1. Mwomwo ika twatela kuliluula kuli Yehova?

TWATELA kuliluula * kuli Yehova mwomwo ikiye Tengi yetu. Akwechi lisesa lyakutuhana jindongi jize twatela kukavangiza. (Kuso. 4:11) Oloze kuli chuma chikwavo chatela kutulingisa tumwononoke. Chuma kana shina jila yamwaza yize eji kuyulilangamo. Kufuma vene kushikulu, vatu vavavulu vanayulunga vakwavo vatu. Oloze chiyulo chavo kachalyeseka nachiyulo chaYehovako, mwomwo Yehova atwama namangana, nazangi, nalikoji kaha nawa muka-kutetela.—Kulo. 34:6; Loma 16:27; Yowa. 1, 4:8.

2. Kweseka namukanda WavaHepeleu 12:9-11, vyuma muka vyatela kutulingisa tuliluulenga kuli Yehova?

² Yehova asaka tumwononoke keshi mwomwo yakumwivwa womako, oloze mwomwo yakumuzanga nakumumona kupwa Chisemi chetu wazangi. Mumukanda uze Paulu asonekelele vaHepeleu alumbunwinemo ngwenyi twatela “kuliluula kuli Setu” mwomwo eji kutunangulanga “mangana tunganyale.”—Tangenu WavaHepeleu 12:9-11.

3. (a) Uno tweji kusololanga ngachilihi ngwetu twaliluula kuli Yehova? (b) Vihula muka natukumbulula?

³ Tweji kuliluulanga kuli Yehova hakumwononoka muvyuma vyosena nakuhona kupendamina hakunangakana chetu. (Vishi. 3:5) Kutachikizanga vilinga vyamwaza atwama navyo Yehova cheji kutukafwanga tuliluule kuli ikiye. Mwomwo ika tunambila ngocho? Mwomwo vyuma vyosena vize eji kulinganga vyazama havilinga vyamwaza vize atwama navyo. (Samu 145:9)  Kachi nge natulinangula chikuma vyaYehova, kaha natumuzanga. Kaha nawa kuzanga Yehova kachasakiwa kupwa namukana wajishimbi jakutulweza vyuma twatela kulinga navize katwatela kulingako. Tweji kukilikitanga mangana tulingise vishinganyeka vyetu vihunge vyuma vyavipi nakuzanga vyuma vyamwaza. (Samu 97:10) Oloze shimbu jimwe chinahase kutukaluhwila kwononoka Yehova. Mwomwo ika? Uno tulama, navisemi vamalunga navisemi vamapwevo navalinangula vyuma muka kuli Nguvulu Nehemiya, naMwangana Ndavichi, naMaliya naye yaYesu? Muchihande chino natukumbulula vihula kanevi.

4-5. Kweseka namazu ahali Wavaka-Loma 7:21-23, mwomwo ika tunahase kuchiwana kupwa chachikalu kuliluula kuli Yehova?

⁴ Chuma chimwe cheji kutulingisanga tuchiwane kupwa chachikalu kuliluula kuli Yehova shina shili yize twaswana nakuhona kukupuka. Shikaho, katwasaka kuliluula kuli Kalunga shimbu yosenako. Omu Alama naEve valikangile kuli Kalunga nakulya muhako uze avakanyishile, vaputukile jino kulisakwila vavene vyakulinga. (Kupu. 3:22) Namakumbi ano nawa, vatu vavavulu kavasaka kwononoka Yehovako, vasaka kulisakwila vavene kulinga vyuma vyakwoloka nevi vyakuhenga.

⁵ Navatu vaze vatachikiza Yehova nakumuzanga vanahase kuchiwana kupwa chachikalu kuliluula kuli ikiye. Kaposetolo Paulu naikiye apwile muukalu kana. (Tangenu Wavaka-Loma 7:21-23.) Ngana muze chapwile kuli Paulu, nayetu nawa twasaka kulinga vyuma vyakwoloka vize asaka Yehova. Chipwe ngocho, twatela kuzata nangolo numba tuhonese muchima wakusaka kulinga vyuma vyavipi.

6-7. Chuma muka chikwavo chinahase kutulingisa tuchiwane kupwa chachikalu kuliluula kuli Yehova? Hanenu chakutalilaho.

⁶ Chuma chikwavo chinahase kutulingisa tuchiwane kupwa chachikalu kuliluula kuli Yehova shina chisemwa chakungalila vatulelelele. Vishinganyeka vyavatu vyalimbalaka navishinganyeka vyaYehova, shikaho chinahase kutukaluhwila kuhonesa vishinganyeka kana. Achitalenu hachakutalilaho chino.

⁷ Kujingalila jajivulu vanyike veji kuvashinyinyikanga mangana vakilikite chikuma vakapwe najimbongo jajivulu. Ndumbwetu Mary * apwile muukalu kana. Shimbu kanda ou ndumbwetu alinangula muchano, ayile kuyunivesiti yayinene yamulifuchi lyavo. Kufumaho vatanga jenyi vamushinjililile azate milimo yajimbongo jajivulu. Nayikiye vene mukiko azangile. Oloze omu atachikijile Yehova nakuputuka kumuzanga alumwine vishinganyeka vyenyi. Chipwe ngocho, eji kwambanga ngwenyi: “Lwola lumwe ngweji kuwananga milimo yimwe yakusekasana yize yinahase kunguhana jimbongo jajivulu, oloze yinahase nawa kungutangula kushipilitu. Cheji kungukaluhwilanga kukana milimo kana mwomwo yajila vangulelelelemo. Ngweji kulombanga Yehova angukafwe ngufungulule cheseko chakwitavila kuzata mulimo uze unahase kunguzeyesa kushipilitu.”—Mateu 6:24.

8. Vyuma muka natushimutwila?

⁸ Tweji kunganyalanga chikuma hakuliluula kuli Yehova. Chikumanyi vatu vaze vatwama nawata vakufwana nge tulama, navisemi vamalunga navisemi vamapwevo vatela kumona chikupu ngwavo vali nakukavangiza vyuma mwavalweza Yehova, mwomwo kulinga ngocho nachinganyalisa vakwavo. Tushimutwilenu havyakutalilaho vyamuMbimbiliya mangana tumone omu tunahase kuzachisa ngolo jetu mujila yize nayivwisa Yehova kuwaha.

9. Ukalu muka amwene Nehemiya?

⁹ Yehova ahana tulama mulimo waulemu chikuma wakufunga vatu jenyi. (Petu. 1, 5:2)  Tulama navalinangula vyavivulu hakukekesa omu Nehemiya azachilililemo navatu jaYehova. Hakuwana nge apwile nguvulu wavaYuta, ngocho apwile nangolo hali vatu. (Nehe. 1:11; 2:7, 8; 5:14) Achishinganyekenu haukalu umwe amwene Nehemiya. Awanyine vatu vanajilulula tembele, kaha nawa kavapwile nakuhana vaLevi mawana akuvakundwiza ngana muze vavalwezele muJishimbiko. VaYuleya vajilulwile lushimbi lwaSambata, kaha nawa vamwe vambachile mapwevo vakumafuchi eka. Uno Nguvulu Nehemiya alingile ngachilihi haukalu kanou waunene ngana?—Nehe. 13:4-30.

10. Vyuma muka alingile Nehemiya haukalu waunene uze amwene?

¹⁰ Nehemiya kazachishile ngolo jenyi mujila yayipi hakutungila vatu jaKalunga jishimbiko. Oloze alombele Yehova amulweze vyakulinga, nakunangula nawa vatu Jishimbi jaYehova. (Nehe. 1:4-10; 13:1-3) Kaha nawa Nehemiya apwile wakulinyisa nakuzachila hamwe navandumbwenyi hakuvakafwa kutungulula jikembwe jaYelusalema.—Nehe. 4:15.

11. Kweseka namukanda Wavaka-Tesolonyika 1, 2:7, 8, uno tulama vatela kuzakama ngachilihi vandumbwavo muchikungulwilo?

¹¹ Tulama pamo kaveshi kuhasa kumona ukalu ngana uze amwene Nehemiyako, oloze vanahase kumulondezeza mujijila jajivulu. Chakutalilaho, veji kukilikitanga mangana vakafwe vandumbwavo vosena. Kaha nawa kavalimona kupwa vavalemu kuhambakana vakwavo mwomwo yawata vavahanako. Oloze veji kuzakamanga chikungulwilo mujila yazangi. (Tangenu Wavaka-Tesolonyika 1, 2:7, 8.) Zangi yavo nakulinyisa chavo vyeji kuvalingisa vahanjike navakwavo mujila yalikoji. Andrew uze nazate mulimo waulama hamyaka yayivulu eji kwambanga ngwenyi: “Vandumbwetu vosena veji kuwahililanga chikuma kachi nge kalama mwapwa walikoji nazangi. Vilinga kana vyeji kulingisanga vatu vosena muchikungulwilo vazachile hamwe natulama.” Ndumbwetu Tony uze nawa nashimbula mumulimo waulama ambile ngwenyi: “Ngweji kufwilanga kukavangiza mazu akuhuhumuna atwama hali Wavaka-Fwilipi 2:3, aze  ahanjika nge twatela kumona vakwetu kupwa vavalemu. Echi cheji kungukafwanga nguhone kushinjila vakwetu valinge omu ngunasake.”

12. Mwomwo ika chapwila chachilemu tulama kupwa vakulinyisa?

¹² Tulama vatela kupwa vakulinyisa ngana muze apwa Yehova. Numba tuhu Yehova apwa wamulemu chikuma, oloze “eji kunongamanga” nakukatula “muka-kukalikiza mulukungu.” (Samu 18:35; 113:6, 7) Yehova eji kwivwilanga unyengwe mutu wakulivwimba.—Vishi. 16:5.

13. Mwomwo ika kalama atela ‘kukasa lilimi lyenyi’?

¹³ Kalama uze aliluula kuli Yehova, atela ‘kukasa lilimi lyenyi.’ Nge mwahona kulinga ngocho, nahase kuhanjika mazu amapi kumutu uze ahona kumuvumbika. (Yako. 1:26; Ngale. 5:14, 15) Andrew uze twavulukanga hakavanga ambile ngwenyi: “Shimbu jimwe ngweji kusakanga kuhanjika mazu amapi kuli ndumbwami uze eji kuhonanga kunguvumbika. Oloze ngweji kushinganyekanga havyakutalilaho vyamalunga vakushishika vaze vavuluka muMbimbiliya, echi chinangukafwe ngutachikize kuwaha chatwama hakupwa vakulinyisa nakuvova.” Tulama veji kusololanga ngwavo valiluula kuli Yehova hakusolola zangi nalikoji hakuhanjika navandumbwavo muchikungulwilo kuhakilako vene navakwavo tulama.—Kolo. 4:6.

14. Yehova ahana visemi vamalunga mulimo muka, kaha vyuma muka asaka valingenga?

¹⁴ Yehova ahana mulimo kuli visemi vamalunga wakupwa mutwe watanga, kaha asaka ava visemi vanangulenga nakuzangamisa vana vavo. (Koli. 1, 11:3; Efwe. 6:4) Chipwe ngocho, ngolo atwama najo chisemi walunga jatwama noho jakumina, mwomwo mwakalyambulula kuli Yehova, kuze tanga hitanga yatambula lijina lyayo. (Efwe. 3:14, 15) Visemi vamalunga veji kusololanga hatoma ngwavo valiluula kuli Yehova hakuzachisa wata wavo mujila yize yeji kwivwisanga Yehova kuwaha. Tunahase kulinangula vyavivulu hakutanga mujimbu waMwangana Ndavichi.

15. Mwomwo ika visemi vamalunga vatela kulondezeza Mwangana Ndavichi?

¹⁵ Yehova atongwele Ndavichi kupwa mutwe watanga kaha nawa atetekele muyachi waIsalele wosena. Hakuwana nge apwile mwangana, ngocho apwile nawata waunene chikuma. Lwola lumwe azachishile wata kana mujila yakuhenga nakulinga shili yayinene chikuma. (Samwe. 2, 11:14, 15) Oloze asolwele hatoma kuliluula chenyi kuli Yehova hakwitavila vamuzangamise. Alombele kuli Yehova namuchima wenyi wosena. Kaha nawa afwililile kwitavila kuhuhumuna chaYehova. (Samu 51:1-4) Chuma chikwavo nawa, etavilile kulinga vyuma vyamwaza vyosena vize vamulwezelenga vakwavo  malunga kuhakilako vene navize vamulwezelenga mapwevo. (Samwe. 1, 19:11, 12; 25:32, 33) Ndavichi azachililenga hatutenga twenyi kaha nawa ahakilenga milimo yaYehova kulutwe mukuyoya chenyi.

16. Vishina muka navalinangula visemi vamalunga kuli Ndavichi?

¹⁶ Tuchitalenu havishina vino, vize visemi vamalunga vanahase kulinangula kuli Mwangana Ndavichi. Chatete, kanda kuzachisa wata uze Yehova amihana mujila yayipiko. Chamuchivali, mwatela kwitavilanga vyuma munalimbenje. Chamuchitatu, itavilenunga nge vakwenu vanamihuhumuna kweseka navyuma yanangula Mbimbiliya. Kachi nge namulinga ngocho, kaha vaka-tanga yenu navamivumbika chikuma mwomwo yakulinyisa chenu. Kachi nge muli nakulomba hamwe natanga yenu, kaha mwatela kumulweza Yehova vyosena vili kumuchima wenu mangana vaka-tanga yenu vamone chikupu ngwavo mwapendamina hali Yehova. Chuma chachilemu chikumanyi shina, kuzachila Yehova mukuyoya chenu chosena. (Lushi. 6:6-9) Tachikizenu ngwenu, chakutalilaho chenu chamwaza chinahase kukafwa chikuma tanga yenu.

17. Visemi vamapwevo vavahana mulimo muka kuli Yehova?

¹⁷ Yehova ahana visemi vamapwevo mulimo waulemu mutanga, kaha nawa avahana wata hali vana vavo. (Vishi. 6:20) Shikaho vyuma mwalinga chisemi wapwevo navize mwahanjikanga vikiko vanahase kukalinganga vana mukuyoya chavo chosena. (Vishi. 22:6) Talenu vishina vanahase kulinangula visemi vamapwevo kuli Maliya naye yaYesu.

18-19. Vyuma muka navalinangula visemi vamapwevo kuli Maliya?

¹⁸ Maliya atachikijile kanawa Visoneka. Avumbikilenga chikuma Yehova nakutunga usepa wakukola naikiye. Aliluwile kuli Yehova hakulinga vyuma vyosena amulwezele, numba tuhu kulinga ngocho chalumwine kuyoya chenyi.—Luka 1:35-38, 46-55.

¹⁹ Enu visemi vamapwevo, munahase kulondezeza Maliya mujijila jajivulu. Munahase kulinga ngachilihi ngocho? Chatete, mwatela kulama usepa wenu naYehova hakulinangulanga Mbimbiliya nakulombanga. Chamuchivali, mwatela kwalumunako vyuma mukuyoya chenu mangana mulinge vyuma vize navivwisanga Yehova kuwaha. Chakutalilaho, pamo vamilelele kuli visemi vaze vakwachilenga washi matoto nakuhanjika mazu amapi kuli yenu vana vavo. Ngocho pamo mweji kushinganyekanga ngwenu mukiko visemi vatela kulelelamo vana. Shikaho, nomu munalinangula lyehi jishimbi jaYehova, munahase kuchiwana kupwa chachikalu chikuma kupwa vakuunda nakutalilila vana venu chikoki kachi nge navalikanga kuli enu chikumanyi nge munazeye. (Efwe. 4:31)  Halwola lwakufwana ngana mwatela kupendamina chikuma hali Yehova mukulomba. Lydia chisemi wapwevo ambile ngwenyi: “Shimbu jimwe omu mwanami walunga alikangilenga kuli ami, ngwalombelenga chikuma mangana nguhone kumwamba mazu amapi. Ngwaholelenga nakuvangila kulomba numba jino ngutwaleho kuhanjika. Kulomba cheji kungukafwanga nguunde muchima.”—Samu 37:5.

20. Ukalu muka veji kumonanga visemi vamwe vamapwevo, kaha vyuma muka vatela kulinga mangana vakumise ukalu kana?

²⁰ Visemi vamwe vamapwevo veji kuchiwananga kupwa chachikalu kuzanga vana vavo. (Chitu. 2:3, 4) Mapwevo vamwe vavalelele mutanga muze visemi kavasolwelelenga vana vavo zangiko. Kachi nge mukiko vamilelele nayenu, kaha kamwatela kulondezeza jila yize vamilelelelemo visemi jenuko. Chisemi wapwevo uze aliluula kuli Yehova, atela kulinangula mwakusolwela zangi kuli vana venyi. Chinahase kumukaluhwila kwalumuna vishinganyeka navilinga vyenyi. Oloze kachapwa chachikaluko, kaha nawa kulinga ngocho nachinganyalisa vosena mutanga.

21-22. Kweseka namukanda waIsaya 65:13, 14, nganyo muka yeji kufumanga hakuliluula kuli Yehova?

²¹ Mwangana Ndavichi atachikijile nganyo yatwama hakuliluula kuli Yehova. Asonekele ngwenyi: “Jindongi jakufuma kuli Yehova japwa jakwoloka, jeji kulingisanga muchima uwahilile, jishimbi jaYehova japwa jitoma, jeji kulingisanga meso amunyike. Ngamba yove vanamuhuhumuna najishimbi kana, kaha kujilama cheji kunehanga fweto yayinene.” (Samu 19:8, 11) Makumbi ano, tuli nakumona chihandwa chatwama hali vatu vaze veji kuliluulanga kuli Yehova, navaze veji kuhonanga kulinga ngocho. Vaze veji kuliluulanga kuli Yehova veji kutwanga “jingunda hakwivwa kuwaha mumichima yavo.”—Tangenu Isaya 65:13, 14.

²² Kachi nge tulama, navisemi vamalunga navisemi vamapwevo navaliluula kuli Yehova, kaha navapwa vakuwahilila mukuyoya, jitanga javo najifukila, kaha nawa vatu vosena muchikungulwilo navapwa vakulinunga. Chuma chachilemu chikumanyi shina, navevwisa Yehova kuwaha. (Vishi. 27:11) Kulinga vyuma kana nachitunganyalisa chikuma mukuyoya chetu.