1. Vyuma muka eji kulinganga Yehova mangana atesemo mwaya kujina chenyi?

YEHOVA nahase kupwa kala mweshomwo nasake mangana atesemo munayi kujina chenyi. Chakutalilaho, Yehova eji Kunangulanga naKuvendejeka, kaha nawa eji Kwambululanga mujimbu wamwaza, evi tunavuluka hivyuma vimwe kaha vyavindende vize eji kulinganga. (Isa. 48:17; Koli. 2, 7:6; Ngale. 3:8) Chipwe ngocho, kakavulu eji kuzachisanga vatu mangana valinge munayi kujina chenyi. (Mateu 24:14; 28:19, 20; Koli. 2, 1:3, 4) Yehova nahase nawa kuhana mangana nangolo kuli kala mutu mangana atesemo munayi kujina chenyi. Ulumbunwiso wosenou ukiko waliweza muulumbunwiso walijina Yehova, kahomu mukiko vatachikiza navatu valinangula vamwe.

2. (a) Mwomwo ika lwola lumwe tweji kuhuhwasanyinanga numba nge Yehova ali nakutuzachisa? (b) Vyuma muka natushimutwila muchihande chino?

² Tuvosena twasaka Yehova atuzachise mumilimo yenyi, oloze vatu vamwe veji kuhuhwasananga numba nge Yehova eji kuvazachisanga mumilimo yenyi. Mwomwo ika? Mwomwo veji kushinganyekanga ngwavo ushinakaji, nakwalumuka chavyuma mukuyoya chipwe mwomwo yakuhona uhashi, vinahase kuvahonesa. Kaha nawa veka veji kusuulukanga namilimo vali nakuzata, nakuhona kumona nge vanahase kuzovoloka nakuzata milimo yeka. Muchihande chino, natushimutwila omu Yehova nahase kutukafwa tuvosena mangana atesemo kujina chenyi. Kaha nawa natukekesa mijimbu yamuMbimbiliya yize yasolola omu Yehova ahanyinenga vangamba jenyi michima yakufwila kulinga vyuma, nangolo jakulingamo nawa. Chamakumishilo, natushimutwila omu tunahase kwitavila Yehova atuzachise.

3. Kweseka namukanda Wavaka-Fwilipi 2:13, Yehova nahase kutuhana ngachilihi muchima wakufwila kumuzachila?

³ Tangenu Wavaka-Fwilipi 2:13. * Yehova nahase kutuhana muchima wakufwila kumuzachila. Uno nahase kulinga ngachilihi ngocho? Kachi nge tunevu ngwavo kuliko ndumbwetu umwe anakusakiwa kumukafwa chipwe nge kuli mulimo umwe uze vatela kuzata muchikungulwilo, chipwe vakulwane vanatambula mukanda kufuma kuofesi yamutango nakutulweza ngwavo kuliko chikungulwilo chimwe chize chili nakusakiwa kukafwa, kahechi chinahase kutulingisa tulihulise ngwetu, ‘Vyuma muka ngunahase kulinga mangana nguyenga nakukafwa chikungulwilo kana?’ Nyi pamo vanatuhane mulimo umwe uze unakusoloka nge waukalu chikuma, kaha tuli nakuhuhwasana numba nge tunahase kuuzata. Chipwe nge tunatange mujimbu umwe muMbimbiliya kaha tunahase kulihulisa ngwetu, ‘Nanguhasa kuzachisa ngachilihi vishina ngunanganyala mumujimbu kana mangana ngukafwe vakwetu?’ Yehova keshi kutushinjila tumuzachileko. Oloze nge Yehova mwamona ngwenyi tuli nakufwila kumuzachila kaha nahase kutukafwa tulinge vene ngocho.

4. Yehova nahase kutuhana ngachilihi ngolo jakulinga vyuma vimwe?

⁴ Yehova eji kutuhananga ngolo jakulinga vyuma vimwe. (Isa. 40:29) Nahase kuzachisa shipilitu yenyi yajila mangana ahotole uhashi wetu. (Kulo. 35:30-35) Yehova nahase kutunangula mwakuzachila milimo yimwe kuhichila muliuka lyenyi. Kachi nge kamwejivile mwakuzachila milimo yimweko, kaha mwatela kulwezako vakwenu vamikafwe. Kaha nawa munahase kulomba Setu wamwilu kala lwola amihane “ngolo jakuhambakana jize javatu.” (Koli. 2, 4:7; Luka 11:13) MuMbimbiliya mwatwama mijimbu yayivulu yize yasolola omu Yehova nakafwe mapwevo namalunga vapwenga namuchima wakufwila kumuzachila, nangolo jakulinga ngocho. Omu natushimutwila hamijimbu yimwe, esekenu kushinganyeka omwo Yehova nahase kumizachisa nayenu nawa.

5. Lwola muka Yehova azachishile Mose, kaha alingile ngachilihi ngocho, jino vyuma muka natulinangulako?

⁵ Yehova alingishile Mose asokole vaIsalele. Uno lwola muka Yehova amuzachishile? Uno amuzachishile halwola luze Mose alimwene ngwenyi natemo mwomwo “vamunangwile mwayile mangana avaEjipitu osena” tahi? (Vili. 7:22-25) Nduma, Yehova amuzachishile omu alingile namukafwe lyehi kupwa lunga wakulinyisa kaha nawa wamuvwovu. (Vili. 7:30, 34-36) Yehova akafwile Mose apwenga wakumika hakuhanjika kuli muka-kuyula waEjipitu. (Kulo. 9:13-19) Lwola muka Yehova azachishile Mose kaha alingile ngachilihi ngocho? Kaha vyuma muka natulinangulako? Yehova eji kuzachisanga vatu vaze veji kulondezezanga vilinga vyenyi nakupendamina hali ikiye avakafwe.—Fwili. 4:13.

6. Chishina muka tunalinangula hakumona omu Yehova azachishile Mbalajilai mangana akafwe Mwangana Ndavichi?

⁶ Omu mwahichile myaka, Yehova azachishile Mbalajilai akafwe Mwangana Ndavichi. Ndavichi navatu vaze apwile navo vevwile ‘zala nalipwila, kaha nawa vazeyele’ omu apwile nakuchina Avasalome mwana Ndavichi. Numba tuhu Mbalajilai apwile kashinakaji, oloze ahakile mwono wenyi muponde hamwe kaha namyono yavatu veka vaze ayile navo mangana vatwalile vyakulya Ndavichi navatu jenyi. Mbalajilai kakukulwile ngwenyi apwile kashinakaji, kaha katelemo kumuzachisa kuli Yehovako. Oloze azachishile vyuma apwile navyo mangana akafwe vangamba jaKalunga vaze vapwile muukalu. (Samwe. 2, 17:27-29) Chishina muka natulinangulako? Chamokomoko namyaka tuli nayo, Yehova nahase kutuzachisa tukafwe vandumbwetu vaze vali muukalu, numba vatwama mulifuchi twatwama chipwe mulifuchi lyeka. (Vishi. 3:27, 28; 19:17) Numba  nge katweshi kuvahana vyuma kana etu vaveneko, oloze tunahase kuhana wana wakukundwiza kumulimo wamukaye kosena mangana vahase kuuzachisa kala lwola nakusakiwa kukafwa vandumbwetu vaze vali muukalu.—Koli. 2, 8:14, 15; 9:11.

7. Yehova azachishile ngachilihi Shimeyone, kaha kutachikiza chuma kana nachitukolezeza ngachilihi?

⁷ Yehova ashikile Shimeyone uze apwile kashinakaji wakwononoka muYelusalema ngwenyi keshi kufwako kuvanga namono Meshiya. Atela lushiko kana lwakolezezele chikuma Shimeyone mwomwo hamyaka yayivulu avandaminyinenga kwiza chaMeshiya. Yehova akiswile Shimeyone mwomwo yakupwa nalufwelelo nalukakachila. Likumbi limwe “hakumutwaminyina nangolo jashipilitu,” ayile mutembele. Kaha amwene Yesu uze apwile kemba, kaha Yehova alingishile Shimeyone ahanjike upolofweto wakuvuluka ou kemba uze mwakapwa Kulishitu. (Luka 2:25-35) Numba tuhu Shimeyone pamo afwile shimbu kanda Yesu aputuke kuzata milimo yenyi hano hamavu, oloze awahililile chikuma hakumona ou kemba, kaha kulutwe mwakalivwisa kuwaha vyuma vyamwaza. Mukaye kakahya, Shimeyone mwakamona omu chiyulo chaYesu nachikanganyalisa vatu vavavulu hano hamavu. (Kupu. 22:18) Nayetu twatela kuwahilila chikuma hakala mulimo uze natuhane Yehova tumuzachile.

8. Uno Yehova nahase kutuzachisa ngachilihi ngana muze alingile kuli Mbalanape?

⁸ Mulikulukaji lyamyaka lyakulivanga, kwapwile lunga umwe wachisambo lijina lyenyi ikiye Yosefwe. Ou lunga alisuwile vamuzachise kuli Yehova. (Vili. 4:36, 37) Hakuwana nge Yosefwe apwile mutu uze avendejekelenga chikuma vakwavo, chikiko pamo chalingishile vaposetolo vamuvuluke ngwavo Mbalanape, kulumbununa “MwanaKuvendejeka.” Chakutalilaho, omu Saulu alumukile nakupwa muka-Kulishitu, vandumbwenyi vavavulu vamwivwilenga woma mwomwo ayanjishilenga vaka-Kulishitu. Chipwe ngocho, Mbalanape mutu uze apwile wachisambo chikuma akafwile Saulu, kaha chasoloka nge Saulu awahililile chikuma halikoji amusolwelele Mbalanape. (Vili. 9:21, 26-28) Kufumaho tulama muYelusalema vafwililile kukolezeza vandumbwavo vaze vatwaminenga muAndeyoka yakuSulya. Uno iya vatumineko? Mbalanape. Chikupu vene vasakwile mutu wakutamo. Mbimbiliya yamba ngwayo Mbalanape aputukile “kuvakolezeza vosena vakakachilenga lika kuli Mwata namichima yavo yosena.” (Vili. 11:22-24) Chochimwe namakumbi ano nawa, Yehova nahase kutukafwa nayetu tuvendejekenga vandumbwetu. Chakutalilaho, nahase kutukafwa mangana tuvendejeke vaze vanafwisa vausoko wavo. Chipwe nahase kutukafwa tumenekele chipwe tutumine shinga ndumbwetu uze naviji nakumuvendejeka. Kutala namwitavila Kalunga amizachise ngana muze alingile kuli Mbalanape tahi?—Teso. 1, 5:14.

9. Hakumona omu Yehova akafwile ndumbwetu Vasily apwenga kafunga wakuhya kushipilitu chinatukafwe ngachilihi?

⁹ Yehova akafwile ndumbwetu Vasily apwenga kafunga wakuhya kushipilitu. Vasily vamutongwele kupwa kalama omu apwile namyaka yakusemuka 26, ngocho alivwile nge katelemo kukafwa vandumbwenyi muchikungulwiloko, chikumanyi vandumbwenyi vaze vapwile muukalu. Oloze omu vamunangwile kutulama vakuhya kushipilitu nakuhita muShikola yaMulimo waWangana, Vasily azovolokele chikuma. Chakutalilaho, alitomenene vyuma vize asakile kutesamo. Kahomu aputukile kutesamo vyuma alitomenene, chamukafwile ahonese woma. Eji kwambanga jino ngwenyi: “Vyuma vize vyangwivwishilenga woma kunyima, vikiko vili jino nakungunehela kuwahilila. Kahomu Yehova eji kungukafwanga nguwane chisoneka chakutamo mangana ngukolezeze ndumbwami, cheji kungulingisanga ngupwenga wakusuuluka chikuma.” Enu vandumbwetu vamalunga, kachi nge namwitavila Yehova amizachise ngana muze alingile Vasily, kaha nahase kumikafwa mupwenga nauhashi wakuzata milimo yayinene muchikungulwilo.

10. Vyuma muka alingile Avingayile, kaha chuma muka munalinangula kuli ikiye?

¹⁰ Mwangana Saulu apwile nakuhangasana Ndavichi namalunga vaze apwile navo, ngocho  vasakiwile wakuvakafwa. Kaha malunga vaze vapwilenga naNdavichi vayile kuli kaIsalele walijina lyaNavale, lunga uze apwile naluheto mangana vakamulombe vyakulya chipwe kala vyuma apwile navyo. Ava malunga vakasunukile kuya nakulomba Navale mwomwo vamulaminyinyineko vimuna jenyi mupambo. Oloze hakuwana nge Navale apwile walifwi, akanyine kuvahana vyakulya. Ngocho Ndavichi akwachile matoto, kaha asakile kuya nakunongesa Navale namalunga vosena vakuzuvo yenyi. (Samwe. 1, 25:3-13, 22) Oloze Avingayile pwevo lyaNavale apwile wakunangakana kaha nawa wamwaza. Ou pwevo omikile nakuya nakulihumangana naNdavichi, kaha omu amumwene alimbilile kumahinji aNdavichi nakumulweza ngwenyi kanda mwaya nakumwanga manyinga kuzuvo yaNavaleko. Oloze amulwezele mujila yakuzangama mangana aseze chihande kana mumavoko aYehova. Mazu ahanjikile Avingayile namuchima asolwele vyalingishile Ndavichi ahone kuya nakujiha vatu kuzuvo yaNavale. Echi chalingishile Ndavichi akukulule ngwenyi, Avingayile vamutumine kuli Yehova ayenga nakumulweza ahone kumwanga manyinga. (Samwe. 1, 25:23-28, 32-34) Avingayile apwile navilinga vyamwaza vize vyalingishile Yehova amuzachise. Chochimwe nawa, nge vandumbwetu vamapwevo navapwa namuchima wakunangakana vanahase kuvazachisa kuli Yehova vakafwe jitanga javo nakukolezeza vandumbwavo muchikungulwilo.—Vishi. 24:3; Chitu. 2:3-5.

11. Milimo muka vazachilenga vana vaShalume vamapwevo, kaha veya vali nakuvalondezeza makumbi ano?

¹¹ Kushikulu, vana vaShalume vamapwevo, vapwile hamukana wavaze azachishile Yehova mangana vatungulule jikembwe jaYelusalema. (Nehe. 2:20; 3:12) Numba tuhu sevo apwile chilolo, oloze vana venyi valisuwile kuzata mulimo waukalu kaha nawa waponde. (Nehe. 4:15-18) Vyuma valingile vyalihandunwine navize valingile malunga vavalemu vakuTekowa vaze vakanyine ‘kulinyisa vazate mulimo’ wakutungulula jikembwe. (Nehe. 3:5) Achishinganyekenu ocho kuwaha vevwile vana vaShalume vamapwevo omu vakumishile kutungulula jikembwe jaYelusalema hamakumbi 52! (Nehe. 6:15) Makumbi ano, vandumbwetu vamapwevo vali nakulisuula kuzata milimo yajila yakufwana nge kutunga nakutungulula vihela vyakwalishila Yehova. Chikupu vene, tweji kusakwililanga vandumbwetu vamapwevo vaze vali nakuzachisa uhashi wavo mangana mulimo waYehova ufukile.

12. Yehova akafwile ngachilihi Tavita, kaha etu nahase kutukafwa ngachilihi?

¹² Yehova akafwile muka-Kulishitu walijina lyaTavita uze “azachilenga milimo yamwaza yayivulu,” chikumanyi hakukafwa vatuliwe. (Vili. 9:36) Omu afwile Tavita, vatu vavavulu valishonene chikuma, mwomwo yalikoji namuchima wakuhana apwile nawo. Ava vatu vawahililile chikuma omu kaposetolo Petulu amusangwile. (Vili. 9:39-41) Vyuma muka natulinangula kuli Tavita? Vanyike, navakulwane, namapwevo namalunga tuvosena twatela kufwila kukafwa vandumbwetu muchikungulwilo.—Hepe. 13:16.

13. Ndumbwetu Ruth uze apwile wasonyi, vamuzachishile ngachilihi kuli Yehova, kaha akukulwile ngwenyi ika?

¹³ Ndumbwetu Ruth uze apwile wasonyi asakile kuzata mulimo waumishonali. Omu apwile kanyike, ayilenga kuzuvo hizuvo nakuhana jitalakiti. Ambile ngwenyi: “Ngwalivwishilenga kuwaha chikuma kuzata mulimo kana.” Oloze kwambulwila kuzuvo hizuvo nakulweza vakwavo vyaWangana waKalunga chamukaluhwililenga chikuma. Numba tuhu apwile nasonyi, oloze aputukile kuzata upayiniya washimbu yosena omu apwile namyaka 18. Kuheta mu 1946, ayile kuShikola yaNgileyate Yakulinangula Mbimbiliya, kufumaho azachililile muHawaii namuJapan. Yehova amuzachishile chikuma mangana avilike mujimbu wamwaza mumafuchi kana. Omu azachile mulimo kana hamyaka kafwe 80, akukulwile ngwenyi: “Yehova nangujikijisanga chikuma. Nangukafwe nguhonese sonyi ngwapwilenga nayo. Ngwafwelela chikupu ngwami, Yehova nahase kuzachisa kala mutu uze mwamufwelela.”

14. Kweseka namukanda Wavaka-Kolose 1:29, vyuma muka twatela kulinga kachi nge tuli nakusaka Yehova atuzachise?

¹⁴ Kufuma vene kushikulu, Yehova nakafwenga vangamba jenyi vazate milimo yakulisezaseza. Uno Yehova nahase kumikafwa ngachilihi mumuzachile? Echi chapendamina hakulisuula chenu. (Tangenu Wavaka-Kolose 1:29.) Kachi nge namwitavila Yehova amizachise, kaha nahase kumilingisa mupwenga vaka-kwambulula vatwima, vaka-kunangulanga vakwipangweji, vaka-kuvendejeka vamwenemwene, vaka-kuzata mwakulonga. Nahase kumilingisa nawa mukafwenga vakwenu chipwe mupwenga kala mwosena omwo nasake mangana atesemo kujina chenyi.

15. Kweseka namazu hali WaChimoteu 1, 4:12, 15, vyuma muka vandumbwetu vamalunga vatela kulomba Yehova avakafwe?

¹⁵ Vyuma muka vatela kulinga vandumbwetu vamalunga vavanyike? Ava vandumbwetu vatela kuzata mwavaka-kuzachila muchikungulwilo mangana vakafwe milimo yilimo. Muvikungulwilo vyavivulu, tulama vapwa vavavulu kuhambakana vaka-kuzachila. Kutala enu vandumbwetu vavanyike namulisuula kuzata milimo yayivulu muchikungulwilo tahi? Shimbu jimwe vandumbwetu veji kwambanga ngwavo, “Ngwasuuluka kupwa muka-kwambulula kaha.” Kachi nge mukiko mweji kushinganyekanga nayenu, kaha lombenu Yehova amikafwe mufwile kuzata mwavaka-kuzachila muchikungulwilo, nakumulomba amihane ngolo jakumuzachila. (Kwambu. 12:1) Tuli nakumilembelela mutukafweko.—Tangenu WaChimoteu 1, 4:12, 15.

16. Vyuma muka twatela kumulomba Yehova, kaha mwomwo ika?

¹⁶ Yehova nahase kumikafwa muzate kala mulimo mangana atesemo vyuma ajina. Mulombenu amihane muchima wakufwila kumuzachila, kaha nawa mulombenu amihane ngolo jasakiwa hakuzata mulimo kana. Numba mupwa muvanyike chipwe muvakulwane mwatela kuzachisa lwola lwenu nangolo jenu navikumba vyenu mangana mwalise Yehova. (Kwambu. 9:10) Kanda namwivwa woma chipwe kushinganyeka ngwenu kamwatelemo kuzata milimo yaYehovako. Chapwa hikutokwa chachinene kuzachila Setu wazangi milimo yize nayineha kavumbi kuli ikiye.