1. Kweseka naMateu 28:18-20, Yesu alwezele tumbaji twenyi valingenga ika?

OMU Yesu asangukile, ayile nakuliwana natumbaji twenyi vaze vapwile muNgalileya, mwomwo kwapwile chuma chachilemu chize asakile kuvalweza. Chuma muka? Chuma kana vachisoneka hali Mateu 28:18-20.—Tangenu.

2. Vihula muka natushimutwila?

² Lushimbi lwaYesu lwakunangula vatu vapwenga tumbaji, vatela kulukavangiza navangamba jaKalunga makumbi ano. Shikaho natushimutwila vihula vitatu kupandama kulushimbi kana. Chatete, chuma muka chikwavo twatela kulinga nge tuli nakunangula kambaji wamuhya vyuma asaka Kalunga? Chamuchivali, uno vaka-kwambulula vosena muchikungulwilo vanahase kukafwa ngachilihi vilongesa vyaMbimbiliya vazovoloke? Chamuchitatu, natukafwa ngachilihi vandumbwetu vaze vazeya mangana vaputuke cheka kuzata mulimo wakunangula vatu vapwenga tumbaji?

3. Uno kukavangiza lushimbi lwaYesu mwaliweza kulinga ika?

³ Yesu ahanjikile hatoma ngwenyi twatela kunangula vatu vyuma vize atulweza ikiye. Chipwe ngocho, twatela kwanukanga chishina chimwe chachilemu. Yesu kahanjikile ngwenyi, ‘Mukavanangule vyuma vyosena vize ngunamilweze[ko].’ Oloze ambile ngwenyi: Mukavanangule “kulamanga vyuma vyosena vize ngunamilweze.” Shikaho, nge tuli nakunangula mutu Mbimbiliya, katwatela kukumina hakumunangula kahako, oloze twatela kumukafwa nawa atachikize mwakuzachishila vyuma ali nakulinangula mukuyoya chenyi. (Vili. 8:31) Mwomwo ika?

4. Uno kulama lushimbi chalumbununa kulinga ika? Hanenu chakutalilaho.

 ⁴ ‘Kulama’ lushimbi chalumbununa kulukavangiza chipwe ngwetu kulwononoka. Hakusaka tulumbunune omwo tunahase kunangwila mutu alame vyuma atunangwile Kulishitu, talenu chakutalilaho chino. Uno muka-kunangula vatu kutambukisa jiminyau eji kuvanangulanga ngachilihi mangana vakavangizenga jishimbi jahamukwakwa? Ou muka-kunangula eji kuvangilanga kuvanangwila jishimbi kana mushikola. Oloze hakusaka vaka-shikola vatachikize mwakujikavangijila kanawa, atela nawa kuvatwala mumukwakwa muze muli jiminyau jajivulu. Mwomwo ika? Mangana avakafwe kuzachisa vyuma vanalinangula mushikola. Chishina muka natulinangula kuchakutalilaho kana?

5. (a) Kweseka naYowano 14:15 naWaYowano 1, 2:3, vyuma muka twatela kunangulanga vilongesa jetu valingenga? (b) Hanenu vyakutalilaho vyakusolola jijila tunahase kuvakafwilamo.

⁵ Omu tweji kunangulanga vatu Mbimbiliya, tweji kuvanangulanga vyuma vize asaka Kalunga ngwenyi tulingenga. Oloze kuli chuma chikwavo twatela kulinga. Twatela kunangula vilongesa jetu vaMbimbiliya vazachisenga vyuma vali nakulinangula mukuyoya chavo. (Tangenu Yowano 14:15; WaYowano 1, 2:3.) Vyuma tweji kulinganga vinahase kukafwa vilongesa jetu vatachikize mwakuzachishila jindongi jamuVisoneka nge vali kushikola chipwe kumilimo chipwe nge vali nakulihizumuna. Tunahase kuvalweza chuma chimwe twalingile mukuyoya chetu chize chasolola omwo kukavangiza jishimbi jamuMbimbiliya chatukingile kuponde, chipwe kutukafwa tusakule vyuma vyamwaza. Kaha nawa nge tuli navo tunahase kuvalombelako, mangana Yehova avahane shipilitu yajila yivatwaminyine.—Yowa. 16:13.

6. Vyuma muka vyaliweza mukunangula vatu valamenga vyuma anangwilenga Yesu?

⁶ Vyuma muka vyaliweza mukunangula vatu valamenga vyuma anangwilenga Yesu? Twatela kukafwa vilongesa jetu vazange mulimo wakunangula vatu vapwenga tumbaji. Vamwe vanahase kwivwa woma kwambulula mujimbu wamwaza. Shikaho twatela kuvatalililanga chikoki, nakuvakafwa vevwishise kanawa muchano wamuMbimbiliya nakupwa nalufwelelo lwakukola. Nge muchano kana unavahete kumuchima, kaha navafwila jino kwambulula mujimbu. Jino twatela kulinga ika, mangana tukafwe vilongesa jetu vazange kwambulilako vakwavo mujimbu wamwaza?

7. Tunahase kukafwa ngachilihi chilongesa chetu azange kwambulilako vakwavo mujimbu wamwaza?

⁷ Tunahase kuhulisa mutu tuli nakunangula Mbimbiliya ngwetu: “Uno kukavangiza vyuma yanangula Mbimbiliya chinakukafwe ngachilihi mukuyoya chove? Kutala washinganyeka ngwove kuli vatu veka vatela kwivwa mujimbu kana tahi? Vyuma muka unahase kulinga mangana uvakafwe?” (Vishi. 3:27; Mateu 9:37, 38) Mulwezenu jitalakiti jetu jize jatwama haVinoma vyaKuzachisa haKunangula, nakumulweza asakuleho jize namono ngwenyi jinahase kukafwa vausoko wenyi chipwe masepa jenyi chipwe vakwavo vaka-milimo. Kaha muhanenu jitalakiti jajivulu jize mwakazachisa. Lihitulwisenu nenyi mwakuhanyina jitalakiti kana kuvatu mujila yakuzangama. Nge vanamwitavila kupwa muka-kwambulula wakuzeneka kumbapachisa, kaha twatela kuya nenyi muwande mangana tumukafwe mwakwambulwila.—Kwambu. 4:9, 10; Luka 6:40.

8. Mwomwo ika chapwila chachilemu chilongesa chetu kuzanga chikuma Kalunga navatu? (Talenu nawa lipwata lyakwamba ngwavo, “ Mwakukafwila Vilongesa Jetu vaMbimbiliya Vazange Kalunga.”)

⁸ Anukenu ngwenu, Yesu atulwezele ngwenyi tunangulenga vatu ‘kulamanga vyuma vyosena’ vize anangwile. Havyuma kana hatwama najishimbi jivali jajilemu, lushimbi lwakuzanga  Kalunga nalwakuzanga vakwetu vatu. Kaha jishimbi kana jikiko jeji kutulingisa tuzate mulimo wakwambulula nakunangula. (Mateu 22:37-39) Mwomwo ika? Mwomwo kuzanga Kalunga navakwavo vatu chikiko nachimulingisa afwile kwambulula mujimbu wamwaza. Chipwe ngocho, vilongesa vamwe vanahase kwivwa woma kwazana mumulimo kana. Oloze twatela kuvafwelelesa ngwetu Yehova mwavakafwa, kaha mukuhita chalwola kaveshi kukevwa cheka woma vatuko. (Samu 18:1-3; Vishi. 29:25) Lipwata lili muno muchihande, linasolola vyuma twatela kulinga mangana tukafwe chilongesa chetu azange chikuma Kalunga. Vyuma muka vatela kulinga vandumbwetu muchikungulwilo mangana vakafwe tumbaji vavahya vazange chikuma Kalunga navakwavo vatu?

9. Uno muka-kulinangula kutambukisa minyau, nahase kulinangula ngachilihi vishina vyavilemu?

⁹ Shinganyekenu cheka hachakutalilaho chamutu uze ali nakulinangula kutambukisa minyau. Vyuma muka mwalinangula nge ali nakutambukisa hamukwakwa wajiminyau jajivulu oku ali namuka-kumunangula? Vyuma vize mwamulweza muka-kumunangula navize mwamona vakwavo vanyamutekenya vali nakulinga. Chakutalilaho, muka-kumunangula nahase kumulweza atale mukwavo nyamutekenya uze nemika minyau mangana mukwavo ahite. Nahase nawa kumwinyikila nyamutekenya uze nakehesako manongo kuchina kumunyika vakwavo hameso, kahechi chinahase kumukafwa nayikiye alinge mwomumwe. Vyakutalilaho kana vinahase kumunangula vishina vyavilemu vize mwakazachisanga nge napu lyehi nyamutekenya.

10. Chuma muka nachikafwa chilongesa chaMbimbiliya azovoloke kushipilitu?

¹⁰ Chochimwe nawa, chilongesa chaMbimbiliya uze naputuka kutambuka mujila yakuya kukuyoya, keshi kulinangula kaha kuli muka-kumunangulako, oloze nakuli vangamba jaYehova veka nawa. Jino chuma muka nachimukafwa azovoloke kushipilitu? Atela kupwanga kukukunguluka. Mwomwo ika? Mwomwo vyuma vyamuVisoneka mwalinangula kukukunguluka navimukafwa apwenga nachinyingi chachivulu, nakuzamisa lufwelelo lwenyi nakuzanga nawa chikuma Kalunga. (Vili. 15:30-32) Kaha nawa nge neza nakukunguluka, muka-kumunangula mwamujimbula kuli vandumbwenyi vaze vali nakumona ukalu uze ali nakumona naikiye. Tukekesenu vyakutalilaho vimwe mwawana muchikungulwilo vize navimukafwa apwenga nazangi yavaka-Kulishitu.

11. Vyakutalilaho muka nahase kuwana chilongesa muchikungulwilo, kaha vinahase kumukafwa ngachilihi?

¹¹ Chilongesa wapwevo uze apwa chisemi wamujike, nahase kumona ndumbwetu wapwevo uze apwa chisemi wamujike. Mwevwa kuwaha hakumona omwo eji kukilikitanga ou ndumbwetu mangana ahase kwiza navana venyi kuZuvo yaWangana. Chilongesa uze ali nakuhona kwecha kunwa makanya nahase kutachikiza ndumbwetu uze apwile naukalu woumwe, oloze jino auhonesele. Ndumbwetu kana mwamulweza omwo kuzanga Yehova chamukafwile ononoke jishimbi jenyi. (Koli. 2, 7:1; Fwili. 4:13) Hanyima yakumulweza mujimbu kana, mwamulweza nawa ngwenyi: “Nayove unahase kwecha kunwa makanya.” Ngocho ou chilongesa mwafwelela jino ngwenyi naikiye nahase kwecha kunwa makanya. Kaha nawa chilongesa wapwevo wakanyike, nahase kumona ndumbwetu wapwevo wakanyike uze apwa wakuwahilila hakupwa Chinjiho chaYehova. Kuwahilila chayou ndumbwetu wakanyike nachilingisa chilongesa afwile kutachikiza ovyo vyamulingisa apwenga wakuwahilila.

12. Mwomwo ika natwambila ngwetu vaka-kwambulula vosena muchikungulwilo vanahase kukafwa vilongesa vyaMbimbiliya?

¹² Nge vilongesa vyaMbimbiliya navatachikiza vaka-kwambulula vakushishika vavavulu, kaha  vyakutalilaho vyavava vaka-kwambulula vinahase kuvakafwa vatachikize omwo chapwa kulama lushimbi lwaKulishitu lwakuzanga Kalunga navakwetu vatu. (Yowa. 13:35; Chimo. 1, 4:12) Kaha nawa ngana muze tunashimutwila lyehi, mutu ali nakulinangula Mbimbiliya nahase kulinangula kuli vaka-kwambulula vaze vali nakulipika naukalu ngana uze ali nakumona ikiye. Vyakutalilaho vyavo navimukafwa amone ngwenyi nahase vene kulinga vyuma vyasakiwa mangana atengamo kupwa kambaji kaKulishitu. (Lushi. 30:11) Vandumbwetu vosena muchikungulwilo vanahase kumukafwa mujijila jakulisezaseza mangana azovoloke. (Mateu 5:16) Vyuma muka mweji kulinganga hauka wenu mangana mukolezeze chilongesa chaMbimbiliya uze neza nakukunguluka?

13-14. Vyuma muka alingile Yesu kuli tumbaji twenyi vaze vazeyele?

¹³ Twatela kukafwanga vandumbwetu vakuzeya mangana vaputuke cheka kukavangiza lushimbi lwaKulishitu lwakunangula vatu vapwenga tumbaji. Vyuma alingile Yesu kuli tumbaji twenyi vaze vazeyele, navitukafwa tutachikize vyuma twatela kulinga nayetu.

¹⁴ Omu Yesu ahetele kusongo yamulimo wenyi, kwakamwihi nakumujiha, vaposetolo “vosena vamusezele, vachinyine.” (Mako 14:50; Yowa. 16:32) Uno Yesu alingile ika kuli ava vaposetolo halwola vazeyele kushipilitu. Kufuma kaha hakusanguka chenyi, alwezele tumbaji vamwe ngwenyi: “Kanda namwivwa womako! Yenu mukalweze vandumbwami [ngwenu ngunasanguka].” (Mateu 28:10a) Yesu kambilile vaposetolo jenyiko. Numba tuhu vakiko vamusezele, oloze avavulukile ngwenyi “vandumbwami.” Avatetelelele nakuvakonekela ngana muze eji kulinganga Yehova.—Vamya. 2, 13:23.

15. Uno twamona ngachilihi vandumbwetu vaze vecha kwambulula mujimbu?

¹⁵ Nayetu nawa twazanga vaze vecha kwambulula mujimbu, mwomwo vapwa vandumbwetu. Tuchili nakwanuka lika milimo vazachililenga Yehova. Vandumbwetu vamwe vaze vazeya vazachililile Yehova hamyaka yayivulu. (Hepe. 6:10) Vandumbwetu kana tuli nakuvashinganyeka. (Luka 15:4-7) Vyuma muka twatela kulinga mangana tusolole ngwetu twavazanga ngana muze alingile Yesu?

16. Natusolola ngachilihi ngwetu twazanga vandumbwetu vakuzeya?

¹⁶ Valanyenu kukukunguluka. Jila yimwe yize Yesu akolezezelemo vaposetolo jenyi shina yakuvalanya kukuliwana. (Mateu 28:10b; Koli. 1, 15:6) Nayetu nawa tunahase kukolezeza vaze vazeya vezenganga kukukunguluka kachi nge kaveshi nakulinga ngochoko. Twatela kwanuka ngwetu vamwe navasakiwa kuvalanya mapapa kakavulu numba jino vezenga. Yesu evwile kuwaha omu tumbaji twenyi vejile kukuliwana kuze avalanyine.—Esekesenuko Mateu 28:16 naLuka 15:6.

17. Vyuma muka twatela kulinga kachi nge ndumbwetu uze azeya kushipilitu neza kukukunguluka?

¹⁷ Vatambwokesenu nachisambo. Yesu atambwokesele tumbaji twenyi nachisambo omu vejile kuli ikiye. Ikiye aputukile kuvahanjikisa. (Mateu 28:18) Vyuma muka twatela kulinga kachi nge ndumbwetu uze azeya kushipilitu neza kuZuvo yaWangana nakukunguluka? Etu yetu twatela kuputuka kumuhanjikisa nakumutambwokesa nachisambo. Hakavanga chinahase kutukaluhwila kwijiva mazu akuhanjika hakusaka tuhone kumwivwisa sonyi. Shikaho tunahase kaha kwamba ngwetu, “Tunawahilila hakukumona.”

18. Tunahase kufwelelesa ngachilihi vaka-kwambulula vakuzeya?

¹⁸ Vafwelelesenunga. Tumbaji twaYesu pamo vashinganyekele ngwavo kaveshi kuhasa kuzata  mulimo wakwambulula mukaye kosenako. Oloze Yesu avafwelelesele ngwenyi: “Ami nangupwanga nayenu makumbi osena.” (Mateu 28:20) Kutala mazu ahanjikile avakafwile tahi? Eyo. Nakushimbula chiku, vaputukile kuya “nakwambulula mujimbu wamwaza.” (Vili. 5:42) Vandumbwetu vakuzeya navakiko vasakiwa kuvafwelelesa. Chinahase kuvakaluhwila kuputuka cheka kuzata mulimo wakwambulula. Shikaho twatela kuvafwelelesa ngwetu kaveshi kuzata mulimo kana ukawavoko. Kaha nge vanalizange lyehi kuya muwande, twatela kuya navo. Nge vanazame lyehi mumulimo wakwambulula, kaha navakatusakwilila hakuvakafwa. Kachi nge natumonanga vaze vanazeye kushipilitu kupwa hivandumbwetu, kaha natulingisa chikungulwilo chetu chizovoloke.

19. Chuma muka twafwila kulinga, kaha mwomwo ika?

¹⁹ Uno mwaka uka naukakuma mulimo wakunangula vatu vapwenga tumbaji? Palanga nakuchikukulwishi chakatwamino kamyaka yino. (Mateu 28:20; talenu Mukana waMazu, “Chikukulwishi chakatwamino kamyaka.”) Kutala natuhasa kutesamo mulimo kana tahi? Eyo, mukiko tuli nakufwila. Tweji kuzachisanga lwola lwetu, nangolo jetu, navikumba vyetu, mangana tuwane vatu “[vamichima] yamwaza yakusaka kuyoya chahaya myaka yosena.” (Vili. 13:48) Nge natulinga ngocho, kaha tuli nakulondezeza Yesu. Ambile ngwenyi: “Kulya chami shina kulinga mwaya muchima wayauze angutumine nakukumisa mulimo wenyi.” (Yowa. 4:34; 17:4) Chuma kana chikiko twafwila kulinga nayetu. Tuli nakusaka kukumisa mulimo uze vatuhana. (Yowa. 20:21) Kaha nawa tuli nakusaka kuzachila hamwe navandumbwetu vosena palanga nakusongo, kuhakilako vene navaze vazeya kushipilitu.—Mateu 24:13.

20. Kweseka naWavaka-Fwilipi 4:13, twatachikiza ngachilihi ngwetu tunahase kutesamo mulimo atuhana Yesu?

²⁰ Kachapwa chachashi kuzata mulimo atuhana Yesuko. Chipwe ngocho, katweshi nakuuzata ukawetuko. Yesu atushikile ngwenyi mwapwanga nayetu. Twapwa “tuvaka-kuzachila hamwe naKalunga,” kaha nawa ‘twalikata naKulishitu’ hakuzatanga mulimo wakunangula vatu vapwenga tumbaji. (Koli. 1, 3:9; Koli. 2, 2:17) Shikaho tunahase kuutesamo. Ocho kuwaha kana kuzata mulimo vatuhana nakukafwa nawa vakwetu valinge mwomumwe enu vayaya!—Tangenu Wavaka-Fwilipi 4:13.