavangiza Kulishitu vyakulya vyakushipilitu mumakumbi akukuminyina. (Mateu 24:45-47; Luka 12:42) Twatokwa chikuma hakupwa hamukana wavatu vaze vali nakulivwisa kuwaha kutambula vinoma vize vyeji kujikijisanga lufwelelo lwetu, vize vali nakutuhana kuli ou kaselwa wakushishika mukaye kosena.