1. Vyuma muka vyatulingisa tutachikize chikupu ngwetu tuli nakuyoyela ‘mumakumbi akukuminyina’?

UNO mwasemukile hanyima yamwaka wa 1914 tahi? Nge mukiko, kaha munayoyelanga lika ‘mumakumbi akukuminyina’ akatwamino kamyaka yino. (Chimo. 2, 3:1) Tuvosena tunevunga mijimbu yavyuma vize ambile Yesu ngwenyi navikasoloka mumakumbi ano akukuminyina. Vyuma vimwe shina, jijita, nazala, namindenda, namisongo yachihita, nakuvula chaupapwoki, nakuyanjisa vatu jaYehova. (Mateu 24:3, 7-9, 12; Luka 21:10-12) Kaha nawa tuli nakumona vatu vaze vali navilinga vyavipi vize asonekele kaposetolo Paulu. (Talenu lipwata lyakwamba ngwavo, “ Omu Vali Vatu Makumbi Ano.”) Ngocho etu Vinjiho jaYehova tunatachikiza chikupu ngwetu tuli nakuyoyela ‘mumakumbi akukuminyina.’—Mika 4:1.

2. Vihula muka vize twatela kuwana muvavikumbulwila?

² Hanahichi tando yayinene kufuma mu 1914 nakuheta oholyapwa, shikaho tuli nakuyoyela jino kusongo ‘yamakumbi akukuminyina.’ Hakuwana nge kukuma chili hakamwihi, ngocho twatela kuwana muvakumbulwila vihula vimwe vino vyavilemu: Vyuma muka navikasoloka kusongo ‘yamakumbi akukuminyina’? Kaha Yehova ali nakusaka tulinge ika shimbu tuli nakuvandamina vyuma kana?

3. Kweseka namazu atwama hali Wavaka-Tesolonyika 1, 5:1-3, mutambi muka navakavilika vaka-kuyula?

³ Tangenu Wavaka-Tesolonyika 1, 5:1-3. Paulu avulukile “likumbi lyaYehova.” Kaha mumukanda kana, eli likumbi lyatalisa kutando yakuputukila halwola navakanyemukila “Mbavilone Yayinene” yize yapwa kwitava chamakuli chamukaye kosena,  kuheta nakujita yaAlamangetone. (Kuso. 16:14, 16; 17:5) Kaha shimbu kanda “likumbi” kana liputuke, vaka-kuyula navakavilika ngwavo, kuli “Kuunda namukingo.” (MujiMbimbiliya jimwe, awa mazu vawalumuna ngwavo: “Pambwe-malambwe.”) Lwola lumwe, vaka-kuyula vamukaye veji kuhanjikanga mazu kana nge vanakulivwasana navakwavo mwakunehela kuunda mukaye. * Chipwe ngocho, mutambi vavuluka muMbimbiliya wakuvuluka “kuunda namukingo” naukapwa mweka. Mwomwo ika tunambila ngocho? Mwomwo omu navakavilika mutambi kana, vatu vavavulu navakashinganyeka ngwavo kaye kosena kali jino mukuunda. Oloze kacheshi kukapwa ngochoko, mwomwo “kunongesa chakuvakasumuna” nachikavawana omu nalukaputuka “luyando lwalunene.”—Mateu 24:21.

4. (a) Vyuma muka vize katwatachikizako kutalisa kumutambi ‘wakuunda namukingo’? (b) Vyuma muka vize twatachikiza?

⁴ Twatachikizako kaha vyuma vimwe kutalisa kumutambi ‘wakuunda namukingo.’ Oloze kuli vyuma vyeka vize katwatachikizako. Katwatachikiza vyuma navikalingisa numba vakavilike ou mutambi, namujila navakauvilikilamoko. Kaha nawa katwatachikijileko nge navakauvilika mapapa kakavulu chipwe kamwe kaha. Chipwe ngocho, katwatela kwitavila vaka-kuyula vamukaye vatuhungumwise tufwelele ngwetu vanahase kuneha kuunda mukayeko. Oloze Mbimbiliya yatulweza ngwayo twatela kutalilila mutambi kana, mwomwo wapwa chinjikizo chakutachikijilaho nge “likumbi lyaYehova” kalinwaha lizenga.

5. Vyuma muka vyatwama hamukanda Wavaka-Tesolonyika 1, 5:4-6 vize twatela kulinga mangana tulizange vyakwiza ‘chalikumbi lyaYehova’?

⁵ Tangenu Wavaka-Tesolonyika 1, 5:4-6. Mazu akutuhuhumuna aze ahanjikile Paulu atukafwa tutachikize vyuma twatela kulinga mangana tulizange vyakwiza ‘chalikumbi lyaYehova.’ Ambile ngwenyi, katwatela kusavala “tulo nge omu valinga vatu vekako,” oloze twatela kupwa ‘vakutona’ nakupwa vakuvanguluka. Chakutalilaho, twatela kupwa vakuvanguluka kuchina natwazana muvihande vyalifuchi nachiyulo hakukundwiza vihande vyamapolitiki vyamuno mukaye. Mwomwo nge natukundwiza vihande kana, kaha natusolola ngwetu ‘twapwa tuvaka-kaye.’ (Yowa. 15:19) Etu twatachikiza ngwetu, Wangana waKalunga ukiko kaha naukaneha kuunda chamwenemwene mukaye.

6. Twatela kukafwa vakwetu valinge vyuma muka, kaha mwomwo ika?

⁶ Chipwe ngocho, katwatela kaha kufwila kupwa vakutona etu vaveneko, oloze twatela kukafwa navakwetu vapwenga vakutona hakuvanangula muchano wamuMbimbiliya wavyuma navikasoloka kulutwe. Twatela kutachikiza ngwetu, luno lukiko lwola lwakunangula vatu muchano mwomwo nge luyando lwalunene lunaputuka lyehi, kaha katweshi kukapwa namulimo wakunangula vatu muchanoko. *

7. Vyuma muka Yehova ali nakusaka tulinge oholyapwa?

⁷ Yehova nasake tuzate chikuma mulimo wakwambulula mulwola lwalundende lunasaleko shimbu kanda “likumbi” lyenyi lizenga. Ngocho twatela kupwa “navyuma vyavivulu vyakuzata mumulimo waMwata.” (Koli. 1, 15:58) Yesu ahanjikile vyuma twatela kulinga. Omu akumishile kuhanjika havyuma vyosena vize vyatela kusoloka hamakumbi akukuminyina, ambile ngwenyi: “Kaha nawa mujimbu wamwaza watela chatete kuwambulula muli vaka-mafuchi osena.” (Mako 13:4, 8, 10; Mateu 24:14) Tachikizenu ngwenu, kala lwola mweji kuyanga nakwambulula, mweji kutesangamo upolofweto kanou wamuMbimbiliya.

8. Uno tunatachikiza ngachilihi ngwetu mulimo wakwambulula uli nakuzovoloka?

⁸ Uno mulimo wakwambulula unazovoloka ngachilihi? Ou mulimo uli nakuzovolokelako lika mwaka himwaka. Chakutalilaho, achishinganyekenu omu vaka-kwambulula Wangana vanavulilako chikuma muno mumakumbi akukuminyina. Mu 1914, kwapwile vaka-kwambulula vakuheta ku 5,155 mumafuchi 43. Oloze oholyapwa vali jino kafwe jimiliyoni 8 nachimbwa mumafuchi 240. Chipwe ngocho, mulimo wakwambulula uchili nakutwalililaho. Shikaho, twatela kutwalaho lika kulweza vatu vatachikize ngwavo Wangana waKalunga ukiko kaha naukakumisa maukalu avatu vosena.—Samu 145:11-13.

9. Mwomwo ika twatela kutwalaho lika kuzata mulimo wakwambulula?

⁹ Katweshi kwecha kuzata mulimo wakwambululako, kuvanga Yehova natulweze ngwenyi twatela kulitwamina kuuzata. Uno lwola lungahi lunalituluko lwakulweza vatu vatachikize Yehova Kalunga naYesu Kulishitu? (Yowa. 17:3) Katwatachikijileko. Oloze tunatachikiza kaha ngwetu, kufuma oholyapwa nakuheta kulwola nalukaputuka luyando lwalunene, vatu vaze vali “namichima yamwaza yakusaka kuyoya chahaya myaka yosena” vanahase kwitavila kuvanangula muchano nakuputuka kuzachila Yehova. (Vili. 13:48) Uno tunahase kukafwa ngachilihi vatu kana shimbu kanda lwola lukume?

10. Vyuma muka ali nakutuhana Yehova mangana vitukafwe tunangule vatu muchano?

¹⁰ Yehova ali nakuzachisa liuka lyenyi hakutuhana vyuma vyosena vize vinakutukafwa twambulile vatu muchano. Chakutalilaho, chalumingo hichalumingo tweji kutambulanga jindongi kuhichila mukukunguluka chamukachi kachalumingo. Echi kukunguluka cheji kutukafwanga tutachikize mwakuhanjikila namutu haungeji watete naungeji wakukindulukilako. Kaha cheji kutukafwanga nawa mwakunangwila vilongesa vyaMbimbiliya. Liuka lyaYehova lyatuhana  nawa Vinoma vyaKuzachisa haKunangula. Evi vinoma vyeji kutukafwanga mangana . . .

• tuputuke kushimutwila navatu,

• twambulile vatu mujila yize nayivakunyula,

• twambulile vatu mujila yize nayivalingisa vafwile kulinangula vyavivulu,

• tukafwe vatu tweji kunangulanga Mbimbiliya vatachikize muchano,

• tulweze vatu vakuwahilila vatachikize keyala yetu yahaInternet nakuvalanya vezenga kukukunguluka kuZuvo yaWangana.

Chipwe ngocho, kupwa kaha nevi vinoma kacheshi kutunganyalisako, oloze twatela kuvizachisanga. * Chakutalilaho, nge tunashimutwila namutu uze nawahilila, kaha hinatumusela talakiti chipwe mangazini, nahase kuyitanga swi nomu natukamutambukila cheka. Ngocho twatela kuzata chikuma mulimo wakwambulula kakweji hikakweji, kweseka noho hakumina ngolo jetu.

11. Mwomwo ika vahakilako chihanda chakwamba ngwavo, Linangwilenu Mbimbiliya haInternet?

¹¹ Hakusaka mutachikize jila yikwavo yize Yehova ali nakuzachisa mangana akafwe vatu valinangule muchano, talenu chihanda chakwamba ngwavo, Online Bible Study Lessons (Linangwilenu Mbimbiliya haInternet) chize chili ha jw.org^®. Uno mwomwo vahakilako chihanda kana? Vatu vavavulu mukaye kosena veji kuyanga haInternet kakweji hikakweji nakutondatonda vihande vyamuMbimbiliya. Kaha vihande vyahakeyala yetu vinahase kulingisa vatu kana vaputuke kulinangula Mazu aKalunga. Kachi nge vatu vamwe vaze namwambulila navakana kuvanangula Mbimbiliya, kaha valwezenu echi chihanda chaLinangwilenu Mbimbiliya haInternet, chipwe kuvalweza jila yakavatu yakuwanyinamo vihande vyahachihanda kana. *

12. Vihande muka vanahase kulinangula vatu hachihanda chaLinangwilenu Mbimbiliya haInternet?

¹² Hachihanda chakwamba ngwavo, Linangwilenu Mbimbiliya haInternet hatwama vihande vyakufwana nge, “Mbimbiliya naMwenyayo,” “Vatu Vavuluka muMbimbiliya,” “[na]Mijimbu YamuMbimbiliya yaLutalililo.” Hakulinangula evi vihande, nachikafwa vatu vatachikize vishina vino:

• Mujila muka Mbimbiliya yinahase kukafwa mutu?

• Uno Yehova, naYesu, navangelo vapwa veya?

• Mwomwo ika Kalunga atengelele vatu?

• Mwomwo ika kwapwila kuyanda naupi?

Evi vihande vyahanjika nawa omwo Yehova . . .

• mwakakumisa kuyanda nakufwa,

• mwakasangula vafu,

• mwakafumisako jifulumende javatu nakujishishisa naWangana wenyi.

13. Uno vihande vyahaInternet vinashishi mulimo wakunangula vatu Mbimbiliya tahi? Lumbununenu.

¹³ Evi vihande vyahaInternet, kavyashishile mulimo wakunangula vatu Mbimbiliyako. Twatela kwanuka ngwetu, Yesu atuhana mulimo waulemu wakunangula vatu vapwenga tumbaji. Twafwelela ngwetu vatu vakuwahilila navalinangula evi vihande vyahaInternet, nakuvizanga chikuma, nakufwila kulinangula vyavivulu. Kutwala muze, vanahase nakwitavila jino kulinangula Mbimbiliya, mwomwo kusongo yachihande hichihande kuli mazu akulweza mutu uze mwatanga evi vihande alombe mutu wakumunangula Mbimbiliya. Kaha hakumbi hakumbi, vatu kafwe 230 vanakulombanga vavanangule Mbimbiliya. Ngocho, mulimo wakunangula vatu Mbimbiliya uli nakusakiwa chikuma.

14. Kweseka namukanda waMateu 28:19, 20, twatela kuzata nangolo hakulinga vyuma muka, kaha mwomwo ika?

¹⁴ Tangenu Mateu 28:19, 20. Omu natunangulanga vatu Mbimbiliya, twatela kuzata  nangolo mangana tuvakafwe ‘vapwenga tumbaji nakuvanangula valamenga vyuma vyosena vize atulweza Yesu.’ Twatela kuvakafwa vatachikize ovyo chapwila chachilemu kuzachila Yehova nakukundwiza Wangana wenyi. Echi chalumbununa nge twatela kuzata nangolo tukafwe vatu valinangule muchano nakukavangiza vyuma navalinangula, mangana valihane kuli Yehova nakuvambapachisa. Kulinga vyuma kana nachivakafwa vakayovoke halikumbi lyaYehova.—Petu. 1, 3:21.

15. Uno twatela kwecha kulinga ika, kaha mwomwo ika?

¹⁵ Ngana muze twahanjikanga hakavanga, kunasale katando kakandende kufuma oholyapwa nakuheta kusongo yakatwamino kamyaka yino. Shikaho, twatela kulitwamina kunangula vatu vaze kaveshi namuchima wakufwila kupwa tumbaji vaKulishituko. (Koli. 1, 9:26) Mulimo wetu unakusakiwa kuuzata mukapachapacha, mwomwo kuli vatu vavavulu vaze vanakusakiwa kuvanangula muchano waKalunga shimbu kanda kukuma chizenga.

16. Kweseka namukanda waKusoloka 18:2, 4, 5, 8, vyuma muka twatela kulinga? (Talenu nawa kwinyikila chamwishi.)

¹⁶ Tangenu Kusoloka 18:2, 4, 5, 8. Eji jivesi jahanjika havyuma vyeka vize Yehova asaka vatu jenyi valinge. Vaka-Kulishitu vamuchano vosena vatela kulihenda kukala chuma chize chakundwiza kwitava chamakuli. Vatu vamwe vaze vanakulinangula Mbimbiliya vapwilenga mukwitava chamakuli. Kaha vakungulukilenga navaka-kwitava kana nakuliweza muvyuma vyakulisezaseza vyamukwitava kana, chipwe vahanyinenga jimbongo jakukafwa liuka kana. Shikaho, shimbu kanda mutu munakunangula Mbimbiliya vamwitavile kupwa muka-kwambulula wakuzeneka kumbapachisa, atela kuvangila kwecha kulikata nachachi apwilemo. Mutu kana atela kusonekela chachi mukanda wakwecha kulikata navo, nakujimisa lijina lyenyi kukala liuka lyakundwiza kwitava chamakuli. *

17. Milimo muka yakukaye yize katela kuzata muka-Kulishituko, kaha mwomwo ika?

¹⁷ Vaka-Kulishitu vamuchano kavatela kwingila milimo yize yakundwiza kwitava chamakuliko. (Koli. 2, 6:14-17) Chakutalilaho, muka-Kulishitu keshi kwitavila kwingila milimo kuchachiko. Kaha nawa muka-Kulishitu uze azata milimo kukapani yimwe, keshi kuhasa kwitavila kuzachila hachihela chize chakundwiza kwitava chamakuli halwola lwalusukuko. Nge apwa muka-kusekasana, kaha keshi kuhasa kwitavila kumukumuna chipwe kuzachila liuka lyakwitava chamakuliko. Mwomwo ika twatela kupwila vakumika hachihande kanechi?  Mwomwo katweshi nakusaka kwazana mukala vyuma vyamukwitava chamakuli chize ahunga Kalungako.—Isa. 52:11. *

18. Uno ndumbwetu umwe akavangijile ngachilihi jindongi jamuMbimbiliya kutalisa kumilimo yenyi?

¹⁸ Mwaka umwe, kalama umwe vamukumwine kumutu mangana ayenga nakuzata mulimo umwe wakusonga hachachi yamungalila apwile nakutwama. Uze mutu amukumwine atachikijile ngwenyi ou ndumbwetu eji kukananga kuzata milimo hajichachi. Oloze halwola kanelu, ou mutu alwezele ou ndumbwetu mwomwo kapwile namutu weka wakutela kuzata ou mulimoko. Chipwe ngocho, ou ndumbwetu afwililile kukavangiza jindongi jamuMbimbiliya, ngocho akanyine kuzata mulimo kana. Kaha mulipapilo lyamijimbu valowele chalumingo chakavangijileho, mwapwile muvwimbimbi wamuka-kusonga weka ali nakuhaka kulusu hachachi kana. Shikaho, nge ou ndumbwetu etavilile kuzata mulimo kana, kachi muvwimbimbi wenyi ukiko wapwile muli eli lipapilo lyamijimbu. Kaha chuma kana kachi chahukanyishile vandumbwenyi nakupihisa lijina lyenyi, nakwivwisa nawa Yehova kupihya kumuchima.

19-20. (a) Vyuma muka tunalinangula muchihande chino? (b) Kaha vyuma muka natulinangula muchihande chinakavangizaho?

¹⁹ Kweseka naupolofweto wamuMbimbiliya, chuma chachinene chize nachisoloka kalinwomu mukaye kosena shina mutambi ‘wakuunda namukingo’ uze navakavilika vaka-kuyula. Chipwe ngocho, vyuma atunangula Yehova vyatukafwa tutachikize ngwetu, vaka-mafuchi kaveshi kuhasa kuneha kuunda chamwenemweneko. Uno vyuma muka twatela kulinga shimbu kanda mutambi kana nakunongesa chakukasumuna vipwengako? Yehova ali nakusaka tuzate nangolo mumulimo wakwambulula mujimbu wamwaza waWangana, nakunangula vatu vapwenga tumbaji. Kaha nawa twatela kulihenda kukwitava chamakuli chosena. Echi chasolola nge twatela kulihenda kukala liuka lize lyakundwiza kwitava chamakuli, nakuhona kuzata milimo yize yakundwiza kwitava kana.

²⁰ Kuli vyuma vyeka vize vyatela kusoloka kusongo ‘yamakumbi ano akukuminyina.’ Kaha kuli nawa vyuma vikwavo vize Yehova ali nakusaka tulinge. Uno vyuma muka vene evi, kaha tunahase kupwa ngachilihi vakulizanga havyuma kanevi vili nakwiza kulutwe? Vyuma kana natukavishimutwila muchihande chinakavangizaho.