Twalenuho Lika Kuzata Nangolo Mangana Kalunga Amikisule
“Unalipiki naKalunga navatu, kaha unavahase.”—KUPU. 32:28.
MYASO: 60, 38
1, 2. Ukalu muka veji kumonanga vangamba jaYehova?
KUFUMA vene kuli mutu watete wakushishika Avele nakuheta kumakumbi etu ano, vangamba jaYehova vakushishika vanalipikinga naukalu. Kaposetolo paulu asonekelele vaka-kulishitu vavaHepeleu ngwenyi, “mwomikile hakuhita muukalu waunene namuluyando,” omu vasakile Kalunga avevwile kuwaha nakuvakisula. (Hepe. 10:32-34) Paulu afwanyishile ukalu valipikilenga nawo vaka-Kulishitu kukuhema chakulitapa chapwile muHelase chakufwana nge kulaha, nakulikwata mukapanga, nakulyasa jikonyi. (Hepe. 12:1, 4) Namakumbi ano nawa tuli nakulaha chakuya kukuyoya, kaha tuli nakulipika navaka-kole jetu vaze vafwila kututangula, nakutuhungumwisa nakutushinyinyika, nakusaka nawa kutulingisa tuhone kupwa vakuwahilila nakuhona jino kushishika meso etu hafweto.
2 Chatete tuli nakulipika (chipwe ngwetu, “kulwa,” kwinyikila chamwishi) naSatana hamwe kaha nakaye kenyi kakuhuka. (Efwe. 6:12) Chapwa chachilemu kulihenda “kuvyuma vize vyazama chikuma,” vyamukaye vyakufwana nge kunangula chamakuli, namangana autu, navilinga vyavipi vyakufwana nge ujila, nakunwa makanya, nakupenda nakunwa maundu akupendesa. Kaha nawa lwola lwosena twatela kulipika natutenga twetu naukalu wakuhomba.—Koli. 2, 10:3-6; Kolo. 3:5-9.
3. Uno Kalunga eji kutunangulanga ngachilihi mangana tulipike navaka-kole jetu?
3 Kutala chinahase kupwa chachashi kuhonesa ukalu kanou tahi? Mukiko, oloze chasakiwa kukilikita. Ngana muze valingilenga vaka-kwasa jikonyi vakunyima, Paulu ambile ngwenyi: “Mujila nguli nakwashilamo jikonyi jami, kangweshi nakujasa nakuveta mupehoko.” (Koli. 1, 9:26) Ngana muze muka-kwasa jikonyi eji kufwilanga kuveta mukwavo, nayetu twatela kwijiva mwakufungulwila vaka-kole jetu. Yehova eji kutunangulanga nakutukafwa tufungulule vaka-kole jetu. Eji kutuhananga jindongi jakutukinga jize jatwama muMbimbiliya. Eji kutukafwanga nawa kuhichila mumikanda yetu yahanjika haMbimbiliya, nakukukunguluka chachikungulwilo, nachachihanda nechi changalila. Kutala muli nakukavangiza vyuma muli nakulinangulanga tahi? Nge chiku, kaha chinafwane nge ‘munakuveta mupeho,’ kamweshi nakufungulula vaka-kole jenuko.
4. Tunahase kufungulula ngachilihi upi?
4 Vaka-kole jetu vanahase kutulukuka halwola luze katwatachikijileko kaha vanahase kutufungulula halwola luze tunazeye, ngocho twatela kupwa vakuvanguluka shimbu yosena. Mbimbiliya yatuhuhumuna ngwayo: “Kanda namwechelela upi umifungululeko, oloze fungululenunga upi hakulinganga mwamwaza.” (Loma 12:21) Mazu akwamba ngwavo kanda natwechelela ‘upi utufungululeko’ asolola nge tunahase kufungulula upi. Tunahase kulinga ngocho hakutwalaho lika kufungulula upi. Ngocho kachi nge natutwalaho kulwa, kaha tunahase kufungulula Satana, nakano kaye, natutenga twetu. Shikaho, katwatela kwechelela Satana atuhonese kufungulula upiko.—Petu. 1, 5:9.
5. (a) Vyuma muka navitukafwa mangana tutwaleho lika kulipika naukalu numba Kalunga atukisule? (b) Vatu muka vamuMbimbiliya natushimutwila?
5 Hakusaka vaze vali nakulipika naukalu vafukile, vatela kutachikiza chuma chinakuvalingisa mangana vafwile kumika. Hakusaka Kalunga avevwile kuwaha nakuvakisula, vatela kutwalaho lika kufwelela mazu atwama hamukanda waHepeleu 11:6 akwamba ngwavo: “Mwomwo weshowo mwapandama kuli Kalunga, atela kwitavila ngwenyi kwatwama, kaha nawa ngwenyi ikiye apwa muka-kufweta vaze vali nakumutondatonda chikuma.” Mazu achiHelase valumuna ngwavo “kumutondatonda chikuma” alumbununa kuzata nangolo. (Vili. 15:17) MuVisoneka mwatwama malunga namapwevo valufwelelo vaze vazachile nangolo mangana Yehova avakisule. Chakutalilaho, Yakova, naLakele, naYosefwe naPaulu vahichile muukalu waunene oloze vatwalileho lika kumika kaha Yehova avakiswile. Tunahase kulondezeza ngachilihi ava vatu vawana?
LUKAKACHILA LWEJI KUNEHANGA KUTOKWA
6. Vyuma muka vyakafwile Yakova akakachile, kaha vamukiswile ngachilihi? (Talenu muvwimbimbi wakulivanga.)
6 Yakova alipikile naukalu oloze omikile mwomwo azangile Yehova, nakumona nawa vyuma vyakushipilitu kupwa vyavilemu. Afwelelele nawa ngwenyi Yehova mwakakisula vaka-tanga yenyi. (Kupu. 28:3, 4) Omu Yakova apwile namyaka kafwe 100 azachile nangolo jenyi josena mangana Kalunga amukisule, echi chikiko chamulingishile alipike nakangelo. (Tangenu Kuputuka 32:24-28.) Kutala Yakova apwile najingolo jakulipika nauze kangelo tahi? Nduma. Oloze afwililile kulipika lika nauze kangelo palanga nomu amufungulwile. Chikupu vene, vamukiswile mwomwo yalukakachila lwenyi. Vamulukile lijina ngwavo Isalele, (kulumbununa “Muka-kulipika [Muka-kukachila] naKalunga” chipwe “Kalunga Eji Kufungululanga.”) Yakova vamukiswile kuli Yehova, nayetu nge natukakachila kaha Yehova mwatwivwila uselewa nakutukisula.
7. (a) Ukalu muka ahichilemo Lakele? (b) Chuma muka chamukafwile atwaleho lika kumika nakumukisula kuli Yehova?
7 Lakele, pwevo lyaYakova afwililile kumona omu Yehova mwakatesamo lushiko ashikile lunga lyenyi. Oloze kwapwile ukalu uze amwene nge keshi kuhasa kuuhonesako. Kapwile navanako. Halwola luze, mutu uze ahonenenga kupwa navana vamumwenenga kupwa muka-kuvindama. Chuma muka chakafwile Lakele kulipika naukalu kanou numba tuhu chamukolelenga kumuchima? Kechele kulipika naukalu kanako. Oloze atwalilileho lika kumika hakulombanga kuli Yehova shimbu yosena. Yehova evwile kulomba chaLakele kaha amukiswile hakumuhana vana. Echi chikiko chalingishile Lakele ambenga ngwenyi: “Ngunalipiki chikuma . . . Kaha ngunamufungulula.”—Kupu. 30:8, 20-24.
8. Ukalu muka waunene ahichilemo Yosefwe kaha chakutalilaho chenyi nachitukafwa ngachilihi?
8 Chakutalilaho chamwaza chaYakova naLakele, chakafwile mwanavo Yosefwe atachikize mwakufungulwila vyeseko amwenenga. Omu Yosefwe apwile namyaka yakusemuka 17, vyuma vyalumukile mukuyoya chenyi. Vandumbwenyi vamulanjishile muundungo mwomwo vamwivwilile lwiso. Kaha kutwala muze omikile hamyaka yayivulu omu vamukashile mukamenga muEjipitu mwomwo yakumuvangijikila. (Kupu. 37:23-28; 39:7-9, 20, 21) Yosefwe kahombeleko kaha nawa kalamine koko chipwe kushinganyeka kulinga sambanjingako. Oloze ahakile kaha mangana kuusoko wenyi naYehova. (Levi 19:18; Loma 12:17-21) Chakutalilaho chaYosefwe chatela kutukafwa. Chakutalilaho, kachi nge twamwene ukalu kuunyike chipwe nge tuli nakuhita muukalu waunene, kaha twatela kutwalaho lika kumika nakupwa nalukakachila. Twatela kufwelela ngwetu nge natulinga chuma kana, kaha Yehova mwatukisula.—Tangenu Kuputuka 39:21-23.
9. Vyuma muka twatela kulinga numba Yehova atukisule ngana muze akiswile Yakova, naLakele naYosefwe?
9 Achishinganyekenu hacheseko muli nakuhitamo. Cheseko kana chinahase kupwa kumilinga mwamupi, kumimona ulumbi chipwe kumitoleka. Nyi pamo vanamivangijikila vyuma vimwe mwomwo yakumivwila lwiso. Muchishishisa chakuhomba, mwatela kwanuka vyuma vyakafwile Yakova naLakele naYosefwe vatwaleho lika kuzachila Yehova nakuwahilila. Kalunga avazamikishile nakuvakisula mwomwo vatwalileho lika kumona vyuma vyakushipilitu kupwa vyavilemu. Vatwalilileho lika kumika muukalu nakuzata kweseka nakulomba chavo. Tuli nakuyoyela kusongo yakatwamino kamyaka yino yayipi, ngocho twatela kuzata nangolo mangana tutwaleho lika kutalilila vyuma vatushika. Kutala muli nakufwila kuzata nangolo mangana Yehova amivwile uselewa tahi?
FWILENU KUZATA NANGOLO MANGANA YEHOVA AMIKISULE
10, 11. (a) Tunahase kulipika ngachilihi naukalu numba Kalunga atukisule? (b) Vyuma muka navitukafwa tusakule vyuma vyakwoloka nakuhonesa kuhomba chipwe vyuma vyakututangula?
10 Ukalu muka uze unahase kutulingisa tuzate nangolo numba Kalunga atukisule? Ukalu umwe vanakuhitamo vavavulu shina wakulipika natutenga twavo. Kaha veka nawa chasakiwa kuzatanga nangolo numba vapwenga navishinganyeka vyamwaza kutalisa kumulimo wakwambulula. Nyi pamo munakufwila kupwa lika vakumika chamokomoko nakuhona kulikangula kumujimba chipwe kwivwa uli. Kaha nawa katwatela kulelesa vakwetu vaze veji kuchiwananga kupwa chachikalu
kukonekela vakwavo vaze vanavapihisako. Chamokomoko namyaka tunazachila Yehova, tuvosena twatela kufwila kuzata nangolo mangana tuhonese vyuma vize navitutangula kuzachila Kalunga uze eji kufwetanga vaka-kushishika.Kutala muli nakumika muukalu mangana Kalunga amikisule tahi? (Talenu palangalafu 10 na 11)
11 Chapwa chachikalu kusakula vyuma vyakwoloka chipwe kukavangiza jishimbi jaKalunga. Echi chinahase kupwa chachikalu nge muchima wetu naututangisa. (Yele. 17:9) Kachi nge munamono ngwenu muchima wenu unaputuka kumitangisa, kaha lombenu kuli Kalunga amihane shipilitu yenyi yajila. Shipilitu yajila nakulombanga vinahase kumikafwa mulingenga vyuma vyakwoloka nakumikisula kuli Yehova. Lingenunga kweseka navyuma munakulomba. Fwilenunga kutanga Mbimbiliya hakumbi hakumbi, nakupwanga nachilongesa chahauka naKulemesa Kalunga mwaTanga.—Tangenu Samu 119:32.
12, 13. Vyuma muka vyakafwile vandumbwetu vavali vechenga vishinganyeka vyavipi?
12 Kuli vyakutalilaho vyavivulu vyasolola omu Mazu aKalunga, nashipilitu yenyi namikanda yetu vinakafwenga vaka-Kulishitu kuhonesa vishinganyeka vyakuhenga. Ndumbwetu umwe wamukweze atangile chihande chakwamba ngwavo “How Can You Resist Wrong Desires?” muTonenu! yaChingeleshi yaDecember 8, 2003. Vyuma muka ahanjikile? Ambile ngwenyi: “Nguli nakufwila kuhonesa vishinganyeka vyakuhenga. Omu ngwatangile chihande chize chavulukile nge vavavulu vali nakulipika naukalu wakuhonesa vishinganyeka vyakuhenga, changukafwile nguhone kuhomba. Mwomwo navandumbwami vapwile nakuhita muukalu kanou.” Ou ndumbwetu Koli. 2, 12:7) Hakuwana nge vali nakutwalaho lika kulipika naukalu kanou mangana vapwenga lika navilinga vyamwaza, vatela kutwalaho kushinganyeka havyuma vyamwaza vili kulutwe. Ambile ngwenyi, “Ngweji kufwilanga jino kupwa wakushishika hakumbi hakumbi. Kaha ngweji kusakwililanga chikuma Yehova naliuka lyenyi, hakutukafwa tutwaleho lika kupwa vakushishika mukaye kano kakuhuka.”
anganyalile nawa hakutanga chihande chakwamba ngwavo “Alternative Life-Styles—Does God Approve?” chize chapwile muTonenu! yaChingeleshi yaOctober 8, 2003. Awanyine nge ukalu kanou wapwile nge “mungonga mumujimba” kuli vamwe. (13 Tutalenu nawa chakutalilaho chandumbwetu wapwevo wamuUnited States. Asonekele ngwenyi: “Ngunamisakwilila chikuma hakutuhananga kulya chakushipilitu lwola lwosena halwola lwakutamo. Lwola lwosena ngweji kwivwanga ngwami vihande kana vavisonekela kaha yami. Hamyaka yayivulu ngunalipikinga navishinganyeka vyavipi vize ahunga Yehova. Halwola lumwe, ngwasaka kulitwamina kulipika naukalu kana. Ngwatachikiza vene ngwami Yehova apwa wakeke nakukonekela, oloze hakuwana nge ngukwechi vishinganyeka vyavipi vize ngweji kulinganga, cheji kungulingisanga ngulivwe nge Yehova keshi kungukafwako. Ukalu kanou unangulingisa nguhone kupwa wakuwahilila mukuyoya chami. . . . Omu ngwatangile chihande chakwamba ngwavo ‘Kutala Mwatwama ‘Namuchima Wakwijiva’ Yehova Tahi?’ chamuKaposhi Kakutalila waMarch 15, 2013, ngwamwene ngwami Yehova ali nakusaka kungukafwa.”
14. (a) Paulu evwile ngachilihi haukalu alipikilenga nawo? (b) Tunahase kulipika ngachilihi natutenga twetu?
14 Tangenu Wavaka-Loma 7:21-25. Paulu atachikijile ukalu watwama hakulipika navishinganyeka vyavipi natutenga twetu mwomwo yakuhona kukupuka. Chipwe ngocho afwelele chikupu ngwenyi nahase kufungulula ukalu kanou hakulombanga kuli Yehova lwola lwosena nakufwelela mundando yakusokola yaYesu. Nyi ngachilihi etu? Tunahase kufungulula tutenga twetu. Mujila muka? Hakulondezezanga Paulu nakupendamina hali Yehova, keshi mungolo jetuko nakufwelela nawa mundando yakusokola.
15. Mwomwo ika kulomba chinahase kutukafwa tupwenga vakushishika nakumika muvyeseko?
15 Shimbu jimwe Kalunga nahase kutwechelela mangana atale vyuma tunahase kulinga haukalu kana. Chakutalilaho, ngachilihi nge yenu (chipwe muka-tanga yenu) ali nakuviza misongo yayinene chipwe vanamulingi mwamupi? Tunahase kusolola ngwetu twafwelela chikuma Yehova hakulombanga kuli ikiye atukafwe tutwaleho lika kushishika nakupwa vakuwahilila nakuzachila kanawa Kalunga. (Fwili. 4:13) Vyakutalilaho vyavandumbwetu vavavulu vamumakumbi aPaulu namakumbi ano, vyasolola nge kulomba chinahase kutukafwa tupwenga nangolo nakutwalaho lika kumika.
TWALENUHO LIKA KUZATA NANGOLO MANGANA KALUNGA AMIKISULE
16, 17. Vyuma muka muli nakufwila kulinga?
16 Liyavolo asaka kumilingisa muhone kumika hakumona vyeseko. Shikaho fwilenu “kulinjilila kuvyuma vyamwenemwene.” (Teso. 1, 5:21) Fwelelenu ngwenu munahase kufungulula Satana nakaye kenyi kakuhuka navilinga vyavipi. Munahase kulinga ngocho hakufwelela ngwenu Kalunga nahase kumijikijisa.—Koli. 2, 4:7-9; Ngale. 6:9.
17 Twalenuho lika kuzata nangolo, nakumika muukalu munakumona. Twalenuho lika kukakachila. Fwelelenu ngwenu Yehova mwamihingunwina “jikisu palanga nomu namuhona mwakujitambwila.”—Mala. 3:10.