1-2. Chuma muka chinahase kutulingisa tulivwe ngwetu Yehova keshi nakukumbulula kulomba chetuko?

 MBIMBILIYA ngwayo, “Ivwila kuwaha Yehova, kaha mwakuhana vyuma wafwila muchima wove.” (Samu 37:4) Lushiko kana ocho kuwaha enu vayaya! Kutala twatela kushinganyeka ngwetu Yehova mwatulingilanga vyuma tunamulombo hahaze vene tahi? Mwomwo ika tunahase kulihulishila chihula kana? Achishinganyekenu havyuma vino: Ndumbwetu wapwevo nalombo Yehova amukafwe vamusanyike kuShikola yaVaka-Kwambulula Wangana. Oloze nahahita myaka yayivulu chakuzeneka kumusanyika kushikola kana. Ndumbwetu walunga wamukweze nalombo Yehova amuhindule kumusongo wenyi mangana azate chikuma milimo muchikungulwilo. Oloze jino misongo nayitwalililaho. Visemi vaze vapwa Vinjiho navalomba Yehova akafwe mwanavo atwaleho kupwa mumuchano. Oloze mwanavo mwapipuka nakwecha kuzachila Yehova.

² Pamo nayenu mwalombele Yehova amilingileko vyuma vimwe oloze kamilingilililevyoko. Munahase kukukulula ngwenu Yehova eji kukumbululanga kaha kulomba chavakwenu. Munahase nawa kushinganyeka ngwenu pamo kuli chuma chimwe munapihisa. Omu mukiko evwile ndumbwetu wapwevo Janice. b Ikiye nalunga lyenyi valombele kuli Yehova nakumulweza ngwavo vafwila kuzachila haMbetele. Ambile ngwenyi: “Ngwakunyukile ngwami kalinwomu vatusanyike haMbetele.” Oloze mwahichile myaka chakuzeneka kuvasanyika. Janice ambile nawa ngwenyi: “Ngwahombele chikuma kaha ngwevwile namumutwe ngo. Ngwalihulishilenga ngwami, ‘Vyuma muka ngunavulumuna kuli Yehova?’ Ngwalombelenga chikuma mangana nguyenga kuMbetele.  Mwomwo ika azenekelele kukumbulula kulomba chami?”

3. Vyuma muka natushimutwila muchihande chino?

³ Lwola lumwe tunahase kushinganyeka ngwetu Yehova kevwilila kukulomba chetuko. Navatu vakushishika vakushikulu vashinganyekele mwomumwe. (Yopa 30:20; Samu 22:2; Hamba. 1:2) Vyuma muka navimikafwa mukunyuke ngwenu Yehova mwakumbulula kulomba chenu? (Samu 65:2) Hakusaka kukumbulula chihula kana, chatete tumutwilenu havihula vinakavangizaho: (1) Vyuma muka tunahase kutalilila kuli Yehova? (2) Vyuma muka asaka Yehova tulinge? (3) Mwomwo ika twatela kwalumunako chuma twalombanga?

4. Kweseka naYelemiya 29:​12, Yehova atufwelelesa kutulingila chuma muka?

⁴ Yehova atufwelelesa ngwenyi mwevwililanga kukulomba chetu. (Tangenu Yelemiya 29:12.) Kalunga ketu azanga vangamba jenyi vakushishika, shikaho keshi kuliula kulomba chavoko. (Samu 10:17; 37:28) Chipwe ngocho, echi kachalumbununa nge mwatuhananga kala vyuma natumulombangako. Vyuma vimwe tweji kumulombanga, twatela kuvandamina kaye kakahya numbanyi akatulingilevyo.

5. Chuma muka eji kutalangaho Yehova nge ali nakukumbulula kulomba chetu? Lumbununenu.

⁵ Yehova eji kutalanga amone nge chuma tunamulombo chinalite namwaya kujina chenyi. (Isa. 55:​8, 9) Chuma chimwe ajina shina kuzalisa hano hamavu navatu vakulinunga vakuwahilila muchiyulo chenyi. Oloze Satana eji kuhanjikanga ngwenyi, vatu vanahase kupwa kanawa nge navaliyula vavene. (Kupu. 3:​1-5) Hakusaka Yehova asolole ngwenyi vishinganyeka vyaLiyavolo vyakuhenga, ahana vatu lwola lwakuliyula vavene. Oloze chiyulo chavatu chinanehe ukalu wauvulu tuli nakumona makumbi ano. (Kwambu. 8:9) Twatachikiza ngwetu Yehova keshi kufumisako ukalu wosenou mukatwamino kamyaka yinoko. Nge mwalinga ngocho, kaha vatu vamwe navashinganyeka ngwavo vatu vanahase kuliyula vavene mujila yamwaza, nakukumisa ukalu veji kumonanga vatu.

6. Mwomwo ika twakunyukila ngwetu lwola lwosena Yehova mwalinganga vyuma muzangi kaha nawa mwachiyulo?

⁶ Yehova nahase kukumbulula kulomba chochimwe mujijila jakulisezaseza. Chakutalilaho, omu Mwangana Hezekiya avijile chikuma, alombele Yehova amukafwe ayoye. Kaha Yehova amuhindwile. (Vamya. 2, 20:​1-6) Oloze omu kaposetolo Paulu alembelelele Yehova amufumise “mungonga mumujimba” wenyi, pamo kulumbununa misongo apwile nayo, Yehova kakumishile misongo kanako. (Koli. 2, 12:​7-9) Tutalenu nawa chakutalilaho chakaposetolo Yakova naPetulu. Vosena vavali vasakile kuvajiha kuli Mwangana Helote. Chikungulwilo chalombeleleleko Petulu, kaha pamo naYakova vene vamulombeleleleko. Chipwe ngocho, Yakova vamujihile oloze Petulu vamuyowele mujila yakukomwesa. (Vili. 12:​1-11) Tunahase kulihulisa ngwetu, ‘Mwomwo ika Yehova ayowelele Petulu nakwechelela Yakova vamujihe?’ Mbimbiliya kayatulwezako. c Oloze twatela kufwelela kaha ngwetu lwola lwosena Yehova “[ka]hengesa chiyuloko.” (Lushi. 32:4) Kaha nawa twatachikiza ngwetu Petulu naYakova, vosena vavevwilile uselewa kuli Yehova. (Kuso. 21:14) Lwola lumwe Yehova nahase kukumbulula kulomba chetu mujila yize katwashinganyekangako. Oloze hakuwana nge twafwelela ngwetu lwola lwosena mwakumbululanga kulomba chetu mujila yazangi kaha nawa yakwoloka, ngocho natwitavila kala jila mwatukumbulwilamo.—Yopa 33:13.

7. Chuma muka twatela kulihendako, kaha mwomwo ika?

 ⁷ Katwatela kwesekesanga ukalu wetu kuukalu wavakwetuko. Chakutalilaho, tunahase kulomba Yehova atukafwe muvyuma vimwe, oloze keshi kutulingilavyoko. Kutwala muze, natutachikiza ngwetu mukwetu weka alombanga chuma chochimwe, kaha Yehova namulingilacho. Chuma kana chasolokele kuli ndumbwetu wapwevo Anna. Alombele Yehova akafwe lunga lyenyi Matthew ayoye kumusongo wakasa. Halwola lwolumwe, vandumbwetu vavali vamapwevo vatushinakaji vapwile namusongo kana. Anna alombelelele chikuma lunga lyenyi Matthew navaze vandumbwetu vatushinakaji. Vaze vandumbwetu vatushinakaji vayoyele, oloze Matthew afwile. Hakavanga, Anna ahuhwasanyine numba nge Yehova ikiye akafwile vaze vandumbwetu vatushinakaji vayoye. Nge Yehova ikiye avakafwile vayoye, kaha mwomwo ika ahonenene kukafwa nalunga lyaAnna ayoye? Chikupu vene, katwatachikiza chuma chakafwile vaze vandumbwetu vatushinakaji vayoyeko. Chuma chachilemu shina kutachikiza ngwetu Yehova alongesa jila yakukakumishilamo kuyanda chetu chosena, kaha nawa afwila kukasangula masepa jenyi vaze vafwa.—Yopa 14:15.   

8. (a) Kweseka naIsaya 43:​2, Yehova eji kutukafwanga ngachilihi? (b) Uno kulomba nachitukafwa ngachilihi nge tuli nakumona ukalu? (Talenu vindiyo yakwamba ngwavo, Kulomba Cheji Kutukafwanga Tumike.)

⁸ Yehova mwatwalaho lika kutukafwa. Hakupwa Setu wazangi, Yehova kasaka kutumona tuli nakuyandako. (Isa. 63:9) Chipwe ngocho, kahonesa ukalu wosena uze vafwanyisa kutulwiji namilangi yakakahya kutusolokelako. (Tangenu Isaya 43:2.) Oloze atufwelelesa ngwenyi mwatukafwanga mangana tumike muukalu kana. Kaha nawa keshi kwechelela kala ukalu natumona utuhonese kumuzachilako. Yehova eji kutuhananga nawa shipilitu yenyi yajila yangolo yitukafwe tutwaleho kumika. (Luka 11:13; Fwili. 4:13) Shikaho, natukunyuka ngwetu lwola lwosena mwatuhananga vyuma twasakiwa vyakutukafwa tutwaleho kumika nakupwa lika vakushishika kuli ikiye. d

9. Kweseka naWaYakova 1:​6, 7, mwomwo ika twatela kufwelela ngwetu Yehova mwatukafwanga?

⁹ Yehova asaka tumufwelelenga. (Hepe. 11:6) Lwola lumwe tunahase kumona ngwetu ukalu unatutohwela chikuma. Tunahase kuputuka nakuhuhwasana ngwetu Yehova keshi kutukafwako. Oloze Mbimbiliya yatufwelelesa ngwayo, ngolo jaKalunga najitukafwa tuhase “kunyina hakembwe.” (Samu 18:29) Shikaho muchishishisa chakuhuhwasana, twatela kulomba Yehova nakufwelela chikupu ngwetu, mwakumbulula kulomba chetu.—Tangenu WaYakova 1:​6, 7.   

10. Hanenu chakutalilaho chakusolola omwo tunahase kulinga vyuma vize navilitombola nachuma tunalombo.

¹⁰ Yehova asaka tulingenga vyuma kweseka navyuma tunalombo. Chakutalilaho, ndumbwetu walunga nahase kulomba Yehova amukafwe vamwitavise kuli mukulwane wamilimo, ayenga kukukungulula changalila. Uno nahase kukumbulula kulomba chenyi tahi? Nahase kumukafwa apwenga wakuhamuka kuya nakushimutwila namukulwane wamilimo. Oloze ou ndumbwetu atela kulikatukila ivene kuya kuli mukulwane wamilimo. Lwola lumwe chinahase kusakiwa kushimutwila namukulwane kana naluzema. Nahase nawa kuzata mulwola lwamukwavo mangana naikiye akamuzachile mulwola lwenyi. Kaha nge chinahase, nahase kumulweza akahone kumufweta hamakumbi aze mwapwa kukukunguluka.

11. Mwomwo ika twatela kulombanga naluzema?

¹¹ Yehova asaka tulombenga haukalu wetu mapapa  kakavulu. (Teso. 1, 5:17) Mazu ahanjikile Yesu asolola nge vyuma vimwe natulombanga kaveshi kutulingilavyo hahaze veneko. (Luka 11:9) Shikaho kanda kuzeyako. Lombenunga namuchima wosena kaha nawa naluzema. (Luka 18:​1-7) Nge natulombanga mapapa kakavulu hachuma chochimwe, natusolola kuli Yehova ngwetu chuma kana tuli nakuchisaka chikuma. Natusolola nawa ngwetu twafwelela ngwetu atwama nangolo jakutukafwa.

12. (a) Chihula muka chimwe twatela kulihulisa kutalisa kuvyuma tunalombo, kaha mwomwo ika? (b) Natusolola ngachilihi ngwetu tunalombo mujila yize nayineha kavumbi hali Yehova? (Talenu lipwata lyakwamba ngwavo, “ Uno Vyuma Ngweji Kulombanga Vyasolola Nge Ngwavumbika Yehova Tahi?”)

¹² Nge Yehova katulingililile chuma twamulombangako, kaha tunahase kulihulisa vihula vitatu. Chatete, ‘Uno chuma nguli nakumulomba chakutamo tahi?’ Kakavulu tunahase kushinganyeka ngwetu, twatachikiza vyuma vize navitunganyalisa. Oloze vyuma tunalombo pamo kavyeshi kutunganyalisa halwola lwalusukuko. Nge tuli nakulomba Kalunga haukalu tuli nawo, kaha kunahase kupwa jila yamwaza yakuukumishilamo kuhambakana yize tunashinganyeka yetu. Vyuma vimwe natulomba vinahase kulimbalaka namwaya muchima waYehova. (Yowa. 1, 5:14) Chakutalilaho, tutalenu hali vaze visemi twavulukanga hakavanga. Valombele Yehova akafwe mwanavo atwaleho kupwa mumuchano. Chasoloka nge chakutamo kulomba chuma kana. Oloze, Yehova kashinjila kala mutu mangana amuzachilengako. Asaka tuvosena, kuhakilako vene navana vetu tulisakwile kumulemesa. (Lushi. 10:​12, 13; 30:​19, 20) Shikaho, vaze visemi vatelelele kulomba Yehova avakafwe vanangule mwanavo nakumuheta kumuchima, mangana azange Yehova nakupwa Sepa lyenyi.—Vishi. 22:6; Efwe. 6:4.

13. Kweseka naWavaHepeleu 4:​16, lwola muka eji kutukafwanga Yehova? Lumbununenu.

 ¹³ Chihula chamuchivali shina, ‘Uno luno hilwola lwakutamo Yehova kungulingila chuma ngunalombo tahi?’ Tunahase kushinganyeka ngwetu tuli nakusakiwa kutukumbulula hahaze vene. Oloze Yehova ikiye atachikiza lwola lwakutamo kutukafwa. (Tangenu WavaHepeleu 4:16.) Nge Yehova katulingilile chuma tunamulombo hahaze veneko, tunahase kushinganyeka ngwetu pamo nakumbulula ngwenyi, ‘nduma.’ Oloze pamo halwola kana nakumbulula ngwenyi, ‘Vandamina.’ Chakutalilaho, achishinganyekenu uze ndumbwetu wamukweze alombele Yehova amukafwe ayoye kumusongo wenyi. Nge Yehova amukile mujila yakukomwesa, kachi Satana amuvangijikilile ngwenyi ali nakuzachila Yehova mwomwo yakumuka kumusongo wenyi. (Yopa 1:​9-11; 2:4) Kaha nawa Yehova anoneka lwola lwakukafumisako misongo yosena. (Isa. 33:24; Kuso. 21:​3, 4) Shimbu kanda lwola kana luhete, katwatela kushinganyeka ngwetu natuyoya mujila yakukomwesako. Shikaho, ou ndumbwetu atelelele kulomba Yehova amuhane ngolo nakuunda muchima mangana atwaleho kumika mumisongo yenyi nakuzachila Kalunga nakashishi.—Samu 29:11.

14. Vyuma muka munalinangula kuchakutalilaho chaJanice?

¹⁴ Anukenu ndumbwetu wapwevo Janice, uze alombele mangana akazachile hambetele. Mwahichile myaka yiwana numba atachikize jila amukumbulwililemo Yehova. Ambile ngwenyi: “Yehova azachishile lwola kana mangana angunangule vyuma vyavivulu nakulingisa ngupwenga ngumuka-Kulishitu wamwenemwene. Ngwasakiwile kuvangila kuzamisa lufwelelo lwami muli ikiye. Ngwasakiwile nawa kulinangula chikuma mwakulingila chilongesa chauka. Kaha nawa ngwasakiwile kupwa nakuwahilila chize kachapendamina havyuma vili nakusoloka mukuyoya chetuko.” Kutwala muze,  Janice nalunga lyenyi vavatumine kuya mumulimo wakujinguluka. Omu Janice anukile chuma kana ambile ngwenyi: “Yehova akumbulwile kulomba chami numba tuhu kakumbulwile mujila yize kangwashinganyekeleko. Hahichile lwola numba ngumone kuwaha chajila angukumbulwililemo, kaha ngwamusakwilila hakungukafwa ngumone zangi yenyi nalikoji lyenyi.”

15. Mwomwo ika twatela kumulomba atukafwe kweseka namunayi kujina chenyi? (Talenu nawa mivwimbimbi.)

¹⁵ Chihula chamuchitatu shina, ‘Kutala ngwatela kumulomba chuma cheka tahi?’ Numba tuhu chapwa chamwaza kulweza Yehova vyuma tuli nakusaka, oloze shimbu jimwe nachiwaha nge natumulomba atukafwe kweseka namwaya kujina chenyi. Achishinganyekenu hachakutalilaho chandumbwetu wapwevo uze alombelenga vamusanyike kuShikola yaVaka-Kwambulula Wangana. Asakile kuya kushikola kana mangana akahase kuya nakuzachila kuze kuli nakusakiwa chikuma vaka-kwambulula. Halwola alombelenga vamusanyike, atelelele nawa kulomba Yehova amukafwe awane jijila jeka jakutohweselamo mulimo wenyi. (Vili. 16:​9, 10) Kaha nawa hakusaka kutesamo chuma kana, atelelele kuhanjika nakalama wakujinguluka amulweza chikungulwilo chamukamwihi chize chapwile nakusakiwa vapayiniya. Chipwe kusonekela kumutango mangana vamulweze kuze kuli nakusakiwa chikuma vaka-kwambulula Wangana. e

16. Chuma muka twatela kukunyuka nakufwelela?

¹⁶ Ngana muze tunalinangula, twatela kukunyuka ngwetu Yehova mwakumbululanga kulomba chetu mujila yazangi nachiyulo. (Samu 4:3; Isa. 30:18) Lwola lumwe nahase kutukumbulula mujila yize katwashinganyekeleko. Olozenyi Yehova keshi kuliula kulomba chetuko, mwomwo atuzanga chikuma. Kaha nawa keshi kukatusezako. (Samu 9:10) Shikaho, twalenuho “[kufwelela] muli ikiye lwola lwosena” nakumulweza vyuma vyosena vili kumuchima.—Samu 62:8.