ISE yaJohn vamumbapachishile muji 1950 mungalila yaGujarat, muIndia nakupwa Chinjiho chaYehova. John navandumbwenyi vatanu nanevo vapwile vaka-Katolika, kaha vahungile kwitava chasevo.

Likumbi limwe John vamutumine kuli ise mangana amutwalileko mukanda kuli mukwavo Chinjiho. Halikumbi kana nachimene, John alitetele kumunwe wakulivoko lyachilyo omu apwile nakusokolola chifwoyo chavyakulya. Chipwe ngocho, ononokele ise kaha akashile lihina hambandu nakutwala uze mukanda.

Omu John ahetele kuze kuzuvo, pwevo lyauze Chinjiho uze naikiye apwile Chinjiho atambwile uze mukanda. Uze pwevo amwene mbandu kumunwe waJohn, kaha asakile kumukafwa. Ngocho ambachile chikasha chenyi chavitumbo, kaha amukosele hambandu nakumuhakaho vitumbo nakukasaho. Kufumaho amuhanyine tiyi oku ali nakushimutwila nenyi vihande vyamuMbimbiliya mujila yalikoji.

Halwola kana John aputukile jino kuzanga Vinjiho, ngocho amuhulishile vihula vivali havyuma vafwelela vaka-Katolika vize Vinjiho kavafwelelako. Amuhulishile ngwenyi, Uno Yesu apwa Kalunga tahi? Kutala vaka-Kulishitu vatela kulomba kuli Maliya tahi? Hakuwana nge ou Chinjiho atachikijile lilimi lyaGujarati, ngocho amukumbulwile kuzachisa Mbimbiliya yamulilimi kana nakumuhana mukanda “[wa]This Good News of the Kingdom.”

Omu John akatangile uze mukanda, hakiko jino aputukile kwivwa muchano wamuMbimbiliya. Kufumaho ayile kuli kapilishitu wamuchachi yavo nakumuhulisa vize vihula vivali. Uze kapilishitu apihililile nakumwasa Mbimbiliya nakwamba ngwenyi: “Unapu uSatana! Ngulweze oho vasoneka muMbimbiliya ngwavo Yesu keshi ikiye Kalungako. Hamwe halihi vasoneka ngwavo kamwatela kulemesa Maliyako? Ngulweze!” John alikomokelele havyuma alingile ou kapilishitu kaha amulwezele ngwenyi, “Kangweshi kukaya cheka kuchachi yaKatolikako.” Kaha omu mukiko alingile.

John aputukile kulinangula Mbimbiliya naVinjiho jaYehova kaha etavililile muchano nakuputuka kuzachila Yehova. Mukuhita chalwola vavavulu mutanga yavo vapwile Vinjiho. John achili lika nachiveza chayize mbandu alitetele myaka 60 kunyima. Oloze achili nakwanuka likoji vamusolwelele lize lyamulingishile ezenga mukulemesa chamuchano.—Koli. 2, 6:4, 6.