Chihande Chakulinangula 41
Kapwenu Vakushishika ‘haLuyando Lwalunene’
“Zangenunga Yehova, enu vaka-kulonga muvosena. Yehova eji kukinganga vatu vakushishika.”—SAMU 31:23.
MWASO 129 Natutwalaho Kukakachila
VYUMA NATUSHIMUTWILA *
1-2. (a) Mutambi muka navavilika vaka-kuyula kalinwomu? (b) Vihula muka vinakusakiwa kukumbulula?
ACHISHINGANYEKENU omu navikapwa vyuma halwola vaka-kuyula vamukaye navakavilika ngwavo kuli “kuunda namukingo.” Vanahase pamo kukalisasa ngwavo mukaye muli jino kuunda chamwenemwene. Navakasaka tuketavile jino ngwetu vanahase kukumisa ukalu wosena mukaye. Oloze kaveshi kukahasa kuhonesa vyuma vize navikasoloka kulutweko. Mwomwo ika? Mwomwo upolofweto wamuMbimbiliya wamba ngwawo, “kunongesa chakuvakasumuna hinachivawana hahaze vene, . . . kaha kaveshi kukachinako chikupu.”—Teso. 1, 5:3.
2 Kuli vihula vyavilemu vize vinakusakiwa kukumbulula. Chatete, vyuma muka navikasoloka ‘haluyando lwalunene’? Chamuchivali, Yehova mwakasaka tukalinge vyuma muka “haluyando lwalunene”? Chamuchitatu, vyuma muka twatela kulinga oholyapwa mangana tukapwe vakushishika haluyando lwalunene?—Mateu 24:21.
VYUMA MUKA NAVIKASOLOKA ‘HALUYANDO LWALUNENE’?
3. Kweseka namukanda waKusoloka 17:5, 15-18, Kalunga mwakanongesa ngachilihi “Mbavilone Yayinene”?
3 Tangenu Kusoloka 17:5, 15-18. “Mbavilone Yayinene” navakayinongesa chikupu. Ngana muze twashimutwilanga hakavanga, vaka-kuyula vamukaye kaveshi kukahasa kuhonesa vyuma vize navikasoloka halwola kanako. Mwomwo ika? Mwomwo “Kalunga [mwakachihaka] mumichima yavo mangana [vakalinge] mwaya kujina chenyi.” Uno vyuma muka vene evi ajina? Ajina kukanongesa kwitava chamakuli chamukaye kosena, kuhakilako vene naKulishitendomu. * Shikaho Kalunga mwakahaka kujina kana mumichima yavaze vemanyinako “jimbinga 10” ‘nachisuma uchila.’ Jimbinga 10 jemanyinako jifulumende josena jize jeji kukundwizanga “chisuma,” uze apwa liuka lyaUnited Nations. (Kuso. 17:3, 11-13; 18:8) Kaha luyando lwalunene nalukaputuka omu jifulumende najikanyemukila kwitava chamakuli. Chuma kana nachikavakasumuna nakuvevwisa woma.
4. (a) Vyuma muka navikalingisa vaka-kuyula vakanyemukile Mbavilone Yayinene? (b) Vyuma muka navakalinga vatu vaze vakundwijilenga Mbavilone Yayinene?
4 Katwejivile kanawa vyuma navikalingisa vaka-kuyula vakanyemukile Mbavilone Yayineneko. Pamo vanahase kukamba ngwavo Mbavilone Yayinene yinakwazananga muvihande vyamapolitiki nakulingisa nawa vatu vahone kutwama mukuunda. Vanahase nawa pamo kukamba ngwavo yinalivulishila luheto. (Kuso. 18:3, 7) Chipwe ngocho, echi kachalumbununa nge vatu vosena vamukwitava chamakuli navakavanongesako. Oloze chasoloka nge ava vaka-kuyula navakanongesa mauka akwitava chamakuli. Kaha omu navakanongesa mauka kana, vatu vaze vakundwijilenga mauka kana navakamona jino ngwavo vatwamina javo vanahono kuvatwaminyina ngocho navakakana kulikata navo.
5. Vyuma muka atushika Yehova kutalisa kuluyando lwalunene, kaha mwomwo ika?
5 Numba tuhu Mbimbiliya kayavuluka tando nayikahita hakunongesa Mbavilone Yayineneko, oloze twatachikiza ngwetu kaheshi kukahita tando yayisuku chikumako. (Kuso. 18:10, 21) Yehova atushika ngwenyi ‘mwakakehesa makumbi’ aluyando lwalunene mangana akalwile “vaze asakula ivene,” nakukinga kwitava chamuchano. (Mako 13:19, 20) Uno vyuma muka vize Yehova ali nakusaka tukalinge omu nalukaputuka luyando lwalunene kuheta nakujita yaAlamangetone?
TWALENUHO LIKA KUKUNDWIZA KWITAVA CHAMUCHANO
6. Mwomwo ika katwatela kaha kulihenda kukwitava chamakuliko?
6 Ngana muze twashimutwilanga muchihande chinafumuho, Yehova asaka vangamba jenyi valihende kuMbavilone Yayinene. Chipwe ngocho, echi chasakiwa kulinga vyuma vyavivulu keshi kulihenda kaha kukwitava chamakuliko. Twatela kufwila kukundwiza kwitava chamuchano. Tushimutwilenu jino hajijila jivali jize tunahase kulingilamo ngocho.
Twatela kulikungulwilanga hamwe navandumbwetu numba tuli mulwola lwalukalu (Talenu palangalafu 7) *
7. (a) Uno tunahase kukavangiza ngachilihi jishimbi jaYehova jakwoloka? (b) Uno mukanda WavaHepeleu 10:24, 25, wasolola ngachilihi ovyo chapwila chachilemu kukungulukanga, chikumanyi oholyapwa?
7 Jila yatete, twatela kukavangizanga jishimbi jaYehova jakwoloka mukuyoya chetu. Katwatela kukavangiza vilinga vyavipi vyavatu vamukayeko. Chakutalilaho, katwatela kwitavila kala vilinga vyaujila nakukundwiza malo avatu vausonyi woumwe navilinga vize vyakundwiza kulisavala chavatu vausonyi woumweko. (Mateu 19:4, 5; Loma 1:26, 27) Jila yamuchivali, twatela kutwalaho lika kulemesela Yehova hamwe kaha navandumbwetu. Tweji kulinganga ngocho kujiZuvo jaWangana chipwe mujizuvo javandumbwetu chipwe kuvihela vyakuswamana. Shikaho twatela kutwalaho lika kukungulukanga navandumbwetu chamokomoko nakala ukalu. Mbimbiliya yamba ngwayo twatela kulikungulwilanga hamwe navandumbwetu ‘chikumanyi omu tunamono ngwetu likumbi kana linapandama kwakamwihi.’—Tangenu WavaHepeleu 10:24, 25.
8. Mujimbu natukambulula naukalihandununa ngachilihi nauze tuli nakwambulula makumbi ano?
8 Mujimbu natukambulula haluyando lwalunene naukalihandununa namujimbu tunakwambulula oholyapwa. Makumbi ano, tuli nakwambululanga mujimbu wamwaza waWangana waKalunga nakunangula vatu vapwenga tumbaji. Oloze haluyando lwalunene pamo natukambulula mujimbu waupi chikuma uze Mbimbiliya yafwanyisa kuvula yamalolwa. (Kuso. 16:21) Pamo natukambulula mujimbu wakuvuluka kunongesa chakaye kaSatana. Kulutwe navakatulweza omwo naukapwa mujimbu kana namujila natukawambulwilamo. Katwatachikijileko numba nge natukazachisanga jijila jojimwe jize tunazachisanga hamyaka yayivulu, nyi pamo natukazachisa jijila jeka. Kala mweshomwo nachikapwa, chasoloka nge natukahamuka hakuvilika kusopesa chaYehova.—Ezeke. 2:3-5.
9. Vyuma muka navakafwila kulinga vaka-mafuchi mwomwo yamujimbu natukambulula, oloze etu twatela kufwelela vyuma muka?
9 Chasoloka nge mujimbu kana ukiko naukalingisa vaka-mafuchi vakafwile jino kunongesa vatu jaKalunga vosena. Shikaho, twatela kukapendamina chikuma hali Yehova halwola kana, ngana muze tuli nakulinga makumbi ano. Kaha nawa twatela kufwelela ngwetu, Kalunga mwakatuhana ngolo jakutukafwa mangana tukomike halwola kana.—Mika 3:8.
LIZANGENU HAKUMINYEMUKILA CHILI NAKWIZA KULUTWE
10. Kweseka namazu atwama hali Luka 21:25-28, vyuma navikasoloka haluyando lwalunene navikalingisa vatu vakalinge ika?
10 Tangenu Luka 21:25-28. Haluyando lwalunene, vatu mukaye navakalikomokela omu navakamona jino vyuma vize vafwelelele kavyeshi nakuzatako. Shikaho, navakamona ‘vihuli’ nakulizakamina ngwavo pamo navavajiha halwola lwaluyando lwalunene. (Zefwa. 1:14, 15) Halwola kana, nayetu vatu jaYehova natukamona ukalu waunene hakuwana nge katwapwa vakukayeko. Pamo katweshi kukapwa navyakulikafwa navyo vimwe vyamukuyoyako.
11. (a) Mwomwo ika vaka-mafuchi navakalumukila jino kuli Vinjiho jaYehova? (b) Mwomwo ika katwatela kwivwa woma luyando lwaluneneko?
11 Kutwala muze, vatu vamwe vamukwitava chize navakanongesa, navakapihilila omu navakamona Vinjiho jaYehova chivatwalaho lika kulemesa Kalunga kavo. Chasoloka nge nakukapwa liuya chikuma mwomwo navakafwila kushimutwila vihande kana navakwavo, kuhakilako vene navaka-kwazana mijimbu. Vaka-mafuchi naSatana uze apwa muka-kuvayula navakatuhunga mwomwo yetu kaha natukatwalaho kulemesa Kalunga. Kaha navakamona ngwavo kavahashile kunongesa kwitava chosena hamavuko. Ngocho navakalumukila jino kuli yetu. Halwola kana, vaka-mafuchi vakiko navakapwa jino Ngonge wakuMangonge. * Kaha navakalinunga hamwe nakunyemukila vatu jaYehova. (Ezeke. 38:2, 14-16) Hakuwana nge katwatachikijile kanawa omu navikapwa vyumako, pamo tunahase kulizakamina havyuma navikasoloka haluyando lwalunene. Oloze tunatachikiza ngwetu, katwatela kwivwa woma luyando lwaluneneko, mwomwo Yehova mwakatuhana jindongi jakutukafwa mwakukayovokela. (Samu 34:19) Shikaho, natukemana ‘nakwandula mitwe yetu,’ mwomwo natukatachikiza ngwetu ‘kuyovoka chetu chili nakupandama kwakamwihi.’ *
12. Uno “ndungo wakushishika wakuzangama” natukafwenga ngachilihi tulizange havyuma vinakwiza kulutwe?
12 “Ndungo wakushishika wakuzangama” ali nakutunangwila chimweza vyuma vize navikatukafwa tukapwe vakushishika haluyando lwalunene. (Mateu 24:45) Ou ndungo ali nakutunangula mujijila jakulisezaseza. Jila yimwe shina kuhichila muvihande vyahakukunguluka changalila chamu 2016, na 2017, navyevi vyamu 2018. Kukunguluka kana, chatukolezezele tutwaleho lika kupwa navilinga vize twatela kupwa navyo omu tunakupandama kulikumbi lyaYehova. Tushimutwilenu havilinga kana.
TWALENUHO LIKA KUPWA VAKUSHISHIKA, NAKUPWA NALUKAKACHILA NAKUMIKA
Lizangenu oholyapwa mangana mukayovoke “haluyando lwalunene” (Talenu palangalafu 13-16) *
13. Vyuma muka navitukafwa tupwenga lika vakushishika kuli Yehova, kaha mwomwo ika?
13 Kushishika: Kukunguluka changalila cha 2016 chapwile namutwe wakwamba ngwawo, “Pwenunga Lika Vakushishika Kuli Yehova.” Kukunguluka kana chatukafwile tutachikize ngwetu kutunga usoko wakukola naYehova nachitukafwa tupwenga vakushishika kuli ikiye. Chatukafwile nawa tutachikize ngwetu kulomba chakufuma kumuchima nakulinangula chikuma Mbimbiliya vinahase kutukafwa tupandame kuli Kalunga. Kaha kulinga vyuma kana chinahase kutukafwa tumike nahakuhita muukalu waunene. Hakuwana nge kalinwaha luyando lwalunene lwizenga, ngocho tunahase kuhita muukalu waunene uze naweseka kushishika chetu kuli Kalunga nakuWangana wenyi. Vatu vanahase kutwalaho lika kututoleka hakuwana nge katwazana muvihande vyalifuchi nachiyulo vyamuno mukaye kaSatanako. (Petu. 2, 3:3, 4) Shikaho, twatela kulinga vyuma vize navitukafwa tupwenga vakushishika oholyapwa mangana tukapwe lika vakushishika haluyando lwalunene.
14. (a) Kwalumuka muka nachikapwako kutalisa kuli vandumbwetu vaze vali nakututwaminyina hano hamavu? (b) Mwomwo ika twatela kukapwa vakushishika halwola kana?
14 Haluyando lwalunene nakukapwa kwalumuka kutalisa kuli vandumbwetu vaze vali nakututwaminyina hano hamavu, mwomwo vandumbwetu vawavisa vosena hano hamavu navakavakungulula nakuvatwala mwilu mangana vakazane mujita yaAlamangetone. (Mateu 24:31; Kuso. 2:26, 27) Echi chasoloka nge katweshi kukapwa naLizavu Lyakutwaminyina hano hamavuko. Chipwe ngocho, nakukapwa vandumbwetu vakulindunuka vaze navakatongola mangana vakatwaminyine liyongomena lyalinene. Shikaho, tunahase kukasolola ngwetu twapwa vakushishika kuli Yehova kachi nge natukakundwiza ava vandumbwetu nakukakavangiza jindongi jakufuma kuli Yehova jize navakatulweza. Kaha kulinga vyuma kana nachikatulingisa mangana tukayovoke.
15. Chuma muka nachitukafwa tupwenga lika nalukakachila, kaha mwomwo ika chapwila chachilemu kupwa nalukakachila oholyapwa?
15 Lukakachila: Kukunguluka changalila cha 2017 chapwile namutwe wakwamba ngwawo, “Kanda Kuzeyako!” Kukunguluka kana chatukafwile tupwenga nalukakachila hakuhita muvyeseko. Chatukafwile nawa tutachikize ngwetu twatela kupwa nalukakachila numba nge vyuma vinakaluhwa. Shikaho, twatela kupendamina hali Yehova numba tuhase kupwa nalukakachila. (Loma 12:12) Twatela kwanuka mazu ahanjikile Yesu akwamba ngwenyi, “Ou mwakakachila palanga nakusongo navakamulwila.” (Mateu 24:13) Awa mazu asolola nge twatela kupwa lika vakushishika kuli Yehova chamokomoko nakala ukalu natumona. Shikaho, nge natupwa nalukakachila hakuhita muvyeseko oholyapwa kaha natukapwa nawa vakumika hakuputuka chaluyando lwalunene.
16. Uno kupwa vakumika chapendamina haka, kaha vyuma muka navitukafwa tupwenga vakumika?
16 Kumika: Kukunguluka changalila cha 2018 chapwile namutwe wakwamba ngwawo, “Pwenunga Vakumika.” Kukunguluka kana chatukafwile tutachikize ngwetu kupwa vakumika kachapendamina hauhashi wetuko. Ngana muze twatachikiza ngwetu kupwa nalukakachila chasakiwa kupendamina hali Yehova, nakupwa vakumika nawa chasakiwa kupendamina hali Yehova. Uno vyuma muka navitukafwa tupendamine chikuma hali Yehova? Twatela kutanganga Mazu enyi hakumbi hakumbi nakushinganyekanga omu nalwililangamo vatu jenyi kunyima. (Samu 68:20; Petu. 2, 2:9) Shikaho, twatela kukapwa vakumika nakufwelela Yehova chikuma omu vaka-kuyula vamukaye navakatunyemukila haluyando lwalunene. (Samu 112:7, 8; Hepe. 13:6) Kaha kupendamina hali Yehova oholyapwa nachikatukafwa tukapwe vakumika omu Ngonge mwakatunyemukila. *
FWELELENU NGWENU NAMUKAYOVOKA
Yesu namaswalale jenyi vamwilu vananyinyi hatuvalu vatoma mangana valwenga jitanga yaAlamangetone nakujiha vakole jaKalunga, kaha liyongomena lyalinene naliyovoka (Talenu palangalafu 17)
17. Mwomwo ika katwatela kwivwa woma jita yaAlamangetoneko? (Talenu muvwimbimbi wahalipapilo lyahelu.)
17 Ngana muze twashimutwilanga muchihande chinafumuho, etu vavavulu tunayoyelanga lika mumakumbi akukuminyina. Oloze tuli nawa nalutalililo lwakukayovoka haluyando lwalunene. Kaha jita yaAlamangetone yikiko nayikapwa makumishilo akatwamino kamyaka yino. Chipwe ngocho, katwatela kwivwa womako. Mwomwo ika? Mwomwo Kalunga ikiye mwakalwa jita kana keshi yetuko. (Vishi. 1:33; Ezeke. 38:18-20; Zeka. 14:3) Yehova mwakalweza Yesu kuya nakulwa, kaha Yesu Kulishitu mwakatwaminyina liyongomena lyavaka-jita mangana vakalwe jita. Yesu mwakapwa hamwe navaze vawavisa vaze vasangwile, namayongomena avangelo. Kaha navakalwa naSatana, navandemone jenyi namaswalale jenyi vahamavu.—Ndanye. 12:1; Kuso. 6:2; 17:14.
18. (a) Vyuma muka atushika Yehova? (b) Uno mukanda waKusoloka 7:9, 13-17 wamikafwa mufwelele vyuma muka?
18 Yehova atushika ngwenyi: “Vyeshovyo vitwa navakafula mangana vaka[mi]zungise, kavyeshi kukafukilako.” (Isa. 54:17) Ngocho “Liyongomena lyalinene” lyavaka-kulemesa Yehova navakayovoka “muluyando lwalunene.” Kaha navakatwalaho lika kumuzachila mulimo wajila. (Tangenu Kusoloka 7:9, 13-17.) Mbimbiliya yatufwelelesa ngwayo navakatuyovola chikupu. Ngocho twatachikiza ngwetu, “Yehova eji kukinganga vatu vakushishika.” (Samu 31:23) Vosena vaze vazanga Yehova nakumwalisa navakevwa kuwaha omu mwakahakwila lijina lyenyi.—Ezeke. 38:23.
19. Kuyoya muka tuli nakuvandamina kulutwe?
19 Achishinganyekenu omu chinahase kupwa chisoneka chaWaChimoteu 2, 3:2-5, kachi nge chapwile nakulumbununa omu navakapwa vatu vamukaye kakahya oku Satana vanamufumisako. (Talenu lipwata lyakuvuluka ngwavo, “Omu Navakapwa Vatu haMakumbi Aze.”) Ndumbwetu George Gangas, * uze apwile muLizavu Lyakutwaminyina ambile ngwenyi: “Kaye nakakawaha chikuma omu vatu vosena navakapwa vandumbwetu. Kaha kalinwomu mupwenga mukatwamino kakahya. Shikaho, natukayoyanga haya myaka yosena nganomu ayoya Yehova.” Echi nachikapwa kuyoya chamwaza chikuma.
MWASO 122 Zamenunga Mbe, Chakuzeneka Kusosoloka
^ par. 5 Tunejiva ngwetu kalinwomu vatu vosena vamone “luyando lwalunene.” Uno vyuma muka navikasoloka kuli yetu? Kaha Yehova ali nakusaka tukalinge vyuma muka? Vilinga muka twatela kupwa navyo oholyapwa vize navikatukafwa tukatwaleho lika kupwa vakushishika haluyando lwalunene? Vihula kana navavikumbulula muchihande chino.
^ par. 3 MAZU VANALUMBUNUNA: Kulishitendomu yapwa mauka akwitava aze alivuluka kupwa avaka-Kulishitu, oloze kawanangula vatu valemese Yehova mujila yize etavilako.
^ par. 11 MAZU VANALUMBUNUNA: Lizu Ngonge wakuMangonge (navulukiso yamukavatu yakwamba ngwavo, Ngonge) lyatalisa kuli vaka-mafuchi vaze navakalifutula nakunyemukila vatu jaKalunga haluyando lwalunene.
^ par. 11 Hakusaka muwane vyuma vyosena navikasoloka shimbu kanda jita yaAlamangetone, talenu mukanda wakwamba ngwavo, Wangana waKalunga Unakuyula kapetulu 21. Nge munakusaka mijimbu yayivulu yize yahanjika omu Ngonge wakuMangonge mwakanyemukila vatu jaYehova nomu Yehova mwakavakingilamo hajita yaAlamangetone, kaha talenu mukanda wakwamba ngwavo, Kukindulwisa Kulemesa chaMuchano kapetulu 17 na 18.
^ par. 16 Kukunguluka changalila cha 2019 chize chapwanga namutwe wakwamba ngwawo, “Zangi Kayakumako,” chatukafwanga tutachikize ngwetu tunahase kupwa vakukingiwa hakutulama kuli Yehova.—Koli. 1, 13:8.
^ par. 19 Talenu chihande chakwamba ngwavo “His Deeds Follow Him” muKaposhi Kakutalila waDecember 1, 1994.
