1. Mujimbu muka uze kapolofweto Isaya ambulwile kuli vakwavo vaIsalele?

 KAPOLOFWETO Isaya alumbunwine ngwenyi Yehova apwa “Kalunga wamuchano.” Lizu valumuna ngwavo “muchano” lyalumbununa “amene.” (Isa. 65:​16, kwinyikila) Lizu “amene” lyalumbununa “chipwenga vene ngocho,” chipwe ngwetu “mukiko vene.” Eli lizu valizachisa hakusolola nge vyuma ahanjika Yehova chipwe Yesu vyapwa vyamuchano. Shikaho, mujimbu asonekele Isaya wasolwele hatoma nge vyuma eji kuhanjikilanga chimweza Yehova vyatamo kuvifwelela. Lwola lwosena Yehova eji kutesangamo jishiko jenyi.

2. Mwomwo ika twatela kufwelela vyuma ashika kukatulingila Yehova kulutwe, kaha vihula muka natushimutwila?

² Kutala nayetu tunahase kufwelela vyuma ashika kukatulingila Yehova kulutwe tahi? Omu hahichile myaka kafwe 800 kufuma halwola lwaIsaya, kaposetolo Paulu alumbunwine ovyo jishiko jaKalunga jatelamo kujifwelela lwola lwosena. Paulu asonekele ngwenyi: “Kalunga keshi kuhasa kwongako.” (Hepe. 6:18) Kaselwoke keshi kulovola meya amwaza nameya amungwako, ngocho naYehova nawa uze apwa Kasulu kamuchano, keshi kuhasa kwongako. Shikaho, twatela kufwelela chikuma vyuma eji kuhanjikanga Yehova kuhakilako vene navyuma vyosena ashika kukatulingila kulutwe. Muchihande chino natushimutwila havihula vino: Vyuma muka ashika kukatulingila Yehova kulutwe? Kaha Yehova ahana unjiho muka uze wasolola nge chikupu vene mwakatesamo jishiko jenyi?

3. (a) Lushiko muka vazanga chikuma vangamba jaKalunga? (Kusoloka 21:​3, 4) (b) Uno vatu vamwe veji kuhanjikanga ika nge tunavalweze lushiko kana?

³ Lushiko natushimutwila lwapwa lwalulemu chikuma kuli vangamba jaKalunga mukaye kosena. (Tangenu Kusoloka 21:​3, 4.) Yehova atushika vyalwola luze “kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako.” Etu vavavulu tweji kuzachisanga mazu awa amwaza amuMbimbiliya ahanjika hachiyoyelo chamuPalachise, omu tweji kwambulilanga vatu. Uno vatu vamwe veji kuhanjikanga ika nge vanevu mazu kana? Vamwe vanahase kuhanjika ngwavo, “Mazu kana kaweshi kukatesamoko.”

4. (a) Chuma muka atachikijilile chimweza Yehova? (b) Uno Yehova alingile chuma muka chikwavo omu ashikile lushiko lwaPalachise?

⁴ Omu Yehova ahwiminyinyine kaposetolo Yowano asoneke lushiko lwachiyoyelo chamuPalachise, atachikijile ngwenyi nayetu makumbi ano natulwezangako vatu lutalililo kana nge tuli nakwambulula mujimbu waWangana. Yehova atachikijilile chimweza nawa ngwenyi vavavulu nachikavakaluhwila kufwelela lushiko “[lwa]vyuma vyavihya.” (Isa. 42:9; 60:2; Koli. 2, 4:​3, 4) Jino natuhasa ngachilihi kukunyuka nakukunyula nawa vakwetu vamone ngwavo vyuma vyamwaza vavuluka hali Kusoloka 21:​3, 4 navikatesamo chikupu? Omu Yehova ashikile lushiko kana, ahanyine nawa unjiho wakusolola ovyo vyatela kutulingisa tufwelele lushiko kana. Uno unjiho muka ahanyine?

5. Unjiho muka atuhana Kalunga wakutukunyula tufwelele lushiko lwenyi lwaPalachise, kaha kulihi tweji kuwananga unjiho kana?

⁵ Tweji kuwananga unjiho wakutukunyula tufwelele lushiko lwaYehova lwaPalachise mujivesi jinakavangizaho. Vasonekamo ngwavo: “Uze atwamine halitanda ambile ngwenyi: ‘Tala! Nangulingisa vyuma vyosena kupwa vyavihya.’ Ambile nawa ngwenyi: ‘Soneka, mwomwo mazu awa atela kuwafwelela, kaha amuchano.’ Kaha ambile kuli ami ngwenyi: ‘Vinalingiwa lyehi! Ami yami Alafwa, yami Omenga, yami maputukilo, yami makumishilo.’”—Kuso. 21:​5, 6a.

6. Uno mazu ahali Kusoloka 21:​5, 6 atukunyula ngachilihi tufwelele lushiko lwaKalunga?

⁶ Uno awa mazu amuMbimbiliya nawatukafwa ngachilihi tufwelele lushiko lwaKalunga? Mukanda waChingeleshi waRevelation Climax wahanjika hajivesi kaneji ngwawo: “Chapwile nge apwile nakulishika navatu vakushishika vyuma vyamwaza mwakavalingila kulutwe.” b Elu lushiko lwaKalunga lwatwama hali Kusoloka 21:​3, 4. Oloze, muvesi 5 na 6, chapwile kwijiva nge ahakileko chala chenyi mujila yachifwanyisa mangana asolole ngwenyi lushiko lwenyi nalukatesamo. Tukekesenu kanawa hamazu azachishile Yehova hakuhana unjiho kana.

7. Iya aputukile kuhanjika mazu atwama muvesi 5, kaha mwomwo ika mazu kana apwila akulipwila?

⁷ Unjiho ahanyine Kalunga waputukile namazu ano ngwawo: “Uze atwamine halitanda ambile ngwenyi.” (Kuso. 21:5a) Mazu kana apwa akulipwila chikuma mwomwo Yehova ivene awahanjikile mapapa katatu mumukanda waKusoloka. Shikaho Yehova ivene ikiye ahanyine unjiho kana, keshi kangelo wangolo chipwe vene Yesu uze asangukileko. Echi chatukafwa tufwelele chikuma mazu anakavangizaho aze ahanjikile. Mwomwo ika? Mwomwo Yehova keshi ‘kwongako.’ (Chitu. 1:2) Lizu kana lyalingisa mazu atwama hali Kusoloka 21:​5, 6 apwenga amuchano chikupu.

8. Lizu muka ashindakanya Yehova lize lyasolola nge lushiko lwenyi nalukatesamo chikupu? (Isaya 46:10)

⁸ Tushimutwilenu nawa halizu “Tala!” (Kuso. 21:5) Lizu lyachiHelase valumuna ngwavo  “Tala!” valizachisa mapapa kakavulu mumukanda waKusoloka. Mukanda umwe wahanjika ngwawo, mukingo wakasumwiso vahaka kulizu “Tala!” veji kuuzachisanga “mangana muka-kutanga ahake mangana kuvyuma navikavangizaho.” Mazu muka anakavangizaho hanyima yamukingo kana? Kalunga ambile ngwenyi: “Nangulingisa vyuma vyosena kupwa vyavihya.” Numba tuhu Yehova apwile nakuhanjika havyuma navikasoloka kulutwe, oloze elu lushiko kana alumwene ngwenyi nalukatesamo chikupu. Evi vikiko vyamulingishile ahanjike kwijiva nge lushiko kana lunatesamo lyehi.—Tangenu Isaya 46:10.

9. (a) Uno mazu akwamba ngwavo, “nangulingisa vyuma vyosena kupwa vyavihya” atalisa kumilimo muka yivali yaYehova? (b) Vyuma muka navikasoloka ‘kumelu namavu’ awa aliko oholili?

⁹ Tukekesenu mazu akwavo atwama hali Kusoloka 21:5 akwamba ngwavo: “Nangulingisa vyuma vyosena kupwa vyavihya.” Muli ou kapetulu, mazu kana atalisa kumilimo yivali yaYehova. Milimo kana shina kushishisa nakukindulwisa. Chatete, uno Yehova mwakashishisa vyuma muka? Hali Kusoloka 21:​1, vamba ngwavo: “Melu akulivanga namavu akulivanga vinafumuko lyehi.” Shikaho, “Melu akulivanga” atalisa kujifulumende javatu jize vali nakukundwiza kuli Satana navandemone jenyi. (Mateu 4:​8, 9; Yowa. 1, 5:19) Ngana muze yahanjika Mbimbiliya, lizu “mavu” linahase kutalisa kuvatu vaze vatwama hamavu. (Kupu. 11:1; Samu 96:1) Shikaho, “mavu akulivanga” atalisa kuchitungilo chiliko makumbi ano chavatu vakuhuka. Yehova keshi kukatungulula “melu” aliko ‘namavuko,’ oloze mwakafumisamo vyuma vyosena vilimo nakuvishishisa navyavihya. Melu akulivanga namavu akulivanga aliko navakawashishisa “[na]melu amahya namavu amahya,” kulumbununa fulumende yayihya nachitungilo chavatu chachihya.

10. Vyuma muka vize Yehova mwakalingisa kupwa vyavihya?

¹⁰ Hali Kusoloka 21:​5, tweji kutangangaho nawa mazu aze Yehova ahanjikile kutalisa kuvyuma vize mwakalingisa kupwa vyavihya. Anukenu ngwenu hachisoneka kana, Yehova kahanjikile ngwenyi: “nangutenga vyuma vyosena kupwa vyavihya[ko].” Oloze ambile ngwenyi: “Nangulingisa vyuma vyosena kupwa vyavihya.” Yehova mwakalingisa mavu navatu kupwa vyavihya hakuvilingisa vipwenga vyakukupuka. Mavu osena navakawalumuna kupwa nge milemba yamwaza chikuma yakulifwana namilemba yaEtene, ngana muze ahanjikilile chimweza Isaya. Kaha nawa tuvosena mutu himutu navakatulingisa kupwa vavahya hakutuka kumisongo yetu. Chakutalilaho, vitonji, natupuputa natuveveve, navakavoka. Kaha nawa vaze vafwa navakayoya cheka.—Isa. 25:8; 35:​1-7.

11. Lushimbi muka Yehova ahanyine Yowano, kaha vyuma muka amulumbunwinyine?

¹¹ Mazu muka akwavo aze atufwelelesa nge Jishiko jaKalunga najikatesamo chikupu? Yehova ahanyine Yowano lushimbi ngwenyi: “Soneka, mwomwo mazu awa atela kuwafwelela, kaha amuchano.” (Kuso. 21:5) Omu Yehova alwezele Yowano ngwenyi ‘asoneke’ mazu kana, amulumbunwinyine nawa ovyo vyamulingishile amulweze alinge ngocho. Ambile ngwenyi: “Mwomwo mazu awa atela kuwafwelela, kaha amuchano.” Kulumbununa nge mazu aKalunga apwa amuchano kaha nawa akwoloka. Tweji kwivwanga kuwaha hakuwana nge Yowano evwililile lushimbi lwakumulweza ‘asoneke.’ Ngocho tweji kutanganga jishiko jaKalunga jahanjika haPalachise nakushinganyeka havyuma vyamwaza vize tuli nakutalilila.

12. Mwomwo ika chapwila chakutamo Yehova kuhanjika ngwenyi: “Vinalingiwa lyehi!”

¹² Mazu muka akwavo aze Kalunga ahanjikile? Ambile ngwenyi, “Vinalingiwa lyehi!” (Kuso. 21:6) Yehova ahanjikile kwijiva nge vyuma vyosena  ahanjikile kutalisa kupalachise vinatesamo lyehi. Kaha chikupu vene chakutamo kuhanjika ngocho, mwomwo kakweshi chuma nachimuhonesa kutesamo vyuma ajinako. Yehova atulweza nawa vyuma vikwavo vize vyatulingisa tufwelele ngwetu vyuma atushika navikatesamo chikupu. Vyuma muka vene ovyo?

13. Mwomwo ika Yehova ahanjikilile mazu akwamba ngwavo: “Ami yami Alafwa, yami Omenga”?

¹³ Ngana muze twahanjikanga hakavanga, Yehova ivene ikiye ahanjikile mapapa katatu muchakumwenesa amwenesele Yowano. (Kuso. 1:8; 21:​5, 6; 22:13) Hamapapa osena awa atatu, Yehova ahanjikile mazu wowamwe ngwenyi: “Ami yami Alafwa, yami Omenga.” Lizu Alafwa lyaputuka nasona watete muvasopelo vachiHelase, kaha lizu Omenga lyaputuka nasona wamakumishilo. Yehova hakuzachisa mazu ‘Alafwa naOmenga’ alumbunwine ngwenyi nge naputuka vyuma, kaha mwavitesamo nakuvikumisa.

14. (a) Hanenu chakutalilaho chasolola nge Yehova apwile nakuhanjika ngwenyi “Alafwa,” Kaha nawa ngwenyi “Omenga.” (b) Vyuma muka vatufwelelesa vyatwama hali Kuputuka 2:​1-3?

¹⁴ Hanyima yakutenga Alama naEve, Yehova avalwezele vyuma ajinyine kutalisa kuvatu nakumavu. Mbimbiliya yamba ngwayo: “Kalunga avakiswile, avambile ngwenyi: ‘Semenunga muvule chikuma, muzalise hamavu, nakuwalamanga.’” (Kupu. 1:28) Halwola kana, chapwile kwijiva nge, Yehova nambe ngwenyi, “Alafwa.” Avalwezele hatoma vyuma ajinyine ngwenyi, nakukapwa lwola luze vaka-tanga yaAlama naEve vakwononoka, kaha nawa vakukupuka navakatesamo mulimo wakuzalisa ano mavu nakuwalumuna kupwa palachise. Halwola kana, nachikapwa kwijiva nge Yehova nambe ngwenyi “Omenga.” Omu Yehova akumishile kutenga “melu namavu navyuma vyosena vyatwamamo,” ahanjikile mazu aze asolwele nge mwakatesamo chikupu vyuma ashika. Mazu kana atwama hali Kuputuka 2:​1-3. (Tangenu.) Yehova asakwile  likumbi lyakusokesa 7 kupwa lyajila. Uno echi chalumbununa vyuma muka? Chikupu vene Yehova atufwelelesa ngwenyi mwakatesamo vyuma ajina kutalisa kuvatu nakumavu. Vyuma kana navikatesamo chikuma kusongo yalikumbi lyakusokesa 7.

15. Mwomwo ika Satana ashinganyekelele ngwenyi nahonesa Kalunga kutesamo vyuma ajinyine kutalisa kuvatu?

¹⁵ Omu Alama naEve valikangile vapwile jino vaka-shili nakutambwisako vanavavo shili nakufwa. (Loma 5:12) Ngocho, echi chasolola nge Satana ashinganyekele ngwenyi vatu vakukupuka, kaha nawa vakwononoka kaveshi kuhasa kutesamo vyuma ajinyine Kalunga kutalisa kukuzalisa mavuko. Echi chapwile kwijiva nge Satana nahonesa Yehova ambenga ngwenyi “Omenga.” Satana ashinganyekele ngwenyi Yehova kapwile nawa najijila jeka jakuteselamo vyuma ajinako. Ashinganyekele ngwenyi Yehova apwile kaha najila yimwe. Jila kana shina kujiha Alama naEve hahaze vene nakutenga valunga napwevo veka, mangana atesemo vyuma ajinyine kutalisa kuvatu. Nge Yehova alingile chuma kana kachi Liyavolo amwalumukililile nakumwamba ngwenyi apwa muka-makuli. Mwomwo ika? Mwomwo ngana muze vasoneka hali Kuputuka 1:​28, Yehova alwezele Alama naEve ngwenyi, vana vavo navakazalisa mavu.

16. Vyuma muka vize kachi vyalingishile Satana ahane mulonga Yehova ngwenyi nahono kutesamo vyuma ajinyine?

¹⁶ Jila muka yikwavo yize pamo ashinganyekele Satana ngwenyi yikiko nahase kuzachisa Yehova? Pamo ashinganyekele ngwenyi Yehova nahase kwitavisa Alama naEve vaseme vana vaze kaveshi kukahasa kupwa vakukupukako. (Kwambu. 7:20; Loma 3:23) Echi kachi chalingishile Liyavolo ahane Yehova mulonga ngwenyi nahono kutesemo vyuma ajinyine. Mwomwo ika? Mwomwo jila kana kachi kayateselemo vyuma ajinyine Kalunga vyakuzalisa mavu kupwa Palachise kuhichila muli vaka-tanga yaAlama naEve vakukupuka kaha nawa vakwononokako.     

17. Uno Yehova akumishile ngachilihi kulikanga chaSatana naVatu vatete kaha vyuma muka? (Talenu nawa muvwimbimbi.)

¹⁷ Satana katachikijile vyuma mwalinga Yehovako. Yehova apwile najila yamwaza yakuteselamo vyuma ajinyine numba tuhu Satana naAlama naEve valikangile. (Samu 92:5) Yehova asolwele hatoma ngwenyi kapwa muka-makuliko hakwitavisa Alama naEve vaseme vana. Kaha nawa asolwele hatoma ngwenyi nge najinyi kulinga chuma chimwe kuvanga achilinge, kakweshi chuma nachimuhonesako. Atwalileho lika kupwa navishinganyeka vyakutesamo vyuma ajinyine hakuhakako  “muka-tanga” uze mwayovola vaka-tanga yaAlama naEve vakwononoka. (Kupu. 3:15; 22:18) Satana pamo alikomokelele hajila yize Yehova alongesele yakusokwelamo vatu. Mwomwo ika? Mwomwo kulongesa kana chapwa hijila yimwe asolwelamo zangi yamwenemwene. (Mateu 20:28; Yowa. 3:16) Satana katwama nazangi kanako. Jino vyuma muka navikasoloka mwomwo yakulongesa chize vahakako mangana vasokole vatu? Kukukuma chamyaka 1,000 vana vaAlama naEve vakukupuka kaha nawa vakwononoka navakatwamanga mupalachise hano hamavu ngana muze ajinyine Yehova hakavanga. Halwola kana nachikapwa kwijiva nge Yehova nambe ngwenyi, “Omenga.”

18. Vyuma muka vitatu vize vyatulingisa tufwelele ngwetu lushiko lwaKalunga lwakutalisa kupalachise nalukatesamo? (Talenu nawa lipwata lyakwamba ngwavo “ Vyuma Vitatu Vyatulingisa Tufwelele Lushiko lwaYehova.”)

¹⁸ Kweseka navyuma tunashimutwila, vyuma muka vyakutufwelelesa vize twatela kulwezako vatu vaze veji kuhuhwasananga ngwavo lushiko lwakutalisa kuPalachise luze atushika Kalunga kalweshi kukatesamoko? Chatete, Yehova ivene ikiye ashikile lushiko kana. Mukanda waKusoloka wamba ngwawo: “Uze atwamine halitanda ambile ngwenyi: ‘Tala! Nangulingisa vyuma vyosena kupwa vyavihya.’” Yehova atwama namangana, akwechi ngolo, kaha nawa afwila kutesamo vyuma nashiki. Chamuchivali, Yehova atachikiza ngwenyi vyuma nashiki mwakavitesamo chikupu. Echi chikiko chamulingishile ahanjike ngwenyi: “Mazu awa atela kuwafwelela, kaha amuchano. . . . [Kaha] vinalingiwa lyehi!” Chamuchitatu, nge Yehova naputuka chuma chimwe, kaha eji kuchitesangamo nawa, kaha echi chikiko chamulingisa ambenga ngwenyi: “Ami yami Alafwa, yami Omenga.” Yehova mwakasolola ngwenyi Satana apwa muka-makuli kaha nawa muka-kuhona.

19. Vyuma muka namulinga nge vatu navahuhwasana lushiko lwaKalunga lwakutalisa kuPalachise?

¹⁹ Anukenu ngwenu, namufwelela chikuma Yehova nge namushimutwilanga navatu vyuma vyatulingisa tufwelele jishiko jenyi. Namulinga ngachilihi nge munatangila mutu vyuma vize vyatwama hali Kusoloka 21:4 vyakutalisa kuPalachise yize yili nakwiza, kaha ikiye himwamba ngwenyi, “Vyuma kana kavyeshi kukatesamoko”? Kaha munahase kumutangila vesi 5 na 6 nakumulumbunwina mazu atwamaho. Mulwezenu omwo Yehova ahakileko chala chenyi mujila yachifwanyisa mangana asolole ngwenyi lushiko lwenyi nalukatesamo.—Isa. 65:16.