Echi chivwasano chavalingishile vatunge liuka lize vavulukilenga ngwavo League of Nations. Liuka kana valihakileko mangana “likafwe mafuchi azachile hamwe nakuneha kuunda namukingo.” Mauka akwitava amavulu aKulishitendomu akundwijile liuka kana. Kaha vaka-Federal Council of the Churches of Christ vamuAmerica valishile liuka lyaLeague of Nations nakwamba ngwavo liuka kana lyapwile “unjiho wakusolola nge Wangana waKalunga uneza hano hamavu.” Vaka-Federal Council of the Churches of Christ vasolwele hatoma nge vakundwijile kuliwana kana, mwomwo vatumine vatemesa javo kukuliwana chapwile kuParis Peace Conference. Umwe hali vaze vatemesa ambile ngwenyi, “kuliwana kana chapwile maputukilo akuneha kuunda mukaye.”

Numba tuhu chapwile maputukilo, oloze kuunda kana kaveshi kuchineha kuvatu vaze vapwile kukuliwana kanako. Mu 1919 twaputukile mulimo wetu wakwambulula omu Yehova ahanyine ngolo vatu jenyi mangana vazate mulimo kana natwima kuhambakana muze vazachilenga hakavanga. Oloze shimbu kanda mulimo kana uputuke, kwatelele kupwa kwalumuka chimwe kuli Vaka-Kulinangula Mbimbiliya.

Mwaka himwaka liuka lyaWatch Tower Bible and Tract Society lyasakwilenga vatwamina vatetekele liuka, shikaho mumwaka wa 1919 vanonekele ngwavo nakupwa kusakula vatwamina lyaSateli January 4. Oloze halwola kana Joseph F. Rutherford uze apwile nakutwaminyina Vinjiho jaYehova vamuvangijikilile mulonga, kaha vamukashile mukamenga muAtlanta, Georgia, U.S.A, hamwe kaha navandumbwenyi 7. Jino valihulishile ngwavo, Kutala twatela kutongola cheka ava vandumbwetu vali mukamenga vatwaminyine lika tahi, nyi twatela kutongola veka?

Omu Ndumbu Rutherford apwile mukamenga alizakaminyine vyaliuka omu nalikapwa kulutwe. Atachikijile ngwenyi vandumbwetu vamwe vashinganyekele ngwavo nachipwa chamwaza kusakula mutu weka apwenga twamina waliuka. Ngocho asonekelele mukanda vandumbwetu vaze vapwileko, nakutongola Evander J. Coward mangana apwenga twamina waliuka. Rutherford asangejekele Coward ngwenyi, apwile mutu “wakuunda, wakulikehesa wakushishika kuli Mwata.” Oloze vandumbwetu vavavulu kavashinganyekele ngochoko, vasakile kuvandaminako tukweji 6 numba jino kupwenga  kusakula mutu wakutwaminyina liuka. Lizavu lyamahako lize lyahakwililile vandumbwetu vaze vapwile mukamenga navakiko vetavilile ngwavo vatela kuvandaminako tukweji 6. Halwola vapwile nakushimutwila, vandumbwetu vamwe vapihililile chikuma.

Kufumaho kwapwile vyuma vyeka vyasolokele, Richard H. Barber ahanjikile ngwenyi, chuma kana chaunjishile ukalu uze wepukile. Ndumbwetu umwe haze halizavu ahanjikile ngwenyi: “Ami kangwapwa ngulihakoko, oloze kweseka najishimbi jahanjika hachihande kana ngwatachikiza vyuma vyasakiwa hakupwa vakushishika. Kalunga asaka vatu vakashishi. Shikaho jila yimwe tunahase kusolwelamo kushishika chetu kuli Kalunga shina kutongola Ndumbu Rutherford apwenga cheka twamina waliuka.”—Samu 18:25.

Ndumbwetu A. H. Macmillan uze apwile naikiye mukamenga ahanjikile ngwenyi, likumbi lyakavangijileho Ndumbu Rutherford avetele hambango yakapete muze ngwapwile nakungulweza ngwenyi, “Lovola livoko lyove kuno.” Kaha Ndumbu Rutherford amuhanyine mukanda. Ngocho omu autambwile atachikijile ngwenyi vapwile nachihande chachinene chikuma. Uze Mukanda wambile ngwawo: “RUTHERFORD, naWISE, naVAN, naBARBER, naANDERSON BULLY naSPILL, CHATETE KULI TWAMINA NAKULI ENU VAKULWANE VATATU MUVOSENA TWAMIZANGA MWANE.” Echi chalumbunwine nge vosena vaze vapwile nakutwaminyina vavatongwele. Ndumbu Joseph Rutherford naWilliam Van Amburgh vavatongwele cheka mangana vatwalilileho namilimo yavo. Kaha Ndumbu Rutherford apwile cheka twamina waliuka.

Omu ava vandumbwetu 8 vapwile mukamenga, Vaka-Kulinangula Mbimbiliya vakushishika valwezelenga vatu vavavulu vasoneke chipwe kusayina hamapapilo mangana vaka-fulumende vafumise ava vandumbwetu mukamenga. Vatu vaze vasonekele chipwe kusayina hamapapilo aze vasakile kutwala kufulumende, vavulile kuzomboka 700,000. Kuheta LyaChitatu March 26, 1919, shimbu kanda vatwale aze mapapilo, Ndumbu Rutherford navaze vandumbwetu vavafumishile mukamenga.

Kaha Ndumbu Rutherford ahanjikile kuli vaze vejile nakumusambilila ngwenyi: “Ngunakunyuka ngwami ukalu wosenou tunahichimo unatukafwe tupwenga vakulizanga naukalu waunene uli nakwiza kulutwe. . . . Kamwafwilanga kaha kusokola vandumbwenu mukamengako, . . oloze mwafwilanga kuhakwila muchano waYehova, kaha vosena vaze vakundwizanga mulimo kana navavakisula.”

Vyuma vyasolokele vyasolwele nge Yehova ikiye apwile nakutukafwa. HaMay 14, 1919 zango yasopele ngwayo: “Vaze vahananga mulonga vanavawane nge kaveshi namulongako . . . Ngocho vali nalisesa lyakutwalaho kuzata mulimo wavo, kaha chihande chavo vanachifumisako.” Nge vandumbwetu vaze vakashile mukamenga vavulumwine mulonga waunene, chipwe nge vavakonekelele chipwe vavechele kaha, kachi chihande chavo vachitulikile mujifwayilo jazango yakusopela. Oloze kavavahanyine mulongako. Hakuwana nge Rutherford, apwile chambamilonga, ngocho omu vavalowele mukamenga ahashile kuhakwila vangamba jaYehova vaze vatwalilenga kuZango Yakulitulaho Yakusopa Milonga yamuUnited States mapapa kakavulu.

Ndumbu Macmillan ambile ngwenyi: “Katwatwamine kaha mbombomane nakuvandamina Mwata atutwale mwiluko. Twashinganyekele ngwetu twatelelele kulingako vyuma vimwe mangana tumone mwayile muchima wamwata wetu.”

Oloze vandumbwetu hachikota chetu kavatwalileho namulimo wavo uze vazachilengako. Mwomwo ika? Mwomwo halwola vavakashile mukamenga, vyuma vyosena vize vazachishilenga mangana vapulite mikanda vavyenyekele. Echi chahombesele vandumbwetu nakuvalingisa vahuhwasane numba nge mulimo wakwambulula nautwalaho lika nyi chiku.

Vandumbwetu valihulishilenga ngwavo, uno vatu vanakufwila lika kwivwilila kumujimbu waWangana tahi? Hakusaka kutachikiza kanawa, Ndumbu Rutherford ashinganyekele kuhana chihande. Ngocho valanyine vatu kuchihande kana. Ndumbu Macmillan ambile ngwenyi: “Kachi nge vatu kaveshi kwiza nakwivwilila kuchihande kanako kaha natutachikiza ngwetu mulimo wakwambulula unakumu lyehi.”

Kuheta lyaSondo, haMay 4, 1919, Ndumbu Rutherford ahanyine chihande numba tuhu apwile nakuviza. Chihande kana chapwile namutwe wakwamba ngwavo: “The Hope for Distressed Humanity” muLos Angeles, California. Kafwe vatu 3,500 vakiko kaha vengilile mukachi nakwivwilila kuchihande kana, kaha veka vavalwezele vakeze likumbi lyakavangijileho mwomwo mwakutwama mwakehele. Likumbi lyakavangijileho, kwejile vatu 1,500. Vandumbwetu vatachikijile jino ngwavo kumana kwapwile vatu vavavulu vaze vapwile nakusaka kwivwilila kumujimbu waWangana.

Chuma valingile vandumbwetu chalingishile kupwenga mulimo wakwambulula uze vanakuzata Vinjiho jaYehova palanga nakulelo lino.

Mangazini yaKaposhi Kakutalila waAugust 1, 1919, yahanjikile ngwayo kumaputukilo akakweji waSeptember nakupwa kukunguluka changalila chize nachikapwila kuCedar Point, Ohio. Clarence B. Beaty wakuMissouri uze apwile hali Vaka-Kulinangula Mbimbiliya, ambile ngwenyi: “Vatu vosena vapwile nakufwila kukapwa kukukunguluka kanechi.”  Kahomu chahetele chize kukunguluka, kwejile vandumbwetu vakuzomboka 6,000, katwashinganyekele ngwetu nakupwa vatu vavavulu nganako. Kaha nawa vatu vakuzomboka 200 vavambapachishile kwakamwihi naChijiva chaErie.

Kuheta haSeptember 5, 1919, halikumbi lyamuchitanu hakukunguluka kana, ndumbwetu Rutherford, ahanjikile chihande chakwamba ngwavo: “Kuli vakwetu mutwazachila Mulimo.” Ndumbu Rutherford avilikile mangazini yayihya yize yapwile namutwe wakwamba ngwavo The Golden Age. * Ambile ngwenyi: “Eyi mangazini nayisolola kulema chavyuma vili nakulingiwa oholyapwa.”

Vaka-Kulinangula Mbimbiliya vosena vavakolezezele kwambulula natwima hakuzachisa mangazini kaneyi yayihya. Mukanda umwe uze walumbunwine mwakuzachila mulimo kana wambile ngwawo: “Mutu wosena uze vambapachisa atela kutachikiza ngwenyi atwama namulimo waulemu uze atela kuzata nangolo jenyi oholyapwa mangana ambulile vatu vosena mukaye.” Vatu vavavulu vetavilile kuzata mulimo kana. Kuheta muDecember vaka-kwambulula vatwima vatambwile jimbongo jamangazini kaneyi yayihya jakuheta ku 50,000.

Kusongo yamwaka wa 1919, vatu jaYehova vaputukile cheka kuzata nangolo mulimo wavo. Kaha nawa upolofweto wauvulu uze wahanjikile hamakumbi akukuminyina wateselemo. Kweseka naupolofweto wahanjika hakutomesa nakulongesa kanawa vatu jaYehova vavuluka hali Malaki 3:1-4 wateselemo, mwomwo vatu jaYehova vavafumishile muufunge wachifwanyisa “[mu]Mbavilone Yayinene.” Kaha Yesu atongwele “ndungo wakushishika wakuzangama.” * (Kuso. 18:2, 4; Mateu 24:45) Ngocho Vaka-Kulinangula Mbimbiliya vapwile vakulizanga kuzata mulimo wavo wakwambulula avahanyine Yehova.