MWAKA himwaka, mikoko jaYehova vavavulu vali nakuvakindulwisanga muchikungulwilo. Kaha “mwilu mweji kupwanga kuwahilila chachinene” nge mutu nakinduluka muchikungulwilo. (Luka 15:7, 10) Shikaho nge vanamikindulwisa muchikungulwilo, kaha tachikizenu ngwenu Yesu, navangelo, naYehova vanawahilila chikuma hakumimona muneza cheka mumuchano. Chipwe ngocho, omu namutwalaho kutunga usoko wenu naYehova munahase kumona ukalu. Uno ukalu umwe muka munahase kumona? Kaha munahase kuuhonesa ngachilihi?

Vandumbwetu vavavulu veji kutwalangaho kuhomba nahanyima yakuvakindulwisa muchikungulwilo. Pamo mwatachikiza omu evwilenga naMwangana Ndavichi. Hanyima yakumukonekela jishili alingile, ambile ngwenyi: “Jishili jami jinavulu chikuma.” (Samu 40:12; 65:3) Vandumbwetu vamwe nge vanakinduluka kuli Yehova veji kutwalangaho kulihana milonga nakulimona kupwa vamokomoko hamyaka yayivulu. Ndumbwetu Isabelle, * uze vafumishile muchikungulwilo hamyaka yakuhambakana 20 ambile ngwenyi, “Changukaluhwililenga kwitavila ngwami Yehova nangukonekela.” Kachi nge mutu mwatwalaho kuhomba nahanyima yakumukindulwisa muchikungulwilo, kaha nahase kuzeya cheka kushipilitu. (Vishi. 24:10) Shikaho kanda kwechelela chuma kana chimisolokeleko.

Vandumbwetu veka veji kulizakaminanga ngwavo kaveshi kuhasa kulinga vyuma vyosena vyasakiwa mangana vatunge cheka usoko wavo naYehovako. Antoine uze vakindulwishile muchikungulwilo ambile ngwenyi: “Ngwalivwilenga nge ngunavulyama vyuma vyosena vize ngwalinangwile navize ngwalingilenga shimbu kanda vangufumise muchikungulwilo.” Vishinganyeka vyangana vyeji kulingisanga vatu vamwe vahone kuzachila Yehova natwima.

Chakutalilaho, kachi nge nyamanganda nashiula zuvo yamutu, mwenyazuvo nahase kuhomba chikuma omu mwashinganyeka halwola nangolo najisakiwa  hakutungulula zuvo kana. Chochimwe nawa, nge usoko wenu naYehova wafwile mwomwo yashili yayinene mwalingile, munahase kushinganyeka ngwenu mwatela kuzata chikuma nangolo numba mupwenga cheka nausoko wamwaza naYehova. Oloze kamwatela kulizakaminako, Yehova mwamikafwa.

Yehova atulweza ngwenyi: “Twayenu tushimutwile mangana tusungamise vyuma.” (Isa. 1:18) Tachikizenu ngwenu, munazate lyehi nangolo, ‘nakusungamisa vyuma.’ Yehova nawahilila chikuma hakulinga chuma kana. Kukinduluka chenu kuli Yehova nachimulingisa alangulule Satana uze eji kumutombanga.—Vishi. 27:11.

Kukinduluka kuli Yehova chinasolola nge munapandama kuli ikiye, kaha naikiye mwapandama kuli yenu ngana muze atufwelelesa. (Yako. 4:8) Numba tuhu vandumbwenu vanawahilila hakumimona munakinduluka muchikungulwilo, oloze mwatela kutwalaho lika kuzanga Yehova uze apwa Senu kaha nawa Sepa lyenu. Uno munahase kulinga ngachilihi ngocho?

Litomenenu kulinga vyuma vize munahase kutesamo. Twafwelela ngwetu muchili lika nakwanuka vyuma mwalinangwile hali Yehova nahavyuma ashika kukatulingila. Chipwe ngocho, mwatela kuputuka cheka kwambulula mujimbu wamwaza, nakuyanga kukukunguluka, nakulikata chikuma navandumbwenu. Talenu vyuma vimwe mwatela kulitomena.

Lombenunga kuli Yehova lwola lwosena. Yehova atachikiza ngwenyi kutwalaho lika kulihana mulonga chinahase kumilingisa muchiwane kupwa chachikalu kulomba kuli ikiye. (Loma 8:26) Shikaho, “lombenunga naluzema” nakulweza Yehova ngwenu muli nakusaka kuzamisa cheka usoko wenu naikiye. (Loma 12:12) Andrej ambile ngwenyi: “Ngwalihanyinenga mulonga nakulimona kupwa nguwamokomoko. Oloze omu ngwalombelenga ngwaunjile muchima.” Kachi nge kamwejivile vyuma mwatela kulombako, kaha munahase kutanga mazu aMwangana Ndavichi uze apihililile nakwalumuka aze atwama hali Samu kapetulu 51 nakapetulu 65.

Linangulenunga Mbimbiliya lwola lwosena. Kulinangula Mbimbiliya nachimikafwa mupwenga nalufwelelo lwakukola nakuzanga chikuma Yehova. (Samu 19:7-11) Felipe ambile ngwenyi: “Kuhona kutanga Mbimbiliya nakulinangulayo hauka changulingishile nguzeye kushipilitu nakuseza Yehova. Shikaho hakuwana nge kangwasakile cheka kwivwisa Yehova kupihyako, ngocho ngwalitomenene kutanga Mbimbiliya nakulinangulayo lwola lwosena.” Nayenu munahase kulinga mwomumwe. Nge muli nakusaka kuwana vihande vyakuzachisa hachilongesa chauka, kaha munahase kulweza ndumbwenu wakuhya kushipilitu mangana amikafwe.

Tungenu cheka usoko navandumbwenu. Vandumbwetu vamwe vaze veji kukindulukanga muchikungulwilo veji kulizakaminanga ngwavo vandumbwavo kaveshi kulikata navo chekako. Larissa ambile ngwenyi: “Hamyaka yayivulu ngwalimwenenga kupwa nguwamokomoko nakushinganyeka ngwami ngwevwishile vandumbwami kupihya.” Tachikizenu ngwenu tulama navandumbwetu veka vakulindunuka vali nakufwila kumikafwa mutunge cheka usoko wenu naYehova. (Talenu lipwata lyakwamba ngwavo “ Vyuma Muka Vatela Kulinga Tulama?”) Vanawahilila chikuma hakumimona munakinduluka kuli Yehova, ngocho vali nakusaka mupwenga vakuwahilila.—Vishi. 17:17.

Vyuma muka vinahase kumikafwa mupandame kuli vandumbwenu? Fwilenu kuyanga kukukunguluka, nakwazananga mumulimo wakwambulula hamwe navandumbwenu. Uno echi nachimikafwa ngachilihi? Felix ambile ngwenyi: “Vandumbwami vawahililile chikuma omu ngwakindulukile muchikungulwilo, kahechi changwivwishile kuwaha. Vangukafwile ngumone ngwami, ngwapwa nguwamulemu muchikungulwilo, kaha nawa Yehova nangukonekela, ngocho ngunahase kutwalaho kumuzachila.”—Talenu lipwata lyakwamba ngwavo “ Vyuma Muka Mwatela Kulinga?”

Satana mwatwalaho lika kuminehela ukalu waunene mangana amizeyese muhone kutunga cheka usoko wenu naYehova. (Luka 4:13) Fwilenu kuzamisa usoko wenu naYehova.

Yehova afwelelesa mikoko jenyi ngwenyi: “Nangutondatonda vaze vanajimbala, nakukindulwisa vaze vanahanduka. Nangujichika vaze vanalemana, nakujikijisa vaze vanazeye.” (Ezeke. 34:16) Yehova nakafwe vandumbwetu vavavulu mangana vatunge cheka usoko wavo naikiye. Shikaho tachikizenu ngwenu, ali nakusaka kumikafwa mutwaleho lika kutunga usoko wakukola naikiye.