1, 2. (a) Mulimo muka amwene Yesu kupwa waulemu chikuma mukuyoya chenyi, kaha mwomwo ika? (b) Hakupwa “tuvaka-kuzachila hamwe naKalunga” vyuma muka twatela kulinga numba tufukile?

YESU KULISHITU apwilenga muka-kusonga maliva, kaha nawa muka-kwambulula. (Mako 6:3; Loma 15:8) Atachikijile kanawa milimo yosena yivali. Alinangwile mwakukwachila vinoma vyakuzachisa nakusonga kanawa maliva. Kaha nawa hakupwa muka-kwambulula mujimbu wamwaza, azachishilenga kanawa chinyingi chamuVisoneka apwile nacho hakukafwa vatu mangana vevwishise muchano wamuMazu aKalunga. (Mateu 7:28; Luka 24:32, 45) Omu apwile namyaka yakusemuka 30, asezele jino mulimo wakusonga maliva mwomwo atachikijile ngwenyi mulimo wakwambulula ukiko waulemu chikuma. Ambile ngwenyi, Kalunga amutumine hano hamavu mangana ambulule mujimbu wamwaza waWangana waKalunga. (Mateu 20:28; Luka 3:23; 4:43) Chikupu vene, Yesu amwenenga mulimo wakwambulula kupwa waulemu mukuyoya chenyi, kaha asakile navakwavo vazate mulimo kana.—Mateu 9:35-38.

² Etu vamwe pamo katwapwa tuvaka-kusonga malivako, oloze tuvaka-kwambulula mujimbu wamwaza. Mulimo kana wapwa waulemu mwomwo naKalunga eji kuzatanga mulimo woumwe, kaha vatuvuluka ngwavo “tuvaka-kuzachila hamwe naKalunga.” (Koli. 1, 3:9; Koli. 2, 6:4) Twafwelela ngwetu “mazu [aYehova] osena apwa muchano.” (Samu 119:159, 160) Echi chikiko chatulingisa tufwile “[kunangula vatu] mazu amuchano mujila yakwoloka.” (Tangenu WaChimoteu 2, 2:15.) Twafwila nawa kuhotola uhashi wetu wamwakuzachishila  Mbimbiliya yize yapwa chinoma chachinene chakuzachisa hakunangula vatu muchano wakupandama hali Yehova, naYesu naWangana waKalunga. Shikaho hakusaka tufukile mumulimo wakwambulula, liuka lyaYehova lyatuhana vinoma vyeka vize twatela kuzachisa. Vinoma kana twavivuluka ngwetu Vinoma vyaKuzachisa haKunangula.

3. Chuma muka twatela kufwila kulinga oholyapwa, kaha chisoneka chaVilinga 13:48 nachitukafwa ngachilihi tulinge ngocho?

³ Pamo munahase kulihulisa ngwenu mwomwo ika vavivulukila ngwavo Vinoma vyaKuzachisa haKunangula, muchishishisa chakuvivuluka ngwavo Vinoma vyaKuzachisa haKwambulula. Tachikizenu ngwenu “kwambulula” chapwa kuvilika mujimbu kuvatu, oloze “kunangula” chapwa kuhanjika mujila yize nayilingisa mujimbu uhete kumichima yavatu nakuvakunyula valingeho chuma chimwe. Lwola lunasaleko lwalundende, shikaho twatela kufwila kuputuka vilongesa vyaMbimbiliya nakunangula vatu muchano. Echi chili nakulumbununa nge twatela kutondatonda vaze vakwechi “michima yamwaza yakusaka kuyoya chahaya myaka yosena” nakuvakafwa valumuke nakupwa vaka-kwitava.—Tangenu Vilinga 13:44-48.

4. Natuhasa kutachikiza ngachilihi vatu vaze vakwechi “michima yamwaza yakusaka kuyoya chahaya myaka yosena”? kaha natuvawana ngachilihi?

⁴ Uno natuhasa kutachikiza ngachilihi vatu vaze vakwechi “michima yamwaza yakusaka kuyoya chahaya myaka yosena”? Ngana muze chapwile mulikulukaji lyamyaka lyakulivanga, chuma nachitukafwa tuvatachikize shina kuvambulila mujimbu wamwaza. Shikaho twatela kukavangiza mazu aYesu akwamba ngwenyi: “Mweshomwo munganda chipwe mwimbo namwingila, tondenu weshowo atela.” (Mateu 10:11) Omu tweji kuyanga muwande, tweji kuwananga vatu vavakalu michima navaka-kulivwimba vaze kavasaka kwivwilila kumujimbu wamwazako. Oloze tweji kutondatondanga vatu vakashishi nakulinyisa, vaze veji kwivwanga zala yakusaka kutachikiza muchano. Chuma kana pamo tunahase kuchifwanyisa kuvyuma alingilenga Yesu hakusakula mitondo yamwaza mangana asonge vyuma vyakufwana nge jimesa, namapito navyuma vyeka. Omu awanyinenga mitondo yamwaza, hakiko ambachilenga vinoma vyenyi nakuputuka jino kusonga maliva. Shikaho nayetu twatela kufwila kuwana vatu vamwaza michima mangana tuvanangule vapwenga tumbaji.—Mateu 28:19, 20.

5. Chishina muka twatela kutachikiza kupandama kuvinoma vyetu? Hanenu chakutalilaho. (Talenu muvwimbimbi wakulivanga.)

⁵ Tachikizenu ngwenu chinoma hichinoma chatwama namwakuchizachishila. Chakutalilaho, achishinganyekenu havinoma azachishilenga Yesu. * Asakiwilenga vinoma vyakupimisa, navyakutetesa, nakutuvisa, nevi vyakwolwesa nakupachisa. Omu mukiko vyapwa naVinoma vyaKuzachisa haKunangula. Chinoma hichinoma chikwechi mulimo wacho. Shikaho tushimutwilenu jino havinoma kana nakumona omwo vyalema.

6, 7. (a) Mweji kuzachisanga ngachilihi jikati jakulweza vatu keyala yetu? (b) Milimo muka yivali kazata kalipapilo kakulanya vatu kukukunguluka?

⁶ Jikati Jakulweza Vatu Keyala Yetu. Eji jikiko jikati tunahase kuzachisa hakulijimbula kuvatu nakuvalweza vayenga hakeyala yetu mangana vatachikize liuka lyetu nakufwila kulinangula Mbimbiliya. Kafwe vatu vakuzomboka 400,000 vanasayinanga fwomu yatwamaho yakulomba vavanangule Mbimbiliya, kaha nawa vatu vavavulu veji kulinganga ngocho hakumbi hakumbi. Shikaho nachiwaha nge namupwanga najikati kana kweshokwo muli mangana mwambulilenga vatu kala lwola.

⁷ Mapapilo Akulanya Vatu Kukukunguluka. Kalipapilo kaKulanya vatu kukukunguluka kazata milimo yivali. Hakalipapilo kana vasonekaho ngwavo: “Tunakumilanya mulinangule Mbimbiliya naVinjiho jaYehova.” Kaha nawa vasonekaho  ngwavo, munahase kulinangula Mbimbiliya hakwiza “kukukunguluka chetu chachikungulwilo” chipwe kuminangwila Mbimbiliya kukala chihela munasake. Shikaho, aka kalipapilo kakapwa kakututachikijilaho kahako oloze tweji kukazachisanga hakusanyika vatu “vaze vejiva ngwavo vasaka vyuma vyakushipilitu,” mangana tulinangule navo Mbimbiliya. (Mateu 5:3) Chipwe ngocho, tweji kutambulanga nachisambo vatu vosena vaze naveza nakukunguluka numba tuhu vamwe kaveshi kwitavila kulinangula Mbimbiliyako. Kwiza nakukunguluka nachivakafwa valinangule muchano.

8. Mwomwo ika twatela kulanyanga vatu vezenga kukukunguluka chetu numba vene kamwe kaha? Hanenu chakutalilaho.

⁸ Twatela kulanyanga vatu vezenganga kukukunguluka chetu, numba vene kamwe kaha. Mwomwo ika? Echi nachivakafwa vamone chihandwa chatwama hakukunguluka chavaka-Kulishitu vamuchano, nechi chavaka-Mbavilone Yayinene. (Isa. 65:13) Ray napuwenyi Linda vamuUnited States vashinganyekele ngwavo vatela kuputuka kuya kuchachi. Vafwelelele ngwavo Kalunga kwatwama, kaha vasakile kulinangula vyakushipilitu. Shikaho vaputukile kuya kujichachi jakulisezaseza jamunganda yavo. Munganda kana mwapwile jichachi jajivulu. Ava valunga napwevo vatondelenga vyuma vivali mujichachi jize vayilenga. Chatete vatondelenga kulinangulako vyuma vimwe halwola lwakukunguluka, kaha chamuchivali, vafwililile kuwana vatu vaze navasoloka nge chikupu vene vapwa vatu jaKalunga. Omu mwahichile myaka yayivulu, vayile kujichachi josena jamunganda yavo, oloze chaluvinda kavawanyine vyuma vapwilenga nakutondako. Kujichachi josena jize vayilenga, nevi valinangwileko vene vyauchi. Vatu vamujichachi kana nawa kavavwalilenga mukavumbiko. Omu valovokele muchachi yamakumishilo, Linda ayile kumilimo yenyi, kaha lunga lyenyi ayile kuzuvo kahomu ahetele hakachi, awanyine Zuvo yaWangana. Ngocho alyambile mumuchima wenyi ngwenyi, ‘Ngwatela kuyamo mangana ngumone omu veji kulinangulanga.’ Chuma alingile chamunganyalishile chikuma. Vatu awanyine muzuvo yaWangana vapwile vachisambo kaha nawa vavwalile mukavumbi. Ray atwamine hachitwamo chakulutwe, ngocho azangile vyuma vapwile nakunangula. Chapwile kwijiva nge muze ahanjikile kaposetolo Paulu hamutu uze mweza kukukunguluka chavaka-Kulishitu halwola lwatete nakwamba jino ngwenyi: “Chikupu vene Kalunga ali muli enu.” (Koli. 1, 14:23-25) Kufuma vene haze, Ray ayilenga kukukunguluka chahaSondo, kaha kutwala muze ayilenga nakukukunguluka chamukachi kachalumingo. Linda nawa aputukile kukungulukanga, kaha omu vapwile namyaka yakuzomboka 70 vetavilile kulinangula Mbimbiliya nakuvambapachisa.

9, 10. (a) Mwomwo ika chapwila chachashi kuzachisa jitalakiti? (b) Lumbununenu mwakuzachishila talakiti yakwamba ngwavo Wangana waKalunga chuma muka?

⁹ Jitalakiti. Twatwama najitalakiti 8 jize tweji kuzachisanga hakuputuka kushimutwila navatu. Kufuma vene mu 2013 haze vaputukile kusoneka eji jitalakiti, vanasonekako lyehi jakuheta kafwe kujimbiliyoni jitanu. Eji jitalakiti vajisoneka mujila yoyimwe, shikaho nge mutu nalinangula mwakuzachishila yimwe, kaha mwahasa kuzachisa najikwavo. Uno namuhasa kuzachisa ngachilihi talakiti mangana muputuke kushimutwila namutu?

¹⁰ Pamo munahase kuzachisa talakiti yakwamba ngwavo Wangana waKalunga chuma muka? Mutalisenu chihula chahalipapilo lyahelu nakuhanjika ngwenu: “Kutala mwashinganyekaho lyehi haWangana waKalunga tahi? Uno wapwa . . .?” Kufumaho mulwezenu asakuleho kukumbulula chimwe hakukumbulula chitatu chatwamaho. Kanda kumulweza ngwenu nakumbulula mwakwoloka chipwe mwakuhengako oloze pandumuna haze vanasoneka ngwavo, “Vyuma Yahanjika Mbimbiliya” nakutanga chisoneka chaNdanyele 2:44 nachaIsaya 9:6. Nge chinahase, kaha munahase kutwalaho lika kushimutwila nenyi. Chamakumishilo, mutalisenu haze vanasoneka ngwavo, “Vyuma Mwatela Kushinganyekaho”: “Uno  chiyoyelo nachikapwa ngachilihi muchiyulo chaWangana waKalunga?” Echi nachimikafwa muwane hakukaputukila kushimutwila nenyi omu namukakindulukilako. Omu namukakindulukilako, mwatela kukamulweza chilongesa 7 chamumbuloshuwa yaMujimbu Wamwaza Wakufuma Kuli Kalunga yize tweji kuzachisanga hakuputuka vilongesa vyaMbimbiliya.

11. Uno jimangazini jetu vajisonekela ika, kaha chuma muka twatela kutachikiza?

¹¹ Jimangazini. Mangazini yaKaposhi Kakutalila nayaTonenu! jikiko jimangazini valumuna mumalimi amavulu chikuma mukaye kosena. Hakuwana nge vajisonekela vatu vosena mukaye, ngocho chihande chachinene chahalifwo lyahelu veji kuchisonekanga mujila yize nayikunyula vatu vosena. Shikaho twatela kujizachisanga mangana tusangumune pwipwi yavatu nakuvakunyula vafwile kutachikiza vyuma vyavilemu mukuyoya chavo. Oloze hakusaka tuzachise kanawa eji jimangazini, twatela kutachikiza vatu muka vasonekela mangazini yaKaposhi Kakutalila, kaha yaTonenu! nawa vayisonekela veya?

12. (a) Uno mangazini yaTonenu! vayisonekela vatu muka, kaha mwomwo ika? (b) Uno munanganyala ngachilihi hakuzachisa eyi mangazini?

¹² Mangazini yaTonenu! vayisonekela vatu vaze kavatwama nachinyingi chamuMbimbiliyako chipwe vaze vakwechi chinyingi chachindende. Vatu kana pamo kavatachikiza kunangula chavaka-Kulishituko, chipwe vamona ngwavo mauka akwitava kaweshi nakunangula muchanoko nyi pamo kavatachikiza ngwavo Mbimbiliya yapwa yanganyoko. Chuma chachinene vasonekela mangazini yaTonenu! shina kukafwa vatu vafwelele ngwavo Kalunga kwatwama. (Loma 1:20; Hepe. 11:6) Kaha nawa yeji kukafwanga vatu mangana vafwelele ngwavo Mbimbiliya “himazu aKalunga.” (Teso. 1, 2:13) Jimangazini josena jitatu jaTonenu! jamu 2018 jili namitwe yavihande yino: “Mwakupwila Vakuwahilila,” “Vyuma 12 Vize Navikafwa jiTanga Jifukile,” “Vyuma Muka Navitukafwa Nge Tunakulishona?”

13. (a) Uno Mangazini yaKaposhi Kakutalila vayisonekela vatu muka? (b) Uno munanganyala ngachilihi hakuzachisa mangazini kana muwande?

¹³ Mangazini yaKaposhi Kakutalila wavatu vosena vayisonekela vatu vaze vavumbika Kalunga naMazu enyi. Numba tuhu vatu kana vanahase kupwa nachinyingi chamuMbimbiliya, oloze kaveshi kuhasa kupwa nachinyingi chakwoloka chakutachikiza vyuma yanangulako. (Loma 10:2; Chimo. 1, 2:3, 4) Jimangazini josena jitatu jaKaposhi Kakutalila jamu 2018 jili namitwe yavihande yino: “Uno Mbimbiliya Yinahase Kutukafwa Makumbi Ano Tahi?” “Vyuma muka Twatalilila Kulutwe?” “Uno Kalunga Amizakama Tahi?”

14. (a) Mulimo muka jazata eji jivindiyo jiwana? (b) Munanganyala ngachilihi hakuzachisa jivindiyo kana?

¹⁴ Jivindiyo. Mulwola lwaYesu, vaka-kusonga maliva vazachishilenga vinoma vyakumavoko. Oloze makumbi ano vatu vali nakuzachisa jino vinoma vyakuzachisa nakakahya kakezi vyakufwana nge jimbumbu, najisaha, navinoma vyeka. Omu mukiko vili navinoma vyetu. Oholyapwa tuli jino nakulivwisa kuwaha kuzachisa jivindiyo jakufwana nge: Mwomwo Ika Twatela Kulinangwila Mbimbiliya?, Vyuma Muka Vyeji Kusolokanga haChilongesa chaMbimbiliya?, Vyuma Muka Vyeji Kusolokanga haZuvo yaWangana? Nayakwamba ngwavo Etu Vinjiho jaYehova Twapwa Veya? Hakuwana nge eji jivindiyo japwa jaminyutu yivali nakuneha mwishi, ngocho chapwa chamwaza kujizachisanga haungeji watete. Kaha jivindiyo jajisuku tunahase kujizachisa hakukindulukilako chipwe nge mutu ali nalwola. Evi vinoma kana vinahase kukunyula vatu mangana vafwile kulinangula Mbimbiliya nakwiza kukukunguluka.

15. Hanenu vyakutalilaho vyasolola nganyo yatwama hakutalisa vatu jivindiyo mumalimi avo.

¹⁵ Chakutalilaho, ndumbwetu wapwevo awanyine pwevo umwe wakuMicronesia uze ahanjika lilimi lyaYapese, kaha amutalishile vindiyo yakwamba ngwavo: Mwomwo Ika Twatela Kulinangwila Mbimbiliya? mulilimi lyenyi. Omu yaputukile  eyi vindiyo, uze pwevo ambile ngwenyi: “Eli likiko lilimi lyami. Ngunawahilila chikuma. Ou lunga ali nakuhanjika nganomu twahanjika kwimbo lyetu.” Hanyima yakutala eyi vindiyo, ambile ngwenyi mwatanganga jino vyuma vyatwama hakeyala yetu nakutala nawa jivindiyo mulilimi lyenyi. (Esekesenuko Vilinga 2:8, 11.) Ndumbwetu mukwavo wapwevo wakuUnited States nawa atuminyinyine muhya wenyi vindiyo yahalikina mulilimi lyenyi. Ou muhya wenyi ayitalile, kaha amusonekelele mujimbu ngwenyi: “Mazu akwamba ngwavo Liyavolo ikiye ali nakuyula kano kaye angukwachile kumuchima, kaha anangulingisa ngulombe vangunangule Mbimbiliya.” Ou muhya wenyi atwama mulifuchi muze vakanyisa mulimo wetu.

16. Lumbununenu ovyo vasonekela eji jimbuloshuwa: (a) Ivwililenu Kuli Kalunga Mangana Mukayoye. (b) Mujimbu Wamwaza Wakufuma Kuli Kalunga. (c) Veya Vali Nakulinga Mwaya Muchima waYehova Makumbi Ano?

¹⁶ Jimbuloshuwa. Namuhasa ngachilihi kunangula vatu vaze kavatachikiza kutanga kanawako chipwe nge kamweshi namikanda yamulilimi lyavoko? Kanda kulizakaminako. Mbuloshuwa yakwamba ngwavo, Ivwililenu Kuli Kalunga Mangana Mukayoye Haya Myaka Yosena. * yinahase kumikafwa. Chinoma chikwavo chamwaza kuzachisa hakuputuka chilongesa chaMbimbiliya shina mbuloshuwa yaMujimbu Wamwaza Wakufuma Kuli Kalunga. Munahase kumutalisa vihula 14 vyatwama kunyima yambuloshuwa kana nakumulweza asakuleho chihula nasake mushimutwile. Kaha namuputuka jino kulinangula nenyi mukapetulu nasakula. Kutala mwazachisaho lyehi jila kana hakukindulukila kuvatu tahi? Mbuloshuwa yikwavo nawa shina yakwamba ngwavo Veya Vali Nakulinga Mwaya Muchima waYehova Makumbi Ano? Mbuloshuwa kana vayisoneka mangana yikafwe vatu vatachikize omwo lyazata liuka lyetu. Talenu mukanda waChiyoyelo naMulimo waVaka-Kulishitu waMarch 2017 mangana mumone mwakuyizachishila.

17. (a) Lumbununenu ovyo vasonekela eyi mikanda yivali. (b) Chuma muka atela kutwalaho kulinga mutu numba tuhu vanamumbapachisa, kaha mwomwo ika?

¹⁷ Mikanda. Kachi nge munaputuka lyehi kunangula mutu kuzachisa mbuloshuwa, kaha munahase kumona numba nge chinatemo kuputuka kumunangula kuzachisa mukanda waMbimbiliya Nayitunangula Vyuma Muka? Kuzachisa chinoma kana nachikafwa mutu apwenga nachinyingi chachivulu chamuMbimbiliya chakunangula chamaputukilo. Hanyima yakukumisa mukanda kana munahase kutwalaho lika kulinangula nenyi mumukanda waTwamenunga Muzangi yaKalunga. Ou mukanda naukafwa mutu ali nakulinangula akavangizenga jindongi jamuMbimbiliya mukuyoya chenyi chahakumbi hakumbi. Anukenu ngwenu, numba vene nge mutu vanamumbapachisa lyehi, mwatela kutwalaho lika kumunangula swi noho mwakakumishila eyi mikanda yosena yivali. Echi nachimukafwa apwenga wakuzama mbe mumuchano.—Tangenu Wavaka-Kolose 2:6, 7.

18. (a) Chisoneka chaWaChimoteu 1, 4:16 chatukolezeza tulingenga ika etu vaka-kunangula vatu muchano, kaha nganyo muka yinahase kufumamo? (b) Chuma muka twatela kufwila kutesamo omu natuzachisanga vinoma atuhana Yehova?

¹⁸ Etu Vinjiho jaYehova twatwama namulimo wakuvilika “mazu amuchano amujimbu wamwaza” aze anahase kulingisa vatu vakayoye haya myaka yosena. (Kolo. 1:5; tangenu WaChimoteu 1, 4:16.) Shikaho Yehova natuhane Vinoma vyaKuzachisa haKunangula mangana vitukafwe hakuzata mulimo kana. (Talenu lipwata lyakwamba ngwavo “ Vinoma vyaKuzachisa haKunangula.”) Ngocho tuzachisenunga kanawa evi vinoma. Muka-kwambulula himuka-kwambulula nahase kulisakwila ivene vinoma atela kuzachisa hakushimutwila navatu. Chipwe ngocho, katwatela kufwila kupangila kaha vatu mikandako chipwe kuyihana kuvatu vaze kavasaka kuvambulilako. Chuma tweji kufwilanga shina kunangula vatu “[vamichima] yamwaza yakusaka kuyoya chahaya myaka yosena” vapwenga tumbaji.—Vili. 13:48; Mateu 28:19, 20.