1. Uno mutu wakutetela apwa ngachilihi?

UNO mutu wakutetela apwa ngachilihi? Apwa mutu walikoji, wamuchima wamwaza, wakeke, kaha nawa muka-kuhana. Achishinganyekenu hali kaSamaliya uze Yesu avulukile muchifwanyisa. Ou lunga wakaSamaliya ‘atetelelele’ kaYuleya uze alitulukile navihwanga. Ou kaSamaliya ‘evwililile keke’ uze kaYuleya valemekele, ngocho amuzakamine. (Luka 10:29-37) Echi chifwanyisa chasolola nge Yehova atwama namuchima wakutetela. Kalunga apwa muka-kutetela mwomwo atuzanga, kaha eji kututetelanga mujijila jakulisezaseza hakumbi hakumbi.

2. Jila muka yikwavo yize mutu nahase kusolwelamo muchima wakutetela?

² Kuli chuma chikwavo chize nahase kulinga mutu uze apwa muka-kutetela. Nahase kulitwamina kuzangamisa mutu uze atelanga kuzangamisa. Omwo mukiko apwa naYehova, eji kututetelanga. Muka-kwimba jisamu ambile ngwenyi: “Katulingile kweseka najishili jetuko.” (Samu 103:10) Oloze shimbu jimwe, Yehova eji kuzangamisanga mutu uze nalingi shili.

3. Vihula muka natushimutwila muchihande chino?

³ Muchihande chino, natushimutwila havihula vino vitatu: Mwomwo ika Yehova eji kusolwelanga muchima wakutetela? Kutala chinahase kupwa chakutamo kuzangamisa mutu nakumusolwela nawa muchima wakutetela tahi? Kaha vyuma muka navitukafwa tusololenga muchima wakutetela? Tutalenu omu Mbimbiliya nayitukafwa kukumbulula vihula kana.

4. Mwomwo ika Yehova eji kusolwelanga muchima wakutetela?

⁴ Yehova eji kusololanga muchima wakutetela mwomwo atuzanga. Kaposetolo Paulu asonekele ngwenyi, Kalunga apwa “muka-kutetela  chikuma.” Paulu hakuhanjika mazu kana, apwile nakulumbununa ngwenyi, Kalunga apwa muka-kutetela mwomwo ahana vangamba jenyi vakuhona kukupuka vakuwavisa lutalililo lwakukayoyela mwilu. (Efwe. 2:4-7) Oloze Yehova keshi kutetela vaze vawavisa kahako. Muka-kwimba jisamu Ndavichi asonekele ngwenyi: “Yehova apwa wamwaza kuvyuma vyakuyoya vyosena, keke yenyi yasoloka hatoma mumilimo yenyi yosena.” (Samu 145:9) Hakuwana nge Yehova azanga vatu, ngocho eji kuvatetelanga chipwe ngwetu eji kuvevwilanga keke kachi nge chinatemo kulinga ngocho.

5. Uno Yesu atachikijile ngachilihi muchima waYehova wakutetela?

⁵ Yesu ikiye atachikiza kanawa omwo Yehova eji kusololanga muchima wakutetela. Mwomwo apwilenga hamwe naIse mwilu hamyaka yayivulu shimbu kanda ezenga hano hamavu. (Vishi. 8:30, 31) Yesu amwenenga omu Ise atetelelenga vatu vakuhona kukupuka mapapa kakavulu. (Samu 78:37-42) Omu anangwilenga vatu, asolwelenga hatoma nge Ise apwa muka-kutetela.

6. Yesu asolwele ngachilihi omu Ise eji kututetelanga?

⁶ Muchihande chinafumuho, twalinangulanga omu Yesu azachishile chifwanyisa chamwana wakujimbala mangana atukafwe tutachikize ngwetu Yehova eji kututetelanga mwomwo atuzanga. Ou mwana afumine hembo ‘nakwenyeka vikumba vyenyi vyosena hakuhungukila muvilinga vyavipi.’ (Luka 15:13) Kutwala muze apihililile nakwalumuka, nakulinyisa nakukinduluka kuli ise. Uno ise alingile ngachilihi? Yesu ambile ngwenyi: “Shimbu [mwanenyi] apwile hahasuku, ise amumwene, amwivwililile keke, kaha amulahililile nakumupakata mukasamba, kaha amusweswenyele.” Chikupu vene ou chisemi kevwishile mwanenyi kupihyako. Amutetelelele, nakumukonekela, nakumwitavisa atwame cheka hembo. Ou mwana wakujimbala alingile shili yayinene, oloze hakuwana nge apihililile nakwalumuka, ngocho ise amukonekelele. Chisemi wakutetela vavuluka muli echi chifwanyisa emanyinako Yehova. Hakuzachisa chifwanyisa kanechi, Yesu asolwele ngwenyi Ise alisuula kukonekela vaka-shili vaze navapihilila nakwaluka chamwenemwene.—Luka 15:17-24.

7. Uno jila Yehova eji kusolwelangamo muchima wakutetela yasolola ngachilihi nge atwama namangana chikuma?

⁷ Yehova eji kusololanga muchima wakutetela mwomwo atwama namangana chikuma. Shimbu yosena, Yehova eji kulinganga vyuma vize navinganyalisa vyuma atenga. Mbimbiliya yamba ngwayo, ‘mangana akufuma mwilu apwa akuzala nakutetela namihako yamwaza.’ (Yako. 3:17) Ngana mwachisemi wazangi, Yehova atachikiza  ngwenyi vangamba jenyi navanganyala kachi nge mwavatetelanga. (Samu 103:13; Isa. 49:15) Kuvatetela chavalingisa vatalilile vyuma vyamwaza kulutwe numba tuhu kavakupukako. Hakuwana nge Yehova atwama namangana chikuma, ngocho eji kutetelanga vatu jenyi kachi nge chinatemo kulinga ngocho. Kaha nawa atachikiza lwola luze katela kusolola muchima wakutetelako. Hakuwana nge atwama namangana, kasolola muchima wakutetela kachi nge namono ngwenyi kulinga ngocho nachisolola nge ali nakukundwiza upi.

8. Chuma muka cheji kusolokanga kuli vatu vaze navahona kupihilila nakwalumuka, kaha mwomwo ika?

⁸ Chuma muka twatela kulinga kachi nge ngamba yaKalunga nalisakwila ivene kuhungukila muvilinga vyavipi? Yehova alwezele Paulu asonekele chikungulwilo ngwenyi: ‘Litwaminenu kulikata’ nenyi. (Koli. 1, 5:11) Shikaho vatu vaze navahona kupihilila nakwalumuka veji kuvafumisanga muchikungulwilo. Chapwa chachilemu kulinga ngocho mangana vakinge vandumbwetu vakushishika, nakukundwiza jishimbi jaYehova jakwoloka. Oloze vatu vamwe vashinganyeka ngwavo kufumisa mutu muchikungulwilo kachasolola nge Kalunga namutetelako. Kutala mukiko tahi? Tuwanenu muvakumbulwila chihula kana.

9-10. Kweseka naWavaHepeleu 12:5, 6, mwomwo ika natwambila ngwetu kufumisa mutu muchikungulwilo chasolola muchima wakutetela? Hanenu chakutalilaho.

⁹ Tweji kwivwanga kupihya chikuma kachi nge mutu uze twatachikiza, kaha nawa uze twazanga navamuvilika kuchikungulwilo ngwavo “keshi cheka Chinjiho chaYehovako.” Tunahase kuhuhwasana numba nge chakutamo kufumisa mutu twazanga muchikungulwilo. Kutala chapwa hikutetela kufumisa mutu muchikungulwilo tahi? Eyo. Kachi nge mutu ali nakusakiwa kumuzangamisa mwomwo yavyuma vimwe nalingi, nachiwaha kulinga ngocho mwomwo nachisolola nge mwatwama namangana, namuchima wakutetela, kaha nawa mwamuzanga. (Vishi. 13:24) Uno kufumisa mutu muchikungulwilo nachikafwa mutu kana apihilile nakwalumuka tahi? Eyo. Vatu vavavulu vaze valingile shili yayinene veji kuhanjikanga ngwavo chapwile chakutamo kuvafumisa muchikungulwilo, mwomwo chavakafwile vaputuke kushinganyeka kanawa, nakuseza vilinga vyavo vyavipi, nakukinduluka kuli Yehova.—Tangenu WavaHepeleu 12:5, 6.

¹⁰ Achishinganyekenu hachakutalilaho chino. Kafunga namono ngwenyi mukoko wenyi umwe naviji. Natachikiza ngwenyi hakusaka amuke kumusongo kana atela kumuhandula kuli vakwavo mikoko. Hakuwana nge mikoko vasaka kupwa hamwe navakwavo, ngocho mukoko nahase kuhomba nge navamuhaka kwauka wenyi. Uno ou kafunga hakuhandula ou mukoko wakuviza kuli vakwavo chalumbununa nge ou kafunga atwama namuchima waupi chipwe waukenya tahi? Nduma, mwomwo natachikiza ngwenyi kachi nge uze mukoko naviji mwapwa hamwe navakwavo, kaha mwavatambwisako. Shikaho kumuhandula kuli vakwavo nachikinga utanga wosena.—Esekesenuko waVyavaLevi 13:3, 4.

11. (a) Uno tunahase kufwanyisa ngachilihi mutu uze vanafumisa muchikungulwilo kumukoko uze naviji? (b) Vyuma muka vatela kulinga vaze vanafumisa muchikungulwilo, kaha vanahase kuvakafwa ngachilihi?

¹¹ Nge muka-Kulishitu vanamufumisa muchikungulwilo, kaha nafwane nge mukoko uze ali namusongo, mwomwo mutu kana naviji kushipilitu. (Yako. 5:14) Ngana muze mutu nahase kutambwisako vakwavo musongo, namutu uze naviji kushipilitu nahase kulingisa vakwavo valinge mwomumwe. Shikaho chapwa chakutamo lwola lumwe kufumisa mutu uze naviji kushipilitu muchikungulwilo. Kuzangamisa mutu mujila kana chasolola nge Yehova azanga vangamba jenyi vakushishika, kaha nawa chinahase kukafwa mutu uze nalingi shili ashinganyeke havyuma vyavipi alingile nakupihilila nakwalumuka. Uze vanafumisa muchikungulwilo nahase kuyanga  kukunguluka mangana atambulenga jindongi jamuMbimbiliya jize najimukafwa azamise cheka lufwelelo lwenyi. Nahase nawa kutambula mikanda mangana atangenga, kaha nawa nahase kutala JW Broadcasting^®. Jino omu tulama navamona kuzovoloka chenyi, vanahase kumukafwa kuswa kumwe mangana apwenga cheka nausoko wamwaza naYehova nakumukindulwisa muchikungulwilo. *

12. Tulama veji kusololanga ngachilihi zangi kuli muka-shili uze nahono kupihilila nakwalumuka?

¹² Twatela kutachikiza ngwetu mutu uze kapihililile nakwalumukako ikiye veji kufumisanga muchikungulwilo. Tulama veji kukekesanga kanawa chihande shimbu kanda vashinganyeke vyakufumisa mutu muchikungulwilo, mwomwo vatachikiza ngwavo Yehova eji kuzangamisanga “mujila yakutamo.” (Yele. 30:11) Tulama vazanga vandumbwavo, ngocho kaveshi kuhasa kulinga vyuma vize navilingisa vandumbwavo vajihe usoko wavo naYehovako. Oloze shimbu jimwe, tulama veji kusololanga zangi namuchima wakutetela hakufumisa mutu uze nalingi shili muchikungulwilo.

13. Mwomwo ika muka-Kulishitu umwe muKolinde vamufumishilile muchikungulwilo?

¹³ Achishinganyekenu havyuma alingile kaposetolo Paulu kuli muka-shili uze kapihililile nakwalumukako. Muka-Kulishitu umwe muKolinde apwilenga nakulinga ujila napwevo lyaise. Chapwile chaunyengwe kulinga chuma kana. Kaposetolo Paulu atachikijile ngwenyi Yehova alwezele vaIsalele kushikulu ngwenyi: “Lunga uze mwalisavala napwevo lyaise nasaula ise. Vosena vavali vavajihe chikupu.” (Levi 20:11) Chipwe ngocho, Paulu kalwezele vandumbwenyi vajihe mutu kanako, oloze avalwezele vamufumise muchikungulwilo. Vilinga vyavipi vyauze lunga vyapwile nakuhungumwisa vatu vavavulu muchikungulwilo. Vamwe muchikungulwilo vashinganyekelenga ngwavo kapwile nakulinga shili yayineneko.—Koli. 1, 5:1, 2, 13.

14. Uno Paulu asolwele ngachilihi ngwenyi atetelelele mutu wamuKolinde uze vafumishile muchikungulwilo, kaha mwomwo ika? (Wavaka-Kolinde 2, 2:5-8, 11)

¹⁴ Mukuhita chalwola, Paulu evwile ngwavo uze mutu naseze vilinga vyenyi vyavipi. Uze muka-shili apihililile nakwalumuka chamwenemwene. Numba tuhu uze lunga anehele katombo hachikungulwilo oloze Paulu kasakile kumuzangamisa “nautenuko.” Ngocho alwezele tulama ngwenyi: ‘Mukonekelenu namuchima wosena nakumuvendejeka.’ Avalwezele valinge ngocho:  “Kuchina pamo mutu kana mwahomba nachinyengo chachinene.” Kaposetolo Paulu evwililile keke mutu uze apihililile nakwalumuka. Kaha kasakile ou mutu ahombe chikuma nakuchiwana kupwa chachikalu kulomba vamukonekele.—Tangenu Wavaka-Kolinde 2, 2:5-8, 11.

15. Uno tulama vanahase kuzangamisa ngachilihi mutu nakumutetela halwola lwolumwe?

¹⁵ Tulama veji kulondezezanga Yehova hakusolola muchima wakutetela. Veji kuzangamisanga mutu uze nalingi shili kachi nge chinatemo kulinga ngocho, kaha nawa veji kusololanga muchima wakutetela kachi nge chinatemo kulinga ngocho. Kachi nge tulama navahona kuzangamisa mutu uze nalingi shili, kaha kaveshi nakumutetelako oloze vali nakukundwiza vilinga vyenyi vyavipi. Uno tulama vakiko kaha vatela kusolola muchima wakutetela tahi?

16. Kweseka naVishimo 21:13, uno Yehova eji kulinganga ika kuvatu vaze kavasolola muchima wakutetelako?

¹⁶ Vaka-Kulishitu vosena vatela kulondezeza Yehova hakupwa namuchima wakutetela. Mwomwo Yehova keshi kwivwilila kukulomba chavaze kavatetela vakwavoko. (Tangenu Vishimo 21:13.) Twasaka Yehova evwilile kukulomba chetu, shikaho twatela kuzata nangolo mangana tupwenga namuchima wakutetela. Katwatela kuliula vandumbwetu nge vali nakuhita muukaluko, oloze twatela kwivwilila ‘kukawelele kamuka-kuhutwa.’ Shikaho twatela kuzata nangolo mangana tukavangize mazu ano akwamba ngwavo: “Weshowo keshi kutetela vakwavoko, navakamusopesa chakuzeneka kumutetela.” (Yako. 2:13) Nge natutachikiza ngwetu twasakiwa kutusolwela muchima wakutetela lwola lwosena, kaha nayetu natutetelanga vakwetu. Chikumanyi twasaka kusolola muchima wakutetela kuli muka-shili uze napihilila nakwalumuka nakukinduluka muchikungulwilo.

17. Uno Mwangana Ndavichi asolwele ngachilihi muchima wakutetela?

¹⁷ Vyakutalilaho vyamuMbimbiliya vinahase kutukafwa tusololenga muchima wakutetela nakuhona kupwa nautenu. Tutalenu chakutalilaho chaMwangana Ndavichi. Kakavulu asolwelenga muchima wakutetela. Numba tuhu Saulu asakile kumujiha, oloze ikiye amutetelelele nakuhona kulinga sambanjinga. Kasakile kulemeka Sauluko mwomwo apwile mwangana uze vawavisa kuli Kalunga.—Samwe. 1, 24:9-12, 18, 19.

18-19. Lwola muka Ndavichi ahonene kusolola muchima wakutetela?

¹⁸ Shimbu jimwe Ndavichi kasolwelenga muchima wakutetelako. Chakutalilaho, omu Navale, lunga wakutenuka ahanjikile mujila yayipi kuli Ndavichi navatu jenyi nakuvamina vyakulya, Ndavichi apihililile chikuma kaha asakile kujila Navale, namalunga vakuzuvo yenyi vosena. Oloze pwevo lyaNavale Avingayile uze apwile namuchima walikoji, kaha nawa wakutalilila chikoki akingile Ndavichi ahone kupwa namulonga wamanyinga.—Samwe. 1, 25:9-22, 32-35.

¹⁹ Halwola lukwavo nawa, kapolofweto Natane alwezele Ndavichi vyalunga wakuhutwa uze vatambwile mukoko wenyi kuli lunga waluheto. Ndavichi apihililile chikuma nakwamba ngwenyi: “Omu ayoya Yehova tu, mutu kana atela kufwa!” (Samwe. 2, 12:1-6) Ndavichi atachikijile Jishimbi jize Kalunga ahanyine Mose, jahanjikile  ngwajo kachi nge mutu nevi mukoko wambala, kaha vatela kumufwetesa mikoko vawana. (Kulo. 22:1) Oloze Ndavichi hakwamba ngwenyi uze mwiji vatela kumujiha chasolwele nge amusopesele nautenu. Oloze Natane azachishile chakutalilaho kana mangana akafwe Ndavichi atachikize ngwenyi alingile milonga yashili yayinene. Yehova asolwelelele Ndavichi muchima wakutetela chikuma, oloze Ndavichi katetelelele uze mwiji ahanjikile Natane muchakutalilahoko.—Samwe. 2, 12:7-13.

20. Vyuma muka natulinangula kuli Ndavichi?

²⁰ Omu Ndavichi apihililile, asakile kujiha Navale namalunga vakuzuvo yenyi vosena. Halwola lukwavo nawa, Ndavichi ambile ngwenyi lunga uze avulukile Natane muchakutalilaho vatelelele kumujiha. Hakuwana nge Ndavichi apwile lunga walikoji, kaha mwomwo ika ahanjikilile ngwenyi uze mwiji vatelele kumujiha? Tachikizenu ngwenu halwola kana, chivezu chenyi chamuhanyinenga mulonga havyuma vyavipi alingile. Shikaho nge mutu mwasopesa mukwavo nautenu kachasolola nge mutu kana ali nausoko wamwaza naYehovako. Echi chikiko chalingishile Yesu ahuhumune vaka-kumukavangiza ngwenyi: “Litwaminenu kusopesanga vakwenu, kuchina nayenu navakamisopesa, mwomwo kusopesa chize muli nakusopesanga vakwenu, chikiko navakamisopesa nayenu nawa.” (Mateu 7:1, 2) Shikaho tuzatenu nangolo mangana tuhone kupwa namuchima wautenu, nakufwila kupwa ‘vaka-kutetela chikuma’ ngana mwaKalunga.

21-22. Jijila jimwe muka tunahase kusolwelamo muchima wakutetela?

²¹ Kupwa muka-kutetela kachalumbununa kaha kwivwila keke vakwetuko. Chasakiwa nawa kulinga vyuma vize navikafwa vakwetu. Shikaho tuvosena twatela kufwila kukafwa vatanga jetu, navandumbwetu, navatu vamungalila yetu vaze vali muukalu. Kuli jijila jajivulu tunahase kusolwelamo muchima wakutetela. Jijila jimwe shina, kuvendejeka mutu uze ali muukalu, kukafwa vakwetu hakuvahanako vyakulya chipwe kuvalingilako vyuma vyeka, kulikata namutu uze vanakindulwisa muchikungulwilo nakumukolezeza, nakwambulula mujimbu wamwaza. Eji jikiko jijila jimwe jize tunahase kusolwelamo muchima wakutetela kuli vakwetu.—Yopa 29:12, 13; Loma 10:14, 15; Yako. 1:27.

²² Kutachikiza ngwetu kuli vakwetu vali muukalu, nachitukafwa tuvasolwele muchima wakutetela. Nge natusolwelanga vakwetu muchima wakutetela, kaha natwivwisa kuwaha Setu wamwilu, mwomwo apwa Kalunga “muka-kutetela chikuma.”