YOSEFWE WAKUALIMATEYA kashinganyekele ngwenyi mwahamuka nakuya kuli Nguvulu wavaLomako. Pondeu Pilatu vamutachikijile kupwa mutu wamukalu muchima. Oloze hakusaka Yesu vamufunde mukavumbi, kwatelelele kupwa mutu wakuya nakulomba Pilatu mangana amuhane mujimba waYesu. Shikaho Yosefwe ashinganyekele ngwenyi Pilatu mwamutenukila hakuhanjika nenyi, oloze omu keshi mukiko chapwileko. Omu Pilatu vamulwezele kuli kapitau kamaswalale ngwenyi Yesu nafu vene, etavishile jino Yosefwe ayenga akambate mujimba waYesu. Numba tuhu Yosefwe achipwile naushona, oloze akindulukile washi kuchihela kuze vajihilile Yesu.—Mako 15:42-45.

• Uno Yosefwe wakuAlimateya apwile iya?

• Usoko muka wapwile hali Yosefwe naYesu?

• Mwomwo ika mujimbu wenyi wapwila waulemu kuli yenu?

Mukanda waMujimbu Wamwaza waMako wamba ngwawo, Yosefwe apwile “chilolo wamulemu muZango yaKusopela yavaYuleya.” Zango kana yapwile Sunendeline, zango yayinene yavaYuleya. (Mako 15:1, 43, kwinyikila chamwishi) Yosefwe apwilenga halizavu lyavaka-kutwaminyina, kahechi chikiko chamulingishile ahamuke kuya nakuhanjika nanguvulu wavaLoma. Apwile nawa naluheto lwaluvulu.—Mateu 27:57.

Vaka-Sunendeline kavazangile Yesuko. Vosena vasakile kumujiha. Oloze Yosefwe vamuvuluka ngwavo apwile mutu “wamwaza, wakwoloka.” (Luka 23:50) Apwile navilinga vyamwaza, wakashishi, kaha nawa akavangijilenga jishimbi jaKalunga. Apwile nawa “nakuvandamina Wangana waKalunga,” kahechi chikiko chamulingishile apwenga kambaji kaYesu. (Mako 15:43; Mateu 27:57) Pamo azangile mazu ahanjikilenga Yesu mwomwo amwenenga muchano nachiyulo kupwa vyavilemu.

Hali Yowano 19:38 vasonekaho ngwavo, Yosefwe “apwilenga kambaji kaYesu oloze kalisolwele hatoma[ko] hakwivwa woma vaYuleya.” Mwomwo ika Yosefwe evwililile woma? Atachikijile omu vaYuleya vahungile Yesu, kaha nawa atachikijile ngwenyi kala mutu mwamufwelela navamufumisa musunangonga. (Yowa. 7:45-49; 9:22) Nge mutu vanamufumisa musunangonga, kaha vatu vamuhungilenga nakuhona kulikata nenyi. Echi chikiko chalingishile Yosefwe ahone kuhanjika hatoma ngwenyi afwelelele muli Yesu. Nge alingile ngocho kachi vamufumishile hachihela chaulemu apwile nacho.

Yosefwe keshi ikiye kaha apwile naukalu kanako. Hali Yowano 12:42 vasonekaho ngwavo, “vaka-kuyula vavavulu vamufwelelele [Yesu], oloze mwomwo yavaFwaliseu, kavamwitavilile kumeso avatuko kuchina navavahanga musunangonga.” Mutu mukwavo shina Nyikotemu uze nayikiye apwile chilolo wamuzango yaSunendeline.—Yowa. 3:1-10; 7:50-52.

Oloze Yosefwe apwile kambaji, numba tuhu kahanjikile hatomako. Chuma kana chapihile chikuma mwomwo Yesu ahanjikile ngwenyi: “Weshowo mwangwitavila kumeso avatu, nayami nawa nangukamwitavila kumeso atata uze ali mwilu. Oloze weshowo mwangukana kumeso avatu, nayami nangukamukana kumeso atata uze ali mwilu.” (Mateu 10:32, 33) Yosefwe kakanyine Yesuko, kaha nawa kahashile kuhamuka nakumwitavilako. Uno omu mukiko chapwa nakuli yenu tahi?

Mbimbiliya yahanjika ngwayo Yosefwe kakundwijile vaka-Sunendeline vaze vasakile kujiha Yesuko. (Luka 23:51) Echi  chikiko chalingisa vatu vamwe vahanjike ngwavo, halwola vapwile nakusopesa Yesu, Yosefwe kapwileko. Kala mweshomwo chapwile, oloze twejiva ngwetu Yosefwe kevwile kuwaha havyuma vyavipi valingile hali Yesuko. Oloze kahashile kuvakanyisako.

Halwola afwile Yesu, Yosefwe ahonesele woma ngocho afwililile kukundwiza vaka-kukavangiza Yesu. Twatachikiza ngocho mwomwo yamazu ahali Mako 15:43 akwamba ngwawo: “Ahamukile nakuya kuli Pilatu nakulomba mujimba waYesu.”

Chasoloka nge halwola afwile Yesu, Yosefwe kwapwile. Kaha nawa ikiye alivangile kutachikiza ngwenyi Yesu nafu shimbu kanda Pilatu achitachikize. Echi chikiko chalingishile ou nguvulu ahuhwasane “numba nge Yesu nafu lyehi nyi chiku.” (Mako 15:44) Hakumona omu Yesu apwile nakulyonyinga hachitondo chakumuyanjishila, pamo Yosefwe evwile kukola kumuchima nakulisolola jino hatoma ngwenyi apwile kambaji kaYesu. Ngocho Yosefwe apwile jino kambaji kaYesu uze vatachikijile kuvatu vosena.

Lushimbi lwavaYuleya lwahanjikile ngwalwo, mutu uze vasopesele nakumujiha, vatelelele kumufunda likumbi vene lize shimbu kanda kutoke. (Lushi. 21:22, 23) Oloze kuli vaLoma kakwapwile lushimbi kanako, vakiko vasezelenga tuhu chivimbi hachitondo chakumuyanjishila mangana apoleleho, chipwe kumumbila  muchimbumbe vafunjilenga vatu vamokomoko. Yosefwe kashinganyekele ngocho hali Yesuko. Yosefwe apwile nachimbumbe chachihya kwakamwihi nakuze vajihilile Yesu. Hakuwana nge chimbumbe kana chapwile kanda vachifundemo mutu chasolwele nge Yosefwe apwile mukufuma kuAlimateya nakunungulukila kuYelusalema. * Chimbumbe kana chapwile chatanga yenyi. (Luka 23:53; Yowa. 19:41) Yosefwe hakufunda Yesu muchimbumbe chenyi asolwele muchima walikoji, kaha nawa ateselemo upolofweto uze wahanjikile ngwavo Meshiya navakamufunda “navaka-luheto.”—Isa. 53:5, 8, 9.

Mikanda yosena yiwana yaMujimbu Wamwaza yahanjika ngwayo omu mujimba waYesu vaufumishile hachitondo, Yosefwe auvungilile halihina lyamwaza nakuusavalika muchimbumbe chenyi. (Mateu 27:59-61; Mako 15:46, 47; Luka 23:53, 55; Yowa. 19:38-40) Nyikotemu ikiye vavuluka ngwavo akafwile Yosefwe hakufunda Yesu, kaha anehele maji amwaza akukwita chivimbi. Hakuwana nge ava malunga vavali vapwile vapuho, pamo kavafumishile uze mujimba hachitondo ukawavoko. Pamo vazachishile vangamba vambate mujimba nakuufunda. Mulimo vazachile ava malunga vavali kawapwile wawashiko numba tuhu vazachishile vangamba. Mutu uze akwachilenga chivimbi apihilenga hamakumbi 7, kaha vyosena akwachilenga nawa vyapihilenga. (Kula. 19:11; Hangai 2:13) Ngocho kuzata mulimo kana chavalingishile vapwenga kwauka wavo hachalumingo chaPaseka nakuhona kupwa kuchilika. (Kula. 9:6) Yosefwe afunjile Yesu numba tuhu ejivile ngwenyi vakwavo navamuhunga. Alisuwile kufunda Yesu mukavumbi nakulisolola hatoma ngwenyi apwile kambaji kaKulishitu numba tuhu kulinga ngocho nachimunehela ukalu.

Kufuma vene haze vafunjile Yesu, Mbimbiliya kayahanjika cheka hali Yosefwe wakuAlimateyako. Ngocho tunahase kulihulisa ngwetu: Uno vyuma muka vyasolokele kuli ikiye? Katwejivileko. Oloze kweseka navyuma tunashimutwila, tunahase kuhanjika ngwetu alijimbwile hatoma kupwa muka-Kulishitu. Halwola ahichile muukalu, lufwelelo lwenyi lwazamine kaha apwile lika wakumika. Chuma alingile chapwile chamwaza chikuma.

Ou mujimbu unatukunyula tuvosena tulihulise ngwetu: Kutala milimo, naluheto, navausoko chipwe kusaka kupwa vakulihehwa vikiko vyapwa vyavilemu kuli yetu kuhambakana usoko wetu naYehova tahi?