1. Zangi muka yapwa yakulipwila, kaha mwomwo ika? (Talenu muvwimbimbi wakulivanga.)

ZANGI yize yazama hajindongi jamuMbimbiliya (a·gaʹpe) yapwa wana wakufuma kuli Yehova. Mwomwo ikiye apwa Kasulu kazangi kana. (Yowa. 1, 4:7) Eyi zangi yikiko yapwa yakulipwila. Yeji kulingisanga mutu apwenga navilinga vyamwaza vyakufwana nge kuhona lifwi. Mukanda umwe wahanjika ngwawo, zangi ya a·gaʹpe “veji kuyimwenanga kuvilinga mwasolola mutu.” Nge natusolwela vakwetu zangi kaneyi chipwe vakwetu kutusolwelayo, kaha natupwa vakuwahilila mukuyoya chetu.

2, 3. Yehova asolwelele ngachilihi vatu zangi yakulipwila?

² Yehova aputukile lyehi kuzanga vatu shimbu kanda atenge Alama naEve. Atengele mavu mangana apwenga limbo lyavatu nakulivwisa kuwaha kuyoyelaho myaka yosena. Yehova alingile vyuma kanevi mangana vitunganyalise yetu keshi ikiyeko. Atwalileho kusolola zangi kaneyi hakukisula vana venyi hano hamavu mangana valivwise kuwaha kuyoyela muPalachise myaka yosena.

³ Omu Alama naEve valikangile, Yehova asolwele zangi yenyi yayinene. Awahishile ndando yakusokola vana vaAlama naEve,  hakufwelela ngwenyi vamwe navetavila zangi yenyi. (Kupu. 3:15; Yowa. 1, 4:10) Halwola Yehova ahanjikile vyakutuma Mulwilo, kuli ikiye chapwile kwijiva nge namutumu lyehi. Jino omu mwahichile myaka 4,000, Yehova asokwele vatu hakusuula Mwanenyi umwe kaha wakulipwila. (Yowa. 3:16) Twawahilila chikuma hazangi atusolwela Yehova.

4. Twatachikiza ngachilihi ngwetu vatu vakuhona kukupuka vanahase kusolola zangi yakuzeneka kulyonga?

⁴ Nayetu nawa tunahase kusolwela vakwetu zangi, mwomwo Kalunga atutenga muchifwanyisa chenyi. Numba tuhu cheji kutukaluhwilanga kusolwela vakwetu zangi mwomwo yashili twaswana, oloze tuchili lika nauhashi wakulinga ngocho. Avele asolwele zangi yakuzanga Kalunga hakuhana wana wamwaza uze apwile nawo. (Kupu. 4:3, 4) Nowa asolwele zangi yakuzeneka kulyonga kuli vakwavo vatu hakuvambulila mujimbu waKalunga hamyaka yayivulu numba tuhu vatu kana kavakwilekoko. (Petu. 2, 2:5) Apalahama azangile chikuma Kalunga kuhambakana kuzanga vyuma asakile ivene, hakulisuula kuhana mwanenyi Isaka mwachimuna wakuvatula. (Yako. 2:21) Ngana mwamalunga kanava vakushishika, nayetu twatela kusolola zangi chamokomoko naukalu natumona.

5. Mujijila muka natusolwelamo zangi yamwenemwene?

⁵ Mbimbiliya yalumbununa ngwayo, “katwatela kuzanganga vakwetu namazu chipwe hakanwako, oloze muvilinga namumuchano.” (Yowa. 1, 3:18) Uno echi chalumbununa nge katwatela kusolola zangi muhanjikisoko tahi? Nduma. (Teso. 1, 4:18) Mazu kana alumbununa nge zangi yetu kayatela kukumina kaha mukuhanjikako, chikumanyi nge kuli ukalu. Chakutalilaho, nge ndumbwetu nahono vyuma vyakulikafwa navyo mukuyoya, kaha mwasakiwa kumukafwa keshi kuhanjika kahako. (Yako. 2:15, 16) Chochimwe nawa, zangi yakuzanga Yehova navakwetu kayeshi kutulingisa kaha tulombe Kalunga ‘atume vaka-kuzata vayenga mumulimo wenyi wakwahako,’ oloze nayetu twatela kwazanamo.—Mateu 9:38.

6, 7. (a) Uno zangi “yakuzeneka kulyonga” yapwa ngachilihi? (b) Vyakutalilaho muka vyasolola zangi yakulyonga?

⁶ Kaposetolo Yowano asonekele ngwenyi, twatela kuzanga vakwetu “muvilinga namumuchano.” Shikaho zangi yetu yatela kupwa “yakuzeneka kulyonga.” (Loma 12:9; Koli. 2, 6:6) Echi chalumbununa nge katweshi kuhasa kulyonga kusolola zangi yamuchanoko. Pamo tunahase kulihulisa ngwetu, ‘Uno mutu nahase kusolola zangi yakulyonga tahi?’ Eyo, mutu nahase kulinga ngocho hakulyonga kumeso avatu oloze keshi nazangi yakufuma kumuchimako.

⁷ Talenu vyakutalilaho vimwe vyasolola zangi yakulyonga. Satana alyongele mumilemba yaEtene nge apwile nakusaka kukafwa Eve, oloze kumana muchima wenyi wafwililile kulinganyalisa ivene. (Kupu. 3:4, 5) Kaha nawa omu Ndavichi apwile mwangana, Ahitofwele alisolwele nge apwile sepa lyenyi, kumana chiku. Amufumbukilile hakwijiva ngwenyi navamuhana chihela chachinene. (Samwe. 2, 15:31) Namakumbi ano nawa, vaka-kulikanga kuli Kalunga navatu vaze veji kunehanga vihandwa muchikungulwilo veji kuhanjikanga ‘nachilembekeshi namazu akulambisa’ mangana valisolole nge vakwechi zangi, kumana chiku.—Loma 16:17, 18.

8. Chihula muka twatela kulihulisa?

⁸ Zangi yakulyonga yapwa yayipi, mwomwo yeji kwonganga vatu. Vatu vaze veji kusololanga zangi kaneyi veji kwonganga vakwavo vatu, keshi Yehovako. Ngocho Yesu ambile ngwenyi, vaka-kulyonga ‘navakavazangamisa  chikuma.’ (Mateu 24:51) Chipwe ngocho, vangamba jaYehova kavasaka kusolola zangi kaneyi yakulyongako. Oloze twatela kulihulisa ngwetu, ‘Uno zangi yami yapwa yamwenemwene tahi, nyi yapwa yakulyonga?’ Shikaho, tukekesenu hajijila 9 jize natusolwelamo “zangi yakuzeneka kulyonga.”

9. Zangi yamwenemwene nayitukafwa tulinge vyuma muka?

⁹ Lisuulenunga kuzata numba tuhu vatu kavamimweneko. Twatela kulisuula kukafwanga vandumbwetu “mukusweka” chakuzeneka vatu kutachikiza, nge chinahase. (Tangenu Mateu 6:1-4.) Oloze Ananyiya naSafwila vahonene kulinga ngocho. Kavahanyine wana wavo mukuswekako, oloze vasakile vatu vatachikize ngwavo vanahane wana wauvulu, ngocho vavazangamishile hamuchima wavo wakulyonga. (Vili. 5:1-10) Oloze zangi yamwenemwene yeji kutulingisanga tufwile kukafwa vandumbwetu chakuzeneka kulisolola kuvatu. Chakutalilaho, vaze veji kukafwanga vandumbwetu vamuLizavu Lyakutwaminyina kuwahisa kulya chakushipilitu kaveshi kulisolola kuvatuko, mwomwo kavasaka vatu vavalise hamilimo yavoko.

10. Natusolola ngachilihi ngwetu twapwa vatete kusolwela vakwetu kavumbi?

¹⁰ Pwenunga vatete kusolwela vakwenu kavumbi. (Tangenu Wavaka-Loma 12:10.) Yesu atusela chakutalilaho chamwaza chakusolwela vakwetu kavumbi hakuvazachila milimo yize vamona vatu kupwa yamokomoko. (Yowa. 13:3-5, 12-15) Shikaho lwola lumwe twatela kuzata nangolo mangana tupwenga vakulinyisa numba tuhase kusolwela vakwetu kavumbi. Navaposetolo kavejivile ovyo vyalingishilenga Yesu alinge vyuma kanako, oloze vatachikijile jino chuma kana omu vatambwile shipilitu yajila. (Yowa. 13:7) Tunahase kuvumbika vakwetu hakuhona kulimona kupwa tuvavalemu chikuma mwomwo yashikola twatanga, chipwe luheto, chipwe milimo vatuhana muchikungulwilo. (Loma 12:3) Kaha nawa katwatela kwivwila vakwetu lushiushiu kachi nge vanakuvalisa havyuma vanatesamoko, oloze twatela kuwahilila navo numba tuhu tunatachikiza ngwetu nayetu twazananga muvyuma vanatesamo.

11. Mwomwo ika twatela kusangejekela vakwetu namuchima wosena?

¹¹ Sangejekenunga vandumbwenu namuchima wosena. Twatela kusangejekanga vakwetu mwomwo chapwa ‘chamwaza, kaha cheji kutunganga vakwetu.’ (Efwe. 4:29) Chipwe ngocho, kusangejeka chetu chatela kufuma kumuchima, kuchina kuhanjika kaha mazu achilembekeshi chipwe kuhona kukafwa mutu mujila yize yatela. (Vishi. 29:5) Kachi nge natusangejeka mutu oloze kufumaho hinatumuyongola, kaha chinapu kulyonga. Kaposetolo Paulu atuhana chakutalilaho chamwaza chakusangejeka vakwetu kufuma kumuchima. Chakutalilaho, asangejekele vaka-Kulishitu vamuKolinde havilinga vyavo vyamwaza. (Koli. 1, 11:2) Oloze omu valimbenjelenga, avahuhumwinenga hatoma kaha nawa mujila yalikoji.—Koli. 1, 11:20-22.

12. Natusolola ngachilihi zangi yakufuma kumuchima hakutambula vakwetu nachisambo?

¹² Tambulenunga vakwenu nachisambo. Yehova atuhana lushimbi lwakuzanganga vandumbwetu nakuvatambulanga nachisambo. (Tangenu WaYowano 1, 3:17.) Twatela kulinga ngocho namuchima wetu wosena, keshi mangana tunganyalilehoko. Shikaho, twatela kulihulisa ngwetu: ‘Kutala ngweji kusolwelanga kaha chisambo masepa jami, navaze vaya fuma, chipwe vaze ngunashinganyeka ngwami navakiko navakangusolwela chisambo tahi? Nyi ngweji kusolwelanga chisambo navandumbwami vaze  kangwatachikiza kanawako chipwe vaze vakalikiza tahi?’ (Luka 14:12-14) Uno natulinga ngachilihi nge ndumbwetu nengila muukalu mwomwo yakuhona kunoneka kanawa vyuma chipwe nahono kutusakwilila havyuma tunamulingila? Twatela kukavangiza mazu akwamba ngwavo: “Litambulenunga navakwenu nachisambo chakuzeneka kuyayavala.” (Petu. 1, 4:9) Nge namukavangiza mazu kana, kaha namupwa vakuwahilila mwomwo yamuchima wenu wakuhana.—Vili. 20:35.

13. (a) Chinahase kupwa ngachilihi chachikalu kukafwa vaze vanahehela? (b) Vyuma muka twatela kulinga mangana tukafwe vaze vahehela?

¹³ Kafwenunga vaze vanahehela. Zangi yetu vanahase kuyeseka kulushimbi lwamuMbimbiliya lwakwamba ngwavo, “kafwenunga vaze vanahehela, talililenunga chikoki vatu vosena.” (Teso. 1, 5:14) Numba tuhu vatu vakuhehela vavavulu veji kupwanga cheka nangolo, oloze vasakiwa kuvakafwa nakuvatalilila chikoki. Shikaho tunahase kuvakafwa hakushimutwilanga navo Visoneka vyamwaza vyakuvatunga, nakuzatanga navo muwande, nakuvevwililanga nge vanakuhanjika nayetu. Twatela kutachikiza nawa ngwetu tuvosena tukwechi ngolo kaha nawa tweji kuzeyanga. Nakaposetolo Paulu atachikijile ngwenyi apwile wakuhehela. (Koli. 2, 12:9, 10) Ngocho tuvosena twatela kulijikijisanga umwe namukwavo.

14. Tunahase kusolola ngachilihi ngwetu twafwila kutwama mukuunda navandumbwetu?

¹⁴ Twamenunga mukuunda. Tweji kuzatanga nangolo mangana tufwile kutwama mukuunda navandumbwetu, numba tuhu lwola lumwe tunahase kushinganyeka ngwetu vanatulingi mwamupi. (Tangenu Wavaka-Loma 12:17, 18.) Shikaho twatela kulikonekelanga navakwetu chakufuma kumuchima, mangana tuhonese vikokojola. Chakutalilaho, muchishishisa chakuhanjika ngwetu, “Ngukonekeleko nge ngunakupihisa,” twatela kwitavila upi wetu nakwamba ngwetu, “Ngukonekeleko hakukwivwisa kupihya hamazu ngwahanjikanga.” Kuunda nawa chapwa chachilemu chikuma muulo. Valunga napwevo kavatela kusolola ngwavo valizanga nge vali kaha kuvatu, okunyi kwauka wavo veji kulivetanga, nakuliliula nakulyamba mazu amapiko.

15. Tunahase kusolola ngachilihi ngwetu tunakonekela vakwetu kufuma kumuchima?

¹⁵ Likonekelenunga kufuma kumuchima. Tweji kukonekelanga vakwetu nge vanatulingi mwamupi nakuhona kuvalamina koko. Nge ‘natuliula tutenga twavakwetu muzangi, nakufwilanga kulama kulinunga chetu hamwe mushipilitu chize cheji kutununganga hamwe mukuunda,’ kaha natukonekela vakwetu chakuzeneka vakiko kutachikiza ngwavo vatwivwisanga kupihya. (Efwe. 4:2, 3) Hakusaka tukonekelenga vakwetu namuchima wetu wosena, katwatela “kulama kokoko.” (Koli. 1, 13:4, 5) Kulamina vakwetu koko chinahase kwenyeka usepa wetu navandumbwetu hamwe kaha naYehova. (Mateu 6:14, 15) Kaha nawa kulombelangako vaze vanatuvulumuna nachisolola  nge tunavakonekela kufuma kumuchima.—Luka 6:27, 28.

16. Twatela kuzata ngachilihi milimo navatuhana muliuka lyaYehova?

¹⁶ Fwilenunga kunganyalisa vakwenu. Nge vanatuhane milimo muliuka lyaYehova, kaha twatela kuyizata mujila yize nayisolola zangi nakuhona ‘kulinganyalisa etu vavene, oloze tunganyalise vakwetu.’ (Koli. 1, 10:24) Chakutalilaho, hakukunguluka chetu chachihanda nechi changalila, vaka-kukafwa veji kulivanganga mangana vawahise kanawa vihela vyakutwama vatu. Chipwe ngocho kaveshi kulisakwila vavene najitanga javo vihela vyamwazako. Echi cheji kusololanga nge kavasaka kulinganyalisa vaveneko, oloze vazanga vakwavo. Uno tunahase kulondezeza ngachilihi chakutalilaho chavo chamwaza?

17. Zangi yamwenemwene yinahase kulingisa mutu alinge vyuma muka nge nalingi shili yayinene?

¹⁷ Yitavilenu jishili jenu jakusweka nakujiseza. Vaka-Kulishitu vamwe nge vanalingi shili, veji kuswekanga kuchina ngwavo navevwa sonyi chipwe kusawisa vakwavo. (Vishi. 28:13) Oloze kachapwa chamwaza kulinga ngochoko, mwomwo cheji kunehanga ponde kuli mutu yivene nakuli vakwavo nawa. Cheji kulingisanga shipilitu yaKalunga yihone kwiza kuli yetu nakulingisa nawa chikungulwilo chihone kupwa mukuunda. (Efwe. 4:30) Shikaho zangi yamwenemwene yeji kulingisanga vaka-Kulishitu vaze vanalingi shili yayinene valyambulule kuli vakulwane mangana vavakafwe.—Yako. 5:14, 15.

18. Zangi yamwenemwene yalema ngachilihi?

¹⁸ Zangi yapwa yayilemu kuhambakana vilinga vyeka vyosena. (Koli. 1, 13:13) Yeji kutusololanga kupwa tuvaka-kukavangiza Yesu naYehova, uze apwa Kasulu kazangi. (Efwe. 5:1, 2) Kaposetolo Paulu asonekele ngwenyi: “Nge . . kangweshi nazangiko, kaha nguwamokomoko.” (Koli. 1, 13:2) Shikaho twatela kutwalaho kusolola zangi, keshi “namazu” kahako, oloze “muvilinga namumuchano.”