Nganyalenunga Hakumitwaminyina Kuli Yehova
NGWASAKWILE KANAWA VYAKULINGA MUPOLAND
NDUMBWETU umwe wapwevo ambile ngwenyi: “Vangujimikile omu ngwapwile namyaka yakusemuka 15, kahomu mwahichile tukweji 6 ngwaputukile kuzata upayiniya wakukafwa. Kahomu mwahichile mwaka wamuundu ngwalisonekesele upayiniya washimbu yosena. Omu ngwakumishile shikola, ngwalwezele kalama wakujinguluka mangana nguyenga nakuzachila kuze kwapwile nakusakiwa vaka-kwambulula. Ngwasakile kufuma mumbaka ngwapwilenga nakuli kaka uze ngwatwaminenga nenyi, uze kapwile Chinjiho chaYehovako. Ngwevwile kupihya kumuchima omu kalama wakujinguluka angulwezele ngwenyi nanguzachilanga mumbaka vene yize ngwasemukilile. Kangwasakile ejive ngwenyi ngunapihililako. Ngwayile kuzuvo nakushinganyeka havyuma angulwezele. Ngwalwezele mukwetu vangulwezele kuzata nenyi ngwami: “Nguli navishinganyeka vyakuhenga nge vize apwile navyo Yona. Oloze kutwala muze Yona ayile kuNyineve. Shikaho nayami ngwatela kuya nakuzachila kuze vanangulweze.”
Ambile nawa ngwenyi: “Ngunazate jino upayiniya hamyaka 4 mumbaka ngwatwama, kaha ngunamono nganyo yatwama hakukavangiza vyuma navatulweza kuli tulama. Ngwapwilenga navishinganyeka vyakuhenga. Oloze ngwapwa jino wakuwahilila. Ngwahashile kutwaminyina vilongesa vyaMbimbiliya 24 mukakweji umwe. Ngwaputukile jino kunangula nakaka Mbimbiliya, uze angufumbukililenga, kaha ngweji kumusakwililanga Yehova.”
VYUMA VYAMWAZA VYASOLOKELE MUFIJI
Muka-kulinangula Mbimbiliya umwe muFiji apwile mucheseko chakusakula kuya kukukunguluka changalila chipwe kuya kuchilika nalunga lyenyi chakwanuka likumbi asemukile kausoko kalunga lyenyi. Lunga lyenyi amwitavishile kuya kukunguluka changalila. Kaha alwezele lunga lyenyi ngwenyi mwakavawana kuchilika nge kukunguluka chinakumu. Omu afumine kukukunguluka, ashinganyekele ngwenyi kachapwile chakwoloka kwazana muvilika vize navyenyeka usoko wenyi naKalungako, ngocho kayileko.
Lunga lyenyi alwezele vausoko wenyi ngwenyi etavishile puwenyi kuya “kukukunguluka changalila” numba ezenga kuchilika, oloze vausoko wenyi vamulwezele ngwavo, “Keshi kwizako, mwomwo Vinjiho jaYehova kavalinga vilika vyakwanuka makumbi akusemukako.” *
Lunga lyenyi awahililile hakutachikiza ngwenyi puwenyi nomika hakukavangiza vyuma afwelela nakuzachisa kanawa chivezu chenyi. Kushishika chou ndumbwetu wapwevo chamukafwile ambulile lunga lyenyi navatu veka. Vyuma muka vyafuminemo? Lunga lyenyi etavilile kumunangula Mbimbiliya nakuputuka kuya kukukunguluka hamwe napuwenyi.
^ par. 7 Talenu chihande chamuKaposhi Kakutalila waChingeleshi waDecember 15, 2001 chakwamba ngwavo “Vihula Vyakufuma Kuli Vaka-Kutanga.”
