JISHIMBI jaMose jetavishile vatu kulishinganga. Chipwe ngocho, mulwola lwaYesu vatu vapwile natato yakulishinganga chamushingila. Vatu valishingilenga mangana vasolole ngwavo vyuma vahanjikilenga vyapwile vyamuchano. Oloze Yesu akanyishile tato kana mapapa kavali. Kaha ambile ngwenyi: “Lizu lyenu lyakwamba ngwenu ‘Eyo’ lipwenga vene eyo, kaha ‘Nduma,’ lipwenga vene nduma.”—Mateu 5:33-37; 23:16-22.

Mukunda waTheological Dictionary of the New Testament wahanjika ngwawo, mukanda waTelumundi watukafwa tutachikize ngwetu vaYuleya valishingilenga mangana vasolole ngwavo vyuma vahanjikilenga vyapwile vyamuchano. Ou mukanda waTelumundi wahanjika hajishiko vatelelele kuhokola najize kavatelelele kuhokolako.

Yesu keshi ikiye kaha amwene tato kana kupwa yayipiko. Chakutalilaho, Flavius Josephus uze alinangula vyakushikulu ahanjikile hali vaYuleya vamwe ngwenyi kavalishingilengako mwomwo vamwenenga kulishinga kupwa chachipi kuhambakana kwonga. Vashinganyekele ngwavo, nge mutu mwalishinga mangana vakwavo vamufwelele, kaha apwa muka-makuli. Mukanda umwe wavaYuleya vavuluka ngwavo, Wisdom of Sirach chipwe Ecclesiasticus, (23:11) wamba ngwawo: “Mutu uze azanga kulishinga apwa wamupi chikuma.” Yesu ambile ngwenyi katwatela kulishinganga chamushingilako. Nge lwola lwosena tweji kuhanjikanga muchano, kaha katweshi kulishinga mangana ngwetu vatu vatufweleleko.