1-2. (a) Chuma muka cheji kutukafwanga tulipike naukalu tweji kumonanga mukuyoya chetu? Lumbununenu. (b) Vyuma muka natushimutwila muchihande chino?

PAMO mwahitaho lyehi muukalu chipwe mucheseko chimwe nakwamba ngwenu, “kachi nge Kalunga kungukafwa chiku kachi kangwahashile kumikako.” Etu vavavulu twahanjikaho lyehi mazu kana. Pamo mwahanjikile mazu kana mwomwo yakumona omu mwomikile mumisongo yayinene chipwe mwomwo yakufwisa mutu mwazanga. Omu namwanuka ukalu kana kaha munahase kumona ngwenu mwahashile kumika mwomwo shipilitu yaYehova yamihanyine “ngolo jakuhambakana jize javatu.”—Koli. 2, 4:7-9.

² Kaha nawa tuvosena twasaka shipilitu yajila yaYehova yitukafwe mukaye kano kakuhuka. (Yowa. 1, 5:19) Kaha nawa tweji kulipikanga “namazavu avashipilitu vakuhuka.” (Efwe. 6:12) Shikaho natushimutwila hajijila jivali jize najisolola omu shipilitu yajila yeji kutukafwanga tulipike naukalu kana. Kaha nawa natushimutwila omu yeji kutukafwanga mangana tunganyale.

3. Yehova eji kutukafwanga ngachilihi tumike muukalu?

³ Shipilitu yaYehova yeji kutuhananga ngolo chipwe kutujikijisa tuzate kala milimo chamokomoko naukalu tuli nakuhitamo. Kaposetolo Paulu apendaminyine ‘hangolo jaKulishitu,’ ngocho atwalileho lika kuzachila Yehova chamokomoko naukalu apwile nakumona. (Koli. 2, 12:9) Omu Paulu ayile haungeji waumishonali wamuchivali, azachile mulimo wenyi wakwambulula natwima nakuzatako milimo yeka yamukuyoya mangana awane  mwakuyoyela. Atwamine muKolinde hembo lyaAkwila naPilishila vaze vapwile vaka-kutunga jimbalaka. Hakuwana nge Paulu atachikijile mulimo wakutunga jimbalaka, ngocho azachilenga navo makumbi amwe. (Vili. 18:1-4) Shikaho, shipilitu yajila yakafwilenga Paulu apwenga nangolo jakuzata mulimo wakwambulula nawakutunga jimbalaka.

4. Kweseka namukanda Wavaka-Kolinde 2, 12:7b-9, ukalu muka apwile nakulipika nawo Paulu?

⁴ Tangenu Wavaka-Kolinde 2, 12:7b-9. Kweseka nachisoneka chino, Paulu atalikishile mulihi hakwamba ngwenyi alipikilenga ‘namungonga mumujimba’ wenyi? Kachi nge mungonga unamituvu namwivwa kukola chikuma. Shikaho Paulu apwile nakulumbununa ngwenyi apwile naukalu uze wamuyanjishilenga kwijiva nge mungonga. Avulukile ukalu kana ngwenyi, “kangelo kaSatana” uze apwile ‘nakumuvetanga.’ Pamo Satana chipwe vandemone jenyi keshi vakiko vatuvile Paulu uze mungonga wachifwanyisa mumujimba wenyiko. Oloze omu vamwene “mungonga” uze apwile nawo Paulu, pamo vaushinjikilenga mumujimba waPaulu mujila yachifwanyisa nakumulingisa evwenga kukola chikuma. Vyuma muka alingile Paulu?

5. Uno Yehova akumbulwile ngachilihi kulomba chaPaulu?

⁵ Hakavanga, Paulu asakile Yehova amufumise uze “mungonga” wachifwanyisa. Ambile ngwenyi: “Ngwamulembelelele Mwata [Yehova] mapapa katatu ngwami mungonga kanou ungufume.” Numba tuhu Paulu alombele mangana uze mungonga umufume oloze kawamufumineko. Uno echi chasolola nge Yehova kakumbulwile kulomba chaPauluko tahi? Nduma, achikumbulwile. Yehova kakumishile ukalu waPauluko, oloze amuhanyine ngolo mangana omike hakumona ukalu kana. Yehova ambile ngwenyi: “Ngolo jami vanajikupwisa mukuhehela chove.” (Koli. 2, 12:8, 9) Chikupu vene, Kalunga akafwile Paulu atwaleho lika kupwa wakuwahilila nakuunda.—Fwili. 4:4-7.

6. (a) Uno Yehova nahase kukumbulula ngachilihi kulomba chetu? (b) Mazu muka amuvisoneka vili mupalangalafu aze nawamijikijisa?

⁶ Kutala nayenu mwalembelelaho lyehi Yehova amifumise muukalu ngana muze alingile Paulu tahi? Kachi nge mwalembelelele Yehova akumise ukalu wenu, oloze ukalu kana kawakumineko chipwe waputukile jino kutohwelako, kutala mwashinganyekele ngwenu pamo Yehova kamivwililile kuwahako tahi? Nge mukiko, kaha anukenu chakutalilaho chaPaulu. Tachikizenu ngwenu, Yehova mwakumbulula kulomba chenu ngana muze akumbulwile chaPaulu. Pamo Yehova keshi kukumisa ukalu wenuko, oloze nahase kumihana shipilitu yenyi yajila yimikafwe mupwenga vakumika. (Samu 61:3, 4) Vanahase ‘kumimbila hamavu’ oloze Yehova keshi kumisezako.—Koli. 2, 4:8, 9; Fwili. 4:13.

7-8. (a) Tunahase kufwanyisa ngachilihi shipilitu yajila kupeho? (b) Petulu alumbunwine ngachilihi omu yeji kuzatanga shipilitu yajila?

⁷ Mujila muka yikwavo yize shipilitu yajila yeji kutukafwilangamo? Tunahase kufwanyisa shipilitu yajila kupeho yamwaza yize yinahase kupekumuna wato hakalungalwiji mangana uhete kanawa kuze uli nakuya chamokomoko namakimba. Chochimwe nawa, shipilitu yajila yeji kutukafwanga tutwaleho lika kuzachila Yehova chamokomoko naukalu natumona palanga nomu natukaheta mukaye kakahya.

⁸ Hakuwana nge kaposetolo Petulu apwile muka-kuta vaishi, ngocho atachikijile vyavivulu kutalisa kukutambukisa mato hakalungalwiji. Shikaho, omu Petulu alumbunwine jila yeji kuzachilangamo shipilitu yajila, azachishile lizu lize lyatalisa kukutambukisa wato hakalungalwiji. Asonekele ngwenyi: “Kumyaka yosena kakwapwile upolofweto wejile mukusaka chamutuko, oloze vatu vahanjikile vyakuli Kalunga omu vavatwaminyinyine nashipilitu yajila.” Lizu lyachiHelase lize valumuna ngwavo ‘kutwaminyina’  lyatalikisa nawa “kukutetekela chipwe kukutambukisa.”—Petu. 2, 1:21.

9. Vyuma muka alumbunwine Petulu hakwamba ngwenyi ‘kutwaminyina’?

⁹ Vyuma muka alumbunwine Petulu hakwamba ngwenyi ‘kutwaminyina’? Luka uze asonekele mukanda waVilinga azachishile lizu kaneli lyachiHelase lyakutalikisa kuwato uze ‘vanakupekumuna’ napeho. (Vili. 27:15) Mutu umwe uze alinangula chikuma vyaMbimbiliya ambile ngwenyi, omu Petulu ambile ngwenyi vaka-kusoneka Mbimbiliya vavatwaminyinyine nashipilitu yajila, azachishile lizu lize lyanukishile vatu vashinganyeke vyakutambuka hakalungalwiji namato. Petulu alumbunwine ngwenyi, ngana muze wato veji kuushinjikanga chipwe kuupekumuna kupeho palanga nomu naukaheta kuze uli nakuya, mukiko nawa vapolofweto navaka-kusoneka Mbimbiliya vavatwaminyinyine vatesemo mulimo wavo. Muka-kulinangula Mbimbiliya uze twavulukanga ambile nawa ngwenyi: “Vaka-kusoneka Mbimbiliya vapwile kwijiva nge mato aze vanakasununa mahina awo mangana atambuke kanawa. Shikaho, ava vaka-kusoneka vakavangijilenga vyuma vyosena yavalwezelenga shipilitu yajila. Yehova azachile mulimo wenyi, hakuvahana shipilitu yenyi yajila chipwe ‘peho’ yachifwanyisa. Vaka-kusoneka nawa vazachile mulimo wavo mwomwo vazachile kweseka nomwo yavatwaminyinyine shipilitu yajila.

10-11. Vyuma muka vivali vize twatela kulinga numba vatutwaminyine kushipilitu yajila? Lumbununenu.

¹⁰ Makumbi ano, Yehova keshi nakuzachisa shipilitu yenyi yajila mangana vatu vasoneke mikanda yamuMbimbiliyako. Chipwe ngocho, shipilitu yajila yichili nakukafwa vatu jaKalunga oholyapwa. Yehova achili nakuzata mulimo wenyi. Vyuma muka twatela kulinga mangana shipilitu yajila yitutwaminyine? Twatela kutwalaho lika kulinga vyuma asaka Kalunga. Natuhasa ngachilihi kulinga ngocho?

¹¹ Chakutalilaho, hakusaka peho yinganyalise muka-kutambukisa wato, atela kulinga vyuma vino vivali. Chatete atela kutalikisa wato wenyi muze yili nakuya peho, mwomwo kachi nge wato navausulika muchau kaha kaveshi kuushinjika kupehoko. Chamuchivali, atela kukasununa mahina akuwato. Mwomwo nge peho nayihuhwa  oloze kakasunwine mahinako mangana peho yiliveteho, kaha wato kaweshi kutambukako kaha noku mwaya kwauchi. Chochimwe nawa, tunahase kumika kuvangila kaha nge shipilitu yajila nayitukafwa. Hakusaka tunganyale kushipilitu kana, twatela kulinga vyuma vino vivali. Chatete, twatela kulinga vyuma vize yeji kututwaminyinanga shipilitu yajila. Chamuchivali, twatela kutanduula mahina etu achifwanyisa, kulumbununa nge twatela kuzata nangolo jetu josena milimo yakushipilitu. (Samu 119:32) Kachi nge natulinga vyuma kanevi, kaha shipilitu yajila nayituhana ngolo jize najitukafwa tutwaleho lika kuzachila Kalunga palanga nomu natukengila mulifuchi lyalihya.

12. Vyuma muka natushimutwila?

¹² Tunashimutwila lyehi hajijila jivali jize shipilitu yajila yeji kutukafwilangamo. Shipilitu yajila yeji kutuhananga ngolo nakutukafwa tupwenga vakushishika chamokomoko naukalu natuhitamo. Kaha nawa shipilitu yajila yeji kututwaminyinanga nakutukafwa tulinge vyuma vize asaka Kalunga nakukatulingisa tukatambule kuyoya chahaya myaka yosena. Shikaho tushimutwilenu jino havyuma viwana vize twatela kulinga mangana shipilitu yajila yitukafwe.

13. Kweseka namukanda WaChimoteu 2, 3:16, 17, Visoneka vinahase kutukafwa ngachilihi, kaha vyuma muka twatela kulinga?

¹³ Chatete, linangulenunga Mazu aKalunga. (Tangenu WaChimoteu 2, 3:16, 17.) Yehova azachishile shipilitu yenyi yajila “yihake” vishinganyeka vyenyi muvishinganyeka vyavaka-kusoneka Mbimbiliya. Nge natutanganga Mbimbiliya nakushinganyekanga havyuma tunatange, kaha Mazu aKalunga nawengila mumichima namuvishinganyeka vyetu. Mazu vahwima kuli Kalunga eji kutukafwanga twalumune vilinga vyetu mangana tulinge mwaya muchima waKalunga. (Hepe. 4:12) Nge tuli nakusaka shipilitu yajila yitukafwe kaha twatela kuwanangako lwola lwakulinangula Mbimbiliya shimbu yosena nakushinganyekanga chikuma havyuma tunatange. Kaha Mazu aKalunga nawatukafwa tupwenga nahanjikiso yamwaza navilinga vyamwaza.

14. (a) Mwomwo ika natwambila ngwetu shipilitu yajila yeji kupwanga kukunguluka? (b) Vyuma muka twatela kulinga mangana tunganyalenga kukukunguluka?

¹⁴ Chamuchivali, lemeselenunga hamwe Kalunga. (Samu 22:22) Shipilitu yaYehova yeji kupwanga kukukunguluka. (Kuso. 2:29) Mwomwo ika tunambila ngocho? Mwomwo omu tweji kukukungulukanga tweji kulombanga Yehova atuhane shipilitu yajila, kaha nawa tweji kwimbanga myaso yaWangana yize yapendamina haMazu aKalunga, nakwivwilila nawa kuvihande vyakufuma muMbimbiliya vize veji kuhanjikanga vandumbwetu vamalunga vaze vatongola nashipilitu yajila. Kaha shipilitu kana yikiko nawa yeji kukafwanga vandumbwetu vamapwevo vawahise kanawa vihande vyavo nakuvihana mujila yamwaza. Chipwe ngocho, hakusaka tunganyale kushipilitu yajila, twatela kuliwahishilanga chimweza vyakukunguluka nakwazanamo. Kulinga ngocho, nachitukafwa tunganyale kukukunguluka.

15. Uno shipilitu yajila yeji kutukafwanga ngachilihi mumulimo wakwambulula?

¹⁵ Chamuchitatu, azanenunga mumulimo wakwambulula. Kachi nge natuzachisanga Mbimbiliya mumulimo wakwambulula nakunangula vatu, kaha natusolola ngwetu tuli nakusaka shipilitu yajila yitukafwe. (Loma 15:18, 19) Hakusaka munganyale chikuma, mwatela kwazananga mumulimo wakwambulula nakuzachisanga Mbimbiliya. Kachi nge natuzachisanga jijila jakwambulwilamo jize vanakusololanga muMukanda waKukunguluka chaChiyoyelo naMulimo, kaha natutachikiza kanawa mwakuhanjikila navatu muwande.

16. Jila yimwe muka yayashi yakutambwilamo shipilitu yajila?

¹⁶ Chamuchiwana, lombenunga Yehova. (Mateu 7:7-11; Luka 11:13) Kulomba hijila yimwe yayashi yakutambwilamo shipilitu yajila kuli Kalunga. Kakweshi chuma numba chimwe nachihonesa Yehova kwivwilila kukulomba chetu chipwe kuhonesa shipilitu yaKalunga kuheta kuli etuko. Satana chipwe njele, kavyeshi  kuhasa kutuhonesa kutambula shipilitu yajilako. Twatela kulomba ngachilihi numba tutambule shipilitu yajila? Hakusaka tukumbulule chihula kana, tushimutwilenu hachakutalilaho chize vasoneka kaha mumukanda waLuka. *

17. Chakutalilaho ahanjikile Yesu chize vasoneka hali Luka 11:5-9, 13, chatukafwa vyuma muka kutalisa kukulomba?

¹⁷ Tangenu Luka 11:5-9, 13. Chakutalilaho ahanjikile Yesu, chasolola jila twatela kulombelamo kuli Yehova atuhane shipilitu yajila. Muchakutalilaho kana, uze lunga ayile nakulomba, vamuhanyine vyuma alombele “mwomwo yaluzema lwenyi.” Kevwile sonyi kulomba sepa lyenyiko numba tuhu mwapwile mukachi kaufuku. (talenu vishina vyakulinangula vyamumukanda waLuka 11:8 muMukanda waKukunguluka chaChiyoyelo naMulimo waJuly 2018 li. 4) Uno Yesu hakuzachisa echi chakutalilaho, apwile nakutunangula chishina muka kupandama kukulomba? Ambile ngwenyi: “Lombenunga lika, kaha navakamihana. Tondenunga lika, kaha namukawana. Ngongomwezenunga lika, kaha navakamisokolwela.” Chishina muka natulinangulako? Hakusaka shipilitu yajila yitukafwe, twatela kuyilomba kuli Kalunga naluzema.

18. Kweseka nachakutalilaho ahanjikile Yesu, mwomwo ika twatela kufwelela ngwetu Yehova mwatuhana shipilitu yajila?

¹⁸ Chakutalilaho ahanjikile Yesu chatukafwa tutachikize ovyo Yehova eji kutuhanyinanga shipilitu yajila. Uze lunga ayile nakulomba naufuku, asakile kuzumbula ngeji yenyi. Afwililile kuhana ngeji yenyi vyakulya oloze kapwile navyoko. Yesu ambile ngwenyi uze mukwavo ahindukile nakumuhana mbolo alombele mwomwo yaluzema apwile nalwo. Chishina muka apwile nakulumbununa Yesu? Nge mutu wakuhona kukupuka mwahinduka mukachi kaufuku nakukafwa mukwavo, kahanyi Yehova Setu wamwilu wakeke, mwahambakanamo kuhana shipilitu yajila kuli vaze navamulombayo naluzema. Shikaho, nge natulomba Yehova atuhane shipilitu yajila, kaha twatela kufwelela ngwetu mwakukumbulula kulomba chetu.—Samu 10:17; 66:19.

19. Mwomwo ika twatela kufwelela ngwetu Satana natumufungulula?

¹⁹ Twatela kufwelela ngwetu numba tuhu Satana ali nakufwila kutuhungumwisa, oloze natumufungulula. Mwomwo ika? Mwomwo shipilitu yajila yeji kutukafwanga mujijila jivali. Jila yatete, shipilitu yajila yeji kutuhananga ngolo jakutukafwa tufungulule vyeseko. Jila yamuchivali, shipilitu yajila yeji kutukafwanga tuzachile Yehova palanga nomu natukengila mulifuchi lyalihya. Shikaho, tufwilenu lika kukilikita chikuma mangana shipilitu yajila yitukafwe.