Enu Vanyike, Zamisenunga Lufwelelo Lwenu
“Lufwelelo lwapwa . . . hiunjiho wakusolola hatoma vyuma vivene vize katwamweneko.”—HEPE. 11:1.
MYASO: 41, 69
1, 2. Vanyike veji kuvashinjilanga valingile ika, kaha vyuma muka navivakafwa?
NDUMBWETU umwe wapwevo wakanyike wamuBritain vamulwezele kuli mukwavo muka-shikola ngwenyi: “Chasoloka nge wafwelela chikuma muli Kalunga.” Kaha ndumbwetu walunga muGermany asonekele ngwenyi: “Milongeshi jami vamona mijimbu yamuMbimbiliya yavuluka havyuma vyakutenga kupwa yamakuli. Shikaho veji kunangulanga vaka-shikola vafwelele ngwavo vyuma vyalijilile vivene.” Ndumbwetu mukwavo wapwevo wakanyike wamuFrance ambile ngwenyi: “Milongeshi vahashikola yami veji kulikomokelanga hakutachikiza ngwavo kuli vaka-shikola vamwe vaze vachili nakufwelela lika muvyuma yahanjika Mbimbiliya.”
2 Hakupwa muvangamba jaYehova vavakweze chipwe munaputuka kulinangula vyaikiye, kutala veji kumishinjilanga mufwelele mukunangula chakufwana nge vyuma vyalijilile vivene muchishishisa chakufwelela Kalunga uze apwa Tengi tahi? Nge chili ngocho, kaha kuli vyuma vimwe navimikafwa muzamise lufwelelo lwenu. Chuma chimwe shina kuzachisa uhashi wenu wakushinganyeka uze vamihana kuli Kalunga uze ‘naumikinganga.’ Naumikinga kumangana autu aze anahase kwenyeka lufwelelo lwenu.—Tangenu Vishimo 2:10-12.
3. Vyuma muka natushimutwila muchihande chino?
Chimo. 1, 2:4) Shikaho omu namulinangulanga Mazu aKalunga namikanda yetu, kamwatela kutanganga washi chakuzeneka kushinganyekahoko. Zachisenunga uhashi wenu wakushinganyeka mangana ‘mumone munalumbunukila’ vyuma munakutanga. (Mateu 13:23) Tumonenu omu kulinga vyuma kana chinahase kuzamisa lufwelelo lwenu muli Kalunga uze apwa Tengi, nakufwelela lika Mbimbiliya hakukekesa vihande vize vinakusolola “unjiho wakutamo.”—Hepe. 11:1, kwinyikila chamwishi.
3 Lufwelelo lwamwenemwene lwazama hachinyingi chakwoloka chakutachikiza Kalunga. (MUNAHASE KUZAMISA NGACHILIHI LUFWELELO LWENU
4. Mwomwo ika kufwelela muli Kalunga namuvyuma atenga chasakiwa lufwelelo, kaha vyuma muka twatela kutachikiza?
4 Kutala vatu vamwe vamilwezaho lyehi ngwavo vafwelela mukunangula chavyuma vyakulijila vivene mwomwo vyazama hasayasi kaha veka vafwelela Kalunga mwomwo yalufwelelo tahi? Omu mukiko vafwelela vavavulu. Oloze chapwa chachilemu kwanuka ngwetu, numba mutu afwelela muli Kalunga chipwe muvyuma vyakulijila vivene, oloze atela kupwa nalufwelelo muvyuma kana. Mujila muka? Kakweshi mutu amonaho lyehi Kalunga chipwe kumona chuma vali nakuchitengako. (Yowa. 1:18) Kaha nawa kakweshi mutu numba apwa muka-kulinangula vyasayasi uze amonaho lyehi chuma chakuyoya nachilyalumuna muchuma chikwavo chakuyoyako. Chakutalilaho, kakweshi mutu amonaho lyehi soko mwalyalumuna kupwa mutuko. (Yopa 38:1, 4) Shikaho, tuvosena twatela kupwa naunjiho wakutamo nakuzachisa uhashi wetu wakushinganyeka numba tufwelele vyuma kana. Kaposetolo Paulu asonekele kutalisa kuvyuma vyakutenga ngwenyi: “Vilinga [vyaKalunga] evi vahona kumona, nangolo jenyi jahaya myaka yosena nauKalunga wenyi, vyasoloka hatoma kufuma vene kukutenga chakaye nakuya kulutwe, mwomwo vavimwena kuvyuma atenga, mangana vakazeneke kuwana mwakulipatungwila.”—Loma 1:20.
Zachisenunga vinoma vili mulilimi lyenu hakushimutwilanga navakwenu (Talenu palangalafu 5)
5. Uno vatu jaKalunga vanavanangulanga ngachilihi kuzachisa uhashi wavo wakushinganyeka?
5 ‘Kutachikiza’ chalumbununa nawa kumona vyuma vize kanda visoloke. (Hepe. 11:3) Shikaho, vatu vaze vatachikiza vyuma vimwe veji kushinganyekanga havyuma kana keshi kumona nakwivwa kahako. Liuka lyaYehova linatuwahishila vinoma vize navitukafwa chikuma. Vinahase kutukafwa ‘tumone’ Tengi yetu kuhichila mulufwelelo. (Hepe. 11:27) Vinoma vimwe shina, vindiyo yaThe Wonders of Creation Reveal God’s Glory, nambuloshuwa ya Was Life Created? na The Origin of Life—Five Questions Worth Asking, namukanda wakwamba ngwavo Is There a Creator Who Cares About You? Jimangazini jetu nawa jeji kutukafwanga chikuma. Mumangazini yaTonenu! mwatwama vihande vyakwihwojola vaka-sayasi navatu veka havyuma vyavalingishile vafwelele muli Kalunga. Kaha nawa vihande vyakwamba ngwavo “Uno Valingile Vyakutenga Tahi?” vyasolola vyuma vyakukomwesa atenga Kalunga. Vaka-sayasi veji kufwilanga kutunga vyuma vyakufwana nge evi.
6. Kuwaha muka chatwama hakuzachisa vinoma tuli navyo, kaha munanganyala ngachilihi?
6 Ndumbwetu walunga wamyaka yakusemuka 19 wamuUnited States ahanjikile hajimbuloshuwa jivali tunavuluka ngwenyi: “Jinangukafwe chikuma. Ngunajitangenga mapapa kakavulu.” Ndumbwetu wapwevo wamuFrance asonekele ngwenyi: “Vihande vyakwamba ngwavo ‘Uno Valingile Vyakutenga Tahi?’ vinangukafwe chikuma. Vyasolola nge vatu valinangula chikuma vyasayasi vanahase kulondezeza vyuma atenga Kalunga oloze kaveshi kuhasa kutunga vyuma nge muze vavitengeleko.” Visemi vamuSouth Africa vaze vatwama namwana wamyaka yakusemuka 15 vambile ngwavo: “Mwanetu asaka kutanga chikuma chihande chakwihwojola mumangazini yaTonenu!” Nyi yenu? Kutala mweji kutanganga vinoma kanevi tahi? Vinahase kumikafwa muzamise lufwelelo lwenu ngana mwamutondo wamiji yakuzama. Echi nachizamisa lufwelelo lwenu nakumikafwa vahone kumihungumwisa kukunangula chamakuli.—Yele. 17:5-8.
KUFWELELA MUMBIMBILIYA
7. Mwomwo ika Kalunga asaka muzachisenga uhashi wenu wakushinganyeka?
7 Kutala chapwa chakuhenga kuhulisa vihula vyamwaza kutalisa kuMbimbiliya tahi? Nduma. Yehova asaka tuzachisenga ‘uhashi wetu wakushinganyeka’ mangana tutachikize kanawa muchano. Kasaka tukavangize kaha vyuma vafwelela vakwetuko. Shikaho zachisenu uhashi wenu wakushinganyeka mangana mutachikize chinyingi chakwoloka. Chinyingi kana chikiko nachimikafwa mupwenga nalufwelelo lwakukola. (Tangenu Wavaka-Loma 12:1, 2; WaChimoteu 1, 2:4.) Jila yimwe munahase kupwilamo nachinyingi kana shina kufwila kulinangula vyuma yahanjika Mbimbiliya.
8, 9. (a) Vandumbwetu vamwe vanahase kulivwisa kuwaha kulinangula vyuma muka? (b) Vamwe vananganyala ngachilihi hakushinganyeka havyuma veji kulinangulanga?
8 Vandumbwetu vamwe vanafwilanga kulinangula upolofweto wamuMbimbiliya, namijimbu yakunyima yahanjika haMbimbiliya, navyuma vavumbwojola vaka-sayasi, navyuma vyakwoloka vahanjika vaka-sayasi. Upolofweto umwe shina uze watwama hali Kuputuka 3:15. Echi chisoneka chavuluka mutwe wachihande waMbimbiliya, uze wakundwiza chiyulo chaKalunga nakujilika lijina lyenyi kuhichila muWangana. Echi chisoneka chazachisa mazu avifwanyisa, chasolola omu Yehova mwakakumisa kuyanda chavatu chosena chize chaputukile muEtene. Munahase kulinangula ngachilihi mukanda waKuputuka 3:15? Jila yimwe shina kusoneka lwola vyasolokele vyuma. Mwatela kusoneka navisoneka vize vyasolola omu Kalunga ateselemo upolofweto kana chindende chindende. Hakukekesa omu visoneka vyahanjika hachihande kana, namutachikiza jino ngwenu chikupu vene vapolofweto navaze vasonekele Mbimbiliya “vavatwaminyinyine nashipilitu yajila.”—Petu. 2, 1:21.
9 Ndumbwetu wamuGermany asonekele ngwenyi: “Wangana waKalunga vauvuluka chikuma muMbimbiliya nganomu wavula wanda. Numba tuhu Mbimbiliya vayisonekele kuvatu 40, oloze vavavulu vayoyele halwola lwakulihandununa kaha nawa kavalitachikijileko.” Ndumbwetu wapwevo wamuAustralia awahililile chikuma hakutanga chihande chimwe chamuKaposhi Kakutalila waDecember 15, 2013, chize chapwile nakuhanjika haPaseka. Echi chilika chalitombola nachisoneka chaKuputuka 3:15 nakwiza chaMeshiya. Asonekele ngwenyi: “Chihande kana changukafwile ngutachikize omwo apwa Yehova. Ngwawahililile chikuma hakutachikiza omu Kalunga akafwile vaIsalele mujila kaneyi, nomu Yesu ateselemo upolofweto kana. Ngwashinganyekele chikuma haupolofweto kanou waulemu wakuvuluka Paseka.” Mwomwo ika ou ndumbwetu ashinganyekele chikuma hachuma kana? Ahunananyine chikuma havyuma apwile nakutanga ‘nakumona omu vyalumbunukila.’ Echi chamukafwile kuzamisa lufwelelo lwenyi nakupandama kuli Yehova.—Mateu 13:23.
10. Uno tutenga valitavilile vaka-kusoneka Mbimbiliya chatukafwa ngachilihi?
10 Chuma chikwavo nachizamisa lufwelelo lwetu shina kushinganyeka hatwima namuchima wakulinyisa vapwile nawo vatu vaze vasonekele Mbimbiliya. Kushikulu, vaka-kusoneka vaswekelenga tutenga twavatwamina javo chipwe kuvuluka omu vafungulwile wangana wavoko. Oloze vapolofweto jaYehova vahanjikilenga muchano lwola lwosena. Vahanjikilenga hatoma tutenga twavatu javo navamyangana javo. (Miji. 2, 16:9, 10; 24:18-22) Vahanjikilenga nawa hatutenga twavo netu twavandumbwavo. (Samwe. 2, 12:1-14; Mako 14:50) Ndumbwetu umwe wamuBritain ambile ngwenyi, “Vatu vavavulu kavahanjika muchanoko. Chakutalilaho chavaze vasonekele Mbimbiliya, nachitukafwa tutwaleho lika kufwelela ngwetu Mbimbiliya vayihwima kuli Yehova.”
11. Uno vanyike vanahase kusolola ngachilihi nge vamona jindongi jamuMbimbiliya kupwa jajilemu?
11 Vatu vavavulu vafwelela ngwavo Mbimbiliya vayihwima kuli Kalunga mwomwo yatwama najindongi jakukafwa vatu. (Tangenu Samu 19:7-11.) Ndumbwetu wapwevo wakanyike muJapan asonekele ngwenyi: “Omu twaputukile kukavangiza vyuma yanangula Mbimbiliya, twawahililile chikuma mutanga yetu. Twatwaminenga jino mukuunda, nakulinunga nakulizanga.” Jindongi jamuMbimbiliya najitukinga kukulemesa chamakuli nakukupanda chize chinakuhungumwisa vavavulu. (Samu 115:3-8) Uno vatu valinangula mangana autu vaze vamba ngwavo kakwatwama Kalungako vanahase kuhungumwisa vatu tahi? Veji kunangulanga ngwavo vyuma vyalijilile vivene, kaha veji kulemesanga vyuma vyakutenga muchishishisa chakulemesa kaha Yehova. Vatu vaze vafwelela ngwavo kakwatwama Kalungako vashinganyeka ngwavo kuyoya chamutu chakulutwe chapendamina hali ivene. Chipwe ngocho kavakafwa vatu vapwenga nalutalililo lwamwazako.—Samu 146:3, 4.
KUSHIMUTWILA NAVAKWENU
12, 13. Jila muka yamwaza yakushimutwililamo vyuma vyakutenga chipwe Mbimbiliya navakwenu vaka-shikola, namilongeshi numba navatu veka?
12 Vyuma muka navimikafwa mushimutwilenga kanawa navakwenu hachihande chavyuma vyakutenga naMbimbiliya? Chatete, kanda kukukulula washi ngwenu mwatachikiza vyuma vafwelela vakwenuko. Vatu vamwe vashinganyeka ngwavo vafwelela muvyuma vyakulijila vivene oloze vashinganyeka nawa ngwavo Kalunga kwatwama. Vashinganyeka ngwavo Kalunga azachishile vyuma vyakulijila vivene kutenga vyuma vyakuyoya vyakulisezaseza. Veka vafwelela mukunangula chakwamba ngwavo vyuma vyalijilile vivene mwomwo vashinganyeka ngwavo nge vyuma kana vyapwile vyamakuli keshi kavavinangula kumashikolako. Kaha vamwe vanalitwamina kufwelela Kalunga mwomwo yavyuma vyavipi vili mumauka akwitava. Shikaho omu namushimutwila namutu chihande chakwamba ngwavo omu kuyoya chaputukile, nachipwa chamwaza kuvangila kumuhulisa vihula. Fwilenu kutachikiza vyuma afwelela. Nge namwashiwisa muchima wenu nakwivwilila kanawa omu anakuhanjika, kaha nahase kwivwilila vyuma namumulweza.—Chitu. 3:2.
13 Nge mutu umwe mwapopolola vyuma mwafwelela kutalisa kuvyuma vyakutenga, kaha munahase kushimutwila nenyi mujila yakuzangama. Munahase kumuhulisa alumbunune omwo chaputukile kuyoya nge Tengi keshi ikiye achiputukileko. Hakusaka chuma chakuyoya chatete chitwaleho lika kuyoya, chasakiwile kusemunwina nakuvula. Mutu umwe alinangula chikuma vyasayasi ambile ngwenyi kwasakiwile vyuma vyakufwana nge (1) chikova chakukola (protective membrane), (2) uhashi wakuneha ngolo jamujimba, (3) mijimbu yamumaselusi, kaha (4) maselusi atela kulitungulula avene. Ambile nawa ngwenyi: “Vatu veji kulikomokelanga nahatuvyuma twakuyoya twatundende chikuma tuze vatenga.”
14. Vyuma muka mwatela kulinga nge kamwatachikijile mwakulumbunwina mutu chihande chavyuma vyakulijila vivene nyi valingile vyakutenga?
14 Nge kamwaliwahishile kanawa kulumbununa chihande chakwamba ngwavo vyuma vyalijilile vivene chipwe chihande chakwamba ngwavo vyuma valingile vyakutenga, kaha munahase kuzachisa jila azachishile Paulu. Asonekele ngwenyi: “Zuvo hizuvo vayitunga kuli mutu, oloze uze atengele vyuma vyosena ikiye Kalunga.” (Hepe. 3:4) Jila kana yapwa yamwaza kuyizachisa. Chikupu vene, mujila vatengelamo vyuma yasolola nge kwapwile mutu wamangana avitengele. Munahase nawa kuzachisa mukanda uze unalitombola nachihande munakushimutwila. Ndumbwetu umwe wapwevo azachishile jimbuloshuwa twavulukanga hakushimutwila namukweze walunga uze kafwelelele muli Kalungako oloze afwelelele ngwenyi vyuma vyalijilile vivene. Omu mwahichile chalumingo chimwe, ou mukweze ambile ngwenyi, “Ngwafwelela jino ngwami Kalunga kwatwama.” Kutwala muze, vaputukile kumunangula Mbimbiliya kaha apwa jino ndumbwetu.
15, 16. Jijila muka jamwaza jakushimutwililamo navatu havyuma yahanjika haMbimbiliya, kaha mwatela kufwila kulinga vyuma muka?
15 Munahase kuzachisa jijila tunavuluka hakushimutwila namutu uze kafwelela muMbimbiliyako. Vangilenu kutachikiza vyuma afwelela navihande vize asaka. (Vishi. 18:13) Nge asaka kushimutwila vyasayasi, kaha mwevwa kuwaha kumulweza omu Mbimbiliya yahanjika mwakwoloka havyuma vyasayasi. Vatu veka veji kwivwanga kuwaha hakuvalweza vyakutalilaho vize vyasolola nge upolofweto wamuMbimbiliya wapwa wamuchano, kaha nawa Mbimbiliya yahanjika mwakwolola kutalisa kumijimbu yakushikulu. Chipwe munahase kumulweza jindongi jamuMbimbiliya jize jeji kutukafwanga jakufwana nge jize ahanjikile Yesu haChihande ChahaPili.
16 Anukenu ngwenu mwatela kufwila kuheta vatu kumichima keshi kulipula navo jipamiko. Shikaho ivwililenunga kanawa. Hulisenunga vihula vyavyashi mukulinyisa, namukalemesa chikumanyi hakuhulisa vakulwane. Echi nachivalingisa vavumbike vyuma munakuvalweza. Kaha nawa nachivalingisa vatachikize ngwavo mwamona vyuma mwafwelela kupwa vyavilemu. Vanyike vavavulu kavahanjika mukalemesako. Chipwe ngocho, kaveshi kumishinjila kukumbulula vatu vaze navasaka kumihonesa chipwe vaze valelesa vyuma mwafwelelako.—Vishi. 26:4.
FWILENU KUTACHIKIZA MUCHANO
17, 18. (a) Vyuma muka vinahase kumikafwa mutachikize muchano? (b) Chihula muka natushimutwila muchihande chinakavangizaho?
17 Lufwelelo lwakukola kalwapendamina kaha hakunangula chamaputukilo chamuMbimbiliyako. Shikaho mwatela kukekesa chikuma muMazu aKalunga kwijiva nge munakutondatonda luheto lwakuvumbama. (Vishi. 2:3-6) Zachisenunga kanawa vinoma vikwavo vili mulilimi lyenu vyakufwana nge Watchtower Library on DVD, naCHISETE CHAMIKANDA CHAHAINTERNET, naWatch Tower Publications Index chipwe Chinoma Chakukafwa Vinjiho jaYehova Kuhehwojola. Kaha nawa fwilenu kutanganga Mbimbiliya yosena yamuundu. Munahase kuyitanga yosena mumwaka umwe kaha. Kutanganga Mazu aKalunga nachitukafwa chikuma tuzamise lufwelelo lwetu. Kalama wakujinguluka umwe eji kwanukanga omu apwile mukweze ngwenyi: “Chuma changukafwile ngumone Mbimbiliya kupwa Mazu aKalunga shina kuyitanganga lwola lwosena. Mijimbu yamuMbimbiliya yize ngwatangilenga omu ngwapwile ngukanyike yangulumbunukilile mukuhita chalwola. Echi changukafwile nguzovoloke kushipilitu.”
18 Enu visemi, mweji kuzatanga nangolo hakukafwa vana venu vazovoloke kushipilitu. Munahase kuvakafwa ngachilihi vapwenga nalufwelelo lwakukola? Chihande chinakavangizaho nachikumbulula chihula kana.