1. Mwomwo ika Yehova asaka tulihane kuli ikiye namichima yetu yosena?

YEHOVA asaka tulihane kuli ikiye namichima yetu yosena mwomwo ikiye apwa Tengi yetu, kaha nawa ikiye atuhana kuyoya. (Kuso. 4:11) Chipwe ngocho, kulihana kuli ikiye kachapwa chachashiko. Numba tuhu twazanga Yehova nakumuvumbika, oloze kunahase kupwa vyuma vize vinahase kutuhonesa kulihana kuli ikiye nakumuzachila namichima yetu yosena. Uno chinahase kupwa ngachilihi ngocho? Chatete, tuvangilenu kushimutwila havyuma vyasakiwa hakuzachila Yehova namichima yetu yosena.

2. Kweseka namukanda waKulovoka 34:14, chuma muka twatela kulinga kachi nge natulihana kuli Yehova namichima yetu yosena?

² MuMbimbiliya, mazu akwamba ngwavo kulihana kuli Kalunga alumbununa kumuzanga chikuma. Shikaho, nge natulihana kuli Yehova namichima yetu yosena, kaha natumulemesanga ikiye kaha. Yehova ikiye twatela kumona kupwa wamulemu kuhambakana kala mutu chipwe kala chuma.—Tangenu Kulovoka 34:14.

3. Mwomwo ika kulihana chetu chapwila chakufuma kumuchima?

³ Kulihana chetu kuli Yehova chapwa chakufuma kumuchima. Mwomwo ika tunahanjikila ngocho? Mwomwo kulihana chetu, chapendamina havyuma vyamuchano tunalinangula hali ikiye. Tunalinangula vilinga vyenyi vyamwaza vize vinatulingisa tumuzange. Twazanga vyuma vize azanga nakuhunga vize ahunga. Twejiva vyuma ajina kukalingila vatu. Twapwa vakutokwa  chikuma hakutwitavisa tupwenga tumasepa jenyi. (Samu 25:14) Vyuma vyosena vize tweji kulinangulanga kuli Tengi yetu, vyeji kutulingisanga tupandame kuli ikiye.—Yako. 4:8

4. (a) Vyuma muka eji kuzachisanga Liyavolo mangana atuhonese kuzanga chikuma Yehova? (b) Vyuma muka natushimutwila muchihande chino?

⁴ Liyavolo ikiye ali nakuyula kano kaye nakukazachisa mangana tumone vyuma vyasakiwa mukuyoya chetu kupwa vyavilemu chikuma. (Efwe. 2:1-3; Yowa. 1, 5:19) Satana afwila tuzange navyuma vyeka keshi kuzanga kaha Yehova namichima yetu yosenako. Tushimutwilenu vyuma vivali vize nahase kuzachisa mangana atuhungumwise. Chatete, eji kutuzondolanga mangana tufwile luheto, chamuchivali, eji kutuzondolanga mangana tusakule kulihizumuna chachipi.

5. Mwomwo ika katwatela kuzanga chikuma jimbongoko?

⁵ Tuvosena twasaka kupwa navyakulya vyakutamo, nauvwalo wamwaza nazuvo yakutwamamo. Chipwe ngocho, twatela kulihenda kumuchima wakuzanga chikuma jimbongo. Vatu vavavulu makumbi ano, vapwa “vaka-kuzanga jimbongo” navyuma vyeka vyamukuyoya. (Chimo. 2, 3:2) Yesu atachikijile ngwenyi, vaka-kumukavangiza vanahase kukapwa mucheseko kana. Ngocho ambile ngwenyi: “Kakweshi ndungo mwahasa kuzachila vamyata vavaliko, mokomoko mwahunga umwe nakuzanga mukwavo, chipwe mwalipanjika naumwe nakulumbilisa mukwavo. Kamweshi kuhasa kuzachila Kalunga naLuheto hamweko.” (Mateu 6:24) Mutu uze eji kuzachilanga Yehova nakuzata nawa nangolo jenyi josena mangana apwenga naluheto eji kusololanga hatoma nge ali nakuzachila vamyata vavali. Mutu kana keshi kuhasa kuzachila Yehova namuchima wenyi wosenako.

6. Uno mazu ahanjikile Yesu kuchikungulwilo chamuLauchiseya nawatukafwa ngachilihi?

⁶ Kusongo yalikulukaji lyamyaka lyakulivanga C.E., vatu vamuchikungulwilo chamunganda yaLauchiseya vapwile nakulisasa ngwavo: “Ngumuka-luheto, kaha ngunawane  luheto lwaluvulu, ngocho kangweshi nakusakiwa chuma nachimweko.” Oloze Yehova naYesu vavamwene ngwavo vapwile ‘nakumona lupi, naluvinda, nauhutu, naupuputa nauvu.’ Yesu avahuhumwine mwomwo vazangile chikuma luheto, kaha kuzanga chikuma luheto chapwile nakwenyeka usoko wavo naYehova. (Kuso. 3:14-17) Kachi nge tunamono ngwetu tunaputuka kuzanga chikuma luheto, kaha twatela kwolola washi vishinganyeka vyetu. (Chimo. 1, 6:7, 8) Oloze nge katweshi kwolola washi vishinganyeka vyetuko, kaha katweshi kuhasa kuzachila Yehova namuchima wetu wosenako. Ngocho, Yehova keshi kwitavila kumulemesa mujila kanako. ‘Asaka vatu valihane kuli ikiye namichima yavo yosena.’ (Lushi. 4:24) Chuma muka chinahase kutulingisa tuzange chikuma jimbongo mukuyoya chetu?

7-9. Vyuma muka munalinangula kuli kalama walijina lyaDavid?

⁷ Tutalenu chakutalilaho chaDavid kalama watwima uze atwama kuUnited States. Eji kuhanjikanga ngwenyi apwa samalikita. Vamuzezwile helu kumilimo azachilenga, kaha atambwilenga jimbongo jajivulu, ngocho apwile jino himutu wamulemu chikuma hamilimo kana. David ambile ngwenyi: “Halwola kana ngwashinganyekelenga ngwami Yehova ikiye angukiswile numba nguzate yize milimo.” Uno chikupu yapwile kisu yakufuma kuli Yehova tahi?

⁸ David aputukile kumona jino ngwenyi, milimo kana yapwile nakwenyeka usoko wenyi naYehova. Ambile ngwenyi: “Omu ngwapwilenga kukukunguluka chipwe vene mumulimo wamuwande ngwashinganyekelenga vyakumilimo. Ngwapwile nakutambulanga jimbongo jajivulu chikuma, oloze ngwahombelenga nakuzeya chikuma, ulo wetu nawa wapwilenga muponde.”

⁹ David akekesele nakumona vyuma vyavilemu chikuma atelelele kulinga mukuyoya chenyi. Ngocho ambile ngwenyi: “Hahaze vene ngwalumwineko vyuma vimwe nakuhaka  vize vyapwile vyavilemu kulutwe. Anonekele jila yakuzachilamo, nakuyilweza mukulwane wenyi wamilimo. Uno mukulwane wamilimo etavilile vyuma alumwineko tahi? Nduma, kamwitavilileko, oloze amufumishile milimo. Jino vyuma muka alingile? Ambile ngwenyi: “Likumbi lyakavangijileho ngwalisonekesele upayiniya wakukafwa hatando yayisuku.” Oloze hakusaka kuwanako jimbongo jakulikafwa najo, David napuwenyi vaputukile kuzatako milimo yakukomba. Mukuhita chalwola David aputukile kuzata upayiniya washimbu yosena, kutwala muze napuwenyi aputukile kuzata upayiniya. Ava valunga napwevo vasakwile kuzata mulimo uze vamona vatu vavavulu kupwa wamokomoko, oloze mulimo kana keshi ukiko wapwile waulemu kuli vakikoko. Numba tuhu vatambwilenga jimbongo jajindende hakujesekesa kujimbongo vatambwilenga hakavanga, oloze vahashilenga kulanda vyuma vyosena vize vyasakiwile mukuyoya chavo. Chuma chachilemu chikuma vasakile shina, kuhaka milimo yaYehova kulutwe, kaha vamwene chikupu ngwavo, Yehova eji kuzakamanga vaze veji kuhakanga vyaWangana wenyi kulutwe.—Mateu 6:31-33.

10. Tunahase kukinga ngachilihi michima yetu?

¹⁰ Twatela kukinga michima yetu numba tupwa najimbongo jajivulu chipwe jajindende. Mujila muka? Kanda kuzanga chikuma luhetoko. Kaha nawa milimo mwazata kayatela kumilingisa muhone kuhaka milimo yaYehova kulutweko. Uno munahase kutachikiza ngachilihi nge muli naukalu kanou? Mwatela kulihulisa enu vavene ngwenu: ‘Kutala ngweji kushinganyekanga vyamilimo nge nguli kukukunguluka chipwe nge nguli mumulimo wamuwande tahi? Uno ngweji kulizakaminanga chikuma vyajimbongo tahi? Uno jimbongo navikumba vili nakutunehela vikokojola namuka-mahyami tahi? Kutala ngunahase kuzata milimo yize vamona vatu kupwa yamokomoko kachi nge nayinguhana lwola lwaluvulu lwakuzachila Yehova tahi?’ (Chimo. 1, 6:9-12) Omu natukekesa vihula kanevi, twatela kwanuka ngwetu Yehova atuzanga, kaha nawa atushika ngwenyi: ‘Kangweshi kukamisezako, kangweshi kukamimbilako.’ Echi chikiko chalingishile kaposetolo Paulu asoneke ngwenyi: “Kutwama chenu chipwenga chakuzeneka kuzanga jimbongo.”—Hepe. 13:5, 6.

11. Vyuma muka vinahase kusoloka kumutu kweseka navyakulihizumuna mwasakula?

¹¹ Yehova asaka tulivwise kuwaha kuyoya, kaha kulihizumuna chinahase kutwivwisa kuwaha. Kaha nawa Mazu aKalunga amba ngwawo: “Kakweshi chuma chamwaza atela kulinga mutu kuhambakana kulya nakunwa nakulivwisa kuwaha hamilimo yenyi eji kukilikitangako.” (Kwambu. 2:24) Chipwe ngocho,  kulihizumuna chachivulu chili muno mukaye, chinahase kwenyeka vishinganyeka vyetu. Kulihizumuna kana cheji kulingisanga vatu valinge vyuma vyavipi, nakuvakolezeza vakundwize chipwe kuzanga vyuma vize vakanyisa muMazu aKalunga.

12. Kweseka namukanda Wavaka-Kolinde 1, 10:21, 22, mwomwo ika twatela kusakulanga kanawa vyakulihizumuna?

¹² Hakuwana nge twasaka kuzachila Yehova namichima yetu yosena, ngocho katwatela kulya “kumesa yaYehova nakumesa yavandemoneko.” (Tangenu Wavaka-Kolinde 1, 10:21, 22.) Kakavulu kulila hamwe vyakulya namutu cheji kusololanga nge mwalizanga. Nge natulihizumunanga navyuma vize vyeji kukundwizanga ulyanyi, nakupanda, naujila, chipwe vyuma vyeka vyakufwana nganevi, kaha nachilumbununa nge tuli nakulila hamwe navaka-kole jaKalunga. Vyuma kana vyeji kutunehelanga ukalu mukuyoya chetu nakwenyeka usoko wetu naYehova.

13-14. Kweseka namukanda WaYakova 1:14, 15, mwomwo ika twatela kupwila vakuvanguluka hakusakula kulihizumuna? Lumbununenu.

¹³ Tunahase kwesekesa ngachilihi kulihizumuna kuvyakulya? Chakutalilaho, tweji kusakulanga vyakulya vize twatela kulya. Oloze nge tunaviminyi lyehi, kunahu katweshi kuhasa kuvisakulako, naviputuka kuzata mumijimba yetu. Vyakulya vyamwaza vinahase kutulingisa tupwenga vakulikangula kumujimba oloze vyakulya vyavipi vinahase kutuvijisa. Mukuhita chalwola hakiko tunahase kumona kupihya chipwe kuwaha chavyakulya twalyanga.

¹⁴ Chochimwe nawa, tunahase kusakula etu vavene vyuma vyakulihizumuna vize navingila muvishinganyeka vyetu. Nge vinengila lyehi muvishinganyeka vyetu kaha vinahase kutuluwanganyisa chipwe kwenyeka michima yetu. Kulihizumuna chamwaza cheji kutusuulwisanga, oloze kulihizumuna chachipi cheji kutwenyekanga. (Tangenu WaYakova 1:14, 15.) Kakavulu kupihya cheji kufumanga mukulihizumuna chachipi kachasoloka hahaze veneko oloze mukuhita chalwola nachikasoloka. Echi chikiko chalingisa Mbimbiliya yituhuhumune ngwayo: “Kanda navamihungumwisako: Kalunga kaveshi kumuhulamisako. Mwomwo vyeshovyo ali nakukuva mutu, vikiko vene mwakaha nawa, mwomwo weshowo mwakuvila kumujimba wenyi, kumujimba wenyi mwakahako nawa kupola.” (Ngale. 6:7, 8) Shikaho chapwa chachilemu chikuma, kulihenda kukulihizumuna chize cheji kwivwisanga Yehova kupihya.—Samu 97:10.

15. Wana muka wamwaza ali nakutuhana Yehova?

¹⁵ Vatu jaYehova vavavulu veji kulivwisanga kuwaha kutala JW Broadcasting^® yize yapwa polongalamu yetu yahaInternet. Ndumbwetu wapwevo walijina lyaMarilyn ambile ngwenyi: “Kutala JW Broadcasting chinangukafwe ngupwenga nguwakuwahilila, shikaho, ngweji kutalanga polongalamu yosena mwomwo ngwayizanga chikuma. Nge ngunakwivwa uli chipwe nge ngunahombo, kaha ngweji kwivwililanga kuchihande chakukopa chipwe kutala vindiyo yimwe yahapolongalamu yaKukekesa Chisoneka chaLikumbi naChimene. Echi cheji kungulingisanga ngupandame chikuma kuli Yehova naliuka lyenyi. Kutala polongalamu ya JW Broadcasting chinalumuna chikuma kuyoya chami. Kutala muli nakunganyala kuwana kanou wakufuma kuli Yehova tahi? Hachihanda cha JW Broadcasting chahaInternet heji kupwanga navihande vyeka vyavihya vyakukopa, najivindiyo namyaso vize tunahase kutala nakwivwilila kala lwola.

16-17. Mwomwo ika katwatela kumbata lwola lwaluvulu kukulihizumuna, kaha vyuma muka twatela kulinga mangana tuzachise kanawa lwola?

¹⁶ Omu natusakula kanawa vyakulihizumuna, twatela nawa kuzangama nalwola natumbata hakulihizumuna kana. Nge pimbi, kaha tunahase kwenyekela lwola lwaluvulu kukulihizumuna nakuzachisa lwola lwalundende kumilimo yaYehova. Vatu vavavulu veji kulihizumunanga halwola lwaluvulu chikuma. Ndumbwetu wapwevo Abigail wamyaka yakusemuka 18 ambile ngwenyi: “Nge ngunazate lyehi  likumbi lyosena lyamuundu, ngweji kwivwanga kuwaha kutala mivwimbimbi hachisaji chamivwimbimbi mangana ngulihizumuneko. Oloze nge kangwazangamineko, kaha ngunahase kumbata lwola lwaluvulu hakutala mivwimbimbi.” Ndumbwetu wakanyike Samuel ambile ngwenyi: “Shimbu jimwe ngweji kutalanga jivindiyo jajihi jajivulu haInternet. Ngweji kuputukanga kutala vindiyo yimwe halwola lwalundende, ngukatone ngukalawile ngunambate jola jitatu chipwe jiwana nakutala jivindiyo.”

¹⁷ Vyuma muka mwatela kulinga mangana muhonenga kuzachisa lwola lwaluvulu kukulihizumuna? Chuma chatete mwatela kulinga shina, kutachikiza lwola mweji kumbatanga hakulihizumuna. Esekenu kusoneka jola namulihizumuna muchalumingo chamuundu. Sonekenu hakalenda jola munazachisa hakutala mivwimbimbi hachisaji chamivwimbimbi chipwe munazachisa haInternet chipwe kuhema chahajivindiyo halikina lyenu. Nge munamono ngwenu munazachisa lwola lwaluvulu chikuma hakulihizumuna, kaha mwatela kunoneka lwola lwenu. Vangilenu kunoneka lwola lwakulinga vyuma vyavilemu numba jino munoneke lwola lwakulihizumuna. Kufumaho, lombenu Yehova amikafwe mulinge vyuma munanoneka. Kulinga ngocho, nachimikafwa mupwenga nalwola nangolo vize navimikafwa mulinge chilongesa chauka, nakulemesa Kalunga mwatanga, nakuya kukukunguluka chachikungulwilo, nakwazana mumulimo wakwambulula nakunangula. Kuvangila kulinga vyuma vyakushipilitu nachimisuulwisa nakulingisa chivezu chenu chihone kumihana mulonga.

18-19. Tunahase kusolola ngachilihi ngwetu twalihana kuli Yehova namichima yetu yosena?

¹⁸ Omu Petulu akumishile kusoneka vyakukuma chakaye kaSatana nakwiza chakaye kakahya, ambile ngwenyi: “Enu ngwazanga, hakuwana nge muli nakuvandamina vyuma kanevi, zatenu nangolo mangana akamiwane muvakuzeneka lipenga, muvakuzeneka katenga, kaha nawa akamiwane mukuunda.” (Petu. 2, 3:14) Nge natukavangiza kuhuhumuna kanechi nakukilikita mangana tupwenga vatoma kushipilitu nakumujimba, kaha natusolola ngwetu twalihana kuli Yehova namichima yetu yosena.

¹⁹ Satana nakaye kenyi navatwalaho lika kutweseka mangana tuhone kuhaka vyaWangana kulutwe mukuyoya chetu. (Luka 4:13) Chamokomoko nakala ukalu natulitalasana nawo, twatela kutwalaho kuhaka vyuma vyakushipilitu kulutwe mukuyoya chetu. Chuma chachilemu twafwila shina, kuzachila Yehova namichima yetu yosena.