Munahichi Myaka 100 Kufuma Mu 1921
MUKAPOSHI KAKUTALILA waJanuary 1, 1921, mwapwile chihula vahulishile Vaka-Kulinangula Mbimbiliya ngwavo, “Mulimo muka natuzata uno mwaka?” Ou Kaposhi Kakutalila akumbulwile chihula kana hakuzachisa mazu ahali Isaya 61:1, 2, aze ahanjika vyamulimo waulemu wakwambulula mujimbu wamwaza. Chisoneka kana chamba ngwacho: “Yehova anguwavishile mangana nguvilike mujimbu wamwaza kuvatu vavavwovu . . . , ngwambulule mwaka waYehova wakwivwila vatu uselewa, nalikumbi lyaKalunga ketu lyakulinga sambanjinga.”
VAKA-KWAMBULULA VAKUHAMUKA
Hakusaka Vaka-Kulinangula Mbimbiliya vatesemo mulimo wavo, vatelelele kupwa vakuhamuka. Kavatelelele kwambulula kaha “mujimbu wamwaza[ko]” oloze vatelele nawa kwambulula ‘nalikumbi lyakulinga sambanjinga’ kuli vaka-kuhuka.
Ndumbu J. H.Hoskin uze atwaminenga muCanada ambulwilenga mujimbu wamwaza chamokomoko nakumuyanjisa. Kumaputukilo amwaka wa 1921, aliwanyine namukulwane wamuchachi yaMethodist. Ndumbu Hoskin aputukile kushimutwila nauze mukulwane wachachi ngwenyi: “Ngwafwelela natushimutwila vihande vyamuMbimbiliya mujila yakuunda. Kaha numba nge natulimbalaka havyuma vimwe, oloze twatela kukumisa kushimutwila chetu mukuunda nakupwa lika tumasepa.” Oloze kachapwile ngochoko. Ndumbu Hoskin ambile ngwenyi: “Twashimutwilile kaha haminyutu yayindende, kaha uze mukulwane wachachi apihililile chikuma nakusoka chikolo nangolo. Ngwevwile kwijiva nge nachivanjilo chahachikolo chenyi chinapazuka.”
Uze mukulwane wachachi ahanjikile oku napihilila ngwenyi: “Watela kuya nakunangula vatu vaze kavapwa vaka-Kulishituko.” Ndumbu Hoskin kamukumbulwileko, oloze anyingulukile nakumuseza, nakushinganyeka mumuchima wenyi ngwenyi, ‘Chuma alinganga uze mukulwane wachachi chasololanga nge kapwa muka-Kulishituko.’
Kahomu uze mukulwane wachachi apwile nakutangisa muchachi likumbi lyakavangijileho, aputukile kuhanjika vyuma vyamakuli hali Ndumbu Hoskin. Ndumbu Hoskin ambile ngwenyi: “Uze mukulwane wachachi alwezele vatu jenyi ngwenyi, ngwapwile ngumuka-makuli wamunene mungalila kana, ngocho vatelele kungujiha.” Chamokomoko naukalu kanou, Ndumbu Hoskin atwalileho lika kwambulula, kaha vatu vavavulu vetavililenga kuvambulila. Ambile ngwenyi: “Ngwalivwishilenga chikuma kuwaha kwambulwila mungalila kana. Kahechi chalingishile vatu vamwe vambenga ngwavo, ‘Tunetavila chikupu ngwetu umutu waKalunga,’ kaha valisuwile kunguhana vyuma ngwasakiwilenga.”
CHILONGESA CHAUKA NACHATANGA
Hakusaka Vaka-Kulinangula Mbimbiliya vakafwe vatu vevwishise muchano wamuMbimbiliya, vasonekelenga vihula vyakupandama kuMbimbiliya nomwo vavikumbulula mumangazini yize tuli nakuvuluka jino ngwetu Tonenu! Mwapwilenga navihula vyakupandama kuMbimbiliya vize visemi vatelele kulinangula navana vavo. Visemi “vahulishilenga vana vavo evi vihula nakuvakafwa vawane omwo vavikumbulula muMbimbiliya.” Chihula chimwe shina, “Mikanda yingahi yatwama muMbimbiliya?” chize chavakafwilenga valinangule vyuma vimwe kutalisa kuMbimbiliya. Chihula chikwavo shina, “Kutala vaka-Kulishitu vosena vatela kushinganyeka ngwavo navavayanjisanga tahi?” chize chakafwilenga vanyike vapwenga vaka-kwambulula vakuhamuka.
Kwapwile nawa vihula vyakupandama kuMbimbiliya vyavaze vapwile nachinyingi chachivulu haMbimbiliya. Vihula kana vavikumbulwilenga muchihanda chatete chamukanda wakwamba ngwavo Studies in the Scriptures. Vatu vavavulu vevwishishile vyuma vyavivulu havihula kanevi, oloze kutwala muze vavilikile jino ngwavo vihula kana navalitwamina kuvisoneka. Mwomwo ika kwapwililile kwalumuka kana?
MUKANDA WAUHYA
Mukanda waThe Harp of God
Kati yakusolola mafwo akutanga mumukanda
Jikati jili navihula
Vandumbwetu vaze vapwile nakutwaminyina vamwene jino ngwavo Vaka-Kulinangula Mbimbiliya vavahya vatelelele kulinangula muchano wamaputukilo mujila yeka. Shikaho, kuheta muNovember 1921 valowele mukanda waThe Harp of God. Vatu vaze vatambwile mukanda kana valisonekesele vaputuke jino kulinangula vavene. Kulinangula mujila kaneyi chakafwile vatu vatachikize ngwavo “Kalunga ajina kukahana vatu kuyoya chahaya myaka yosena.” Uno valingilenga ngachilihi ngocho?
Kachi nge mutu natambula mukanda kana, kaha vamuhanyinenga kati yize yasolwelenga mafwo amumukanda kana aze atelelele kutanga. Kaha chalumingo chakavangijileho, vamuhanyinenga cheka kati yikwavo yize yapwilenga navihula vyakutalisa kuvyuma vize atangile. Kusongo yakati kana vasonekeleko mafwo mwakatanga muchalumingo chakavangijileho.
Havyalumingo 12, chalumingo hichalumingo mutu uze apwile nakulinangula vamuhanyinenga kati yayihya kuchikungulwilo chize chapwile kwakamwihi naikiye. Kakavulu vandumbwetu vatushinakaji chipwe vaze kavahashilenga kuya kuzuvo hizuvo vakiko vazachilenga ou mulimo wakutuma jikati. Chakutalilaho, ndumbu Anna K Gardner wakuMillvale, Pennsylvania, muU.S.A., ambile ngwenyi: “Omu valowele mukanda waThe Harp of God, chakafwile yayami Thayle uze apwile chitonji apwenga navyakuzata vyavivulu mwomwo atuminenga jikati jize japwile navihula chalumingo hichalumingo.” Omu mutu akumishilenga kulinangula mukanda kana, vamutambukililenga mangana vamukafwe alinangule vyuma vyavivulu vyamuMbimbiliya.
Thayle Gardner ali muchitwamo chakushindumuna
KULI MULIMO WAUNENE TWATELA KUZATA
Kusongo yamwaka kana, Ndumbu F. Rutherford atumine mukanda kuvikungulwilo vyosena. Ambile ngwenyi: “Uno mwaka mujimbu waWangana tunawambulula kuvihela vyavivulu, kaha nawa unakafwe chikuma vatu kuhambakana myaka yinahichi kunyima.” Kaha ahanjikile cheka ngwenyi: “Kuchili mulimo waunene twatela kuzata. Shikaho kolezezenu vatu mangana navakiko vakazane mumulimo kanou wakulipwila.” Chakuzeneka kukakasana, Vaka-Kulinangula Mbimbiliya valingile chuma vavalwezele, mwomwo mu 1922 vambulwile mujimbu waWangana natwima kuhambakana myaka yakunyima.
