1. Uno vaka-kulemesa Kalunga vakushikulu vavazamishilenga ngachilihi?

 KAKAVULU Mazu aKalunga alumbununa vatu vakushishika kupwa vangolo. Oloze navatu vaze vapwilenga vangolo chikuma, shimbu jimwe valivwilenga kupwa vakuhehela. Chakutalilaho, lwola lumwe Mwangana Ndavichi alivwile nge ‘nazame ngana mwapili,’ oloze halwola lukwavo ‘alizuzukilile nawoma.’ (Samu 30:7) Samasone apwile nangolo chikuma mwomwo yakumukafwa kushipilitu yaKalunga, oloze atachikijile ngwenyi chakuzeneka kumukafwa kuli Kalunga ‘mwazeya nakupwa ngana mwavatu vosena.’ (Kuyu. 14:​5, 6; 16:17) Ava malunga vakushishika vazaminenga mwomwo Yehova ikiye avahanyinenga ngolo.

2. Mwomwo ika kaposetolo Paulu ahanjikilile ngwenyi apwile wakuhehela kaha nawa akwachile ngolo? (Wavaka-Kolinde 2, 12:​9, 10)

² Kaposetolo Paulu naikiye atachikijile ngwenyi asakiwilenga ngolo jakufuma kuli Yehova. (Tangenu Wavaka-Kolinde 2, 12:​9, 10.) Naikiye amwenenga ukalu wamisongo ngana omu chili kuli yetu. (Ngale. 4:​13, 14) Shimbu jimwe nawa chamukaluhwililenga kulinga vyuma vyakwoloka. (Loma 7:​18, 19) Kaha lwola lukwavo nawa alizakaminyinenga nakwivwa woma havyuma vinahase kumusolokela. (Koli. 2, 1:​8, 9) Oloze omu Paulu apwile wakuhehela akwachile nawa ngolo. Mujila muka? Yehova amuhanyine ngolo jize asakiwile.

3. Vihula muka natukumbulula muchihande chino?

³ Yehova atushika ngwenyi nayetu mwatuzamikisanga. (Petu. 1, 5:10) Oloze twasakiwa kukilikita numba Yehova atuhane ngolo. Chakutalilaho, yinjini yatwama nangolo jakulingisa  minyau yitambuke. Chipwe ngocho, nyamutekenya atela kuyivukula numba jino yitambuke. Chochimwe nawa, Yehova alizanga kutuhana ngolo jenyi jize twasakiwa, oloze twatela kulingako vyuma vimwe numba atuhanejo. Vyuma muka atuhana Yehova vyakutukafwa tuzame mbe? Kaha vyuma muka twatela kulinga numba atuhane ngolo jenyi? Natukumbulula vihula kana hakukekesa omwo Yehova ahanyine ngolo kapolofweto Yona, naMaliya naye yaYesu, nakaposetolo Paulu vaze vasoneka muMbimbiliya. Natumona nawa omwo Yehova ali nakutwalaho lika kuzamisa vangamba jenyi mujila yoyimwe makumbi ano.

4. Vyuma muka twatela kulinga mangana Yehova atuhane ngolo jenyi?

⁴ Jila yimwe tunahase kutambwilamo ngolo kuli Yehova shina kuhichila mukulomba. Yehova nahase kukumbulula kulomba chetu hakutuhana “ngolo jakuhambakana jize javatu.” (Koli. 2, 4:7) Tunahase nawa kukwata ngolo hakutanganga Mazu enyi nakuwashinganyekanga. (Samu 86:11) Mazu aYehova aze atwama muMbimbiliya “atwama nangolo.” (Hepe. 4:12) Nge namulombanga kuli Yehova nakutanganga Mazu enyi, kaha mwamihana ngolo jize najimikafwa mumike muvyeseko, nakutwalaho kupwa vakuwahilila nakutesamo milimo yayikalu. Talenu omwo Yehova ajikijishile kapolofweto Yona.

5. Mwomwo ika kapolofweto Yona asakiwile kupwa wakuhamuka?

⁵ Kapolofweto Yona asakiwile kupwa wakuhamuka. Achinyine mulimo waukalu uze vamuhanyine kuli Yehova. Echi kachi chatokeselemo mwono wenyi namyono yavaze apwile navo muwato. Omu vamumbilile mumeya, apwile mujimo lyaishi wamunene muze kanda lyehi achipwengamo. Uno munashinganyeka ngwenu Yona evwile ngachilihi? Uno ashinganyekele ngwenyi mwafwa tahi? Kutala ashinganyekele ngwenyi Yehova namukane tahi? Pamo Yona alizakaminyine chikuma.

6. Kweseka namazu atwama hali Yona 2:​1, 2, 7, vyuma muka vyahanyine ngolo Yona omu apwile mujimo lyaishi?

⁶ Vyuma muka alingile Yona numba akwate ngolo omu apwile mujimo lyaishi? Alombele kuli Yehova. (Tangenu. Yona 2:​1, 2, 7.) Numba tuhu Yona alikangile, oloze apihililile nakwalumuka nakufwelela ngwenyi Yehova mwevwilila kukulomba chenyi. Yona ashinganyekele nawa haVisoneka vize atangilenga. Tunatachikiza ngocho, mwomwo mazu amavulu amukulomba chenyi aze asoneka hali Yona kapetulu 2, atwama namumukanda waSamu. (Chakutalilaho, esekesenu Yona 2:​2, 5 kuli Samu 69:1; 86:7.) Echi chasolola hatoma nge Yona atachikijile Visoneka. Shikaho, kushinganyeka visoneka kana halwola apwile muukalu chamukafwile amone ngwenyi Yehova mwamukafwa. Yehova ayowele Yona, kufumaho Yona azachile mulimo uze amuhanyine Yehova.—Yona 2:10–3:4.

7-8. Vyuma muka vyajikijishile ndumbwetu wakuTaiwan omu apwile nakumona ukalu?

⁷ Mujimbu waYona unahase kutukafwa nge tuli nakumona ukalu wakulisezaseza. Chakutalilaho, ndumbwetu Zhiming b wamuTaiwan, eji kulipikanga namisongo yayinene. Kaha nawa, veji kumufumbukilanga chikuma mwomwo yakupwa Chinjiho chaYehova. Oloze kulomba nakulinangula Mbimbiliya vyeji kumuhananga ngolo. Ambile ngwenyi, “Lwola lumwe nge ukalu unanguwane, ngweji kulizakaminanga nakuhona ngolo jakulinga chilongesa chauka.” Chipwe ngocho, ou ndumbwetu eji kutwalangaho kupendamina hali Yehova. Ambile ngwenyi, “Chatete, ngweji kulombanga kuli Yehova, kufumaho ngweji kuhakanga  tuvihungo mumatwitwi nakwivwilila kumyaso yetu yaWangana. Kaha shimbu jimwe ngwembilililenga myaso kana mwishi palanga nomu ngwevwilenga muchima undutu. Kufumaho ngwaputukilenga jino kulinangula.”

⁸ Chilongesa chauka cheji kujikijisanga ndumbwetu Zhiming mujijila jakulipwila. Chakutalilaho, omu mbandu vamupulile yaputukile kukanguka, nase umwe amulwezele ngwenyi hakuwana nge apwile namanyinga amandende, asakiwile kumuhaka manyinga. Hafuku wakukokela kulikumbi lyakumupula ndumbwetu, Zhiming atangile mujimbu wandumbwetu umwe wapwevo uze ahichile muukalu woumwe. Awanyine ngwenyi ou ndumbwetu wapwevo manyinga amukehele chikuma kuhambakana ikiye. Kaha numba tuhu akanyine kumuhaka manyinga oloze ayoyele. Mujimbu kana wajikijishile ndumbwetu Zhiming nakutwalaho kupwa wakushishika.

9. Vyuma muka mwatela kulinga kachi nge munazeye mwomwo yacheseko? (Talenu nawa mivwimbimbi.)

⁹ Kutala mwalizakaminaho lyehi kulomba Yehova nge muli nakuhita mucheseko, chipwe kwivwa uli wakulinangula tahi? Anukenu ngwenu Yehova atachikiza kanawa ukalu wenu. Shikaho numba nge namumulomba kachuma kakandende, mwamihana vyuma namumulomba. (Efwe. 3:20) Nge ukalu muli nakumona uli nakulingisa chimikaluhwile kutanga Mbimbiliya nakulinangula, munahase kweseka kwivwilila kuMbimbiliya chipwe kumikanda yahanjika haMbimbiliya yamumazu akukopa. Munahase nawa kwivwilila kumyaso yetu chipwe kutala vindiyo yaha jw.org. Yehova nahase kumijikijisa hakumulomba nahakutondatonda omwo nakumbulwilamo kulomba chenu kuhichila muMbimbiliya namuvyuma vyosena vize atuhana.

10. Uno vandumbwetu vanahase kutujikijisa muvyuma muka?

¹⁰ Yehova nahase kuzachisa vandumbwetu mangana vatujikijise. Vanahase kupwa ‘vaka-kutuvendejeka’ nge tuli muvyeseko chipwe nge chili nakutukaluhwila kutesamo mulimo waukalu. (Kolo. 4:​10, 11) Tweji kusakiwanga masepa chikumanyi “mulwola lwavihuli.” (Vishi. 17:17) Nge tunazeye, vandumbwetu vanahase kutukafwa kumujimba, namuvishinganyeka  nakushipilitu. Tutalenu omwo Maliya naye yaYesu vamujikijishile kuli vakwavo.

11. Mwomwo ika Maliya asakiwilile kumujikijisa?

¹¹ Maliya asakiwile kumujikijisa. Chasoloka nge Maliya alizakaminyine chikuma omu kangelo Ngavalyele amulwezele ngwenyi mwemita, numba tuhu mujike. Apwile namulimo wakulela mwana walunga uze mwakapwa Meshiya numba tuhu katachikijile mwakulelela vanako. Hakuwana nge apwile kanda alisavaleho lyehi nalunga, ngocho chapwile chachikalu kulumbunwina Yosefwe uze amuhuhwile.—Luka 1:​26-33.

12. Kweseka nachisoneka chaLuka 1:​39-45, uno Maliya vamujikijishile ngachilihi?

¹² Uno Maliya awanyine ngachilihi ngolo jakuhasa kutesamo mulimo uze wapwile waukalu kaha nawa wakulipwila? Afwilililenga kumukafwa kuli vakwavo. Chakutalilaho, alwezele Ngavalyele amulweze mijimbu yikwavo kutalisa kumulimo kana. (Luka 1:34) Nakushimbula chiku, ayile “kungalila yajipili” muYuta kuli kausoko kenyi Elizaveta. Ungeji kana wamunganyalishile. Elizaveta asangejekele Maliya, kaha nawa vamuhwiminyinyine kuli Yehova alweze Maliya vyaupolofweto wakutalisa kumwana uze apwile mujimo. (Tangenu Luka 1:​39-45.) Maliya ambile ngwenyi Yehova azachile “vyuma vyangolo nalivoko lyenyi.” (Luka 1:​46-51) Yehova ajikijishile Maliya kuhichila muli Ngavalyele naElizaveta.

13. Uno ndumbwetu umwe wapwevo wamuBolivia anganyalile ngachilihi hakulweza vandumbwenyi vamukafwe?

¹³ Nayenu vanahase kumijikijisa kuli vakwenu vaka-kulemesa Kalunga, ngana muze chapwile kuli Maliya. Ndumbwetu wapwevo Dasuri, wamuBolivia asakiwile kumujikijisa. Omu ise vamuwanyine namusongo waupi nakumutumbika muchipatela, Dasuri alisuwile kuzakama chisemi chenyi. (Chimo. 1, 5:4) Chuma kana kachapwile chachashiko. Ambile ngwenyi, “Kakavulu ngwevwilenga nge jinanguhu.” Uno alwezele vakwavo vamukafwe tahi? Chiku. Ambile ngwenyi, “Kangwasakile kuhana vandumbwami chiteliko. Ngwalyambile ngwami, ‘Yehova kaha ikiye atela kungukafwa.’ Oloze ngwamwene jino ngwami nge nangulihandula kuli vandumbwami, kaha nachisoloka nge nguli nakulipika naukalu ukawami.” (Vishi. 18:1) Dasuri asonekelelele masepa jenyi vamwe nakuvalumbunwina ukalu apwile nakuhitamo. Ambile ngwenyi: “Kangweshi kuhasa kulumbununa omwo vandumbwami vangujikijishileko. Vangunehelelenga vyakulya kuchipatela nakunguvendejeka kuzachisa Visoneka. Twawahilila hakutachikiza ngwetu katweshi ukawetuko. Chikupu vene, twatwama mutanga yaYehova yayinene yize yalisuula kutukafwa nakulilila hamwe nayetu nakutukolezeza tutwaleho lika kumuzachila.”

14. Mwomwo ika twatela kukavangijila vyuma navatulweza vakulwane?

¹⁴ Yehova eji kutuhananga nawa ngolo kuhichila muli vakulwane muchikungulwilo. Vapwa hiwana uze eji kuzachisanga mangana atujikijise nakutuhizumuna. (Isa. 32:​1, 2) Shikaho, nge munalizakamina, kaha lwezenu vakulwane ukalu wenu. Kaha kanda kulangisa kukavangiza vyuma navamilwezako. Yehova nahase kumijikijisa kuhichila muli ava vakulwane.

15. Vyuma muka vatalilila vaka-Kulishitu vosena?

¹⁵ Jishiko jamuMbimbiliya twatalilila jinahase kutuhana ngolo. (Loma 4:​3, 18-20) Etu vaka-Kulishitu twatalilila kukayoya haya myaka hano hamavu muPalachise yize yinakwiza kulutwe chipwe muWangana waKalunga mwilu. Lutalililo lwetu lunahase kutuhana ngolo jakutukafwa tumike muvyeseko, nakwambulula mujimbu wamwaza, nakutukafwa nawa tuzate kanawa milimo yakulisezaseza  muchikungulwilo. (Teso. 1, 1:3) Kaposetolo Paulu nayikiye akwachile ngolo mwomwo yalutalililo.

16. Mwomwo ika kaposetolo Paulu asakiwilile kumujikijisa?

¹⁶ Paulu asakiwile kumujikijisa. Mumukanda wenyi uze asonekelele vaka-Kolinde, alifwanyishile kumulondo wauma. ‘Vamushindakanyine,’ ‘alikakasanyine’ ‘vamuyanjishile,’ ‘nakumumbila hamavu.’ Kaha kuyoya chenyi nawa chapwile muponde. (Koli. 2, 4:​8-10) Paulu asonekele mazu kana haungeji wenyi wamuchitatu waumishonali. Kaha hanyima yakusoneka mazu kana, ahichile nawa muukalu weka wauvulu. Vamuvetele, nakumukasa, nakuvomba nakumuhaka mukamenga.

17. Kweseka nachisoneka chaWavaka-Kolinde 2, 4:​16-18, vyuma muka vyajikijishile Paulu omike hakumona ukalu?

¹⁷ Paulu akwachile ngolo jakumika hakushinganyeka havyuma atalililile. (Tangenu Wavaka-Kolinde 2, 4:​16-18.) Alwezele vaka-Kolinde ngwenyi, numba tuhu mutu wenyi wakuweluka apwile “nakuya nakunonga,” oloze kechelelele chuma kana chimuzeyeseko. Paulu ashinganyekelenga havyuma atalililile kulutwe. Lutalililo lwenyi lwakukayoyela mwilu lwapwile “[lwa]kuhambakana chikuma ulemu.” Ngocho alisuwile kumika hakumona kala ukalu mangana akatambule fweto. Paulu ashinganyekelenga halutalililo kana, kahechi chamulingishilenga “kupwa wamuhya hakumbi hakumbi.”

18. Uno lutalililo lwajikijishile ngachilihi Tihomir natanga yenyi?

¹⁸ Ndumbwetu Tihomir wamulifuchi lyaBulgaria, akwachile ngolo mwomwo yalutalililo lwenyi. Myaka yayindende kunyima, songo yenyi Zdravko afwile muponde. Ngocho Tihomir ahombelenga chikuma halwola lwalusuku. Hakusaka ahonese ukalu kana, ikiye natanga yenyi veji kushinganyekanga omwo nachikapwa kusanguka. Ambile ngwenyi: “Chakutalilaho, tweji kushimutwilanga okwo natukaliwanyina naZdravko, navyakulya natukamuwahishila, navatu natukasanyika kuchilika chakumutambwokesa navyuma natukamulweza kutalisa kumakumbi akukuminyina.” Tihomir ambile  ngwenyi kushinganyeka havyuma twatalilila chajikijishile tanga yavo nakutwalaho lika kupwa vakumika nakuvandamina lwola Yehova mwakasangula songo yenyi Zdravko.

19. Vyuma muka navimikafwa mutwaleho lika kupwa nalutalililo? (Talenu nawa muvwimbimbi.)

¹⁹ Uno vyuma muka navimikafwa mutwaleho lika kupwa nalutalililo? Chakutalilaho, nge mwatwama nalutalililo lwakukayoyela hano hamavu haya myaka, kaha tangenu omwo valumbununa Palachise muMbimbiliya nakuhunananaho. (Isa. 25:8; 32:​16-18) Shinganyekenu omwo nachikapwa chiyoyelo mukaye kakahya. Shinganyekenu muli mukaye kana. Vatu muka muli nakumona? Vivumo muka muli nakwivwa? Kaha muli nakwivwa ngachilihi? Munahase kutala mivwimbimbi yamumikanda yetu yize yasolola Palachise, chipwe kutala vindiyo yamwaso wakwamba ngwavo, Kaye Kakahya Kali Nakwiza, chipwe wakwamba ngwavo, Palachise Yili Hakamwihi, chipwe wakwamba ngwavo, Shinganyekenu Muli muPalachise. Nge natutwalaho lika kushinganyekanga halutalililo lwakukayoyela mukaye kakahya, kaha ukalu tuli nakumona naupwa kaha “[wa]hakapyapya kakandende, kaha nawa [wawashi] kumika.” (Koli. 2, 4:17) Yehova mwamijikijisa kuhichila muvyuma atushika vize twatalilila.

20. Uno tunahase kukwata ngachilihi ngolo numba tuhu tunazeye?

²⁰ Numba nge natuzeya, oloze “Kalunga mwatukafwa tukwate ngolo.” (Samu 108:13) Yehova natuhane vyuma twasakiwa mangana atujikijise. Shikaho, lombenu Yehova namuchima wenu wosena nakulinga chilongesa chauka, mangana amikafwe mutesemo mulimo wenu, nakumika muvyeseko, nakutwalaho lika kupwa vakuwahilila. Itavilenunga vandumbwenu vamikolezezenga. Twalenuho lika kupwa nalutalililo. Kaha navamijikijisa “nangolo josena nge omu mwaya ngolo jenyi jaupahu mangana muhase kukakachila chikuma namuchima wakutalilila chikoki nakuwahilila.”—Kolo. 1:11.