Chisoneka chinasolola nge kaposetolo Paulu atalikishile kumujimbu uze wahanjika havyuma ajina Kalunga uze vasoneka muMbimbiliya.

Chisoneka chawavaHepeleu 4:12 veji kuchizachisanga chikuma mumikanda yetu, kusolola hatoma nge Mbimbiliya yatwama nangolo jakwalumuna kuyoya chavatu, shikaho chatamo kuchizachisa. Chipwe ngocho, chapwa chachilemu kutachikiza ngwetu mazu ahali wavaHepeleu 4:12 alumbununa vyuma vikwavo. Alumbununa nge Paulu ahuhumwine vaka-Kulishitu vavaHepeleu vakavangizenga vyuma ajina Kalunga. Vyuma kana vavisonekele mumikanda yajila. Paulu azachishile chakutalilaho chavaIsalele vaze vayowele muEjipitu. Vapwile nalutalililo lwakwingila “mulifuchi lyamwaza lyalinene, lyakumbwambumuka mavele nauchi,” nakulivwisa kuwaha kuyoya.—Kulo. 3:8; Lushi 12:9, 10.

Omu mukiko ajinyine Kalunga. Oloze vaIsalele vakaluwishile michima yavo, kaha kavasolwele lufweleloko, ngocho vavavulu kavengilile mukunoka chaKalungako. (Kla. 14:30; Yos. 14:6-10) Oloze kutwala muze, Paulu ambile ngwenyi, “lushiko lwakwingila mukunoka [chaKalunga]” kuluchili. (Hep. 3:16-19; 4:1) “Lushiko” kana lwatwama havyuma ajina Kalunga. Ngana muze valingilenga vaka-Kulishitu vavaHepeleu, nayetu tunahase kutanga vyuma ajina Kalunga nakuvikavangiza. Paulu azachishile mazu ahali Kuputuka 2:2 naSamu 95:11 mangana asolole ngwenyi vyuma ajina Kalunga vyazama haVisoneka.

Pundu vene, twatela kuwahilila hakwijiva ngwetu “lushiko lwakwingila mukunoka [chaKalunga] kuluchili lika.” Twafwelela ngwetu tunahase kwingilamo, kaha tuli nakuzata nangolo mangana twingilemo. Kwingila mukunoka kana kachapendamina hakulamanga Jishimbi jaMose chipwe kulingako vyuma vimwe mangana Yehova atwivwile kuwahako. Oloze tunalingi ngocho hakutwalaho lika kukundwiza vyuma ajina Kalunga. Kaha nawa, vatu vavavulu mukaye kosena vali nakulinangula Mbimbiliya navyuma ajina Kalunga. Echi chinakafwe vatu vavavulu valumune kuyoya chavo, nakupwa nalufwelelo, nakuvambapachisa. Echi chinasolola hatoma nge “mazu aKalunga apwa amatonyi, kaha atwama nangolo.” Vyuma ajina Kalunga vasoneka muMbimbiliya vinalumuna lyehi kuyoya chetu, kaha navitwalaho lika kutukafwa.