1, 2. (a) Ukalu muka veji kumonanga visemi, kaha vanahase kuuhonesa ngachilihi? (b) Vyuma muka viwana natushimutwila?

VALUNGA napwevo vamuFrance vambile ngwavo: “Numba tuhu twafwelela Yehova oloze echi kachalumbununa nge navana vetu navakafwelela muli ikiyeko. Lufwelelo kalwapwa nge chuma chakuswanako. Vana vetu veji kupwanga nalufwelelo hakuvanangula chikoki chikoki.” Kaha ndumbwetu wamuAustralia asonekele ngwenyi: “Ukalu waunene vanahase kumona visemi shina kunangula vana vavo vazamise lufwelelo lwavo. Chasakiwa kuzachisa vinoma vyakulisezaseza muli navyo. Munahase kushinganyeka ngwenu munakumbulula kanawa chihula chamwanenu. Oloze kutwala muze mwahulisa cheka chihula chochimwe. Nahase kwivwishisa vyuma namumulweza lelo, oloze mukuhita chalwola mwavulyama. Shikaho mwatela kuhilukila hilukila vihande vimwe numba avivwishise.”

² Nge mwapwa muchisemi, kaha kutala lwola lumwe mweji kulivwa nge kamwatelemo kunangula nakwolola vana venu mangana vazamise lufwelelo lwavo tahi? Chikupu vene tuvosena katweshi kuhasa kuzata mulimo kana hakupendamina kaha hamangana etuko. (Yele. 10:23) Oloze tunahase kuuzata nge natupendamina hali Kalunga atutwaminyine.  Tutalenu vyuma viwana vinahase kumikafwa hakunangulanga vana venu vazamise lufwelelo lwavo. (1) Vatachikizenu kanawa. (2) Hakenu muchima kukuvanangula. (3) Zachisenunga vifwanyisa vyavyashi. (4) Pwenunga namuchima wakutalila chikoki nakuvalombelako.

3. Visemi vanahase kulondezeza ngachilihi Yesu hakunangula?

³ Yesu kevwilenga woma kuhulisa vaka-kumukavangiza vyuma vafweleleleko. (Mateu 16:13-15) Mulondezezenunga. Chapwa chamwaza kupwanga hamwe navana venu kuchihela chakuzeneka vyema mangana vamilweze vyuma vili kumichima yavo. Munahase nawa kushimutwila navo haukalu umwe munamono chipwe vyuma vize vali nakuhuhwasana. Ndumbwetu walunga wamyaka yakusemuka 15 muAustralia asonekele ngwenyi: “Kakavulu tata ashimutwililenga nayami kutalisa kulufwelelo lwami nakungukafwa. Anguhulishilenga ngwenyi: ‘Mbimbiliya yahanjika vyuma muka?’ ‘Kutala wafwelela vyuma yahanjika tahi?’ ‘Mwomwo ika wafwelela vyuma kana?’ Asakilenga ngukumbulule kuzachisa mazu ami, keshi kuhanjika mazu ahanjikile tata chipwe mamako. Kaha kutwala muze ngwaputukile kutachikiza kanawa mwakukumbulwila.”

4. Mwomwo ika chapwila chachilemu kukumbululanga vihula veji kuhulisanga vana? Hanenu chakutalilaho.

⁴ Nge mwana katachikijile kanawa vyuma vimwe yanangula Mbimbiliyako, kaha kamwatela kutenuka chipwe kumupopololako. Oloze mutalililenu chikoki nakumukafwa evwishise kanawa. Chisemi umwe walunga ambile ngwenyi: “Monenunga vihula navamihulisa vana venu kupwa vyavilemu. Kamwatela kuvilelesako kaha nawa kamwatela kulitwamina kushimutwila hachihande vanamilweze mwomwo ngwenu pamo nachimivwisa sonyi.” Chapwa chachilemu kumona vihula navamihulisa vana venu kupwa hikatachikijilo kakusolola nge vanakusaka kwivwishisa. Yesu naikiye ahulishilenga vihula vyavilemu omu apwile namyaka yakusemuka 12. (Tangenu Luka 2:46.) Ndumbwetu walunga wamyaka yakusemuka 15 muDenmark ambile ngwenyi: “Omu ngwahuhwasanyinenga numba nge twapwile mukwitava chamuchano, visemi jami vangukafwile mujila yakuunda numba tuhu valizakaminyine. Vakumbulwile vihula vyami vyosena kuzachisa Mbimbiliya.”

5. Uno visemi vanahase kusolola ngachilihi ngwavo vamona lufwelelo lwavana vavo kupwa lwalulemu?

⁵ Fwilenunga kutachikiza kanawa vyuma veji kushinganyekanga vana venu, nomu veji kwivwanga naukalu wavo. Kanda kushinganyeka ngwenu vali nalufwelelo lwakukola mwomwo yakuyanga kukukunguluka nakuya navo hamwe mumulimo wamuwandeko. Lwola lwosena shimutwilenunga navo vyuma vyakushipilitu. Valombelenungako nakulombela navo hamwe. Fwilenunga kutachikiza vyeseko vanakumona nakuvakafwa mwakuvihonesela.

6. Nge visemi vanalinangula muchano wamuMbimbiliya, kaha unahase kuvakafwa ngachilihi vapwenga vaka-kunangula vakulindunuka?

⁶ Yesu anangwilenga vatu nakuvaheta kumichima mwomwo azangilenga Yehova, naMazu aKalunga, kaha nawa azangilenga vatu. (Luka 24:32; Yowa. 7:46) Zangi kana yatela kumikafwa enu visemi munangulenga vana venu nakuvaheta kumichima. (Tangenu Lushimbi lwamuchivali 6:5-8; Luka 6:45.) Shikaho, enu visemi linangulenunga kanawa Mbimbiliya namikanda tweji kuzachisanga hakulinangula. Fwilenunga kulinangula havyuma vyakutenga navihande vize vyatwama mumikanda yetu vyahanjika havyuma vyakutenga. (Mateu 6:26, 28) Nge namulinga ngocho, kaha namutachikiza vyavivulu, nakusakwilila chikuma Yehova nakumikafwa munangule kanawa vana venu.—Luka 6:40.

7, 8. Vyuma muka vyeji kufumangaho nge visemi navatachikiza kanawa muchano wamuMbimbiliya? Hanenu chakutalilaho.

⁷ Nge munatachikiza kanawa muchano wamuMbimbiliya, kaha namufwila kulwezako vaka-tanga yenu. Vanangulenungawo kala lwola keshi nge  halwola lwakuwahisa vyakukunguluka chipwe hakulemesa Kalunga mwatanga kahako. Kaha nawa kachatela kupwa nge hichiteliko, oloze mwatela kufwilanga kushimutwila navo nge muze mweji kushimutwilanga makumbi osena. Valunga napwevo vamuUnited States veji kushinganyekanga hali Yehova omu tanga yavo yeji kulivwisanga kuwaha kutala vyuma vyakutenga chipwe omu veji kulyanga vyakulya vimwe. Vambile ngwavo: “Tweji kulwezanga vana vetu ngwetu vyuma vyosena evi atuhana Yehova vyasolola zangi namangana atwama nawo.” Omu valunga napwevo vamuSouth Africa veji kuzachilanga hamwe navana vavo mulitepa, veji kulwezanga vana vavo omwo jimbuto jeji kusokanga mujila yakukomwesa nomwo jeji kukolanga. Vambile ngwavo: “Tweji kufwilanga kukafwa vana vetu vamonenga kuyoya kupwa chachilemu.”

⁸ Omu chisemi umwe muAustralia apwile namwana walunga wamyaka yakusemuka kafwe 10, ayile nenyi kuzuvo veji kulaminanga vyuma vyakushikulu mangana amukafwe kuzamisa lufwelelo lwenyi muli Kalunga namuvyuma atenga. Chisemi ambile ngwenyi: “Omu twahetele twamwene vyuma vyakuyoya vyamukalungalwiji vyakushikulu vavuluka ngwavo ammonoids natrilobites. Twalikomokelele hakumona vyuma kanevi vatungile mujila yakukomwesa, kaha kaheshi chihandwa navyuma vyakuyoya tunakumona makumbi anoko. Shikaho nge kuyoya chafumine kuchuma chimwe nakusemunwina vyavivulu, kaha mwomwo ika evi vyuma vyakuyoya vyakushikulu vyapwile mumiyachi yakulisezaseza? Chuma kana changukomwesele kaha ngwalwezeleko namwanami.”

9. Mwomwo ika chapwila chachilemu kuzachisa vifwanyisa, kaha chisemi umwe asolwele ngachilihi ngocho?

⁹ Kakavulu, Yesu azachishilenga vifwanyisa vize vyakafwile vatu vashinganyeke, nakuvaheta kumichima nakwanuka vyuma kana. (Mateu 13:34, 35) Vanyike veji kutachikizanga washi vyuma. Shikaho enu visemi mwatela kuzachisanga kanawa vifwanyisa hakuvanangula. Omu mukiko alingile nachisemi umwe muJapan. Omu vana venyi vavali vahetele myaka yakusemuka 8 na 10, avanangwile omu apwa mavu nomu Yehova atuzakama hakuwatenga. Hakusaka vevwishise, ahanyine vana venyi mavele, nashuka nakofi. Kaha avalwezele vamuwahishileko kofi. Ambile ngwenyi: “Vayiwahishile kanawa. Omu ngwavahulishile ngwami mwomwo ika munayiwahishila kanawa, vambile ngwavo mwomwo twafwilanga kuyiwahisa ngana muze mwazanga enu vavene. Ngwavalwezele ngwami omu mukiko Kalunga azachishile jipeho jakulisezaseza mangana tuyoye kanawa hano hamavu.” Chifwanyisa kana chavakafwile vevwishise, nakuvalingisa valinangule vyavivulu. Chikupu vene kavavulyamine vyuma valinangwileko.

10, 11. (a) Chifwanyisa muka munahase kuzachisa hakukafwa vana venu vazamise lufwelelo lwavo? (Talenu muvwimbimbi wakulivanga.) (b) Vifwanyisa muka mwasaka kuzachisa chikuma?

¹⁰ Munahase kuzachisa nawa jila yize mweji kuwahishilangamo vyakulya mangana mukafwe vana venu vazamise lufwelelo lwavo muli Kalunga. Mujila muka? Nge munocho mbolo, munahase kulumbunwina vana venu vyuma munazachisa. Kufumaho vahanenu muhako wakufwana nge apo, kaha vahulisenu ngwenu: “Uno mwatachikiza ngwenu kuli vyuma vimwe vazachishile hakutenga eyi apo tahi?” Kufumaho tetenu apo hakachi, kaha hanenu vana venu mukoswa.  Munahase kuvalumbunwina ngwenu vyuma vazachishile “vavisoneka” mumukoswa wacho mujila yayikalu kwivwishisa. Munahase kuvahulisa ngwenu: “Kachi nge jijila veji kuzachisanga hakwocha mbolo vajisonekele kuli mutu, nyi iya asonekele jila yize vatengelelemo apo?” Nge mwatwama namwana wakukola, kaha munahase kumulumbunwina ngwenu jila vazachishile hakutenga apo vavisonekelele muDNA yamutondo wacho. Munahase kutangila hamwe vifwanyisa vimwe vasoneka mumbuloshuwa yakwamba ngwavo The Origin of Life—Five Questions Worth Asking, lifwo 10 nakuheta ku 20.

¹¹ Visemi vavavulu veji kulivwisanga kuwaha kushimutwila navana vavo vihande vyamuTonenu! vyakwamba ngwavo “Uno Valingile Vyakutenga Tahi?” Vanahase nawa kuzachisa evi vihande kunangula vana vavo mujila yayashi mangana vevwishise kanawa. Chakutalilaho, valunga napwevo vamuDenmark vafwanyishile ndeke kutujila. Vambile ngwavo: “Jindeke jalifwana natujila. Uno jindeke jinahase kumba maulu nakutota jindeke tahi? Uno tujila veji kuwilanga kuchivaza tahi? Uno tunahase kwesekesa ngachilihi chivumo chandeke kumyaso yatujila? Jino iya atwama namangana chikuma, uze atengele jindeke tahi, nyi uze atengele tujila?” Kuhulisa vihula kanevi navihula vyeka vyavyashi, navikafwa vana venu vapwenga ‘nauhashi wakushinganyeka’ nakuzamisa lufwelelo lwavo muli Kalunga.—Vishi. 2:10-12.

12. Uno vifwanyisa vinahase kukafwa ngachilihi vana vafwelele vyuma yahanjika Mbimbiliya?

¹² Kuzachisa vifwanyisa vyamwaza chinahase kukafwa vana vatwaleho lika kufwelela ngwavo Mbimbiliya yahanjika mwakwoloka. Chakutalilaho, achitalenu mukanda waYopa 26:7. (Tangenu.) Munahase kusolola ngachilihi ngwenu echi chisoneka vachihwima kuli Kalunga? Munahase kulumbununa kaha vishina. Oloze munahase kuzachisa chimweso mangana vana venu vevwishise kanawa. Valwezenu ngwenu mumakumbi aYopa kakwapwile makina atelesikopu namakina ekako. Vana venu vanahase kwamba ngwavo chapwile chachikalu vatu kufwelela ngwavo chuma chachinene chakufwana nge mavu chinahase kuzezalala halengelenge. Vanahase kuzachisa ngunja chipwe lilolwa hakusolola ngwavo chuma chachilemu kacheshi kuhasa kuzezalala halengelengeko. Echi nachikafwa vana venu vafwelele ngwavo Yehova alwezele vatu vasoneke vyuma vyakwoloka muMbimbiliya shimbu kanda vatu vavitachikize.—Nehe. 9:6.

13, 14. Visemi vanahase kukafwa ngachilihi vana vavo vamone nganyo yatwama hakukavangiza jindongi jamuMbimbiliya?

¹³ Chapwa chachilemu kulweza vana venu nganyo yatwama hakukavangiza jindongi jamuMbimbiliya. (Tangenu Samu 1:1-3.) Kuli jijila jajivulu munahase kuzachisa. Chakutalilaho, munahase kulweza vana venu vashinganyeke nge munakuya nakutwama halitungu lyakwakusuku, kaha vahulisenu vamilweze kuvula chavatu navasaka kukatwama navo. Kaha vahulisenu ngwenu, “Vilinga muka vatela kupwa navyo ava vatu numba tukatwame mukuunda nakulivwasana?” Munahase nawa kushimutwila navo vilinga vasoneka hamukanda Wavaka-Ngalesha 5:19-23.

¹⁴ Vanahase kulinangulaho vyuma vivali hachakutalilaho kanechi. Chatete, jishimbi jaKalunga jeji kukafwanga vatu vatwame mukuunda nakulivwasana. Chamuchivali, Yehova ali nakutunangula mangana tukatwame kanawa mukaye kakahya. (Isa. 54:13; Yowa. 17:3) Munahase kushindakanya evi vishina vivali hakuzachisa chakutalilaho chamumikanda yetu. Munahase kuchiwana muKaposhi Kakutalila hachihande chakwamba ngwavo Mbimbiliya Yeji Kwalumunanga Kuyoya chaVatu. Chipwe nge muchikungulwilo chenyi muli ndumbwetu uze alumwine chiyoyelo chenyi mangana evwise Yehova kuwaha, kaha munahase kumusanyika akeze kuzuvo yenu nakumilweza omu alumwine kuyoya chenyi. Vyakutalilaho kana vyeji kulingisanga vatu vamone jindongi jamuMbimbiliya kupwa jajilemu.—Hepe. 4:12.

15. Vyuma muka mwatela kutachikiza hakunangula vana venu?

 ¹⁵ Enu visemi kanda namupopololanga vana venu hakuvanangulako. Oloze pwenunga vakunangakana. Vakafwenunga vevwishise kweseka namyaka yakusemuka vali nayo. Vanangulenunga mujila yayashi nakuzamisa lufwelelo lwavo. Chisemi umwe walunga ambile ngwenyi: “Fwilenunga kuzachisa jijila jajihya hakunangula vana venu.”

16. Mwomwo ika chapwile chachilemu kutalililanga vana venu chikoki hakuvanangulanga? Hanenu chakutalilaho.

¹⁶ Shipilitu yaKalunga yikiko nayivakafwa vapwenga nalufwelelo lwakukola. (Ngale. 5:22, 23) Ngana mwamihako, namutu asakiwa lwola numba azamise lufwelelo lwenyi. Shikaho mwatela kutalilila chikoki vana venu nakupwa nalukakachila hakuvanangula. Chisemi walunga wamuJapan uze atwama navana vavali ambile ngwenyi: “Ami napuwami twazakama chikuma vana vetu. Omu vapwile vanyike, ngwapwilenga nakuvanangula hakumbi hakumbi muminyutu 15 kufumisako kaha makumbi aze twayilenga nakukukunguluka. Kachakaluhwile kuvanangula muminyutu 15 koko.” Kalama wakujinguluka umwe asonekele ngwenyi: “Omu ngwapwile ngumukweze, ngwahulishilenga chikuma vihula, kaha nawa vyuma vimwe kavyangulumbunukililengako. Kutwala muze, vihula vyami vavikumbulwilenga kukukunguluka, nahachilongesa chakulemesa Kalunga mwatanga nahachilongesa chahauka. Shikaho chapwa chachilemu visemi kupwa naluzema hakunangulanga vana vavo.”

17. Mwomwo ika visemi vatela kusolwela vana vavo chakutalilaho chamwaza, kaha tanga yimwe yasolwele ngachilihi chakutalilaho chamwaza?

¹⁷ Tachikizenu ngwenu chapwa chachilemu kusolola chakutalilaho chamwaza. Vana veji kumonanga vyuma mweji kulinganga, kaha navakiko vanahase kulinga mwomumwe. Shikaho enu visemi mwatela kutwalaho lika kuzamisa lufwelelo lwenu. Vana venu vatela kumona ngwavo mwafwelela chikupu Yehova. Valunga napwevo vahalitungu lyaBermuda veji kulombelanga hamwe navana vavo kuli Yehova avakinge nge vali muukalu, kaha nawa veji kukafwanga vana vavo valombenga kuli Yehova. Tweji kulwezanga nawa mwanetu wamukulwane ‘afwelelenga chikuma Yehova, nakuzata natwima mulimo waWangana nakuhona kulizakamina chikuma.’ Omu eji kumonanga nganyo yatwamaho, eji kutachikizanga ngwenyi Yehova ikiye ali nakutukafwa. Echi chinamukafwe afwelele chikuma Kalunga navyuma yahanjika Mbimbiliya.”

18. Chuma muka chachilemu vatela kutachikiza visemi?

¹⁸ Nge vana vanakolo, kaha vatela jino kuzamisa lufwelelo lwavo vavene. Visemi vanahase kaha kutumba nakutukumwina. Oloze Kalunga ikiye eji kukolesanga. (Koli. 1, 3:6) Shikaho mulombenunga Kalunga amihane shipilitu yenyi, nakuzata nangolo hakunangula vana venu. Nge namulinga ngocho, kaha Yehova mwamikisula.—Efwe. 6:4.