1. Yehova alijimbwile ngachilihi kuli Mose, kaha mwomwo ika vyuma ahanjikile vyapwila vyavilemu?

LWOLA lumwe, Kalunga alijimbwile kuli Mose nakumulweza lijina lyenyi navilinga atwama navyo. Chatete avulukile keke nakutetela. (Tangenu Kulovoka 34:5-7.) Nge Yehova asakile, kachi avulukile vyangolo namangana atwama nawo. Oloze ahanjikile havilinga vize vyasolola nge afwila kukafwa vangamba jenyi, mwomwo naMose halwola kana apwile nakusakiwa kumukafwa. (Kulo. 33:13) Chikupu vene, cheji kutuvendejekanga hakutachikiza ngwetu Kalunga avangilile kuvuluka vilinga kanevi vyazangi. Ngocho chino chihande nachishindakanya hakeke. Kaha keke yapwa kutachikiza ukalu ali nawo mutu nakufwila kumukafwa.

2, 3. (a) Vyuma muka vyasolola nge vatu vatela kusolola keke? (b) Mwomwo ika chapwila chachilemu kushimutwila hakeke?

² Vatu vavatenga muchifwanyisa chaKalunga. Hakuwana nge Yehova atwama nakeke, ngocho vatu vosena vatwama nakeke, kuhakilako vene navaze kavatachikiza Kalunga wamuchanoko. (Kupu. 1:27) MuMbimbiliya mwatwama mijimbu yayivulu yakusolola  vatu vaze vapwile nakeke. Chakutalilaho, achishinganyekenu hamapwevo vaka-ujila vavali vaze vejile kuli Solomone nakusaka kutachikiza umwe ulihi apwile mwenyamwana. Omu Solomone avesekele hakwamba ngwenyi vatete uze mwana, uze mwenyamwana evwililile mwanenyi keke. Echi chamulingishile asuule mwanenyi vamuhane tuhu kuli mukwavo. (Vamya. 1, 3:23-27) Anukenu nawa mwanaFwalo uze ayowele Mose omu apwile kemba. Numba tuhu ejivile ngwenyi uze kemba apwile mwana wavaHepeleu kaha vatelelele kumujiha, oloze “amwivwilile keke” nakumulela kupwa mwanenyi.—Kulo. 2:5, 6.

³ Mwomwo ika twatela kushimutwila hakeke? Mwomwo Mbimbiliya yatulweza tulondezezenga Yehova. (Efwe. 5:1) Numba tuhu vatutenga namuchima wakusolola keke, oloze shimbu jimwe tweji kulizakamanga kaha etu vavene mwomwo yakuhona kukupuka chize twaswana kuli Alama. Kaha nawa cheji kutukaluhwilanga kulisuula kukafwa vakwetu. Vamwe veji kutwalangaho lika kumona ukalu kana mukuyoya chavo. Uno vyuma muka navimikafwa muzange vakwenu nakuvakafwa? Chatete, kekesenu vyuma mumone omu Yehova nasololanga keke nomu vatu vanalinginga ngocho. Chamuchivali, wanenu omu munahase kulondezeza Kalunga nomu munahase kunganyala.

4. (a) Mwomwo ika Yehova atuminyine vangelo muSotome? (b) Mujimbu waLote navana venyi watunangula vyuma muka?

⁴ Kwatwama jijila jajivulu jize Yehova asolwelelemo vatu keke. Chakutalilaho, achishinganyekenu havyuma alingilile Lote. Uze lunga wakwoloka “ayanjiwile chikuma” mwomwo yavilinga vyakuzunguma vyavatu vamuSotome naNgomola. Ngocho Kalunga atondele kunongesa vatu kana mwomwo yavilinga vyavo vyavipi. (Petu. 2, 2:7, 8) Atumine vangelo mangana vayovole Lote. Vamulwezele alovoke munganda kana natanga yenyi. “Shimbu apwile nakulangisa, Yehova amwivwilile keke, kaha vaze [vangelo] vakwachile kulivoko lyenyi nakulivoko lyapwevo lyenyi nakumavoko avana venyi vamapwevo vavali, kaha vamulowele nakumutwala kuweluka wanganda.” (Kupu. 19:16) Echi chakutalilaho chasolola nge Yehova atachikiza ukalu veji kumonanga vangamba jenyi vakushishika.—Isa. 63:7-9; Yako. 5:11, kwinyikila chamwishi; Petu. 2, 2:9.

5. WaYowano 1, 3:17 navisoneka vyeka navitukafwa ngachilihi tusolwelenga vakwetu keke?

⁵ Yehova kasolola kaha kekeko, oloze anangula navatu jenyi vasololenga muchima kana. Achitalenu halushimbi ahanyine vaIsalele hachihande chakutambula mutu vyuma vyenyi vyakulifwika kupwa chijikilo. (Tangenu Kulovoka 22:26, 27.) Vatu vakukakama michima vatambwilenga vaka-mikuli yavo vyuma vyakulifwika nakuvaseza vasavale to. Shikaho Yehova alwezele vatu jenyi vahone kupwa namuchima kanou wakukenyuka, oloze vapwenga namuchima wakeke. Lushimbi kana lwatela kutukafwa chikuma nayetu makumbi ano. Nge vandumbwetu vali muukalu, kutala natuvechelela valiyanjile tuhu okunyi kuli vyuma vimwe tunahase kulinga mangana tuvakafwe tahi?—Kolo. 3:12; Yako. 2:15, 16; tangenu WaYowano 1, 3:17.

6. Vyuma muka natulinangula kuli Yehova hamuchima wenyi wakukafwa vaIsalele omu valingilenga shili?

⁶ Yehova evwilililenga vaIsalele keke nahalwola valingilenga shili. Mbimbiliya ngwayo: “Yehova Kalunga kavakakuluka javo  avatuminyinenga lika valuwa jenyi nakuvahuhumuna. Avahuhumwinenga lika mwomwo evwilile keke vatu jenyi nachihela chenyi.” (Miji. 2, 36:15) Nayetu nawa twatela kwivwilanga keke vatu vaze navapihilila nakwalumuka kuvilinga vyavo vyashili nakusaka kuvevwila kuwaha kuli Kalunga. Yehova kasaka mutu numba umwe akanongeko. (Petu. 2, 3:9) Shikaho, tutwalenuho lika kuvilika mujimbu swi noho Kalunga mwakanongesela vatu vakuhuka.

7, 8. Chuma muka chalingishile tanga yimwe yifwelele ngwayo Yehova avevwililile keke?

⁷ Kwatwama vyakutalilaho vyavivulu vize vyasolola nge Kalunga atwama nakeke. Achishinganyekenu havyuma vyasolokele kutanga yakanyike umwe wamyaka 12. Vyuma kana vyasolokele muji 1990 omu kwapwile vikokojola vyakulitala hamiyachi. Ou kanyike, nasongo yenyi, navisemi javo, navandumbwavo veka vapwile nakufuma kuBosnia nakuya kuSerbia musacha. Vapwile nakuya kukukunguluka changalila kuze visemi jenyi vatelele kuvambapachisa. Oloze omu vahetele hamuseto, maswalale valowele uze kanyike natanga yenyi muze musacha mwomwo yakupwa vaka-muyachi weka. Kaha vasuwile vaze vasalile musacha vayenga. Jino omu vavakwachile hamakumbi avali, mukulwane wamaswalale atumine shinga kuli mukulwane wenyi amulweze mwakuvalingila. Uze liswalale emanyine kwakamwihi navakiko, shikaho vevwileko omu vamulwezele ngwavo, “Valoze kaha.”

⁸ Omu uze liswalale apwile nakuhanjika navakwavo, kwejile vatu vavali nakuyevetela yize tanga ngwavo vapwa Vinjiho jaYehova. Ava Vinjiho vavalwezele vyaukalu kanou kuli vaze vasalile musacha. Shikaho valwezele uze kanyike nasongo yenyi vengile mumunyau nakuzauka museto, mwomwo mapapilo avo kavawakekeseleko. Kaha valwezele nawa visemi jenyi vayenga hamavu mangana vakaliwanyine kulutwe. Uze kanyike alikomokelele hachuma kana. Kaha visemi jenyi vambile ngwavo: “Munashinganyeka ngwenu navatwecha tuliyile tuhu?” Omu vapwile nakuya, chasolokele kwijiva nge vanavamono kuli vaze maswalale. Oloze ava visemi vakaliwanyine cheka navana vavo nakuya jino kuze kukukunguluka. Chikupu vene vamwene ngwavo Yehova nakumbulula kulomba chavo. Chipwe ngocho, Mbimbiliya yasolola nge shimbu jimwe Yehova kakingilenga vangamba jenyiko. (Vili. 7:58-60) Oloze uze kanyike ambile ngwenyi: “Chasolokele kwijiva nge vangelo vafwikile hameso avaze maswalale, kaha Yehova atuyowele.”—Samu 97:10.

9. Yesu akafwile ngachilihi liyongomena lyavatu vaze vamukavangijile? (Talenu muvwimbimbi wakulivanga.)

⁹ Tunahase nawa kulinangula chishina chikwavo kuli Yesu. Evwililile keke liyongomena lize lyejile kuli ikiye mwomwo “vayanjile nakulimwanga nge mikoko vakuzeneka kafunga.” Uno avakafwile ngachilihi? “Aputukile kuvanangula vyuma vyavivulu.” (Mateu 9:36; tangenu Mako 6:34.) Yesu apwile namuchima wakulihandununa nauze wavaFwaliseu vaze kavasakilenga kukafwa vatuko. (Mateu 12:9-14; 23:4; Yowa. 7:49) Kutala nayenu kamweshi kusaka kukafwa vatu kushipilitu nganomu alingile Yesuko tahi?

10, 11. Kutala twatela kusololanga keke lwola lwosena tahi? Lumbununenu.

¹⁰ Echi kacheshi nakulumbununa nge twatela kusololanga keke lwola lwosenako. Kalunga asolwelenga keke muvyakutalilaho tunavuluka. Oloze Mwangana Saulu alikangile kuli Kalunga hakulinga vyuma vize ashinganyekele ngwenyi ali nakusolola keke.  Ahonene kujiha Angange uze apwile muka-kole wavatu jaKalunga nakuhona nawa kujiha vimuna vamwaza. Ngocho Yehova akanyine Saulu kupwa mwangana wavaIsalele. (Samwe. 1, 15:3, 9, 15) Shikaho, Yehova apwa Muka-kuyula wakwoloka mwomwo eji kutalanga mumichima nakumona numba nge atela kwivwila mutu keke nyi chiku. (Lungu. 2:17; Ezeke. 5:11) Lwola luli nakwiza omu mwakasopesa vosena vaze veji kulikanganga kuli ikiye. (Teso. 2, 1:6-10) Elu kalweshi kukapwa lwola lwakwivwila vatu vakuhuka kekeko. Oloze mwakavanongesa mangana akasolole keke yenyi hali vaka-kwoloka vaze mwakalwila.

¹¹ Etu katweshi nalisesa lyakulweza vatu ngwetu navakavanongesa chipwe kuvalwilako. Oloze twatela kukilikita nakuvakafwa oholyapwa. Ngocho mujijila muka tunahase kusolwelamo vakwetu keke? Tuchitalenu hajijila jino.

12. Namusolola ngachilihi keke kuli vakwenu?

¹² Kafwenunga vakwenu hakumbi hakumbi. Vaze vafwila kulondezeza Yesu vatela kusolwelanga vandumbwavo navatu valihata navo keke. (Yowa. 13:34, 35; Petu. 1, 3:8) Shimbu jimwe keke vayilumbununa ngwavo yapwa “kuyanjila hamwe.” Shikaho mutu uze eji kwivwilanga vakwavo keke eji kufwilanga kuvakafwa hakuyanda chavo. Ngocho fwilenunga kukafwa vakwenu. Chakutalilaho, munahase kuvazachilako milimo yimwe, yakufwana nge kuvachavila jikunyi chipwe kuvaswichila meya.—Mateu 7:12.

13. Vandumbwetu veji kusololanga vilinga muka nge kunasoloka ponde?

¹³ Kafwenunga vakwenu nge kunasoloka ponde. Vatu vavavulu veji kwivwilanga vakwavo keke nge kunasoloka ponde. Vatu jaYehova vavatachikijila hakukafwa vaze vali muukalu. (Petu. 1, 2:17) Chakutalilaho, ndumbwetu umwe wakuJapan apwile mungalila muze mwasolokele mundenda mu 2011. Ambile ngwenyi vandumbwetu vamuJapan navakumafuchi eka vaze vejile nakuvakafwa kutungulula jizuvo, ‘vamuvendejekele chikuma nakumukolezeza.’ Kaha asonekele ngwenyi: “Vyuma valingile vyangukafwile ngufwelele ngwami Yehova atuzakama. Kaha  nawa vandumbwetu valizakama umwe namukwavo. Ngocho ava vandumbwetu mukaye kosena veji kutulombelangako.”

14. Uno munahase kukafwa ngachilihi vaveji natushinakaji?

¹⁴ Kafwenunga vaveji natushinakaji. Nge natumona vakwetu vali muukalu uze weza mwomwo yashili twaswana kuli Alama, kaha twatela kuvasolwela keke. Twatalilila kulwola luze navakafumisako kuviza naushinakaji. Ngocho tweji kulombanga kuli Kalunga mangana Wangana wenyi wizenga. Oloze shimbu kanda wizenga, twatela kukafwa vakwetu vaze vali muukalu. Achitalenu havyuma asonekele lunga umwe hali naye wakashinakaji uze avijile musongo wakuwongo (Alzheimer). Likumbi limwe ou kashinakaji alipihishilile. Kaha omu aputukile kuwahisa uvwalo wenyi, evwile mutu mwangongomweza kuchikolo. Omu asokolweleko awanyine kuli Vinjiho jaYehova vamapwevo vavali vaze vamutambukililenga kuswakumwe. Ava vandumbwetu vamuhulishile vevwenga nge mwasaka kumukafwa. Uze kashinakaji akumbulwile ngwenyi: “Eyo, olozenyi chasonyi.” Ava vandumbwetu vamukoselelele uze uvwalo wenyi. Kaha vamuwahishilileko vyakulya nakushikama nenyi. Uze mwanenyi awahililile chikuma, kaha asonekele ngwenyi: “Vinjiho vapwa vatu vamwaza chikuma. Veji kulinganga vyuma veji kunangulanga.” Kutala keke yeji kumilingisanga nayenu muzate nangolo mangana mukafwe tushinakaji navaze vaviza tahi?—Fwili. 2:3, 4.

15. Mulimo wetu wakwambulula weji kukafwanga ngachilihi vatu?

¹⁵ Kafwenu vatu kushipilitu. Vatu vanakumona chikuma ukalu nakulizakamina, kahechi cheji kutulingisanga tufwile kuvakafwa kushipilitu. Jila yamwaza yakuvakafwilamo shina kuvanangula vyaKalunga navyuma naukalinga Wangana wenyi. Twatela nawa kuvanangula vamone kulema chatwama hakukavangiza jindongi jaKalunga. (Isa. 48:17, 18) Shikaho, zatenu nangolo mumulimo wamuwande mangana muvumbike Yehova nakusolwela vakwenu keke.—Chimo. 1, 2:3, 4.

16. Mutu uze eji kusolwelanga vakwavo keke eji kunganyalanga ngachilihi?

¹⁶ Vaka-kuka misongo yakuwongo veji kwambanga ngwavo, kusolwela vakwenu keke chinahase kumilingisa mupwenga vakulikangula kumujimba nakutwama kanawa navakwenu. Nge namukafwa vakwenu, kaha namupwa muvakuwahilila, nakuhona kwivwa uli chipwe kupwa navishinganyeka vyavipi. Chikupu vene namunganyala hakusolwela vakwenu keke. (Efwe. 4:31, 32) Vaka-Kulishitu vaze veji kukafwanga vakwavo veji kupwanga nachivezu chamwaza hakutachikiza ngwavo vali nakukavangiza jindongi jaKalunga. Echi cheji kulingisanga mutu azakame vana venyi, nakuzanga muka-mahyenyi namasepa jenyi. Vatu vaze veji kufwilanga kukafwa vakwavo veji kuvakafwanga navakiko nge vali muukalu.—Tangenu Mateu 5:7; Luka 6:38.

17. Mwomwo ika mwatela kusolwela vakwenu keke?

¹⁷ Kamwatela kusolwela vakwenu keke mwomwo yakufwila kaha kulinganyalisako. Oloze chuma chachilemu chatela kumilingisa musolole keke shina mwomwo yakufwila kulondezeza Yehova Kalunga mwenyazangi nakeke, nakufwila kumutohwesa. (Vishi. 14:31) Atuhana chakutalilaho chakukupuka. Shikaho, tuzatenu nangolo tumulondezeze mangana tulizange navandumbwetu nakutwama kanawa navakwetu hakuvasolwelanga keke.—Ngale. 6:10; Yowa. 1, 4:16.