1, 2. (a) Ukalu muka vali nakumona vatu vavavulu makumbi ano, kaha vyuma muka vinakufumamo? (b) Vyuma muka vatufwelelesa hamukanda waIsaya 41:10, 13?

NDUMBWETU wapwevo umwe uze apwa payiniya washimbu yosena, uze nawa asomboka kuli mukulwane muchikungulwilo ambile ngwenyi: “Numba tuhu ngweji kuzatanga milimo yakushipilitu lwola lwosena, oloze ngunalipikinga naukalu wakulizakamina hamyaka yayivulu. Cheji kungulingisanga nguhone kusavala tulo nakuhona kulikangula kumujimba, nakuhona nawa kutwama kanawa navakwetu. Kaha lwola lumwe ngweji kusakanga kulitwamina kuzata milimo yakushipilitu.”

² Kutala munahase kwivwishisa ukalu wayou ndumbwetu tahi? Mukaye kaSatana muli vyuma vyavivulu vize vinahase kutulingisa tulizakamine nakuhomba. Vyuma kanevi vinafwane nge chikungo chakwimikisa wato. (Vishi. 12:25) Vyuma muka vinahase kumilingisa mwivwenga ngana muze evwile ou ndumbwetu? Pamo mwomwo yakufwisa mutu mwazanga, chipwe mwomwo yakuviza chikuma, nyi pamo mwomwo yakufwila kuzakama tanga yenu omu vyuma vinakaluhwa muno mukaye chipwe mwomwo yakumifumbukila. Vyuma kanevi vinahase kumizeyesa mukuhita chalwola nakumilingisa muhone kupwa vakuwahilila mukuyoya chenu. Oloze mwatela  kufwelela ngwenu Kalunga mwamikafwa.—Tangenu Isaya 41:10, 13.

3, 4. (a) Mbimbiliya yazachisa ngachilihi lizu “mavoko”? (b) Vyuma muka vinahase kutulingisa tuhombe?

³ Mbimbiliya yavuluka vihanda vyamujimba hakulumbununa vyuma vyakulisezaseza. Chakutalilaho, livoko valivuluka kakavulu muMbimbiliya. Kukolezeza livoko lyamutu chinahase kulumbununa kumukolezeza, nakumujikijisa, nakumuhana ngolo. (Samwe. 1, 23:16, kwinyikila chamwishi; Ezela 1:6) Chalumbununa nawa kukafwa mutu atalilile vyuma vyamwaza kulutwe.

⁴ Kuzeula mavoko chalumbununa mutu uze nahombo, nazeye, chipwe nahono lutalililo. (Miji. 2, 15:7, kwinyikila chamwishi; Hepe. 12:12) Kakavulu mutu ali muukalu kanou eji kuzeyanga kushipilitu. Kachi nge namuhita muukalu uze naumilingisa muhombe, chipwe muzeye kumujimba, namuvishinganyeka chipwe kushipilitu, kaha vyuma muka navimikafwa mulipike naukalu kana? Vyuma muka navimikafwa mutwaleho lika kumika nakupwa vakuwahilila?

5. (a) Vyuma muka twatela kulinga nge tuli muukalu, kaha vyuma muka twatela kwanuka? (b) Vyuma muka natushimutwila?

⁵ Tangenu Zefwanyiya 3:16, 17. Muchishishisa chakwivwa woma nakuhomba, setu Yehova uze apwa muka-kutuzakama atulweza ngwenyi twatela ‘kumbila kulizakamina chetu chosena hali ikiye.’ (1Petu. 1, 5:7) Twatela kwanuka mazu ahanjikile Kalunga kuli vaIsalele vaze vapwile muufunge ngwenyi, Livoko lyenyi lyangolo ‘kalyeshi lyalihi numba lizeneke kulwila’ vangamba jenyi vakushishikako. (Isa. 59:1) Natushimutwila havyakutalilaho vitatu vyamuMbimbiliya vize vyasolola omu Yehova eji kukolezezanga vatu jenyi mangana valinge mwaya muchima wenyi chamokomoko nakala ukalu navamona. Shinganyekenu omu vyakutalilaho kana vinahase kumikafwa.

6, 7. Vyuma muka natulinangula kumujimbu wavaIsalele wakufungulula vaAmaleke?

⁶ Omu vaIsalele vavasokwele muundungo muEjipitu, vaAmaleke vavalukukile. Kweseka namazu avalwezele Mose, Yoshuwa ahamukile nakutwaminyina vaIsalele kujita. Halwola lwolumwe Mose ayile naAlone naHule helu lyapili haze vamwene kanawa jita. Uno ava malunga vatatu vevwile woma nakuchina kujita tahi? Nduma.

⁷ Mose alingileko chuma chimwe chize chavakafwile vafungulule vaka-kole javo. Azundwile mavoko enyi mwilu oku nakwate mbwechi yaKalunga wamuchano. Omu Mose azundwile mavoko enyi nayize mbwechi mwilu, Yehova akafwile vaIsalele vafungulule vaAmaleke. Oloze omu Mose “azewile mavoko enyi, vaAmaleke nawa vakwachile ngolo kuhambakana vaIsalele.” Omu Mose azeyele kuzundula mavoko enyi, Alone naHule “vamumbachilile lilolwa nakulitumbika hamavu, kaha atwamineho. Alone naHule vakwachililile mavoko enyi, ou kusali yimwe ou kusali yikwavo, mangana mavoko enyi apwenga lika mwilu palanga nakukulauka chalikumbi.” Chikupu vene, vaIsalele vafungulwile vakakole javo mwomwo Kalunga avakafwile nalivoko lyenyi lyangolo.—Kulo. 17:8-13.

8. (a) Vyuma muka alingile Asa omu vaEchopa vejile nakulwa jita navaYuta? (b) Tunahase kukavangiza ngachilihi chakutalilaho chaAsa?

⁸ Yehova akafwile nawa Mwangana Asa. MuMbimbiliya vavulukamo mijimbu yajijita jajivulu, oloze jita yayinene shina yize ashile Zela kaEchopa namwangana Asa. Zela apwile namaswalale 1,000,000 vaze vatachikijile kanawa kwasa jita. Maswalale javaEchopa vavulile chikuma kuhambakana vaAsa. Munahase kushinganyeka ngwenu Asa atela evwile woma nakulizakamina nakulizuzukila ngwenyi navavafungulula. Oloze hahaze vene apendaminyine  hali Yehova amukafwe. Kachapwile chachashi Asa kufungulula vaka-kole jenyiko mwomwo vavulile chikuma, oloze “kuli Kalunga vyuma vyosena vyapwa vyavyashi.” (Mateu 19:26) Ngocho Kalunga asolwele ngolo jajinene “hakufungulula vaze vaEchopa kumeso aAsa,” uze “azachilile Yehova namuchima wenyi wosena hamakumbi akuyoya chenyi osena.”—Miji. 2, 14:8-13; Vamya. 1, 15:14.

9. (a) Chuma muka chakafwile Nehemiya atungulule kembwe yaYelusalema? (b) Kalunga akumbulwile ngachilihi kulomba chaNehemiya?

⁹ Achishinganyekenu omu evwile Nehemiya hakuya kuYelusalema. Nganda kana kayapwile yakukingiwako kaha vakwavo vaYuleya nawa valizuzukilile. VaYuleya vahombele nakuhona jino kutungulula kembwe yaYelusalema mwomwo yakuvevwisa woma kuli vaka-kole javo. Kutala vyuma kana vyevwishile Nehemiya woma nakumulingisa ahombe tahi? Nduma. Nehemiya apendaminyinenga hali Yehova nakumulomba amukafwe ngana muze valingilenga vangamba jaYehova vakushishika vakufwana nge Mose, naAsa, naveka. Nahalwola kanelu, Nehemiya apendaminyine hali Yehova. VaYuleya vamwene ukalu kana kupwa waunene chikuma, oloze Yehova akumbulwile kulomba chaNehemiya nakumukafwa. Kalunga azachishile ‘ngolo jenyi jajinene’ ‘nalivoko lyenyi lyangolo’ mangana akolezeze vaYuleya. (Tangenu Nehemiya 1:10; 2:17-20; 6:9.) Kutala mwafwelela ngwenu Yehova ali nakuzachisa ‘ngolo jenyi jajinene,’ ‘nalivoko lyenyi lyangolo’ mangana akolezeze vangamba jenyi makumbi ano tahi?

10, 11. (a) Uno Satana eji kufwila kuzachisa vyuma muka mangana atuhonese kuzachila Kalunga? (b) Vyuma muka Yehova eji kuzachisanga hakutukolezeza nakutuhana ngolo? (c) Munanganyala ngachilihi kumashikola amuliuka?

¹⁰ Twatachikiza ngwetu Liyavolo mwatwalaho lika kufumbukila vangamba jaKalunga vahone kuzata milimo yakushipilitu. Eji kuzachisanga makuli, najifulumende, navatwamina vamauka akwitava navaka-kulikanga kuli Kalunga. Mwomwo ika? Mangana tuzeye nakulitwamina kuzata mulimo wetu wakwambulula mujimbu wamwaza waWangana. Chipwe ngocho, Yehova mwatuhana ngolo hakuzachisa shipilitu yenyi yajila. (Miji. 1, 29:12) Shikaho chapwa chachilemu kupendamina hashipilitu kana mangana tuhase kuhonesa ukalu ali nakuneha Satana nakaye kenyi kakuhuka. (Samu 18:39; Koli. 1, 10:13) Kaha nawa twatela kupendamina haMazu aKalunga aze vahwima nashipilitu yenyi. Achishinganyekenu hakulya chakushipilitu chamuMbimbiliya chize tweji kutambulanga kakweji hikakweji. Mazu atwama hali Zekaliya 8:9, 13 (tangenu) vawasonekele halwola vapwile nakutungulula tembele yaYelusalema oloze nawatukafwa nayetu makumbi ano.

¹¹ Yehova eji kutukolezezanga nawa omu veji kutunangulanga hakukunguluka chachikungulwilo, nachachihanda, nachangalila namashikola amuliuka. Vyuma tweji kulinangulanga vyeji kutukafwanga tupwenga natwima nakufwila kulitomena kuzata milimo yakushipilitu nakutesamo milimo yetu yakushipilitu. (Samu 119:32) Kutala muli nakufwila kukavangiza vyuma mweji kulinangulanga mangana mupwenga cheka vakujikiza tahi?

12. Vyuma muka twatela kulinga mangana tutwaleho lika kuzama kushipilitu?

¹² Yehova akafwile vaIsalele vafungulule vaAmaleke navaEchopa, kaha nawa akafwile Nehemiya navakwavo vatungulule kembwe yaYelusalema. Shikaho nayetu nawa Kalunga mwatuhana ngolo tumike omu navatufumbukila, nakututoleka chipwe nge tunalizakamina mangana tuhase kutwalaho lika kuzata mulimo wakwambulula. (Petu. 1, 5:10) Katwatela kufwelela ngwetu Yehova mwatukafwa mujila yakukomwesako, oloze twatela kuzata noho hakumina ngolo jetu. Echi  chasakiwa kutanga Mazu aKalunga lwola lwosena, nakuwahisanga chimweza vyakukunguluka, nakukungulukanga lwola lwosena, nakupwanga nachilongesa chahauka, nechi chakulemesa Kalunga mwatanga nakupendaminanga hali Yehova mukulomba. Kanda natufwila vyuma chipwe milimo yize nayitutangula tuhone kuhaka muchima kuvyuma ali nakuzachisa Yehova hakutukolezeza nakutukafwako. Nge munamono ngwenu munaputuka kuzelendenda vyuma vimwe tunavuluka, kaha lombenu kuli Kalunga mangana amikafwe. Talenu omu shipilitu nayimihana “muchima wakufwila kulinga vyuma nangolo jakulingamo nawa.” (Fwili. 2:13) Uno munahase kukolezeza ngachilihi vakwenu?

13, 14. (a) Ndumbwetu umwe vamukolezezele ngachilihi omu afwishile puwenyi? (b) Tunahase kukolezeza ngachilihi vakwetu?

¹³ Twatwama navandumbwetu mukaye kosena vaze veji kutukolezezanga. Anukenu mazu asonekele kaposetolo Paulu ngwenyi: “Jikijisenu mavoko aze analingi mbwambwala namambuli aze anazeye, kaha sungamisenu lika jijila jakutambukamo namahinji enu.” (Hepe. 12:12, 13) Mulikulukaji lyamyaka lyakulivanga, vaka-Kulishitu vavavulu vakolezezelenga vakwavo mangana vazame kushipilitu. Omu mukiko chili namakumbi ano. Ndumbwetu umwe walunga uze afwishile muka-mahyenyi nakumona ukalu wakulisezaseza ambile ngwenyi: “Ngunejiva jino ngwami katweshi kusakula ukalu nautuwana chipwe lwola watela kutuwana chipwe tando watela kumbatako. Oloze kulomba nachilongesa chahauka vikiko vinangukafwe chikuma kupwa wakuzama kushipilitu. Kaha nawa vandumbwami vanangukafwenga chikuma. Ngunatachikiza jino kulema chatwama hakutunga usoko wamwaza naYehova shimbu kanda ukalu wizenga.”

¹⁴ Alone naHule vakafwile Mose hakukwachilila mavoko enyi halwola vapwile nakulwa jita. Nayetu nawa tunahase kuwana jijila jakukafwilamo vakwetu nge vali muukalu. Veya twatela kukafwa? Vaze vanashinakajiwa, navaze vanakuviza, navaze vanakufumbukila kuli vaka-tanga yavo, navaze vanakwivwa uli, chipwe vaze vanafwisa. Tunahase nawa kukolezeza vanyike vaze vali nakulipika naukalu wakuvashinjila kulinga vyuma vyavipi chipwe kufwila “kufukila” muno mukaye hakuya kumashikola ahelu chipwe kufwila luheto. (Teso. 1, 3:1-3; 5:11, 14) Wanenunga jijila jakusolwelamo vakwenu chisambo nge muli haZuvo yaWangana, namumulimo wamuwande, chipwe hakulya navo vyakulya numba nge muli nakuhanjika navo hashinga.

15. Mwomwo ika chapwile chachilemu kuhanjikanga mazu amwaza kuli vandumbwetu?

¹⁵ Kufuma haze Asa afungulwile vaka-kole jenyi, kapolofweto Azaliya akolezezele Asa navatu jenyi ngwenyi: “Oloze enu jikizenu, kanda namuzeula mavoko enuko mwomwo navakamifweta hamilimo yenu.” (Miji. 2, 15:7, kwinyikila chamwishi) Echi chalingishile Asa akilikite chikuma mangana akindulwise kulemesa chamuchano. Nayenu nawa mazu enu amwaza anahase kukolezeza chikuma vakwenu. Chikupu vene, munahase kuvakafwa vatwaleho lika kuzachila Yehova. (Vishi. 15:23) Kaha nge muli kukukunguluka, fwilenunga kukumbululangaho mwomwo mazu enu amwaza anahase kukolezeza chikuma vakwenu.

16. Vakulwane muvikungulwilo vanahase kulondezeza ngachilihi Nehemiya hakukolezeza vandumbwavo muchikungulwilo? Hanenu vyakutalilaho vyakusolola omu vandumbwetu vanamikafwenga.

¹⁶ Nehemiya navatu jenyi vavakafwile kuli Yehova vazate mulimo wavo. Kaha vakumishile kutungulula kembwe yaYelusalema mumakumbi 52 kaha. (Nehe. 2:18; 6:15, 16) Nehemiya kapwile kaha muka-kutetekela mulimoko oloze naikiye azanyine mumulimo wakutungulula  kembwe. (Nehe. 5:16) Navakulwane muvikungulwilo veji kulondezezanga Nehemiya hakukafwa milimo yakutungatunga, chipwe kuwahisa nakutungulula jiZuvo jaWangana mungalila yavo. Veji kulondezezanga nawa Nehemiya hakuzata hamwe navaka-kwambulula muwande, nakutambukila vandumbwavo nakuvakafwa. Veji kukolezezanga nawa vandumbwavo vaze vanazeye mwomwo yakulizakamina.—Tangenu Isaya 35:3, 4.

17, 18. Vyuma muka twatela kulinga nge tuli muukalu chipwe nge tunalizakamina?

¹⁷ Kuzachila hamwe navandumbwetu cheji kutulingisanga tupwenga vakulinunga. Cheji kulingisanga nawa usepa wetu upwenga wakukola nakutukafwa tutwaleho lika kufwelela vyuma vyamwaza vize naukatulingila Wangana waKalunga. Nge natutwalaho lika kukolezeza vakwetu, kaha nachivakafwa valipike naukalu vanakumona, nakutwalaho lika kutalilila vyuma vyamwaza vinakwiza kulutwe. Kaha nawa kukolezeza vakwetu chinahase kutukafwa tutwaleho lika kuzama kushipilitu nakushinganyeka havyuma vize atushika Kalunga. Chikupu vene, echi cheji kutukolezezanga nayetu nawa.

¹⁸ Kushinganyeka omwo Yehova nakafwenga nakukinga vangamba jenyi vakunyima, chatela kutukafwa tutwaleho lika kuzamisa lufwelelo lwetu nakumufwelela. Shikaho nge muli nakuhita muukalu chipwe kumishinyinyika, kaha ‘kanda namulizuzukilako.’ Oloze twalenuho lika kulombanga kuli Yehova nakwitavila livoko lyenyi lyangolo limikolezeze nakumikafwa mukalivwise kuwaha vyuma vyamwaza naukatulingila Wangana.—Samu 73:23, 24.