1-2. (a) Mwomwo ika kaposetolo Paulu ahanjikilile ngwenyi zangi yikiko ‘yahambakana’ vilinga vyosena? (b) Vihula muka natushimutwila?

 OMU kaposetolo Paulu apwile nakushimutwila halufwelelo nalutalililo nazangi, akukulwile ngwenyi zangi ‘yikiko yahambakana vyosena evi.’ (Koli. 1, 13:13) Mwomwo ika Paulu ahanjikilile mazu kana? Mwomwo kulutwe, katweshi kukasakiwa kufwelela mujishiko jaKalunga jakuneha kaye kakahya chipwe kutalilila ngwetu jishiko kana najitesamoko, mwomwo halwola kana jino hijinatesamo lyehi. Oloze natukasakiwanga lika kuzanga Yehova nakuzanga nawa vatu. Shikaho, zangi yetu nayikatohwelangako lika haya myaka.

² Hakuwana nge natukasakiwanga lika kupwa nazangi, natushimutwila havihula vino vitatu. Chatete, mwomwo ika twatela kulizanga navakwetu? Chamuchivali, mujijila muka tunahase kusolwelamo vakwetu zangi? Chamuchitatu, vyuma muka navitukafwa tutwaleho kuzamisa zangi yakulizanga navakwetu?

3. Vyuma muka vyatela kutulingisa tulizange navakwetu?

³ Uno kuzanga vakwetu chalemena halihi? Kuzanga vakwetu cheji kutusololanga kupwa tuvaka-Kulishitu vamuchano. Yesu alwezele vaposetolo jenyi ngwenyi: “Vatu vosena navakatachikiza ngwavo enu mwapwa mutumbaji twami kachi nge namulizanganga mwenumwenu.” (Yowa. 13:35) Kaha nawa kulizanga navandumbwetu cheji kutukafwanga tupwenga vakulinunga. Paulu ambile ngwenyi zangi “yeji kununganga vatu  hamwe mujila yakukupuka.” (Kolo. 3:14) Kuli chuma cheka chachilemu chatela kutulingisa tulizange navakwetu. Kaposetolo Yowano asonekelele vakwavo vaka-kwitava ngwenyi: “Weshowo azanga Kalunga atela kuzanga nandumbwenyi nawa.” (Yowa. 1, 4:21) Nge natulisolwelanga zangi navakwetu, kaha natusolola ngwetu twazanga Kalunga.

4-5. Hanenu chakutalilaho chakusolola omwo zangi yakuzanga Kalunga yatambukila hamwe nazangi yakuzanga vakwetu.

⁴ Mujijila muka muze zangi yetu yakuzanga Kalunga yatambukila hamwe nazangi yetu yakuzanga vandumbwetu? Chakutalilaho, achishinganyekenu omwo muchima wazachila hamwe navihanda vikwavo vyamujimba. Nge ndotolo nashindakanya hamishisa yahalivoko mangana evwenga nge manyinga ali nakutambuka kanawa nyi chiku, nachimukafwa nawa atachikize omwo uli nakuzachilamo muchima. Uno natuzachisa ngachilihi echi chakutalilaho, kutalisa kuzangi?

⁵ Ngana muze ndotolo mwatachikiza omwo uli nakuzata muchima hakushindakanya mishisa yahalivoko, nayetu tunahase kutachikiza kutohwa chazangi yetu yakuzanga Kalunga, hakukekesa zangi yetu yakuzanga vakwetu. Nge natumona ngwetu zangi yetu yakuzanga vakwetu yinaholo, kaha chinahase kupwa unjiho wakusolola nge nazangi yakuzanga Kalunga yinaholo. Oloze nge natutwalaho kusolwelanga vandumbwetu zangi, kaha hichinjikizo chakusolola nge nazangi yetu yakuzanga Kalunga yinazame.

6. Mwomwo ika twatela kulizakamina nge zangi yetu yakuzanga vandumbwetu yinaputuka kuhehela? (WaYowano 1, 4:​7-9, 11)

⁶ Nge zangi yakuzanga vakwetu yinaputuka kuhola kaha hiukalu waunene chikuma. Mwomwo ika? Mwomwo chili nakulumbununa nge usepa wetu naYehova unaputuka kuzeya. Kaposetolo Yowano alumbununa kanawa chishina kana hakutwanukisa ngwenyi: “Ou azeneka kuzanga ndumbwenyi ou amona, keshi kuhasa kuzanga Kalunga uze kamonako.” (Yowa. 1, 4:20) Chishina muka natulinangulako? Yehova eji kutwivwilanga uselewa nge ‘natulizanganga navakwetu.’—Tangenu WaYowano 1, 4:​7-9, 11.

7-8. Jijila muka jimwe tunahase kusolwelamo ngwetu twazanga vakwetu?

⁷ Kakavulu muMazu aKalunga tweji kuwanangamo lushimbi lwakutulweza ‘tulizangenga navakwetu.’ (Yowa. 15:​12, 17; Loma 13:8; Teso. 1, 4:9; Petu. 1, 1:22; Yowa. 1, 4:11) Chipwe ngocho, zangi yatwama mumuchima, chipwe ngwetu mutu wamukachi, kaha nawa kakweshi mutu mwahasa kumona mumuchima wetuko. Jino vakwetu navatachikiza ngachilihi ngwavo twavazanga? Shina kuhichila muhanjikiso yetu namuvilinga.

⁸ Kuli jijila jajivulu jakusolwelamo ngwetu twazanga vandumbwetu. Vyakutalilaho vimwe vino: “Mutu himutu ahanjikenga muchano namukwavo.” (Zeka. 8:16) “Twamenunga mukuunda navakwenu.” (Mako 9:50) Pwenunga vatete ‘kusolwela vakwenu kavumbi.’ (Loma 12:10) “Litambulenunga navakwenu.” (Loma 15:7) ‘Likonekelenunga navakwenu.’ (Kolo. 3:13) “Limbachisenunga viteli navakwenu.” (Ngale. 6:2) “Livendejekenunga navakwenu.” (Teso. 1, 4:18) ‘Litungenunga navakwenu.’ (Teso. 1, 5:11) ‘Lilombelenungako navakwenu.’—Yako. 5:16.

9. Mwomwo ika kuvendejeka vandumbwetu chapwila hijila yayilemu yakusolwelamo zangi? (Talenu nawa muvwimbimbi.)

⁹ Tushimutwilenu jila yimwe yakusolwelamo zangi, yize vanavuluka mupalangalafu yinafumuho. Paulu ambile ngwenyi: “Livendejekenunga navakwenu.” Mwomwo ika kuvendejeka  vakwetu chapwila hijila yayilemu yakusolwelamo zangi? Kweseka namukanda umwe wahanjika haMbimbiliya, lizu “kuvendejeka” lize azachishile Paulu lyalumbununa “kukafwa mutu uze ali nakumona ukalu waunene.” Shikaho, kuvendejeka ndumbwetu uze ali nakumona ukalu, nachimukafwa akatuke cheka nakutwalaho kutambuka mujila yakuya kukuyoya. Lwola lwosena tweji kuvendejekanga vandumbwetu, tweji kusololanga hatoma ngwetu twavazanga.—Koli. 2, 7:​6, 7, 13.

10. Uno kutetela chalikwatasana ngachilihi nakuvendejeka?

¹⁰ Kutetela mutu chatambukila hamwe nakumuvendejeka. Mujila muka? Mutu wamuchima wakutetela eji kuvendejekanga vakwavo vaze vali muukalu nakuvalingilako vyuma vimwe. Shikaho tweji kuvangilanga kwivwila mutu keke numba jino tumuvendejeke. Achitalenu omwo Paulu afwanyishile muchima waYehova wakutetela kukuvendejeka chize eji kuvendejekanga vatu. Paulu avuluka Yehova kupwa “Setu muka-kutetela, kaha nawa Kalunga muka-kuvendejeka chosena.” (Koli. 2, 1:3) Paulu hano azachishile lizu “kutetela” mangana alumbunune keke atela kupwa nayo mutu hali vakwavo. Shikaho, Kalunga vamuvuluka ngwavo Setu muka-kutetela chipwe ngwetu Kasulu kakutetela, mwomwo eji kwivwilanga chikuma vatu keke. Kaha keke kana yeji kumulingisanga atuvendejeke “muvyeseko vyetu vyosena.” (Koli. 2, 1:4) Ngana muze meya amwaza akufuma mukaselwoke nawahizumuna vaze vanevu lipwila, mukiko naYehova eji kuhizumunanga vaze vanahombo nakuvavendejeka. Natulondezeza ngachilihi Yehova nakupwa namuchima wakutetela vakwetu nakuvavendejeka? Jila yimwe tunahase kulingilamo ngocho shina kupwa navilinga vize navitukafwa tutetelenga vakwetu nakuvavendejeka. Vilinga muka vimwe twatela kupwa navyo?

11. Kweseka naWavaka-Kolose 3:12 naWaPetulu 1, 3:​8, vilinga vyeka muka twatela kupwa navyo vize navitukafwa tupwenga nazangi yize nayitukunyula tuvendejeke vandumbwetu?

¹¹ Vyuma muka navitukafwa tutwaleho kupwa nazangi yize nayitukunyula ‘tulivendejekenga navakwetu’ hakumbi hakumbi? Twatela kupwa namuchima wakuzakama vakwetu, nazangi yakuzanga vandumbwetu nalikoji. (Tangenu Wavaka-Kolose 3:12; WaPetulu 1, 3:8.) Uno vilinga kana navitukafwa ngachilihi? Nge natupwa namuchima wakutetela vandumbwetu nakuvazakama chikuma, kaha nachitukunyula tufwilenga kuvavendejeka nge vali nakuyanda. Yesu ambile ngwenyi, “kanwa keji kuhanjikanga vyuma vinavulu mumuchima. Mutu wamwaza eji kulovolanga vyuma vyamwaza kuluheto lwamwaza lwamumuchima wenyi.” (Mateu 12:​34, 35) Kuvendejeka vandumbwetu vali muukalu hijila yimwe yayilemu yakusolwelamo ngwetu twavazanga.

12. (a) Mwomwo ika twatela kupwa vakuzangama? (b) Chihula muka natushimutwila?

¹² Tuvosena twafwila kutwalaho ‘kulizanga navakwetu.’ (Yowa. 1, 4:7) Chipwe ngocho, chapwa chachilemu kwanuka nawa ngwetu Yesu atuhuhumwine ngwenyi “zangi yavatu vavavulu nayikahola mwomwo yakuvula chaupapwoki.” (Mateu 24:12) Yesu kalumbunwine ngwenyi tumbaji twenyi vavavulu navakecha kulisolwela zangiko. Olozenyi twatela kuzangama, nge chiku tunahase kupwa namuchima wavaka-kaye wakuhona zangi. Shikaho tushimutwilenu jino hachihula chino chachilemu: Uno kuli jila tunahase kutachikijilamo ngwetu zangi yetu yakuzanga vandumbwetu yichili yakuzama tahi?

13. Vyuma muka vinahase kweseka zangi yetu?

¹³ Jila yimwe tunahase kutachikijilamo kuzama chazangi yetu shina kukekesa omwo tweji  kulinganga nge kunasoloka vyuma vimwe. (Koli. 2, 8:8) Kaposetolo Petulu avulukile chuma chimwe chinahase kusoloka ngwenyi: “Chachinenenyi, pwenunga nazangi yayinene yakulizanga navakwenu, mwomwo zangi yeji kufwikanga jishili jajivulu.” (Petu. 1, 4:8) Shikaho vyuma tweji kulinganga nge vandumbwetu vanalimbenje chipwe nge vanatwivwisa kupihya, vikiko vyeji kusololanga nge hanga twavazangila chipwe chiku.

14. Kweseka naWaPetulu 1, 4:​8, zangi yakuheta haseteko muka twatela kupwa nayo? Hanenu chakutalilaho.

¹⁴ Tuchikekesenu kanawa mazu ahanjikile Petulu. Mazu atete muvesi 8 asolola zangi yize twatela kupwa nayo, yamba ngwavo “zangi yayinene.” Lizu “yayinene” lize azachishile Petulu lyalumbununa “kutanduula.” Mazu amakumishilo asolola chuma tunahase kulinga nge natupwa nazangi yayinene. Zangi kana yeji kufwikanga jishili javandumbwetu. Chuma kana tunahase kuchilumbununa ngana: Zangi yetu tweji kuyikwatanga namavoko avali kwijiva nge lihina, kaha tweji kuyitanduulanga swi nomu nayifwika “jishili jajivulu” keshi yimwe kahako. Lizu kufwika lyalumbununa kukonekela. Ngana muze lihina linahase kufwika chuma chize chili namajilo, nazangi yinahase kufwika tutenga twavandumbwetu nakuhehela chavo.

15. Nge zangi yakuzanga vandumbwetu nayizama, kaha nachitukafwa tulinge ika? (Wavaka-Kolose 3:13)

 ¹⁵ Zangi yetu yakuzanga vakwetu yatela kupwa yakuzama mangana tuhase kukonekelanga vandumbwetu hatutenga twavo, numba tuhu lwola lumwe chasakiwa kukilikita. (Tangenu Wavaka-Kolose 3:13.) Nge natukonekelanga vakwetu, kaha natufwila kwivwisa Yehova kuwaha nakusolola nawa ngwetu zangi yetu yapwa yakuzama. Vyuma muka vikwavo navitukafwa tuliulenga tutenga twavakwetu tuze tweji kutwivwisanga kupihya?

16-17. Vyuma muka vikwavo navitukafwa tuliulenga tutenga twavandumbwetu? Hanenu chakutalilaho. (Talenu nawa muvwimbimbi.)

¹⁶ Shishikenunga chikuma havyuma vyamwaza veji kulinganga vandumbwetu keshi hatutenga twavoko. Chakutalilaho, achishinganyekenu munalikungulwila hamwe navandumbwenu. Kaha muli nakulivwisa kuwaha, oloze hakukumisa namulikopa jifwato mwalizavu. Oloze namukopelako jifwato jeka jivali mwomwo pamo jimwe kajeshi kusoloka kanawako. Kaha muli jino najifwato jitato. Oloze hafwato yimwe namumona ndumbwenu umwe kamwesele kukanwako. Uno chuma muka namulinga kufwato kana? Twafwelela namuyijima, mwomwo muli najifwato jeka haze vandumbwenu vosena vanamwese kutunwa kuhakilako vene nauze ndumbwenu kamwesanga haze hafwato yikwavoko.

¹⁷ Twesekesenu eji jifwato natutulika, kuvyuma vize tweji kulamanga mumichima yetu. Kakavulu tweji kwanukanga vyuma vyamwaza  twalivwishilenga kuwaha navandumbwetu. Jino achishinganyekenu nge halwola lwakufwana ngana ndumbwenu umwe mwahanjika chipwe kulinga chuma chize nachimivwisa kupihya. Kutala namutwalaho kwanukanga chuma kana tahi? Kutala kamwatela kuchijima ngana muze namujima yize fwato tunavulukako tahi? (Vishi. 19:11; Efwe. 4:32) Nachipwa chachashi kuvulyama katenga kandumbwetu, mwomwo kuli vyuma vyavivulu tunahase kwanuka vize tunalivwisanga kuwaha naikiye. Evi vikiko vyuma twasaka kwanuka nakuvimona kupwa vyavilemu.

18. Vishina muka vyavilemu vize tunashimutwila muchihande chino kutalisa kuzangi?

¹⁸ Mwomwo ika tuli nakusakiwila kuzamisa zangi yakuzanga vandumbwetu? Ngana muze tunashimutwila, nge natusolwela vandumbwetu zangi, kaha tuli nakusolola nawa ngwetu twazanga Yehova. Uno natusolola ngachilihi ngwetu twazanga vandumbwetu? Jila yimwe tweji kulingilangamo ngocho shina hakuvavendejeka. Natutwalaho lika ‘kulivendejekanga navakwetu’ kachi nge natuvevwilanga keke. Chuma muka nachitukafwa tutwaleho lika kuzamisa zangi yakuzanga vandumbwetu? Hakuzata nangolo mangana tuvakonekelenga hatutenga twavo.

19. Mwomwo ika chapwila chachilemu kulisolwela zangi navandumbwetu makumbi ano?

¹⁹ Mwomwo ika chapwila chachilemu makumbi ano kulisolwela zangi navandumbwetu? Petulu avulukile chuma chatela kutulingisa tulisolwele zangi, ngwenyi: “Kukuma chavyuma vyosena chinapandama kwakamwihi. Shikaho . . . pwenunga nazangi yayinene yakulizanga navakwenu.” (Petu. 1, 4:​7, 8) Omu kukuma chakaye kano kakuhuka chili nakupandama, vyuma muka twatela kutalilila? Yesu ahanjikilile chimweza kutalisa kuli vaka-kumukavangiza ngwenyi: “Navakamihunga kuli vaka-mafuchi osena mwomwo yalijina lyami.” (Mateu 24:9) Hakusaka tutwaleho lika kupwa vakushishika kuli Yehova, twatela kupwa vakulinunga. Nge natulinga ngocho, kaha Satana keshi kuhasa kutuhandununako, mwomwo natulikata hamwe muzangi yize “yeji kununganga vatu hamwe mujila yakukupuka.”—Kolo. 3:14; Fwili. 2:​1, 2.