1, 2. (a) Solomone vamuhanyine mulimo muka waulemu? (b) Mwomwo ika Ndavichi alizakaminyine hali Solomone?

SOLOMONE vamulwezele kutetekela mulimo waulemu wakutunga tembele muYelusalema. Tembele kana yatelelele kupwa “yaulangaji chikuma mangana fuma yayo nakuwaha chayo vihete kumafuchi osena.” Chachinenenyi, eyi tembele yapwile “zuvo yaYehova Kalunga wamuchano.” Ngocho Yehova atongwele Solomone atetekele mulimo kana.—Miji. 1, 22:1, 5, 9-11.

² Mwangana Ndavichi atachikijile ngwenyi Kalunga mwamukafwa, oloze Solomone apwile ‘kanyike, kaha nawa kapwile nachinyingiko.’ Kutala Solomone ahashile kupwa wakumika nakuzata mulimo wakutunga tembele tahi? Uno unyike nakuhona chinyingi vyamuhonesele kuzata mulimo vamuhanyine tahi? Chikupu vene, Solomone atelelele kupwa wakumika numba ahase kuzata ou mulimo.

3. Vyuma muka alinangwile Solomone kuli ise?

³ Solomone pamo alinangwile kuli ise kupwa namuchima wakumika. Omu Ndavichi apwile kanyike, akingilenga mikoko jaise kutunyama vaze vasakile kuvalya. (Samwe. 1, 17:34, 35) Asolwele nawa kumika omu azungile namutu wangolo, wakutaluka chikuma. Kalunga  akafwile Ndavichi ajihe Ngolyate nalilolwa.—Samwe. 1, 17:45, 49, 50.

4. Mwomwo ika Solomone atelelele kupwa wakumika?

⁴ Shikaho chapwile chakutamo Ndavichi kukolezeza Solomone apwenga wakumika nakutunga tembele. (Tangenu Mijimbu 1, 28:20.) Nge Solomone kapwile wakumikako, kachi woma wamukwachile nakuhona jino kuzata mulimo vamuhanyine, kahechi kachi chapihile chikuma.

5. Mwomwo ika twatela kupwila vakumika?

⁵ Nayetu nawa twasakiwa kupwa vakumika numba tutesemo mulimo, ngana muze alingile Solomone. Shikaho, tushimutwilenu havyakutalilaho vyavatu vamwe vaze vapwile vakumika. Kahechi nachitukafwa tushinganyeke omu tunahase kupwila vakumika nakutesamo mulimo wetu.

6. Mweji kwivwanga ngachilihi hakumika chaYosefwe?

⁶ Achishinganyekenu hakumika apwile nacho Yosefwe omu pwevo lyakaka yenyi Potefwale amukwachile nakusaka valisavale. Numba tuhu Yosefwe atachikijile ngwenyi nge mwakana, mwalikokela ukalu waunene, oloze omikile nakuchina.—Kupu. 39:10, 12.

7. Lumbununenu omu Lahave asolwele muchima wakumika. (Talenu muvwimbimbi wakulivanga.)

⁷ Chakutalilaho chikwavo chakupwa vakumika shina chaLahave. Nge Lahave apwile nawoma omu vandoji javaIsalele vejile kuzuvo yenyi muYeliko, kachi avahangile kuchina navamunehela ukalu. Oloze afwelelele muli Yehova, kaha aswekele vaze malunga vavali nakuvasuula vayenga chakuzeneka wakuvalemeka. (Yoshu. 2:4, 5, 9, 12-16) Lahave afwelelele ngwenyi Yehova ikiye Kalunga wamuchano, kaha nawa ngwenyi mwahana vaIsalele lifuchi lyavo. Kevwile woma mwangana waYeliko navatu jenyi chipwe vatu vekako. Oloze alingile vyuma vize vyamuyowele natanga yenyi.—Yoshu. 6:22, 23.

8. Uno kumika chaYesu chakafwile ngachilihi vaposetolo jenyi?

⁸ Vaposetolo jaYesu vakushishika nawa vapwile vakumika. Vamwene omu Yesu asolwelenga muchima wakumika. (Mateu 8:28-32; Yowa. 2:13-17; 18:3-5) Chakutalilaho chenyi chavakafwile vapwenga vakumika. Ngocho omu vavafumbukilile kuli vaSatuse, vakiko kavalitwaminyinyine kunangula vatu mulijina lyaYesuko.—Vili. 5:17, 18, 27-29.

9. Uno WaChimoteu 2, 1:7 watukafwa ngachilihi tutachikize owo eji kutuhananga muchima wakumika?

⁹ Yosefwe, naLahave, naYesu navaposetolo vasolwele muchima wakumika uze wavakafwile vazate milimo yamwaza. Kumika chavo kachalumbununa nge valifwelelele vaveneko, oloze vapendaminyine hali Yehova. Nayetu nawa tweji kuhitanga muukalu uze wasakiwa kupwa vakumika. Shikaho katwatela kulifwelelanga etu vaveneko, oloze twatela kupendamina hali Yehova. (Tangenu WaChimoteu 2, 1:7.) Tushimutwilenu jino omu tunahase kusolola muchima wakumika mutanga namuchikungulwilo.

10. Mwomwo ika vaka-Kulishitu vavakweze vatela kupwa vakumika?

¹⁰ Vaka-Kulishitu vavakweze vavavulu veji kuhitanga muukalu wauvulu hakuzachila Yehova, ngocho vasakiwa kupwa vakumika. Vanahase kulinangula kuchakutalilaho chaSolomone nakulondezeza kumika chenyi omu etavilile mulimo wakutunga tembele. Numba tuhu vaka-Kulishitu vavakweze vatela kuvatwaminyina kuli visemi javo, oloze vatela kulisakwila vavene vyuma vimwe vyavilemu. (Vishi. 27:11) Shikaho vatela kupwa vakumika numba vasakulenga masepa vamwenemwene, navyakuhemahema vyamwaza, nakupwa navilinga vyamwaza nakulihana mangana vavambapachise. Vakweze vatela kupwa vakumika mwomwo Satana uze eji kutombanga Kalunga kasaka valingenga vyuma vyamwazako.

11, 12. (a) Mose asolwele ngachilihi muchima wakumika? (b) Vakweze vanahase kulondezeza ngachilihi chakutalilaho chaMose?

 ¹¹ Vyuma vimwe vyavilemu vatela kulisakwila vakweze shina kulitomena vyakulinga mukuyoya. Mumafuchi amwe, vakweze veji kuvashinyinyikanga vafwile chikuma kuya kumashikola ahelu nakwingila milimo yayinene. Mumafuchi auhutu nawa, vakweze veji kufwilanga kuzata mangana vazakame jitanga javo kumujimba. Nge muli nakuhita muukalu kana, kaha shinganyekenu hachakutalilaho chaMose. Mose vamulelele kuli mwanaFwalo wapwevo, ngocho kachi afwililile kutonda milimo yafuma chipwe yize nayimunehela jimbongo jajivulu. Atela vamushinyinyikilenga kuli vaka-tanga yenyi vamuEjipitu, navalongeshi, navaka-kuhana punga, mangana afwile vyuma kana. Oloze ikiye omikile nakukundwiza kwitava chamuchano. Omu asezele uhando wamuEjipitu, afwelelele kaha muli Yehova. (Hepe. 11:24-26) Ngocho Yehova amukiswile halwola luze, kaha twafwelela ngwetu kulutwe nawa mwakamukisula.

¹² Namakumbi ano nawa, Yehova mwakisula vakweze vaze vali nakusakula kulinga vyuma vyakushipilitu nakuhaka Wangana kulutwe. Mwavakafwa vahase kuzakama jitanga javo kumujimba. Chakutalilaho, mulikulukaji lyamyaka lyakulivanga, mukweze Chimoteu ahakile vyuma vyakushipilitu kulutwe, kaha nayenu munahase kulinga ngocho. *​—Tangenu Wavaka-Fwilipi 2:19-22.

13. Kumika chakafwile ngachilihi ndumbwetu umwe wapwevo?

¹³ Ndumbwetu umwe wapwevo muAlabama, U.S.A., apwile wakumika hakulitomena kulinga vyuma vyakushipilitu. Asonekele ngwenyi: “Omu ngwapwile ngukanyike, ngwapwilenga nasonyi chikuma. Changukaluhwililenga kuhanjika navandumbwami haZuvo yaWangana nakwambulila vatu vaze kangwatachikizako.” Oloze visemi jenyi navandumbwenyi muchikungulwilo vamukafwile, ngocho aputukile kuzata upayiniya washimbu yosena. Ahanjikile ngwenyi: “Kaye kaSatana kamona kuya kumashikola ahelu, nakuya fuma, nakupwa najimbongo navikumba vyavivulu kupwa vyavilemu chikuma. Chipwe ngocho, vatu kakavulu kaveshi kutesamo vyuma kanako, kaha kavapwa vakusuulukako. Oloze kuzachila Yehova changulingisa ngupwenga nguwakuwahilila nakusuuluka mukuyoya chami.”

14. Visemi vaka-Kulishitu vatela kupwa vakumika muvyuma muka?

¹⁴ Enu visemi vaka-Kulishitu nawa mwatela kupwa muvakumika. Chakutalilaho, vakulwane vamilimo vanahase kumilweza muzatenga lwola lwaluvulu kuheta naufuku nakusongo yachalumingo. Oloze lwola kana pamo lukiko mweji kulinganga chilongesa chakulemesa Kalunga mwatanga, nakuya muwande, nakukukunguluka. Ngocho chasakiwa kupwa vakumika numba muhonese ukalu kana, nakuhana vana venu chakutalilaho chamwaza. Lwola lumwe nawa visemi vamwe muchikungulwilo veji kwitavisanga vana vavo valinge vyuma vize kamwasaka vana venu valingeko. Visemi kana vanahase kumihulisa ovyo muli nakukanyishila vana venu vahone kulinga vyuma vanakulinga vakwavo. Kutala namumika nakuvalumbunwina mujila yakuzangama ovyo mwakanyishila vana venu tahi?

15. Chisoneka chaSamu 37:25 naWavaHepeleu 13:5 vinahase kukafwa ngachilihi visemi?

¹⁵ Tweji kusololanga muchima wakumika hakukafwa vana vetu valitomene kuzata milimo yakushipilitu nakuyitesamo. Chipwe ngocho, visemi vamwe kavasaka kukolezeza vana vavo vazate upayiniya, chipwe kuya nakuzachila kuze kunakusakiwa kukafwa chikuma, chipwe kuzachila haMbetele, chipwe kuzata milimo yamuliuka yakutungatungako. Veji kulinganga ngocho mwomwo vashinganyeka ngwavo nge vanashinakajiwa,  vana vavo kaveshi kukahasa kuvazakamako. Oloze visemi vamangana veji kusololanga muchima wakumika nakufwelela mujishiko jaYehova. (Tangenu Samu 37:25; WavaHepeleu 13:5.) Jila yikwavo munahase kusolwelamo muchima wakumika nakupendamina hali Yehova shina kukafwa vana venu valondezeze chakutalilaho chenu.—Samwe. 1, 1:27, 28; Chimo. 2, 3:14, 15.

16. Visemi vamwe vanakafwenga ngachilihi vana vavo valitomene kuzata milimo yakushipilitu, kaha nganyo muka yinafumumo?

¹⁶ Valunga napwevo vamwe muUnited States vakafwile vana vavo valitomene kuzata milimo yakushipilitu. Lunga ambile ngwenyi: “Twanangwilenga vana vetu nganyo yatwama hakuzata upayiniya namilimo yamuchikungulwilo shimbu vapwile vakemba. Shikaho mulimo kana ukiko vali nakuzata. Kulitomena milimo yakushipilitu nakuyitesamo chinakafwe vana vetu vahonese vyeseko vyamuno mukaye kaSatana nakushinganyekanga hali Yehova.” Ndumbwetu umwe wavana vavali ambile ngwenyi: “Visemi vavavulu veji kwenyekanga vyuma vyavo hakukafwa vana vafwile vyakuhemahema, nakulihizumuna, nakuya kumashikola ahelu. Oloze etu twafwila kukafwa vana vetu vazate milimo yize nayivalingisa vapwenga nausoko wamwaza naYehova. Kumona omu vana vetu vanatesamo milimo yakushipilitu chatulingisa tupwenga vakuwahilila nakusuuluka.” Shikaho, fwelelenu ngwenu Kalunga mwakisula visemi vosena vaze veji kukafwanga vana vavo vatesemo kuzata milimo yakushipilitu.

17. Hanenu vyakutalilaho vyomu tunahase kusolola muchima wakumika muchikungulwilo.

¹⁷ Twatela nawa kupwa vakumika muchikungulwilo. Chakutalilaho, vakulwane muchikungulwilo vasakiwa kupwa vakumika hakusopa milonga yayinene chipwe hakukafwa vandumbwetu vaze vali nakuviza. Vakulwane vamwe veji kutambukilanga vafunge mutumenga nakuvakafwa kuvyuma vyakushipilitu. Nyi ngachilihi vandumbwetu vamapwevo vavajike? Navakiko vanahase kupwa vakumika nakutohwesa mulimo wavo hakuzata upayiniya, nakuya kuze kuli nakusakiwa vaka-kwambulula, nakuzachila hamwe naLipatimende Lyatala haMulimo  waKutunga, nakulisonekesa kuShikola yaVaka-Kwambulula Wangana. Kaha nawa vamwe veji kuyanga nakuShikola yaNgileyate.

18. Vandumbwetu vamapwevo vavakulwane vanahase kusolola ngachilihi muchima wakumika?

¹⁸ Chapwa nawa hikutokwa kupwa navandumbwetu vamapwevo vavakulwane muchikungulwilo, kaha twavazanga chikuma. Vamwe kavahasa kuzata chikuma nganomu vazachilenga kunyimako, chipwe ngocho vanahase kupwa vakumika nakuya nakuzata. (Tangenu WaChituse 2:3-5.) Chakutalilaho, ndumbwetu wapwevo wamukulwane asakiwa kupwa wakumika kachi nge vanamulweze akafwe ndumbwetu wamukweze havwaliso yenyi. Ndumbwetu kana keshi kutenukila ou mukwezeko oloze mwamukafwa amone omu vwaliso yenyi yinahase kunganyalisa vandumbwenyi. (Chimo. 1, 2:9, 10) Kuhanjika mujila yayivwovu nachikafwa chikuma ou ndumbwetu wamukweze.

19. (a) Uno vandumbwetu vamalunga vanahase kupwa ngachilihi vakumika? (b) Wavaka-Fwilipi 2:13 na 4:13 navikafwa ngachilihi vandumbwetu vamalunga vapwenga vakumika?

¹⁹ Vatu vakwavo vaze vatela kupwa vakumika nakuya nakuzata shina vandumbwetu vamalunga vakumbapachisa. Vandumbwetu vamalunga vakumika vaze vali nakufwila kuzata milimo yakushipilitu vapwa vavalemu chikuma. (Chimo. 1, 3:1) Oloze vamwe kavasaka kuzata nangolo mangana vavatongoleko. Vandumbwetu vaze valimbenjele kunyima vanahase kulivwa nge kavatelemo kupwa vaka-kuzachila chipwe vakulwane muchikungulwiloko. Kaha nawa vandumbwetu vamwe vanahase kushinganyeka ngwavo kaveshi kuhasa kutesamo milimo yamuchikungulwiloko. Nge omu mukiko mweji kwivwanga nayenu, kaha fwelelenu ngwenu Yehova mwamikafwa mupwenga vakumika. (Tangenu Wavaka-Fwilipi 2:13; 4:13.) Anukenu ngwenu naMose halwola lumwe alivwile ngwenyi katelemo kuzata mulimo vamuhanyineko. (Kulo. 3:11) Oloze Yehova amukafwile, ngocho omikile nakutesamo mulimo vamuhanyine. Shikaho navandumbwetu vamalunga vakumbapachisa navakiko vanahase kupwa vakumika kachi nge navalombanga kuli Kalunga nakutanga Mbimbiliya hakumbi hakumbi. Kushinganyeka hamijimbu yavatu vaze vapwile vakumika nawa nachivakafwa vapwenga vakumika. Vanahase kulweza vakulwane vavanangule mwakuzachila milimo yimwe nakulisuula vavazachise. Shikaho tuli nakumikolezeza enu vandumbwetu vamalunga vakumbapachisa mumike nakuzata nangolo muchikungulwilo.

20, 21. (a) Vyuma muka Ndavichi afwelelesele Solomone? (b) Vyuma muka twatela kufwelela?

²⁰ Mwangana Ndavichi alwezele Solomone ngwenyi Yehova mwapwanga nayikiye palanga nomu mwakakumisa kutunga tembele. (Miji. 1, 28:20) Solomone ketavishile unyike chipwe kuhona uhashi vimuzeyeseko mwomwo ashinganyekelenga hamazu amulweze ise. Asolwele muchima wakumika nakuya nakuzata, kaha Yehova amukafwile akumise mulimo wakutunga tembele hamyaka 7 nachimbwa.

²¹ Yehova nahase kutukafwa nayetu tupwenga vakumika mutanga namuchikungulwilo nakutesamo mulimo wetu, nganomu akafwile Solomone. (Isa. 41:10, 13) Nge natupwa vakumika hakulemesa Yehova, kaha natufwelela ngwetu mwatukisula oholyapwa nakulutwe. Shikaho, ‘umikenu nakuya nakuzata.’