1, 2. (a) Ukalu muka veji kumonanga vangeji vavavulu makumbi ano? (Talenu muvwimbimbi wakulivanga.) (b) Kaposetolo Paulu atukolezeza tulinge vyuma muka, kaha vihula muka natushimutwila?

HAMYAKA yakuzomboka 30 kunyima, Osei ^[1] wamuGhana uze kapwile Chinjiho chaYehovako halwola kana ayile kuEurope. Ambile ngwenyi: “Ngwamwene jino ngwami vatu vavavulu kavanguzangileko. Ngonde nawa kayapwile yamwazako. Omu ngwafumine kuchivaza chandeke ngwevwile chishika chikuma chize kanda ngwivwengangaho lyehi mukuyoya chami, ngocho ngwaputukile kulila.” Hakuwana nge Osei katachikijile kanawa lilimi lyakulifuchi ayileko, ngocho chamukaluhwilile kuwana milimo yamwenemwene hamwaka umwe nakuhambakanaho. Kaha nawa evwilenga chikuma uli mwomwo kapwilenga hamwe navausoko wenyiko.

² Nge yenu mwapwanga muukalu kanou amwene Osei, kachi vyuma muka namusaka vakwenu vamilingile? Kutala kamweshi kwivwa kuwaha nge vakwenu navamisolwela chisambo haZuvo yaWangana  chamokomoko nalifuchi mwafuma chipwe chikova chenu tahi? Mbimbiliya yakolezeza vaka-Kulishitu ngwayo: “Kanda namuvulyama kusolwelanga vangeji likojiko.” (Hepe. 13:2, kwinyikila chamwishi) Shikaho tushimutwilenu havihula vino: Uno Yehova amona ngachilihi vangeji? Mwomwo ika twatela kumwena vangeji mujila yamwaza? Kaha tunahase kukafwa ngachilihi vandumbwetu vafuma kumafuchi eka mangana vapwenga vakuwahilila muchikungulwilo?

3, 4. Kweseka namukanda waKulovoka 23:9, vaIsalele vatelelele kumona ngachilihi vamwiza, kaha mwomwo ika?

³ Omu Yehova ayowele vatu jenyi muEjipitu, avahanyine jishimbi jize jasolwele nge azakamine chikuma vatu vaze kavapwile vaIsaleleko vaze vejile nakutwama navaIsalele hamwe. (Kulo. 12:38, 49; 22:21) Hakuwana nge vamwiza veji kumonanga ukalu, ngocho Yehova ahakileko jijila jimwe jakuvazakaminamo. Jila yimwe shina yakupwa nalisesa lyakuhuhwojolanga jimbuto.—Levi 19:9, 10.

⁴ Yehova alwezele vaIsalele vamonenga vamwiza kupwa vavalemu nakuvevwila keke. (Tangenu Kulovoka 23:9.) Vatachikijile ‘omwo chapwile chiyoyelo chamwiza.’ Shimbu kanda vavafumise muundungo muEjipitu, vaYuleya vavalumbilishilenga kuli vaEjipitu mwomwo yamuyachi nakwitava chavo. (Kupu. 43:32; 46:34; Kulo. 1:11-14) Numba tuhu vaIsalele vavayanjishilenga omu vapwile vamwiza, oloze Yehova avalwezele vamone vamwiza “nge himutu wakusemukila mulifuchi” lyavo.—Levi 19:33, 34.

5. Vyuma muka navitukafwa tuzakamenga vamwiza?

⁵ Namakumbi ano, twafwelela ngwetu Yehova azakama vatu vosena vaze veji kuyanga kukukunguluka chetu chamokomoko nokwo vafuma. (Lushi. 10:17-19; Mala. 3:5, 6) Nge natushinganyeka kanawa haukalu veji kumonanga wakufwana nge kuvamona ulumbi, chipwe mwomwo yalilimi vahanjika, kaha tunahase kuwana jijila jakuvasolwelamo likoji nakuvazakama.—Petu. 1, 3:8.

6, 7. Uno vaka-Kulishitu vakulivanga vakumishile ngachilihi vikokojola vyakulitala hamiyachi?

⁶ Mulikulukaji lyamyaka lyakulivanga, vaka-Kulishitu vahonesele muchima wakumona vakwavo ulumbi uze vapwile nawo vaYuleya. HaPendekoseta 33 C.E., vaka-Kulishitu vamuYelusalema vasolwelenga chisambo vatu vaze valumukile nakupwa vaka-Kulishitu vakufuma kujingalila jakulisezaseza. (Vili. 2:5, 44-47) Muchima vapwile navo vaYuleya vaze valumukile nakupwa vaka-Kulishitu wakuzakama vandumbwavo vakufuma kuvihela vyakulisezaseza, wasolwele nge vatachikijile kanawa mwakusolwela “chisambo,” chipwe, ‘kusolwelanga vangeji likoji.’

⁷ Omu vaka-Kulishitu vakulivanga vavulile, kwepukile vikokojola vyakulitala hamiyachi. VaYuleya vaze vahanjikilenga chiHelase vayayavalilenga ngwavo vatuliwe javo vamapwevo vapwile nakuvasuvilila. (Vili. 6:1) Hakusaka kukumisa vikokojola, vaposetolo vatongwele malunga 7 mangana vatale hamulimo wakupangila vyakulya vatuliwe. Ava malunga vosena vapwile namajina achiHelase. Echi chasolola nge vaposetolo vasakile kukumisa vikokojola vyakulitala hamiyachi vize vyepukile kuli vaka-Kulishitu vakulivanga.—Vili. 6:2-6.

8, 9. (a) Vyuma muka vize navisolola nge tuli nakumona vakwetu ulumbi? (b) Vishinganyeka muka vize katwatela kupwa navyoko? (Petu. 1, 1:22)

⁸ Chisemwa chetu chinahase kutulingisa tumone vakwetu ulumbi. (Loma 12:2) Kaha nawa tweji kwivwanga vakwetu twalihata navo, navaze twazata navo, chipwe vakwetu vaka-shikola navatoleka vakwavo mwomwo yachisemwa  chipwe lifuchi vafuma, namuyachi wavo chipwe chikova chavo. Uno tweji kwivwanga ngachilihi havyuma veji kuhanjikanga? Kaha tweji kwivwanga ngachilihi nge mutu mwalumbilisa lifuchi lyetu nakungalila twafuma?

⁹ Hakavanga, kaposetolo Petulu amwenenga ulumbi vatu vaze kavapwile vaYuleyako, oloze kutwala muze aputukile jino kuvazanga nakuhona kuvamona ulumbi. (Vili. 10:28, 34, 35; Ngale. 2:11-14) Nayetu nawa nge tuli navishinganyeka vyakumona vakwetu ulumbi mwomwo yachisemwa chipwe muyachi wavo, kaha twatela kuzata nangolo mangana twechanga vishinganyeka kana. (Tangenu WaPetulu 1, 1:22.) Twatela kwanuka ngwetu, Kakweshi mutu wakwoloka numba umweko, mwomwo tuvosena katwakupukako chamokomoko nachisemwa chipwe muyachi wetu. (Loma 3:9, 10, 21-24) Shikaho mwomwo ikaze natulimwena kupwa vavalemu kuhambakana vakwetu? (Koli. 1, 4:7) Twatela kupwa navishinganyeka ngana vize apwile navyo kaposetolo Paulu uze alwezele vakwavo vaka-Kulishitu vawavisa ngwenyi: “Kamweshi cheka muvatu veka chipwe muvamwizako, oloze. . . munapu muvatu vakuzuvo yaKalunga.” (Efwe. 2:19) Nge natuzata nangolo mangana tuhonese muchima wakumona vakwetu ulumbi, kaha nachitukafwa tupwenga navilinga vyamwaza.—Kolo. 3:10, 11.

10, 11. Uno Mbowaze asolwele ngachilihi omu Yehova amona vangeji hakusolwela Lute likoji?

¹⁰ Mbowaze asolwelele Lute kaMowave likoji ngana muze Yehova amona vangamba jenyi. Omu Mbowaze ayile nakutala vaka-kuzata muwande wenyi, awanyine Lute pwevo wakujikiza ali nakuhuhwojolamo kaha amusolwele chisambo. Omu Mbowaze vamulwezele ngwavo Lute nalombo lisesa mangana ahuhwojole muwande wenyi numba tuhu chapwile chakwoloka kulinga ngocho, amwivwililile keke kaha amulwezele kuhuhwojola nahamikuta.—Tangenu Lute 2:5-7, 15, 16.

¹¹ Jila Mbowaze ashimutwililemo naLute yasolola nge amwivwililile keke, hakushinganyeka haukalu apwile nakuhitamo hakupwa ngeji. Amusanyikile nawa, mangana atwamenga navana vamapwevo kuchina navamutoleka kumalunga vaze vazachilenga muwande wenyi. Amuhanyine vyakulya nameya amavulu ngana mwavaka-kuzata muwande wenyi. Mbowaze kahanjikile vyuma vyavipi hali ou pwevo wangejiko, oloze amufwelelesele ngwenyi mwamukafwa.—Lute 2:8-10, 13, 14.

12. Nganyo muka yatwama hakusolwelela vangeji likoji chamokomoko nokwo vafuma?

¹² Mbowaze kasolwelelele Lute likoji mwomwo yamuchima apwile nawo nayewenu Nowemi kahako, oloze awahililile hakutachikiza ngwenyi Lute apwile jino muka-kulemesa Yehova. Muchima wakeke apwile nawo Mbowaze wasolwele nge Yehova azangile chikuma ou pwevo wangeji uze ejile ‘nakuswama mumavava aKalunga kaIsalele.’ (Lute 2:12, 20; Vishi. 19:17) Chochimwe namakumbi ano, kupwa navilinga vyamwaza chinahase kulingisa “vatu vosena” vatachikize muchano nakumona omu Yehova avazanga.—Chimo. 1, 2:3, 4.

13, 14. (a) Mwomwo ika twatela kufwila kumeneka vangeji haZuvo yaWangana? (b) Munahase kuhonesa ngachilihi ukalu wakuhona kushimutwila navatu vakuvisemwa vyeka?

¹³ Tunahase kusolwela vangeji likoji vakufuma kujingalila jakulisezaseza hakuvamenejeka haZuvo yaWangana. Tunahase kumona ngwetu vangeji vanakwivwa sonyi nakupwa kwaukawavo. Vanahase kulimona nge vakukuminamo hakulyesekesa kuvakwavo kweseka najila vavalelelemo chipwe chisemwa chavo. Shikaho twatela kuvasolwela chisambo mangana vamone ngwavo twavazanga chikuma. Nge muli na  JW Language app mulilimi lyenu, kaha nayimikafwa mulinangule mwakumenekela vatu mumalimi avo.—Tangenu Wavaka-Fwilipi 2:3, 4.

¹⁴ Chinahase kumikaluhwila kushimutwila namutu wakuchisemwa cheka. Hakusaka muhonese ukalu kana, munahase kuvalweza omu chapwa chiyoyelo chenu. Munahase kuwana ngwenu chisemwa chavo kachalihandunwine chikuma nechi chenuko. Namwijiva nawa ngwenu chisemwa hichisemwa chatwama noho chawahila noho chapihila.

15. Vyuma muka navitukafwa tupwenga namuchima wakutalilila chikoki vangeji?

¹⁵ Hakusaka mangana muzakamenga vangeji muchikungulwilo, lihulisenu ngwenu, ‘Kachi nge yami ngwapwanga ngungeji, nangusaka vakwetu vangutambule ngachilihi?’ (Mateu 7:12) Mwatela kutalilila chikoki vangeji vaze vaneza mulifuchi lyenu. Halwola lwatete katweshi kuhasa kutachikiza vishinganyeka vyavoko. Twatela kuvetavila valinge vyuma kweseka namwaya chisemwa chavo, muchishishisa chakuvashinyinyika vakavangize chisemwa chetu.—Tangenu Wavaka-Loma 15:7, kwinyikila chamwishi.

16, 17. (a) Vyuma muka twatela kulinga mangana tupandame chikuma kuvatu vakuvisemwa vyeka? (b) Tunahase kukafwa ngachilihi vangeji vamuchikungulwilo chetu?

¹⁶ Nge natutachikiza chisemwa chavangeji vaze vaneza mungalila yetu, kaha natuchiwana kupwa chachashi kulikata navo. Tunahase kuhehwojola mijimbu yize yasolola chiyoyelo chavangeji vaneza muchikungulwilo chetu halwola lwachilongesa chakulemesa Kalunga mwatanga. Tunahase nawa kupandama chikuma kuli vatu vakuchisemwa cheka hakuvasanyika kuzuvo yetu tulyenga navo vyakulya. Hakuwana nge Yehova asokolwela “vaka-mafuchi eka chikolo chakulufwelelo,” kutala nayetu katweshi kusaka kusolwela chisambo vangeji vaze “twalikata navo mulufwelelo” tahi?—Vili. 14:27; Ngale. 6:10; Yopa 31:32.

 ¹⁷ Nge natuwananga lwola lwakushimutwila navangeji, kaha natusolola ngwetu twavasakwilila hakwalumunako chiyoyelo chavo mangana vayoye kweseka namwaya chisemwa chetu. Twatela kutachikiza ngwetu navasaka kuvakafwa valinangule lilimi lyetu. Kaha nawa tunahase kuvajimbula kuvakulwane vamauka akukafwa afulumende mangana vavahane kwakutwama kwamwaza chipwe kuvengisa milimo yamwenemwene. Kusolwela vandumbwetu chisambo mujila kaneyi chinahase kuvakafwa chikuma.—Vishi. 3:27.

18. Chakutalilaho muka chamwaza chize vatela kulondezeza vangeji makumbi ano?

¹⁸ Vangeji vasaka kuzata nangolo mangana vayoye kweseka nachisemwa chamungalila vali nakutwama. Lute asolwele chakutalilaho chamwaza hakupwa ngeji. Chatete, asolwele ngwenyi amwene jishimbi jamungalila ayile kupwa jajilemu hakulomba lisesa lyakuhuhwojola muwande. (Lute 2:7) Kahuhwojwele chakuzeneka kulomba lisesa kwijiva nge vakwavo vapwile namukuli wenyiko. Chamuchivali, asakwililile chikuma hakumusolwela likoji. (Lute 2:13) Nge vangeji navasolola vilinga vyamwaza ngana vize apwile navyo Lute, kaha nachilingisa vatu vamungalila kana navandumbwavo vavamone kupwa vavalemu.

19. Mwomwo ika twatela kusolwelanga vangeji chisambo vaze vaneza mungalila yetu?

¹⁹ Twawahilila chikuma hakuwana nge Yehova netavila vatu vakumafuchi osena kulinangula mujimbu wamwaza mwomwo yalikoji lyenyi lyalinene. Pamo mulifuchi lyavo kachapwile chachashi kulinangula Mbimbiliya chipwe kulikata navatu jaYehovako. Oloze hakuwana nge vali jino nalisesa lyakulikata nayetu, kutala katweshi kusaka kulikata navoko tahi? Nge natuvasolwela chisambo nakuvakafwa numba tuhu tukwechi vyuma vyavindende, nachisolola nge Yehova avazanga chikuma. Hakuwana nge tweji ‘kulondezezanga Kalunga,’ ngocho tufwilenu kusolwelanga vangeji chisambo vaze vaneza mungalila yetu.—Efwe. 5:1, 2.