ACHISHINGANYEKENU hali mutu uze alinangula mulimo wakukekesa hakuzuma nakututa chajingalila. Nge mutu kana mwamona ngwenyi kuli nakwiza peho yanyamanganda yayinene yize yinahase kwenyeka ngalila yimwe yize yatwama navatu vavavulu, kaha eji kuhuhumunanga vatu mangana valizange vyaponde kana, mwomwo nalizakamina hakuyoya chavo.

Chochimwe nawa, Yehova ali nakuhuhumuna vatu mukaye kosena vatachikize vyakwiza ‘chanyamanganda’ wamunene chikuma kuhambakana kala ponde vanahase kwivwa kuli vaka-kukekesa vyakuzuma nakututa chajingalila. Mujila muka ali nakuhuhumwinamo vatu? Kaha tunafwelela ngachilihi ngwetu nahane vatu lwola lwaluvulu lwakwakula kuvyuma ali nakuvalweza? Hakusaka tuwane mwakukumbulwila vihula kana, tuvangilenu kushimutwila havyuma vimwe vize Yehova ahuhumwine vatu kushikulu.

Kushikulu, Yehova ahuhumwinenga vatu shimbu yosena ‘vyanyamanganda’ chipwe ngwetu vyakusopesa chize ajinyinenga kuneha hali vatu vaze kavakavangijilenga jishimbi jenyiko. (Vishi. 10:25; Yele. 30:23) Alwezelenga vatu ponde kana shimbu kuchapwile lwola lwaluvulu mangana valumuke nakulinga vyuma kweseka namwayile kujina chenyi. (Vamya. 2, 17:12-15; Nehe. 9:29, 30) Hakusaka kukafwa vatu vaze vafwililile kupihilila nakwalumuka, Kalunga atuminenga vangamba jenyi vakushishika mangana vavilike vyakusopesa chenyi nakuvalweza nawa nge vatela kwakula washi kuvyuma avahuhumwine.—Amo. 3:7.

Mutu umwe uze Yehova vatumine mangana akahuhumune vatu shina Nowa ngamba yenyi wakushishika. Hamyaka yayivulu, ahuhumwine vatu vatachikize ngwavo kwapwile nakwiza Livaji lyalinene lize nalinongesa vatu vaulyanyi navaka-kulinga ujila. (Kupu. 6:9-13, 17) Avalwezelenga nawa vyuma vatelele kulinga mangana vahone kunonga. Echi chikiko chalingishile Nowa vamuvuluke ngwavo “muka-kwambulula kwoloka.”—Petu. 2, 2:5.

Numba tuhu Nowa ambulwile natwima, oloze vatu kana kavetavilile vyuma vize avalwezeleko. Echi chasolwele nge vatu kana kavapwile nalufweleloko. Shikaho, omu lyejile ‘Livaji lyavakombele vosena.’ (Mateu 24:39; Hepe. 11:7) Vatu kana kavahanyine Kalunga mulongako mwomwo avahuhumwine shimbu kanda anehe Livaji.

Halwola lukwavo nawa, Yehova ahuhumwinenga vatu omu kwasalilenga shimbu yayindende nakuneha “nyamanganda” chipwe ngwetu kusopesa chenyi. Chipwe ngocho, vatu kana avahanyine lwola lwaluvulu mangana valumuke. Chakutalilaho, ahuhumwine vaEjipitu shimbu kanda anehe Vipupu Likumi. Halwola lumwe Yehova atumine Mose naAlone vakahuhumune Fwalo navangamba jenyi mangana vatachikize vyakwiza chavula yayinene yamalolwa yize yapwile chipupu chakusokesa 7. Hakuwana nge yize vula yamalolwa yaputukile likumbi lyakavangijileho, uno Kalunga avahanyine lwola lwaluvulu mangana vawane zuvo yakuswamamo tahi? Mbimbiliya yakumbulula ngwayo: “Vangamba jaFwalo vaze vevwile woma mazu aYehova vanehele washiwashi vangamba javo navimuna javo nakuvengisa mujizuvo, oloze vaze vahumbwile mazu aYehova vasezele vangamba javo navimuna javo muchipapa.” (Kulo. 9:18-21) Chikupu vene, Yehova ahuhumwinenga vatu mulwola lwakutamo, kaha vaze vevwilililenga mazu akuhuhumuna vayovokelenga.

Fwalo navangamba jenyi vavahuhumwine cheka shimbu kanda Kalunga anehe chipupu chamakumishilo. Oloze kavevwililile kumazu aze vavahuhumwineko. (Kulo. 4:22, 23) Ngocho vana vavo  vamalunga vavatwatwa vafwile. Chuma kana chapihile chikuma. (Kulo. 11:4-10; 12:29) Uno nge vevwililile kutala kachi vayovokele tahi? Eyo. Mose alwezele jitanga javaIsalele vyachipupu chakusokesa 10 chize chapwile nakwiza, nakuvalweza vyuma vatelele kulinga mangana vakinge jitanga javo. (Kulo. 12:21-28) Uno vatu vangahi vevwililile kumazu aze avahuhumwine Mose? Chasoloka nge kwapwile vatu 3,000,000, vatu kana vapwile vaIsalele kuhakilako “[na]vatu veka vavavulu” vaze kavapwile vaIsaleleko hamwe kaha navaEjipitu. Vatu kana kavafwileko kaha vafumine mulifuchi lyaEjipitu.—Kulo. 12:38; kwinyikila chamwishi.

Kweseka navyakutalilaho evi tunavuluka, chasoloka nge Yehova alwezelenga vatu vyakusopesa chenyi shimbu kuchili lwola lwakutamo mangana valizange. (Lushi. 32:4) Mwomwo ika Kalunga alingililenga ngocho? Kaposetolo Petulu alumbunwine ngwenyi Yehova “kazanga mutu numba umwe akanongeko, oloze azanga vosena vapihilile nakwalumuka.” (Petu. 2, 3:9) Eyo, Kalunga azakamine chikuma vatu. Asakile vapihilile nakwalumuka nakukavangiza vyuma mwavahuhumuna shimbu kanda kusopesa chenyi.—Isa. 48:17, 18; Loma 2:4.

Namakumbi ano nawa, vatu vosena vatela kwivwilila kumazu akuhuhumuna aze vali nakuvilika mukaye kosena. Omu Yesu apwile hano hamavu, ahanjikile ngwenyi katwamino kamyaka yino navakakanongesa “[ha]luyando lwalunene.” (Mateu 24:21) Ngocho, alwezele vaka-kumukavangiza upolofweto uze navakatachikijilaho ngwavo luyando kana lunapandama. Yesu avulukile vyuma vyavivulu vize vili nakusoloka makumbi ano.—Mateu 24:3-12; Luka 21:10-13.

Kutalisa kuupolofweto kana, Yehova ali nakukolezeza vatu vosena mangana vetavile chiyulo chenyi chamwaza. Asaka ngwenyi vatu vakwononoka valivwise kuwaha kuyoya oholyapwa nakukalivwisa nawa vyuma vyamwaza mukaye kenyi kakwoloka. (Petu. 2, 3:13) Yehova ahana vatu “mujimbu wamwaza waWangana,” mangana avakafwe vafwelele mujishiko jenyi, kaha mujimbu kana ukiko uze Yesu ambile ngwenyi “navakawambulula hamavu hosena, nakupwa unjiho kuli vaka-mafuchi osena.” (Mateu 24:14) Kalunga ali navatu jenyi vaze vali nakuhana “unjiho” chipwe ngwetu kwambulula mujimbu wenyi mumafuchi kafwe 240. Yehova asaka vatu vavavulu vevwilile kuvyuma mwavahuhumuna mangana akahone kuvanongesa omu mwakaneha kusopesa chenyi.—Zefwa. 1:14, 15; 2:2, 3.

Chishina chachilemu shina echi, Yehova eji kuhananga vatu lwola lwaluvulu mangana vahase kwakula kanawa kuvyuma mwavahuhumuna. Unjiho wasolola nge lwola lwosena eji kulinganga vene ngocho. Jino chihula chachilemu shina echi: Kutala vatu vanahase kwivwilila kuvyuma mwavahuhumuna Kalunga shimbu kuchili lwola lwaluvulu tahi? Ngocho etu hakupwa tuvatu vaze atuma Kalunga, tutwalenuho lika kukafwa vatu vavavulu mangana vakayovoke omu kukuma chili hakamwihi.