1-2. Tunahase kuzachisa ngachilihi mazu atwama hali Vishimo 4:25? Hanenu chakutalilaho.

ACHISHINGANYEKENU havyakutalilaho vino. Ndumbwetu wapwevo wakashinakaji ali nakushinganyeka havyuma alivwishilenga kuwaha kunyima. Numba tuhu ali nakumona ukalu wauvulu oholyapwa, oloze ali nakutwalaho lika kuzachila Yehova kweseka noho hakumina ngolo jenyi. (Koli. 1, 15:58) Hakumbi hakumbi, eji kushinganyekanga ali navatu vaze azanga mukaye kakahya. Ndumbwetu weka wapwevo eji kwanukanga vyuma vyavipi vamulingile kuli ndumbwenyi, oloze kamulamina kokoko. (Kolo. 3:13) Kaha ndumbwetu walunga eji kwanukanga vyuma alimbenjele kunyima, oloze ali nakuzata nangolo mangana apwenga lika wakushishika kuli Yehova.—Samu 51:10.

² Uno evi vyakutalilaho vitatu vinalifwanyina halihi? Vosena vatatu vali nakwanuka vyuma vyasolokele kunyima, oloze kaveshi nakushinganyeka chikuma havyuma kanako. Vanashishika kaha kulutwe.—Tangenu Vishimo 4:25.

3. Mwomwo ika twatela kushishika kaha kulutwe?

³ Mwomwo ika chapwila chachilemu kushishika kaha kulutwe? Ngana muze mutu ali nakutambuka mwahasa kuseuka mujila mwomwo yakutala chikuma kunyima, nayetu nawa katweshi kuhasa kuzachila kanawa Yehovako nge natushinganyekanga chikuma havyuma vyakunyima.—Luka 9:62.

4. Vyuma muka natushimutwila muchihande chino?

⁴ Muchihande chino, natushimutwila havyuma vitatu vize vinahase kutulingisa tushinganyekenga chikuma havyuma vyakunyima. Vyuma kana shina: (1) kushinganyeka chikuma havyuma twalivwishilenga kuwaha, (2) kulama koko, (3) nakulihana chikuma mulonga etu vavene. Natushimutwila nawa omwo jindongi jamuMbimbiliya jinahase kutukafwa tuvulyamenga “vyuma vyakunyima,”  nakushinganyekanga ‘havyuma vili kulutwe.’—Fwili. 3:13.

5. Mukanda waMuka-kwambulula 7:10, watuhuhumuna tuzenekenga kulinga chuma muka?

⁵ Tangenu Muka-kwambulula 7:10. Tachikizenu ngwenu vesi kana kayamba ngwayo chapwa chakuhenga kulihulisa ngwetu: “Mwomwo ika makumbi akunyima apwililile amwaza[ko]?” Mwomwo Yehova atuhana wana wakwanuka vyuma vyamwaza. Oloze yamba ngwayo: “Kanda nawamba ngwove: ‘Mwomwo ika makumbi akunyima apwililile amwaza kuhambakana makumbi ano?’” Shikaho, chapwa chakuhenga kwesekesa chiyoyelo chetu chakunyima nechi choholyapwa, nakwamba jino ngwetu choholyapwa chinapihi.

6. Mwomwo ika chapwila chakuhona mangana kushinganyeka ngwetu chiyoyelo chetu chakunyima chawahile kuhambakana choholyapwa? Hanenu chakutalilaho.

⁶ Mwomwo ika chapwila chakuhona mangana kushinganyeka ngwetu chiyoyelo chetu chakunyima chawahile kuhambakana choholyapwa? Mwomwo chinahase kutulingisa tushinganyekenga kaha havyuma twalivwishilenga kuwaha nakuvulyama ukalu twamwenenga. Chakutalilaho, omu vaIsalele vafumine muEjipitu, vavulyamine vihuli vamwenenga. Oloze vashinganyekelenga kaha havyakulya vyamwaza vize valilenga. Vambilenga ngwavo: “Tunanuka navaishi vawana twalilenga kuEjipitu, namatende, namahapwa, najisapwola jakulisezaseza, natulumingu.” (Kula. 11:5) Kutala kulya kana chapwilenga ‘chawana’ tahi? Nduma. Vapwile nakuvayanjisa chikuma omu vapwile muundungo muEjipitu. (Kulo. 1:13, 14; 3:6-9) Chaluvinda, vavulyamine ukalu vamwenenga nakusaka kukinduluka cheka kuEjipitu. Vashinganyekelenga kaha havyuma vyamwaza vyamuEjipitu, nakuhona kuhaka mangana kuvyuma vyamwaza vize avalingililile Yehova. Yehova evwile kupihya hachuma kana.—Kula. 11:10.

7. Chuma muka chakafwile ndumbwetu umwe wapwevo alihende kukushinganyekanga chikuma havyuma vyamwaza vyakunyima?

⁷ Tunahase kulihenda ngachilihi kukushinganyekanga chikuma havyuma vyamwaza vyasolokele kunyima? Tushimutwilenu hachakutalilaho  chandumbwetu wapwevo uze aputukile kuzachila haMbetele yamuBrooklyn mu 1945. Mukuhita chalwola vamumbachile kuli mukwavo muka-Mbetele kaha vazachililile hamwe hamyaka yayivulu. Oloze kuheta mu 1976 lunga lyenyi avijile. Ambile ngwenyi omu lunga lyenyi apwile kwakamwihi akufwa, ahanjikile mazu akumukolezeza atwaleho kumika omu mwasala muutuliwe. Amulwezele ngwenyi: “Twapwanga vakuwahilila chikuma muulo wetu. Vatu vavavulu kavatwama nakuwahilila kanako.” Amulwezele nawa ngwenyi: “Kanda kushinganyeka chikuma vyakunyimako—numba tuhu nauvyanukanga. Kuhita chalwola nachikukafwa uvulyame. Kanda kwivwa kupihya nakulivwila kekeko. Wahililanga hakukukisula. . . . Kwanuka vyuma wapwa wana wakufuma kuli Kalunga.” Mazu kana apwile akukolezeza chikupu.

8. Uno ndumbwetu umwe wapwevo anganyalile ngachilihi?

⁸ Ou ndumbwetu akavangijile mazu amulwezele lunga lyenyi. Ngocho azachililile Yehova nakashishi, kaha afwile omu apwile namyaka yakusemuka 92. Shimbu kanda afwenga, ambile ngwenyi: “Hakutala hamyaka 63 ngunazachila Yehova mumulimo washimbu yosena, nangwamba ngwami chikupu vene kuyoya chami chinapunga chamwaza chiyovo.” Mwomwo ika? Ambile ngwenyi: “Chuma cheji kunehanga kuwahilila shina wanawakwetu wamwaza nakufwelela nawa ngwetu natukatwama navo mupalachise hano hamavu, nakukazachila Samatanga Wamunene, Kalunga wamuchano Yehova, haya myaka yosena.” * Tunahase kulinangula vyavivulu kuli ou ndumbwetu ashishikile havyuma ashika Yehova.

9. Kweseka naVyavaLevi 19:18, vatu muka chinahase kutukaluhwila kukonekela?

⁹ Tangenu VyavaLevi 19:18. Lwola lumwe cheji kutukaluhwilanga kukonekela vandumbwetu muchikungulwilo chipwe masepa jetu chipwe vausoko. Chakutalilaho, ndumbwetu umwe vamuvangijikilile kuli ndumbwetu weka  wapwevo ngwenyi amwivile jimbongo. Kutwala muze, ndumbwetu uze avangijikilile mukwavo, alikonekelele. Oloze uze mukwavo atwalileho lika kushinganyeka hachuma amulingile. Kutala chuma kana chamisolokelaho lyehi tahi? Numba tuhu kanda vatuvangijikilengaho lyehi, olozenyi vatwivwisaho lyehi kupihya mujijila jeka nakushinganyeka ngwetu mutu kana katweshi kukamukonekelako.

10. Vyuma muka vinahase kutukafwa kachi nge vanatupihisa kumuchima?

¹⁰ Vyuma muka vinahase kutukafwa kachi nge vanatupihisa kumuchima? Twatela kwanukanga ngwetu Yehova eji kumonanga vyuma vyosena. Atachikiza vyuma vyosena, kuhakilako vene navyuma vyavipi veji kutulinganga vakwetu. (Hepe. 4:13) Eji kwivwanga kupihya hakutumona tuli nakuyanda. (Isa. 63:9) Kaha nawa atushika ngwenyi mwakakumisa ukalu wosena uze weji kwizanga mwomwo yakutuyanjisa.—Kuso. 21:3, 4.

11. Tweji kunganyalanga ngachilihi hakukonekela vakwetu?

¹¹ Twatela kwanuka nawa ngwetu kuhona kulamina vakwetu koko nachitunganyalisa. Echi chikiko chishina alinangwile ndumbwetu wapwevo uze vavangijikilile. Kutwala muze amukonekelele ndumbwenyi. Kaha atachikijile ngwenyi nge natukonekelanga vakwetu, naYehova mwatukonekelanga. (Mateu 6:14) Numba tuhu atachikijile ngwenyi chuma amulingile ndumbwenyi chapwile chachipi, oloze amukonekelele. Echi chamulingishile apwenga wakuwahilila nakutwalaho kuzachila Yehova nakashishi.

12. Chishina muka tunahase kulinangula kuchisoneka chaWaYowano 1, 3:19, 20?

¹² Tangenu WaYowano 1, 3:19, 20. Chapwa chakutamo kulihana mulonga havyuma vyavipi twalingile. Chakutalilaho, vandumbwetu vamwe veji kulihananga mulonga havyuma vyavipi valingile shimbu kanda valinangule muchano. Kaha vavavulu veji kulihananga mulonga havyuma valimbenjele hanyima yakuvambapachisa. (Loma 3:23) Tuvosena twasaka kulinga vyuma vyakwoloka. Chipwe ngocho, “tuvosena tweji kuhukananga kakavulu.” (Yako. 3:2; Loma 7:21-23) Numba tuhu tweji kwivwanga kupihya kachi nge tuli nakulihana mulonga havyuma twalingile, oloze kulinga ngocho chinahase kutunganyalisa. Mwomwo ika? Mwomwo kwivwa kupihya havyuma twalimbenjele nachitukafwa tufwile kulinga vyuma vyakwoloka nakuhona kukavilinga cheka.—Hepe. 12:12, 13.

13. Mwomwo ika katwatela kulihananga chikuma mulongako?

¹³ Chipwe ngocho, lwola lumwe tunahase kulihana chikuma mulonga, kulumbununa kutwalaho lika kushinganyeka havyuma vyavipi twalingile numba tuhu Yehova atukonekela lyehi. Kushinganyeka chikuma havyuma kana chinahase kutunehela ukalu. (Samu 31:10; 38:3, 4) Mwomwo ika? Tushimutwilenu hachakutalilaho chandumbwetu uze alihanyinenga chikuma mulonga hashili alingile kunyima. Ambile ngwenyi: “Ngwashinganyekelenga ngwami ngunapu nguwamokomoko kuli Yehova, kaha pamo keshi kukangulwilako.” Etu vamwe tweji kwivwanga nganomu evwile ou ndumbwetu. Shikaho twatela kukilikita kuchina kulihananga chikuma mulonga. Mwomwo ika? Mwomwo nachitulingisa tulitwamine kuzachila Yehova, numba tuhu atuzanga. Ngocho Satana mwawahilila.—Esekesenuko Wavaka-Kolinde 2, 2:5-7, 11.

14. Chuma muka nachitukafwa tufwelele ngwetu Yehova hanga atuzangila?

¹⁴ Tunahase kulihulisa ngwetu, ‘Nangutachikiza ngachilihi ngwami Yehova hanga anguzangila?’ Kachi nge namulihulisa chihula kana, kaha chili nakusolola nge Yehova nahase kumikonekela. MuKaposhi Kakutalila umwe vasonekelemo ngwavo: “Tunahase kulimbenja hachuma chochimwe mapapa kakavulu. Pamo chili nakutukaluhwila kwecha tato yimwe twapwile  nayo shimbu kanda tuputuke kuzachila Kalunga. . . . Oloze kanda kuhombako. Kanda kukukulula ngwenu Kalunga keshi kukamikonekelako. Omwo mukiko ali nakusaka Satana ngwenyi mushinganyekenga. Kwivwa kupihya hashili mwalingile, hiunjiho wakusolola nge kamweshi muvatu vavapi chikumako, kaha nawa Yehova nahase kumikonekela. Linyisenunga nakulomba Yehova amikonekele nakumikafwa mupwenga cheka nachivezu chitoma. Mwana nahase kuya kuli ise mapapa kakavulu amukafwe haukalu woumwe. Shikaho, nayenu twalenuho kulombanga Yehova amikafwe, kaha chikupu vene mwamikafwa.” *

15-16. Vandumbwetu vamwe veji kwivwanga ngachilihi nge vanatachikiza ngwavo Yehova hanga avazangila?

¹⁵ Chuma chinavendejekanga vangamba jaYehova vavavulu shina kutachikiza ngwavo Yehova hanga avazangila. Chakutalilaho, mujimbu wandumbwetu umwe vausonekele muchihande chakwamba ngwavo, “Mbimbiliya Yeji Kwalumunanga Kuyoya chaVatu.” Kushinganyeka havyuma vyavipi alingile kunyima chamulingishile ahone kufwelela ngwenyi Yehova amuzanga. Atwalileho kupwa navishinganyeka kana nahanyima yakumumbapachisa. Oloze omu ashinganyekele chikuma handando yakusokola, alumwine jino vishinganyeka vyenyi. *

¹⁶ Mujimbu wenyi wakafwile ndumbwetu umwe walunga. Ou ndumbwetu walunga asonekele ngwenyi: “Omu ngwapwile ngukanyike, ngwatalilenga mivwimbimbi yavatu vali uselesele. Kaha kalinwomu ngana ngwayitalanga cheka. Hanyima yakulweza vakulwane muchikungulwilo, vangukafwile, ngocho ngunafungulula tato kana. Vakulwane vangufwelelesele ngwavo Kalunga anguzanga, kaha nawa angukonekela. Chipwe ngocho, lwola lumwe ngweji kwivwanga lika kupwa nguwamokomoko, ngwami Yehova keshi kuhasa kunguzangako. Shikaho, kutanga mujimbu wayou ndumbwetu changukafwile chikuma. Omu ngwashinganyekelenga ngwami Yehova keshi kuhasa kungukonekelako, chapwile kwijiva nge nguli nakwamba ngwami, wana waMwanenyi unangukehela. Echi chihande ngwachitulika mangana nguchitangenga nakushinganyekaho heshoho nangwivwila nge nguwamokomoko.”

17. Chuma muka chakafwile kaposetolo Paulu alihende kukulihana chikuma mulonga?

 ¹⁷ Vyakutalilaho vyakufwana ngana vyeji kutwanukisanga kaposetolo Paulu. Shimbu kanda apwenga muka-Kulishitu, alingilenga vyuma vyavipi vyavivulu. Numba tuhu anukilenga vyuma kana, oloze kavishinganyekelenga chikumako. (Chimo. 1, 1:12-15) Amwenenga ndando yakusokola kupwa hiwana uze amuhanyine Kalunga. (Ngale. 2:20) Shikaho alihendele kukulihana chikuma mulonga havyuma vyavipi alingilenga kunyima. Ahakile mangana kukuzachila Yehova nangolo jenyi josena.

18. Vyuma muka tunalinangula muchihande chino?

¹⁸ Vyuma muka tunalinangula kuvyuma evi tunashimutwila vize twatela kulihendako? (1) Kwanuka vyuma vyasolokele kunyima hiwana wakufuma kuli Yehova. Oloze vyuma vyamwaza vize twalivwishile kuwaha kunyima kavyeshi kweseka hamwe navyuma natukalivwisa kuwaha mukaye kakahyako. (2) Vatu vanahase kutwivwisa kupihya kumuchima. Oloze nge katweshi kuvalamina kokoko, kaha natutwalaho kuzachila Yehova. (3) Kulihana chikuma mulonga chinahase kutuhonesa kuzachila Yehova nakuwahilila. Shikaho, ngana mwaPaulu, nayetu twatela kufwelela ngwetu Yehova atukonekela.

19. Twatachikiza ngachilihi ngwetu mukaye kakahya katweshi kukanukanga vyuma vize navikatwivwisanga kupihyako?

¹⁹ Twatalilila kukayoya haya myaka yosena. Mukaye kakahya katweshi kukanukanga vyuma vize navikatwivwisanga kupihyako. Mbimbiliya yahanjika kutalisa kulwola kana ngwayo: “Vyuma vyakunyima kaveshi kukavyanuka chekako.” (Isa. 65:17) Achishinganyekenu hachuma kanechi: Vandumbwetu vamwe vanazachila Yehova swi nakuushinakaji. Oloze mukaye kakahya navakakinduluka kuukweze. (Yopa 33:25) Shikaho, tulihendenunga kukushinganyeka havyuma vyakunyima. Oloze tushishikenu havyuma vyakulutwe nakuzata nangolo mangana tukalivwise kuwaha vyuma kana.