1. Mwomwo ika vatu vavavulu vali muchimbalanganyi?

MAKUMBI ano kuli mauka akwitava avaka-Kulishitu amavulu aze afwelela ngwavo eji kulemesanga Kalunga mujila yize etavila. Echi chikiko chili nakulingisa vatu vavavulu vapwenga muchimbalanganyi nakulihulisa ngwavo, “Uno kwatwama liuka limwe kaha lyamuchano tahi, nyi mauka osena eji kwivwisanga Kalunga kuwaha?” Kutala twakunyuka ngwetu vyuma tweji kunangulanga etu Vinjiho jaYehova vyapwa vyamuchano, kaha nawa tweji kulemesanga Yehova mujila yize etavila tahi? Unjiho muka nautukafwa tukunyuke? Tukekesenu unjiho kana.

2. Kweseka naWavaka-Tesolonyika 1, 1:5, mwomwo ika kaposetolo Paulu akunyukile ngwenyi nawane muchano?

² Kaposetolo Paulu akunyukile ngwenyi awanyine muchano. (Tangenu Wavaka-Tesolonyika 1, 1:5.) Paulu alinangwilenga chikuma Mazu aKalunga kahechi chikiko chamulingishile akunyuke ngwenyi nawane muchano. Afwelelele ngwenyi, “Visoneka vyosena vavihwima kuli Kalunga.” (Chimo. 2, 3:16) Uno kulinangula Mazu aKalunga chamukafwile atachikize vyuma muka? Chamukafwile awane unjiho wakusolola nge Yesu apwile meshiya uze vashikile, unjiho uze vahumbwile vatwamina vamukwitava chavaYuleya. Ava vatwamina vamakuli valyongelenga ngwavo vapwile nakuzachila Kalunga, okunyi vilinga vyavo vyapwilenga vyavipi. (Chitu. 1:16) Paulu kapwile ngana mwavava vatwaminako, mwomwo ikiye afwelelele vyuma vyosena vasoneka muMazu aKalunga. Apwile wakulizanga kunangula nakukavangiza ‘mwosena mwaya kujina chaKalunga.’—Vili. 20:27.

3. Uno twatela kuwana muvakumbulwila vihula vyosena numba tukunyuke ngwetu tunawane muchano tahi? (Talenu nawa lipwata lyakwamba ngwavo “ Milimo yaYehova naVishinganyeka Vyenyi Vyapwa ‘Vyavivulu Chikuma.’”)

³ Vatu vamwe vashinganyeka ngwavo, liuka lyakwitava chamuchano  lyatela kukumbulula vihula vyosena navize kavakumbulula hatoma muMbimbiliyako. Kutala vishinganyeka kana vyakwoloka tahi? Tuchitalenu hachakutalilaho chaPaulu. Alwezele vandumbwenyi ‘vakekesenga vyuma vyosena,’ oloze naikiye etavilile ngwenyi kwapwile vyuma vyavivulu vize katachikijileko. (Teso. 1, 5:21) Asonekele ngwenyi, “tuli nachinyingi chamweseke” kaha nawa ngwenyi, “tuli nakumona vyuma fuvalali hakutalila muchitalilo chachikungo.” (Koli. 1, 13:9, 12) Ngana mwayetu, Paulu naikiye katachikijile vyuma vyavivuluko. Chipwe ngocho, atachikijile vyuma vyamuchano hali Yehova. Kaha vyuma atachikijile vikiko vyamulingishile akunyuke ngwenyi nawane muchano.

4. Chuma muka nachitukafwa tukunyuke ngwetu tunawane muchano, kaha vyuma muka natushimutwila kutalisa kuli vaka-Kulishitu vamuchano?

⁴ Chuma chimwe chinahase kutukafwa tukunyuke ngwetu tunawane muchano shina kwesekesa jila Yesu alemeselelengamo Kalunga nayize Vinjiho jaYehova vali nakulemeselamo Kalunga makumbi ano. Muchihande chino natumona hatoma ngwetu, vaka-Kulishitu vamuchano (1) veji kulihendanga kumakombelo, (2) veji kuvumbikanga lijina lyaYehova, (3) vazanga muchano, kaha (4) valizanga chikuma navakwavo.

5. Chuma muka natulinangula kuli Yesu hajila yakwoloka yakulemeselamo Kalunga, kaha tunahase kukavangiza ngachilihi vyuma anangwile?

⁵ Kuzanga chikuma Kalunga chalingishile Yesu alemesenga kaha Yehova halwola apwile mwilu nomu ejile hano hamavu. (Luka 4:8) Anangwilenga natumbaji twenyi valemesenga kaha Yehova. Yesu natumbaji twenyi vakushishika kavazachishilenga makombelo hakulemesa Kalungako. Hakuwana nge Kalunga katwamumonako, shikaho kakweshi mutu mwahasa kusonga kala chuma chize nachilifwana naikiyeko. (Isa. 46:5) Nyi ngachilihi kusonga tuponya twavatu  vaze vamona kupwa vajila nakuputuka kulomba kutuponya kana? Lushimbi lwamuchivali haJishimbi Likumi lwambile ngwalwo: “Kanda mukalitengela kaponya chipwe chuma chakufwana chuma chamwilu, chipwe chahamavu. . . Kanda mukalifukula kuvikiko.” (Kulo. 20:4, 5) Vosena vaze navasaka kwivwisa Kalunga kuwaha vatela kutachikiza ngwavo Kalunga kasaka etu tulemesenga tuponyako.

6. Uno Vinjiho jaYehova veji kukavangizanga chakutalilaho cheya hakulemesa Kalunga?

⁶ Vatu vaze valinangula mijimbu yakushikulu vamba ngwavo, vaka-Kulishitu vakulivanga valemeselenga kaha Kalunga. Chakutalilaho mukanda waHistory of the Christian Church wamba ngwawo, vaka-Kulishitu vakulivanga “vahungile” vishinganyeka vyakuzachisa tuponya muvihela vyakulemesela Kalunga. Namakumbi ano nawa, Vinjiho jaYehova veji kukavangizanga chakutalilaho chavaka-Kulishitu vakulivanga. Katwalomba kutuponya vaze vemanyinako vatu vakujila chipwe vangeloko, kaha nawa katwalomba kuli Yesuko. Katwalifukula kulipandelo chipwe kulinga vyuma vize navisolola nge tuli nakulemesa lifuchiko. Chamokomoko nakutushinyinyika, etu twafwila kukavangiza mazu ahanjikile Yesu ngwenyi: “Lemesanga Yehova Kalunga kove.”—Mateu 4:10.

7. Chihandwa muka chatwama hali Vinjiho jaYehova namauka eka akwitava?

⁷ Vatu vavavulu makumbi ano veji kukavangizanga vyuma veji kuvanangulanga vatwamina vamukwitava vaze vaya fuma. Vatu kana veji kuvamonanga kupwa vavalemu chikuma nakuvalemesa. Shikaho vatu vavavulu veji kuyanga kujichachi javatu kana, nakulanda mikanda yavo, nakuvahana jimbongo jajivulu chikuma chipwe kujihana kumauka aze veji kukundwizanga ava vatwamina. Kaha vatu vamwe veji kufwelelanga vyuma vyosena vize veji kuvanangulanga kuli ava vatwamina. Nge vanamono ava vatwamina javo, veji kuwahililanga chikuma kwijiva nge vanamono Yesu. Oloze vaka-kulemesa Yehova vamuchano, kavatwama natwamina wamutuko. Numba tuhu tweji kuvumbikanga vaze veji kututwaminyinanga, oloze tweji kukavangizanga mazu ahanjikile Yesu ngwenyi: “Muvosena mwapwa muvandumbu.” (Mateu 23:8-10) Katwalemesa vatu numba vapwa vatwamina vamukwitava chipwe vatwamina vamapolitikiko. Kaha nawa katwakundwiza vishinganyeka vyavoko. Ngocho katwazana muvihande vyalifuchi nachiyuloko, kaha twalihandula kukaye. Echi chikiko chalingisa hapwenga chihandwa chachinene chikuma hali etu namauka akwitava amavulu aze alivuluka kupwa avaka-Kulishitu.—Yowa. 18:36.

8. Twatachikiza ngachilihi ngwetu Yehova asaka lijina lyenyi valitohwese kuvatu nakulilingisa valitachikize?

⁸ Likumbi limwe Yesu alombele ngwenyi: “Ove Tata, tohwesa lijina lyove.” Yehova akumbulwile kulomba kana nalizu lyakukanguka kufuma mwilu ngwenyi, mwatohwesa lijina lyenyi. (Yowa. 12:28) Kaha Yesu atohweselenga lijina lyaIse omu azachilenga mulimo wenyi hano hamavu. (Yowa. 17:26) Shikaho vaka-Kulishitu vamuchano vachimona kupwa hikutokwa kuzachisa lijina lyaYehova nakulingisa lijina kana valitachikize kuvatu.

9. Uno vaka-Kulishitu vakulivanga vasolwele ngachilihi nge vavumbikilenga lijina lyaKalunga?

⁹ Omu mwahichile lwola lwalundende kufuma haze chaputukile chikungulwilo chavaka-Kulishitu mulikulukaji lyamyaka lyakulivanga C.E., Yehova ‘alakanyine vaka-mafuchi eka mangana ambatemo vamwe muli vakiko vapwenga vatu navavulukilanga lijina lyenyi.’ (Vili. 15:14) Vaka-Kulishitu kana vawahililile chikuma kuzachisa lijina lyaKalunga nakulilingisa valitachikize kuvatu vavavulu. Vazachishilenga chikuma  lijina lyaKalunga mumulimo wavo wakwambulula nomu vasonekelenga mikanda yamuMbimbiliya. * Echi chasolwele hatoma nge vakiko kaha vatandakanyishilenga lijina lyaKalunga.—Vili. 2:14, 21.

10. Unjiho muka wasolola nge Vinjiho jaYehova vatamo kupwa vatu vavulukila lijina lyaYehova?

¹⁰ Uno Vinjiho jaYehova vatamo kupwa vatu vavulukila lijina lyaYehova tahi? Tutalenu haunjiho uno. Makumbi ano vatwamina mukwitava vavavulu vanakilikitanga mangana vasweke lijina lyaKalunga kuchina vatu navalijiva. Vanalinginga ngocho hakulifumisa mujiMbimbiliya jimwe jize vanalumunanga, kaha lwola lumwe vanakanyisanga vatu javo kuzachisa lijina kana kujichachi javo. * Oloze unjiho wasolola nge Vinjiho jaYehova kaha vakiko vavumbika lijina lyaYehova. Tweji kutandakanyisanga lijina lyaKalunga kuvatu vavavulu chikuma kuhambakana mauka eka akwitava osena. Tweji kuzatanga nangolo tulinge vyuma kweseka nalijina lyetu, Vinjiho jaYehova. (Isa. 43:10-12) Tunalovolanga jiMbimbiliya jaVisoneka vyaKaye Kakahya jakuhambakana hajimiliyoni 240. MuMbimbiliya kana mwatwama lijina lyaYehova hajivesi haze vaka-kwalumuna jiMbimbiliya jeka vafumisa lijina kana. Kaha nawa tuli nakusoneka mikanda yahanjika haMbimbiliya mumalimi akuhambakana 1,000, yize yazachisa lijina lyaYehova.

11. Uno vaka-Kulishitu vakulivanga vasolwele ngachilihi ngwavo vazangile muchano?

¹¹ Yesu azangilenga muchano wakupandama kuli Kalunga navyuma ajina. Vyuma vize Yesu alingilenga mukuyoya vyasolwele nge azangilenga muchano kaha nawa alingishile muchano kana vautachikize kuvatu. (Yowa. 18:37) Navaka-kukavangiza Yesu vamuchano vazangilenga chikuma muchano. (Yowa. 4:23, 24) Echi chikiko chalingishile kaposetolo Petulu avuluke kwitava chavaka-Kulishitu ngwenyi, “jila yamuchano.” (Petu. 2, 2:2) Kuzanga chikuma muchano chalingishile vaka-Kulishitu vakulivanga vakane vishinganyeka vyamukwitava chamakuli, navisemwa vyavatu, navishinganyeka vyavatu vize vyalimbalakile namuchano wamuMazu aKalunga. (Kolo. 2:8) Chochimwe namakumbi ano nawa, vaka-Kulishitu vamuchano veji kufwilanga ‘kutambuka lika mumuchano,’ hakulingisa vyuma veji kunangulanga vyosena navize veji kulinganga mukuyoya chavo vizame haMazu aYehova.—Yowa. 3, 3, 4.

12. Chuma muka lyeji kulinganga Lizavu lyaKutwaminyina nge linamono ngwalyo twatela kwalumunako ulumbunwiso wavyuma twafwelela, kaha mwomwo ika?

¹² Vinjiho jaYehova kavalimona ngwavo vakiko vatachikiza vyuma vyosena vyatwama muMbimbiliyako. Shimbu jimwe vanalumbununanga vyuma yahanjika Mbimbiliya mujila yakuhenga, kaha shimbu jimwe vanalongesanga vyuma muliuka mujila yakuhenga. Echi kachatela kutukomwesako. Visoneka vyahanjika hatoma ngwavyo, vatu jaKalunga veji kwivwishisanga vyuma yahanjika Mbimbiliya chikoki chikoki. (Kolo. 1:9, 10) Yehova eji kutukafwanga twivwishise muchano wamuMbimbiliya chindende chindende, shikaho twatela kupwa namuchima wakutalilila chikoki nakumona omu mwatukafwa twivwishise muchano. (Vishi. 4:18) Nge Lizavu lyaKutwaminyina linamono ngwalyo twatela kwalumunako ulumbunwiso wavyuma vimwe twafwelela, hahaze vene lyeji kwalumunanga ulumbunwiso wavyuma kana. Mumauka akwitava aKulishitendomu amavulu veji kwalumunangako vyuma vafwelela mangana vevwise vatu javo kuwaha chipwe mangana vayenga fuma mukaye. Oloze etu Vinjiho jaYehova tweji kwalumunanga ulumbunwiso wavyuma twafwelela, mangana tukafwe vatu vapandame chikuma kuli Kalunga nakumulemesa mujila yakwoloka, ngana muze alingile Yesu. (Yako. 4:4) Etu katwalumuna vyuma twafwelela mwomwo yakwalumuka chavyuma mukayeko oloze tweji kwalumunanga mwomwo yakwivwishisa kanawa Mbimbiliya. Etu twazanga chikuma muchano.—Teso. 1, 2:3, 4.

13. Uno vaka-Kulishitu vakulivanga vavatachikijilile chikuma hachuma muka, kaha Vinjiho jaYehova vali nakulondezeza ngachilihi ava vaka-Kulishitu?

¹³ Havilinga vyamwaza vyosena vize vasolwelenga vaka-Kulishitu vakulivanga, zangi yikiko vavatachikijilileho chikuma. Yesu ambile ngwenyi: “Vatu vosena navakatachikiza ngwavo enu mwapwa mutumbaji twami kachi nge namulizanganga mwenumwenu.” (Yowa. 13:34, 35) Makumbi ano Vinjiho jaYehova valizanga chikuma navandumbwavo nakutwama nawa mukuunda. Etu twalihandununa chikuma namauka eka akwitava mwomwo twapwa nge tanga, numba tuhu twafuma kumafuchi navisemwa vyakulisezaseza. Tweji kumonanga unjiho kana omu tweji kulisolwelanga zangi yamuchano kukukunguluka chachikungulwilo, nechi chachihanda, nachechi changalila. Echi chatulingisa tufwelele chikupu ngwetu tuli nakulemesa Yehova mujila yize yeji kumwivwisanga kuwaha.

14. Kweseka naWavaka-Kolose 3:12-14, jila yimwe muka yayilemu tunahase kusolwelamo vakwetu zangi?

¹⁴ Visoneka vyatulweza tupwenganga ‘nazangi yayinene yakulizanga navakwetu.’ (Petu. 1, 4:8) Jila yimwe tunahase kusolwelamo zangi shina kulikonekelanga navakwetu nakwitavilanga tutenga twavo. Kaha tweji kufwilanga kupwa namuchima  wakuhana nakusolwela chisambo vandumbwetu vosena muchikungulwilo kuhakilako navaze vene vanatulingi mwamupi. (Tangenu Wavaka-Kolose 3:12-14.) Kusolwela vakwetu zangi nachitusolola hatoma nge twapwa tuvaka-Kulishitu vamuchano.

15. Mujijila muka jikwavo tweji kulondezezelangamo chikungulwilo chavaka-Kulishitu vakulivanga?

¹⁵ Kwatwama nawa jijila jikwavo tweji kulondezezelangamo chikungulwilo chavaka-Kulishitu vakulivanga. Chakutalilaho, jila valongeselamo vyuma muchikungulwilo makumbi ano yalifwana nayize vakavangijilenga vaka-Kulishitu vakulivanga. Twatwama natulama vakujinguluka, navakulwane muchikungulwilo, navaka-kuzachila ngana muze chapwile kuli vaka-Kulishitu vakulivanga. (Fwili. 1:1; Chitu. 1:5) Ngana muze chapwile kuli vaka-Kulishitu vakulivanga nayetu twamona jishimbi jaKalunga jize jahanjika hakulisavala naulo kupwa jajilemu, kaha nawa tweji kukavangizanga vyuma ahanjika Yehova kutalisa kumanyinga, twafwila nawa kukinga chikungulwilo kuvatu vaze kavasaka kukavangiza jishimbi jaKalungako.—Vili. 15:28, 29; Koli. 1, 5:11-13; 6:9, 10; Hepe. 13:4.

16. Mazu ahali Wavaka-Efwesu 4:4-6 atulweza ika?

¹⁶ Yesu ahanjikile ngwenyi vatu vavavulu navakalivuluka kupwa tumbaji twenyi oloze keshi vosena navakapwa vamuchanoko. (Mateu 7:21-23) Mbimbiliya yatulweza nawa ngwayo hamakumbi akukuminyina vatu vavavulu navakalisolola nge “vakwechi vilinga vyakumwivwa Kalunga woma.” (Chimo. 2, 3:1, 5) Oloze Mbimbiliya yatulweza hatoma ngwayo kwatwama “lufwelelo lumwe” luze Kalunga etavila.—Tangenu Wavaka-Efwesu 4:4-6.

17. Veya vali nakukavangiza Yesu nakupwa nawa nalufwelelo lumwe kaha lwamuchano makumbi ano?

¹⁷ Veya vatwama nalufwelelo lumwe kaha lwamuchano makumbi ano? Tunakekesa unjiho wauvulu. Tunashimutwila hajila yakwoloka yakulemeselamo Kalunga yize anangwilenga Yesu, yize nawa vaka-Kulishitu vakulivanga vakavangijilenga. Shikaho natukumbulula ngana ngwetu, Vinjiho jaYehova kaha vakiko vatwama nalufwelelo lumwe lwamuchano. Chinapu hikutokwa chachinene chikuma kupwa tuvatu jaYehova nakutachikiza muchano hali ikiye navyuma ajina. Shikaho tutwalenuho lika kukunyuka ngwetu tunawane muchano.