“Mazu aKalunga . . . Atwama Nangolo”
“Mazu aKalunga apwa amatonyi, kaha atwama nangolo.”—HEPE. 4:12.
MYASO: 114, 113
1. Twatachikiza ngachilihi ngwetu Mazu aKalunga atwama nangolo? (Talenu muvwimbimbi wakulivanga.)
ETU vatu jaYehova twatachikiza ngwetu mazu aKalunga “apwa amatonyi, kaha atwama nangolo.” (Hepe. 4:12) Etu vavavulu twetavila ngwetu Mbimbiliya yikwechi ngolo jakwalumuna kuyoya chavatu. Vandumbwetu vamwe vapwilenga veji, veka vapwilenga vaka-kunwa makanya namaundu akupendesa, chipwe vaka-ujila. Vakwavo nawa vayoyelenga chiyoyelo chauhando chamukaye kano, oloze kavapwile vakusuuluka mukuyoyako. (Kwambu. 2:3-11) Vatu vaze valimwenenga kupwa vamokomoko vawanyine jino chinyingi hakulinangula Mbimbiliya chakuvalingisa vakayoye. Pamo munanganyala chikuma hakutanganga vyakutalilaho kana vize vanasonekanga muKaposhi Kakutalila muvihande vyakwamba ngwavo, “Mbimbiliya Yeji Kwalumunanga Kuyoya chaVatu.” Kaha nawa munamono ngwenu, nahanyima yakulinangula muchano, Visoneka vinakafwenga vaka-Kulishitu vatwaleho kuzovoloka kushipilitu.
2. Uno Mazu aKalunga akafwile ngachilihi vandumbwetu mulikulukaji lyamyaka lyakulivanga?
2 Kutala twatela kulikomokela hakuwana nge vatu vavavulu makumbi ano vanalumuna chiyoyelo chavo mwomwo yakulinangula Mazu aKalunga tahi? Nduma. Kwalumuka kana cheji kutwanukisanga vandumbwetu vamulikulukaji lyamyaka lyakulivanga vaze vapwile nalutalililo lwakukayoyela mwilu. (Tangenu Wavaka-Kolinde 1, 6:9-11.) Omu kaposetolo Paulu avulukile vatu vaze navakahona kuswana Wangana waKalunga, ambile nawa ngwenyi: “Omu mukiko mumwapwilenga nayenu vamwe.” Oloze Visoneka nashipilitu yajila yaKalunga vyavakafwile valumuke. Nahanyima yakulinangula muchano, vamwe vakindulukilenga kuvilinga vyavo vyavipi, oloze vavisezelenga. Chakutalilaho, muka-Kulishitu umwe wakuwavisa wamulikulukaji lyamyaka lyakulivanga uze vafumishile muchikungulwilo, azachililile hatutenga twenyi, ngocho vamukindulwishile cheka. (Koli. 1, 5:1-5; Koli. 2, 2:5-8) Nayetu cheji kutukolezezanga hakutachikiza ukalu vanahichimo vandumbwetu nomu vanauhonesanga mwomwo yakulinangula Mazu aKalunga.
3. Vyuma muka natushimutwila muchihande chino?
3 Hakuwana nge Mazu aKalunga akwechi ngolo, ngocho twatela kuwazachisanga mujila yakwoloka mwomwo twatwama nawo. (Chimo. 2, 2:15) Muchihande chino natushimutwila omu tunahase kulingisa Mazu aKalunga azate (1) mukuyoya chetu (2) mumulimo wamuwande (3) hakunangula hautenda. Vishina kana navitukafwa tusakwilile Setu wamwilu nakumuzanga mwomwo yakutunangula mangana tunganyale.—Isa. 48:17.
MUKUYOYA CHETU
4. (a) Vyuma muka twatela kulinga numba tunganyale kuMazu aKalunga? (b) Lwola muka mweji kutanganga Mbimbiliya?
4 Hakusaka tunganyale kuMazu aKalunga, twatela kuwatanganga hakumbi hakumbi. (Yoshu. 1:8) Chipwe ngocho, shimbu jimwe tweji kupwanga namilimo chikuma. Oloze katwatela kwechelela kala vyuma vituhonese kutanganga Mbimbiliya halwola twanonekako. (Tangenu Wavaka-Efwesu 5:15, 16.) Vatu jaYehova vavavulu vachiwana nge chapwa chamwaza kutanganga Mbimbiliya hakumbi hakumbi, vamwe nachimene veka namusana kaha vakwavo naufuku. Ngocho veji kwivwanga nganomu evwile muka-kwimba jisamu uze asonekele ngwenyi: “Jishimbi jove omu ngwajizanga! Ngweji kujishinganyekanga lwola lwosena.”—Samu 119:97.
5, 6. (a) Mwomwo ika chapwila chachilemu kushinganyeka hamazu natutanga? (b) Vyuma muka navitukafwa tushinganyeke kanawa hamazu natutanga? (c) Munanganyala ngachilihi hakutanga Mazu aKalunga nakushinganyekangaho?
5 Katwatela kutanganga kaha Mbimbiliyako oloze twatela nawa kushinganyekanga havyuma natutanga. (Samu 1:1-3) Echi nachitukafwa tukavangizenga mazu natutanga mukuyoya chetu. Chuma tweji kufwilanga shina vyuma natutanga muMbimbiliya vituhete kumuchima.
6 Vyuma muka navitukafwa tushinganyekenga kanawa havyuma natutanganga? Vavavulu vanawane nge chapwa chamwaza kwimana chindende hanyima yakutanga chisoneka nakulihulisa vihula vyakufwana nge: ‘Mazu kana anangula vyuma muka hali Yehova? Mujila muka nguli nakuzachishilamo awa mazu mukuyoya chami? Kaha vyuma muka ngwatela kuzachilaho?’ Kulomba nakushinganyekanga haMazu aKalunga nachitukafwa tuwakavangizenga mukuyoya chetu. Chikupu vene, natusolola ngwetu Mazu aKalunga ali nakuzata mukuyoya chetu.—Koli. 2, 10:4, 5.
NGE TULI MUMULIMO WAMUWANDE
7. Jila muka yamwaza tunahase kuzachishilamo Mazu aKalunga nge tuli muwande?
7 Vyuma muka navitukafwa tuzachisenga kanawa Mazu aKalunga nge tuli mumulimo wamuwande? Chatete shina kuwatanganga hakwambulula nahakunangula. Ndumbwetu umwe ambile ngwenyi: “Nge muli nakwambulwila kuzuvo hizuvo naYehova, uno enu yenu namuhanjika tahi, nyi namumwecha ikiye ahanjike?” Uno ou ndumbwetu alumbunwine ika? Alumbunwine ngwenyi, nge natutanganga Mazu aKalunga mumulimo wamuwande, kaha nachisolola nge tuli nakwechelela Yehova ivene alihanjikile. Shikaho twatela kusakulanga kanawa visoneka vize natutanganga mangana vihete vatu kumichima. (Teso. 1, 2:13) Lihulisenu ngwenu: ‘Kutala ngweji kufwilanga kwambulila vatu mujimbu wamwaza hakuvatangilanga Mazu aKalunga kwosenokwo nanguvawana tahi?’
8. Mwomwo ika katwatela kukuminanga kaha hakutangila vatu visonekako nge tuli muwande?
8 Katwatela kukuminanga kaha hakutangilanga vatu visonekako. Mwomwo ika? Mwomwo vamwe kavatwama nachinyingi chamuMbimbiliyako. Omu mukiko chapwile mulikulukaji lyamyaka lyakulivanga, kaha nawa mukiko chili noholyapwa. (Loma 10:2) Shikaho katwatela kushinganyeka ngwetu vatu navevwishisa visoneka vyosena natuvatangilako. Tunahase kuhilukila havishina nakuvilumbununa kanawa. Nge natulinga ngocho, kaha natulingisa Mazu aKalunga ahete vatu vavavulu kumichima.—Tangenu Luka 24:32.
9. Natusolola ngachilihi ngwetu twavumbika Mbimbiliya hakujimbula visoneka? Hanenu chakutalilaho.
9 Twatela nawa kujimbulanga visoneka mujila yize nayisolola nge twavumbika Mbimbiliya. Chakutalilaho, tunahase kuhanjika ngwetu, “Achitalenu omu Tengi yetu ahanjika hachihande kana.” Nge tuli nakushimutwila namutu uze katwama mukwitava chavaka-Kulishituko, kaha tunahase kwamba ngwetu, “Talenu omu ahanjika Mazu Ajila.” Kaha nawa nge tuli nakushimutwila namutu uze kasaka vyamukwitavako, tunahase kumuhulisa ngwetu, “Kutala wevwaho lyehi echi chishimo chakushikulu tahi?” Hakuwana nge vatu valihandununa, shikaho twatela kujimbulanga visoneka mujijila jakulisezaseza hakushimutwila navo.—Koli. 1, 9:22, 23.
10. (a) Lumbununenu vyuma vyasolokele kuli ndumbwetu umwe omu apwile muwande? (b) Vyuma muka mwaliwanyine navyo muwande vize vyamilingisa mwitavile ngwenu Mazu aKalunga akwechi ngolo?
10 Vandumbwetu vavavulu vachiwana nge kuzachisa Mazu aKalunga mumulimo wamuwande nachikafwa chikuma vatu natwambulila. Tuchitalenu hachakutalilaho chino. Ndumbwetu umwe akindulukilile kuli lunga umwe uze atangilenga jimangazini jetu hamyaka yayivulu. Muchishishisa chakumuhana kaha Kaposhi Kakutalila wamuhya, ou ndumbwetu avangilile kumutangila chisoneka. Atangile chisoneka chaWavaka-Kolinde 2, 1:3, 4 chize chamba ngwacho: “Setu muka-kutetela, kaha nawa Kalunga muka-kuvendejeka chosena, . . . eji kutuvendejekanga muvyeseko vyetu vyosena.” Uze lunga asuulukile namazu amuchisoneka kana, kaha alwezele ndumbwetu awatange cheka. Uze lunga ahanjikile ngwenyi ikiye napuwenyi vasakiwile kuvavendejeka, kaha etavilile kumunangulanga Mbimbiliya. Chikupu vene, Mazu aKalunga akwechi ngolo nge natuwazachisa mumulimo wamuwande.—Vili. 19:20.
NGE MULI NAKUNANGULA HAUTENDA
11. Vyuma muka vatela kwanuka vandumbwetu vaze veji kuhanjikanga vihande hautenda?
11 Tuvosena tweji kulivwisanga kuwaha kupwa kukunguluka chavaka-Kulishitu chachikungulwilo nachachihanda nechi changalila. Tweji kuyanga kukunguluka kana nakulemesa Yehova. Kaha tweji kunganyalanga chikuma kushipilitu havyuma veji kutunangulanga. Chapwa hikutokwa chachinene kuli vandumbwetu vamalunga vaze veji kuhanjikanga vihande hautenda. Chipwe ngocho vatela kwanuka ngwavo vatwama namulimo waunene chikuma. (Yako. 3:1) Vyuma navanangula vyatela kupendamina haMazu aKalunga. Shikaho nge muli nakuhanjika chihande hautenda, namusolola ngachilihi ngwenu Mbimbiliya yikwechi ngolo?
12. Uno muka-kuhanjika chihande nahase kupendamina ngachilihi haVisoneka nakuhona kuhanjika vyamumutwe wenyi?
12 Chihande chenu chatela kupendamina haVisoneka keshi kuhanjika vyamumutwe wenuko. (Yowa. 7:16) Uno echi chasakiwa kulinga ika? Vyakuliwana navyo navyakutalilaho namuzachisa chipwe jila namuhanjikilamo chihande chenu kavyatela kulingisa vatu vahone kuhaka mangana kuMbimbiliyako. Tachikizenu nawa ngwenu kunangula vatu Mbimbiliya kachalumbununa kutanga visoneka vyavivuluko. Kutanga visoneka vyavivulu chikuma nachilingisa vatu vahone kwanukaho chisoneka numba chimwe. Shikaho, sakulenunga kanawa visoneka vyavilemu, nakuvilumbununa, nakuhana vyakutalilaho, nakusolola omu vanahase kuvizachisa mukuyoya chavo. (Nehe. 8:8) Nge chihande chenu chili haautulayini yakufuma kuli ndungo, kaha mwatela kuhituluka nakutanga visoneka vilimo. Wanenu omu visoneka vanenyikilako vinalitombola namazu ali muautulayini. Kaha zachisenu visoneka kana mangana mushindakanye havishina vili muautulayini. (Munahase kuwana jijila jamwaza jamwakuhanjikila chihande mumukanda waNganyalenu Kukunangula chaShikola yaMulimo waTeokalasi havilongesa 21 nakuheta ku 23.) Chachilemunyi shina lombenu kuli Yehova amikafwe mulumbunune kanawa vishina vyamuMazu enyi.—Tangenu Ezela 7:10; Vishimo 3:13, 14.
13. (a) Ndumbwetu umwe anganyalile ngachilihi kujila valumbunwinyinemo visoneka hakukunguluka? (b) Munanganyala ngachilihi kujila valumbunwinyinemo visoneka hakukunguluka chetu?
13 Ndumbwetu umwe wapwevo muAustralia anganyalile chikuma kujila valumbunwinyinemo visoneka hakukunguluka. Numba tuhu vamuyanjishilenga chikuma kuunyike wenyi, oloze etavilile mujimbu wamuMbimbiliya nakulihana kuli Yehova. Chipwe ngocho, chamukaluhwilile kwitavila ngwenyi vamuzanga kuli Yehova. Oloze kutwala muze etavilile jino ngwenyi Kalunga amuzanga. Uno vyuma muka vyamukunywile? Ashinganyekele hachisoneka chize valumbunwine kanawa hakukunguluka, nakuchesekesa kuvisoneka vikwavo vyamuMbimbiliya. * Kutala nayenu mwanganyalaho lyehi kujila valumbunwinyinemo Mazu aKalunga hakukunguluka chachikungulwilo, chipwe chachihanda, chipwe changalila tahi?—Nehe. 8:12.
14. Natusolola ngachilihi ngwetu twasakwilila Yehova hakutuhana Mazu enyi?
14 Twasakwilila chikuma Yehova hakutuhana Mazu enyi Mbimbiliya. Yehova kayihanyine kuvatu kahako, oloze nayikinginga nawa mangana yilile, ngana muze ashikile. (Petu. 1, 1:24, 25) Shikaho, twatela kutanganga Mazu aKalunga lwola lwosena, nakuwazachisa mukuyoya chetu, nahakukafwanga vakwetu. Nge natulinga ngocho, kaha natusolola ngwetu twazanga Mbimbiliya nakuyimona kupwa yayilemu, nakuzanga nawa Mwenyayo, Yehova Kalunga nakumusakwilila.
^ par. 13 Talenu lipwata lyakwamba ngwavo, “ Vyuma Vyangukunywile.”
