Kuhakwila Mujimbu Wamwaza Kumeso aVilolo vaFulumende
“OU MUTU kuli ami napu chuma chakusakula, mangana akavilike lijina lyami kuli vaka-mafuchi, nakuli vamyangana.” (Vili. 9:15) Mwata Yesu ahanjikile awa mazu kuli kaposetolo Paulu, kaYuleya uze alumukile nakupwa muka-Kulishitu.
Mwangana umwe hali vaze “vamyangana” ayile nakwambulila apwile Nelo, Mwangana wavaLoma. Munahase kwivwa ngachilihi nge yenu mwapwile nakuhakwila lufwelelo lwenu kuli ou muka-kuyula? Vaka-Kulishitu vosena vavakolezeza kukavangiza chakutalilaho chaPaulu. (Koli. 1, 11:1) Jila yimwe tunahase kumulondezezelamo shina yakuhakwila lufwelelo lwetu kuli vaka-kukuyula ngana muze alingile ikiye.
Jishimbi jaMose jikiko vakavangijilenga vaIsalele, kaha nawa jikiko vatelele kukavangiza vaYuleya vosena. Hanyima yaPendekoseta 33 C.E., vaka-kulemesa Kalunga vamuchano kavakavangijilenga jino Jishimbi jaMoseko. (Vili. 15:28, 29; Ngale. 4:9-11) Chipwe ngocho, Paulu navakwavo vaka-Kulishitu, kavasawilenga Jishimbi kanako oloze vambulwilenga natwima mujingalila javaYuleya chakuzeneka chuma chakuvatangula. (Koli. 1, 9:20) Chakutalilaho, mapapa kakavulu Paulu ayilenga mujisunangonga, nakwambulila vatu vaze vatachikijile Kalunga kaApalahama, kaha ashimutwililenga navo kanawa haVisoneka VyachiHepeleu.—Vili. 9:19, 20; 13:5, 14-16; 14:1; 17:1, 2.
Vaposetolo vasakwile Yelusalema kupwa chihela chatete chakwambulwila mujimbu wamwaza. Vanangwilenga vatu mutembele. (Vili. 1:4; 2:46; 5:20) Lwola lumwe, Paulu ayile kuYelusalema kaha vamukwachile nakumuhaka mukamenga. Echi chikiko chamulingishile vamutwale kuLoma.
PAULU MWAZACHISA JISHIMBI JAVALOMA
Uno vaka-kuyula vavaLoma vamwenenga ngachilihi vyuma anangwilenga Paulu? Hakusaka kukumbulula chihula kana, tutalenu omu vaLoma vamwenenga mauka akwitava. Kavashinjililenga muyachi umwe kwecha kwitava chavoko kuvanga kaha nge chinalimbalaka najishimbi jaFulumende chipwe chakundwiza vilinga vyavipi.
* Paulu azachishilenga jishimbi javaLoma jize jakingilenga vaYuleya hakuhakwila kwitava chavaka-Kulishitu kuli vaka-kuyula vavaLoma.
VaLoma vahanyine vaYuleya lisesa lyakulisakwila vyakulinga muwangana wavo. Mukanda wakwamba ngwavo Backgrounds of Early Christianity wamba ngwawo: “Kwitava chavaYuleya vachimwene kupwa chachilemu muwangana wavaLoma. . . . VaYuleya vapwile nalisesa lyakulemesa Kalunga mukwitava chavo, kaha nawa kavavashinjilililenga kulemesa tulunga vavaLomako. Vayoyelenga kweseka najishimbi jamungalila yavo.” Kaha nawa kavazanyinenga mumilimo yauswalaleko.Vaka-kufumbukila Paulu vasowangijilenga vatu navaka-kuyula mangana vamwimanyine nakole. (Vili. 13:50; 14:2, 19; 18:12, 13) Talenu hachuma chimwe chasolokele. Vakulwane muchikungulwilo chamuYelusalema vatambwile mujimbu uze watanjile kuli vaYuleya wakuvuluka ngwavo Paulu ali nakunangula vatu “valikange nakuseza Jishimbi jaMose.” Mujimbu kana kachi walingishile vatu vamwe vaze valumukile kupwa vaka-Kulishitu vashinganyeka ngwavo Paulu kapwile nakuvumbika jishimbi jaKalungako. Kaha nawa vaka-zango yaSunendeline vambile ngwavo vaka-Kulishitu vapwile vaka-kulikanga vaze vafumine mukwitava chavaYuleya. Nge chuma kana chapwile chamuchano, kachi vaYuleya vaze valikachilenga navaka-Kulishitu vavazangamishile. Kachi vavahungile kuvatu nakuvakanyisa kunangula mutembele chipwe mujisunangonga. Shikaho, vakulwane vamuchikungulwilo valwezele Paulu alihakwile hakuya mutembele nakulinga vyuma vize Kalunga kamulwezeleko, numba tuhu kachapwile chakuhenga kulinga ngocho.—Vili. 21:18-27.
Omu mukiko alingile Paulu, echi chamukafwile ‘ahakwile mujimbu wamwaza nakuuzamisa najishimbi.’ (Fwili. 1:7) Omu vapwile hatembele, vaYuleya vapihililile chikuma kaha vasakile kujiha Paulu. Kaha kapitau kamaswalale wavaLoma ahakile Paulu mukamenga. Omu Paulu amwene ngwenyi hinavamuveta vikote, alisolwele jino ngwenyi apwile kaLoma. Echi chalingishile vamutwale kuKesaliya kuze vaYuleya vapwilenga nakuvayula kuli vaLoma. Oku jino apwile nalisesa lyakuhakwila vyuma afwelelele kumeso avaka-kuyula. Chuma kana chalingishile vatu vatachikize kanawa vaka-Kulishitu.
Mukanda waVilinga kapetulu 24 wahanjika omu Paulu emanyine kumeso aFwelise, nguvulu wavaLoma wamuYuleya uze atachikijile vyuma vimwe vafwelela vaka-Kulishitu. VaYuleya vawanyinyine Paulu milonga yitatu yakuhokola jishimbi javaLoma. Vambile ngwavo apwile muka-kusowangiza vatu vafumbukile fulumende muli vaYuleya muwangana wosena, apwile twamina wakaliuka kakuhanduka, kaha nawa asakile kujilulula tembele yize vakingilenga kuli vaLoma. (Vili. 24:5, 6) Milonga kaneyi kachi yamulingishile vamujihe.
Chapwa chachilemu kuli vaka-Kulishitu makumbi ano kutachikiza omu Paulu asambile kumilonga yosena eyi. Apwile wakumika nakusolola kalemesa. Paulu avalumbunwinyine kuzachisa Jishimbi naMazu avaPolofweto, ngwenyi apwile nalisesa lwakulemesa ‘Kalunga kavakakuluka jenyi.’ Eli likiko lisesa vapwile nalyo navakwavo vaYuleya vaze vapwile nakuyula kuli vaLoma. (Vili. 24:14) Kutwala muze, Paulu ahashile kuhakwila nakulumbununa lufwelelo lwenyi kuli nguvulu Poloshu Fwesetu, nakuli Mwangana Helote Angalipa.
Hakusaka chihande chenyi vachiyule kanawa, Paulu ambile ngwenyi: “Ngunalombo chihande chami vakachisope kuli Kesale!” uze apwile muka-kuyula wamunene halwola luze.—Vili. 25:11.
KUSOPA CHIHANDE CHAPAULU KUZANGO YAKESALE
Kangelo alwezele Paulu ngwenyi: “Watela kwimana kumeso aKesale.” (Vili. 27:24) Mwangana wavaLoma Nelo ahanjikile halwola aputukile kuyula ngwenyi keshi kusopanga vihande ukawenyiko. Hamyaka 8 yachiyulo chenyi, ahanyine mulimo kana kuli vakwavo. Mukanda waThe Life and Epistles of Saint Paul wambile ngwawo, nge Nelo netavila kusopa chihande, kaha achisopelelenga muzango yenyi nakusanyika mahako jenyi vakulindunuka vamukafweko.
Mbimbiliya kayahanjika ngwayo Nelo ikiye asopele chihande chaPaulu chipwe kulweza mahako jenyi vevwilile kuchihande chaPaulu nakumulweza ikiyeko. Kala mweshomwo vyapwile vyuma, Paulu alumbunwine ngwenyi alemeselenga Kalunga kavaYuleya kaha akolezezele vatu vosena vononokenga kujifulumende. (Loma 13:1-7; Chitu. 3:1, 2) Chasoloka nge Paulu ahashile kuhakwila mujimbu wamwaza kuli vaka-kuyula mwomwo asambile kuzango yaKesale.—Fwili. 2:24; Fwile. 22.
TWATELA KUHAKWILA MUJIMBU WAMWAZA
Yesu alwezele tumbaji twenyi ngwenyi: “Navakamitwalanga nawa kumeso avanguvulu navamyangana mwomwo yayami, mangana ukapwe unjiho kuli vakiko nakuli vaka-mafuchi.” (Mateu 10:18) Chapwa hikutokwa chachinene kwimanyinako Yesu mujila kaneyi. Tunahase kusamba kujizango jakusopela hakuhakwila mujimbu wamwaza. Numba tuhu vatu vakuhona kukupuka navasaka kutuhonesa, oloze tunahase kufukila mwomwo Yehova ikiye atuhana lisesa lyakwambulula mujimbu wamwaza. Wangana waKalunga ukiko kaha naukakumisa luyanjisa nakuhengesa chiyulo.—Kwambu. 8:9; Yele. 10:23.
Namakumbi ano, tunahase kutohwesa lijina lyaYehova hakuhakwila lufwelelo lwetu. Twatela kupwa vakumika, nalukakachila nakukunyula vatu ngana muze alingile Paulu. Yesu alwezele vaka-kumukavangiza ngwenyi kavatela ‘kushinganyeka chimweza mumichima yavo mwakukalihakwila vaveneko, mwomwo ikiye mwakavahana mazu namangana aze navakahona vaka-kuvemanyina nakole vosena kulingulula chipwe kuhamikako.’—Luka 21:14, 15; Chimo. 2, 3:12; Petu. 1, 3:15.
Nge vaka-Kulishitu navahakwilanga lufwelelo lwavo kumeso avamyangana, navanguvulu chipwe vilolo veka, kaha vanahase kuhana unjiho kuvatu vaze vavakalu kwambulila mwomwo yafuma yavo. Jizango jimwe jinalumunako jishimbi mangana vahane vatu lisesa lyakuhanjika kala vyoshovyo vanasake nakulemesa Kalunga mukuunda. Chamokomoko nomu navasopelamo vihande vyetu, Kalunga eji kwivwanga kuwaha nge vangamba jenyi navomika hakuvayanjisa.
Tweji kutohwesanga lijina lyaYehova hakuhakwila lufwelelo lwetu
^ par. 8 Muka-kusoneka umwe walijina lyaJames Parkes ambile ngwenyi: “VaYuleya . . . vapwile nalisesa lyakulinganga viwanyino vyavo. Kachapwile chakuhenga kuvetavisa kulinga evi viwanyinoko, mwomwo vaLoma vahanyine vatu lisesa lyakukavangiza visemwa vyavo muwangana wavo wosena.”