Kaposhi Kakutalila waJanuary 1, 1918 aputukile nachihula chakwamba ngwacho: “Vyuma muka navisoloka muno mumwaka wa 1918?” Halwola kana muEurope mwapwile lika Jita Yayinene, oloze vyuma vyapwile nakusoloka kumaputukilo amwaka kana vyalingishile vatu vafwelele ngwavo kalinwomu vyuma viwahe.

Ha 8 January, 1918, omu twamina waAmerica Woodrow Wilson ahanjikile kuvatu vaze vakukungulukile kukuliwana vavulukile ngwavo U.S. Congress, avalwezele vyuma 14 vize amwene ngwenyi “vinahase kuneha kuunda.” Ambile ngwenyi mafuchi atelelele kulikata usendo namafuchi akwavo nakusekasanyina hamwe. Ambile nawa ngwenyi vatelelele kuhakako lushimbi lwakwitavisa “vatu kuya kukala lifuchi vanasake,” luze nalunganyalisa “vatu vosena.” Vyuma 14 vize ahanjikile Wilson vikiko vakavangijile hakutunga liuka lyaLeague of Nations nahalwola valikashile Chivwasano chaVersailles hakukuma chaJita Yayinene.

Numba tuhu mumwaka wa 1917 * mwapwile ukalu waunene chikuma, oloze chasolokele nge kuunda kalinwomu chizenga. Vyuma vyasolokele hakuliwana chavaka-liuka lyaWatch Tower Bible and Tract Society vikiko vyalingishile Vaka-Kulinangula Mbimbiliya venjikize chuma kana.

Hakuliwana chize chapwileko ha 5 January, 1918, malunga vamwe vaze vahangile haMbetele vasakile ngwavo vatwaminyine liuka. Ndumbu Richard H. Barber uze azachilenga mwakalama wakujinguluka ikiye asokolwele kuliwana kana nakulomba. Omu vakumishile kutanga lipoti lyakusolola milimo vazachile mu 1917, vasakwile jino vakulwane vaze vatelemo kutwaminyina liuka. Ndumbu Barber atongwele ndumbu Joseph Rutherford navakwavo veka 6. Kaha lihako umwe uze apwile nakuhakwila vaze vaka-kulikanga, atongwele malunga veka 6, kaha hamukana kana hapwile navaze vahangile haMbetele. Oloze nou avetavilile vene wauchi. Vandumbwetu vavavulu vatongwele Ndumbu Joseph Rutherford navakwavo veka 6 kupwa vaka-kutwaminyina liuka.

Vandumbwetu vavavulu vaze vapwile kukuliwana kanechi, vambile ngwavo: “Kalunga akiswile kuliwana kana kuhambakana kala kukunguluka chakunyima.” Oloze kuwahilila chavo kachatwalilehoko.

Hatukweji vavavulu, Vaka-Kulinangula Mbimbiliya vahanyinenga vatu mukanda wakwamba ngwavo The Finished Mystery. Vatu vamwaza michima vaze vatangilenga ou mukanda, vakwileko kanawa kumuchano valinangwile mumukanda kana.

Lunga umwe napuwenyi vatangile ou mukanda waThe Finished Mystery muvyalumingo vitanu, kufumaho vetavilile muchano valinangwile. Ndumbwetu E. F. Crist, uze apwile kalama wakutambwojoka muCanada ahanjikile hali ou lunga napuwenyi ngwenyi: “Vosena vavali vatwama navilinga vyamwaza, kaha nawa vali nakuzovoloka chikuma.”

Kwapwile nawa lunga umwe uze atambwile ou mukanda nakuutanga namasepa jenyi. Mujimbu atangile “wamukwachile chikuma kumuchima.” Ambile ngwenyi: “Omu ngwapwile nakutambuka mumukwakwa waThird Avenue ngwevwile kwijiva nge litafwali linanguholokela halihye. Oloze kalyapwile litafwaliko wapwile mukanda wa‘The Finished Mystery.’ Ngwejile nawo hembo nakuutanga wosena. . . . Oholyapwa hakiko ngunatachikiza jino ngwami muka-chachi umwe ikiye aumbilile hanjanena mwomwo yamatoto . . . Ngwafwelela chikupu ngwami chuma  alingile chinakafwe vatu vavavulu valinangule muchano nakupwa nalutalililo. . . . Matoto ayou mukulwane wachachi anatukafwe tuzachile Kalunga.”

Ou mukulwane wachachi keshi ikiye kaha ajinjile uze mukandako. Oloze navilolo jafulumende yaCanada navakiko vakanyishile uze mukanda ha 12 February , 1918, mwomwo ngwavo wapwile nakuhungumwisa vatu valikange kufulumende nakuvakanyisa kuya kujita. Nakushimbula chiku, fulumende yaUnited States nayikiko nawa yalingile vene ngocho. Vatumine vilolo javo kuya haMbetele nahajiofesi jamuNew York, Pennsylvania, namuCalifornia mangana vatachikize ovo vapwile nakutwaminyina liuka. Kuheta ha 14 March , 1918, Lipatimende lyatala haChiyulo lyakanyishile mukanda waThe Finished Mystery nakwamba ngwavo wapwile nakukanyisa vatu kuya kujita, kaha nawa ngwavo ou mukanda wahokwele lushimbi vavulukilenga ngwavo Espionage Act, luze lwakanyishilenga vatu kulikanga kufulumende.

Kuheta ha 7 May, 1918, Lipatimende lyatala haChiyulo valihanyine lisesa lyakukasa ndumbwetu Giovanni DeCecca, naGeorge Fisher, naAlexander Macmillan, naRobert Martin, naFrederick Robison, naJoseph Rutherford, naWilliam Van Amburgh naClayton Woodworth. Ava vandumbwetu vavavangijikilile ngwavo “valingilenga vyuma chakuzeneka lisesa nakuhungumwisa vatu valikange kufulumende yaUnited State nakuvakanyisa kwingila mulimo wauswalale.” Chihande chavo vaputukile kuchisopa ha 3 June, 1918, kaha twamwene vene ngwetu vandumbwetu kaveshi kusambako. Mwomwo ika?

Lihako wamunene wamuUnited States ambile ngwenyi kuhokola lushimbi lwaEspionage Act “chapwile himulonga waunene mwomwo yapwile jila yakuhungumwishilamo vatu.” Hakuliwana chapwileko ha 16 May , 1918, vatu vakanyine lushimbi vasakile kuhakako lwakusaka kuhakwila vandumbwetu vaze vasonekele “vyuma vyamuchano, nakufwila kukafwa vatu nakulinga vyuma vize navazanga vatu vosena. Vakulwane valiuka lyaU.S. Congress vahanjikile kutalisa kumukanda kana ngwavo: “Mukanda wa‘The Finished Mystery’ . . . wapwile nakuhungumwisa vatu vamone mulimo wauswalale kupwa wamokomoko nakuvalingisa . . . vakane kwingila mulimo kana.”

Kuheta ha 20 June , 1918, vandumbwetu vavawanyinyine mulonga. Lichako, chambamilonga avatwile jino chihande. Ambile ngwenyi: “Mulonga tunavawanyina wakuhungumwisa vatu kuhichila mukwitava chavo . . .himulonga waunene chikuma kuhambakana namulonga wakuluwanganyisa Maswalale jalifuchi lyaGerman. . . . Shikaho twatela kuvazangamisa mwamunene.” Omu mwahichile vyalumingo vivali, ava vandumbwetu 8 vavahakile mukamenga kaFederal Penitentiary muAtlanta, Georgia, nakuvatongwela myaka yakuputukila ha 10 nakuheta ku 20.

Halwola kana, Vaka-Kulinangula Mbimbiliya vavayanjishilenga chikuma. Liuka lyatupokola lyamuUnited States lyaFederal Bureau of Investigation (FBI) lyayilenga nakusondwesa mangana vatachikize omwo wapwa mulimo waVaka-Kulinangula Mbimbiliya, kaha  vawanyine mapapilo amavulu chikuma. Awa mapapilo apwile nakusolola nge vandumbwetu vapwile nakufwila kutwalaho lika kwambulula.

Saposo [muka-kutwala mikanda] wamumbongi yaOrlando, muFlorida asonekelele mukanda vaka-liuka lyaFBI ngwenyi: “[Vaka-Kulinangula Mbimbiliya] vali nakuhitangana kujizuvo javatu nakwambulula chikumanyi naufuku. . . . Chili nakusoloka nge kavate kwecha kuzata mulimo munavakanyisa.”

Hakwivwa ngocho, mukulwane waLipatimende lyaMaswalale asonekelele vaka-FBI mukanda wakuvalweza vyuma apwile nakulinga ndumbwetu Fredrick W. Franz uze apwileko muLizavu lyaKutwaminyina mukuhita chalwola. Uze mukulwane wamaswalale asonekele ngwenyi: “Franz . . . ali nakulanjisa chikuma mukanda wa‘Finished Mystery’ kuvatu vavavulu.”

Mutu mukwavo vayanjishile chikuma shina Charles Fekel. Naikiye vamutongwele kupwa muLizavu Lyakutwaminyina. Chuma vamukashililile shina kupangila vatu mukanda waThe Finished Mystery. Kaha vaputukile kusandasanda mangana vawane mikanda yize vamusonekelelenga vatu hanyima yakutanga ou mukanda. Vamukashile mukamenga muBaltimore, Maryland hakakweji wamuundu, kaha vamuvulukilenga ngwavo “Muka-kole wakuAustria.” Chuma chamulingishile ambulile vaka-kumwihwojola shina kwanuka mazu ahali Wavaka-Kolinde 1, 9:16, akwamba ngwawo: “Nge kangweshi kuvilika mujimbu wamwazako, lamba kuli ami.” *

Chuma chikwavo valingile Vaka-Kulinangula Mbimbiliya shina kulomba fulumende yisokole vandumbwavo vaze vapwile mukamenga muAtlanta. Anna K. Gardner ambile ngwenyi: “Katwatwaminenga kahako, oloze twalingilengako vyuma vimwe. Halwola vandumbwetu vapwile mukamenga, etu twambachilenga mapapilo akututachikijilaho ngwavo tuVaka-Kulinangula Mbimbiliya. Twambachilenga mapapilo amavulu, ngocho twayilenga kuzuvo hizuvo. Twalwezelenga vatu ngwetu vaze malunga vakashile vapwile vaka-Kulishitu vamuchano kaha nawa vavakashile chakuzeneka mulonga.”

Numba tuhu vandumbwetu vavayanjishilenga, oloze chuma chavakafwilenga vazame kushipilitu shina kupwanga kukukunguluka chaNgalila. Mumangazini yaKaposhi Kakutalila vasonekelemo ngwavo: “Mumwaka umwe kaha . . . kwapwile kukunguluka changalila chakuzomboka 40 . . . Kuvihela vyosena kuze kwapwile echi kukunguluka, kwafuminenga mijimbu yamwaza chikuma. Kunyima, kukunguluka changalila chaVinjiho jaYehova vachilingilenga mungonde yanonga chipwe kumaputukilo avula. Oloze makumbi ano, veji kuchilinganga kakweji hikakweji mumwaka.”

Vatu vamwaza michima vapwilenga nakwakula kanawa kumujimbu twambulwilenga. Chakutalilaho, kukukunguluka changalila chize chapwile muCleveland, Ohio kwapwile vatu 1,200, kaha vatu 42 vavambapachishile. Havatu kana, hapwile nakanyike walunga uze “amwenenga kuzachila Kalunga kupwa chachilemu kuhambakana vakulwane vaze apwile navo muchikungulwilo.”

Omu walingile mwaka wa 1918 unapandama, Vaka-Kulinangula Mbimbiliya vamwene kwalumuka chikwavo chamuliuka. Jizuvo jimwe jamuBrooklyn vajilanjishile, kaha chikota vachinungulwilile kuPittsburgh, Pennsylvania. Numba tuhu vaze vapwile nakutetekela mulimo vavakashile, oloze vanonekele vyuma mangana kupwenga Kuliwana chaMwaka hiMwaka chaLiuka ha 4 January, 1919. Jino vyuma muka vyasolokele?

Vandumbwetu vasolwele lukakachila hakuzata mulimo wakwambulula. Vafwelelele chikupu ngwavo Kalunga mwavakafwa, ngocho vasakwile chisoneka chamwaka wa 1919 chize chambile ngwacho: “Vyexovyo vitwa navakafula nakole nayove, kavyexi kukafukilako.” (Isa. 54:17, Luvale Bible, 1970) Vapwile jino vakulizanga vyakwalumuka chize chapwile nakwiza. Kwalumuka kana chazamishile lufwelelo lwavo nakuvahana ngolo jakuzata mulimo waunene wakwambulula.