Hulda Ateselemo Vyuma Alitomenenene
MULIFUCHI lyaIndonesia hakalitungu kakandende kaSangir Besar hatwama vandumbwetu vatatu vamapwevo. Kaha ava vandumbwetu vanazachilanga hamwe hamyaka yayivulu hachisekeseke. Ava vandumbwetu vavatachikiza kanawa mwomwo yamulimo wakwambulula wakukafwa vatu vevwishise Mbimbiliya. Oloze halwola kana vapwile nakuzata mulimo weka.
Litungu lyaSangir Besar lyakunote yaIndonesia
Chatete, vengililenga mumeya nakumbata malolwa nakuwahaka hachisekeseke. Malolwa apwilenga amanene nge ngunja yayinene. Kufumaho, ava mapwevo vatwaminenga hatuvitwamo nakuputuka kupupa malolwa kana mutuvihanda twatundende chikuma kuzachisa jisandu. Kahomu vakumishilenga, vahakilenga tumalolwa kana mutumingomo nakukanduka hajindondelo nakuya kuze vapwilenga nakutwama. Kufumaho vahakilenga malolwa kana mujinjeke jajinene nakuya nakujilongejeka muchimbayambaya mangana vakawazachise kumulimo wakutunga mukwakwa.
Hulda ali nakukungulula malolwa kuchisekeseke
Hali ava vandumbwetu tunavuluka hapwile naHulda. Hakuwana nge chiyoyelo chenyi chalihandunwineko nechi chavakwavo, ngocho azachilenga lwola lwaluvulu kuhambakana vakwavo. Kakavulu azachishilenga jimbongo awanyinenga hakuzakama tanga yenyi. Oloze halwola kanelu, asakile kulama jimbongo jakuzachisa kuvyuma vyeka. Asakile kulanda shinga yayinene mangana chipwenganga chachashi kuzachisa JW Library®. Hulda atachikijile ngwenyi jivindiyo navyuma vyeka vyatwama ha JW Library navimukafwa ahotole uhashi wenyi wakwambulula nakwivwishisa kanawa Mbimbiliya.
Hulda azachilenga mulimo wakupupa malolwa jola jivali hakumbi hakumbi nachimene, hatukweji vavali nachimbwa nakuzalisa chimbayambaya. Echi chamukafwile awane jimbongo jakuta mukulanda shinga yayinene.
Hulda nakwate shinga yenyi yayinene
Hulda ambile ngwenyi, “Numba tuhu ngwazeyelenga nakupwa najimbandu mumavoko mwomwo yakupupa malolwa, oloze ukalu wosena ngwauvulyamine washi omu ngwaputukile kuzachisa eyi shinga yayinene yize yangukafwile nguzate kanawa mulimo wakwambulula nakuliwahisa vyakukunguluka.” Ambile nawa ngwenyi shinga kana yamukafwile omu waputukile musongo wachihita, hakuwana nge twakungulukilenga nakuzata mulimo wakwambulula kuzachisa jishinga. Twawahilila chikuma hakuwana nge chuma ajinyine Hulda achiteselemo.
