1. Ukalu muka apwile nakuhitamo kaposetolo Yowano kusongo yalikulukaji lyamyaka lyakulivanga?

KUSONGO yalikulukaji lyamyaka lyakulivanga, kaposetolo Yowano apwile muukalu waunene chikuma. Apwile kashinakaji kaha nawa vamukashile mukamenga halitungu lyaPatamu, chasoloka nawa nge ikiye kaha kaposetolo apwileko hashimbu kana yize. (Kuso. 1:9) Atachikijile nawa ngwenyi vaka-kusosoloka kulufwelelo vapwile nakuhungumwisa vatu muvikungulwilo nakuneha vihandwa. Chasolokele kwijiva nge chikungulwilo chapwile nakunonga.—Yuta 4; Kuso. 2:15, 20; 3:1, 17.

2. Kweseka namukanda waKusoloka 7:9-14, chakumwenesa muka chakulipwila chize vamwenesele Yowano? (Talenu muvwimbimbi wahalipapilo lyahelu.)

² Halwola kanelu apwile muukalu, Yowano vamumwenesele chakumwenesa chakulipwila. Muchakumwenesa kana, Yowano amwene kangelo ali nakulweza vangelo vawana vaze vakwachilile jipeho jaluyando lwalunene palanga nomu navalamika tutachikijilo lizavu lyavangamba jaYehova. (Kuso. 7:1-3) Mulizavu kana mwatwama vangamba jaYehova vakuheta ku 144,000 vaze navakayula naYesu mwilu. (Luka 12:32; Kuso. 7:4) Yowano avulukile nawa lizavu likwavo lyalinene chikuma, kaha ambile ngwenyi: “Ngwamwene liyongomena lyalinene lize kavahashile kulava kuli mutu numba umweko, vakumafuchi osena, nakumiyachi yosena, nakuvatu veka naveka vosena, nakumalimi osena, vanemana kulutwe lwalitanda, nakumeso aMwanamukoko.” (Tangenu Kusoloka 7:9-14.) Twafwelela chikupu ngwetu, Yowano awahililile chikuma hakutachikiza ngwenyi kulutwe nakukapwa mayongomena avatu vaze navakalemesanga Yehova mujila yakwoloka.

3. (a) Mwomwo ika chakumwenesa vamwenesele Yowano chatela kujikijisa lufwelelo lwetu? (b) Vyuma muka natushimutwila muchihande chino?

³ Chikupu vene, chakumwenesa kana chajikijishile lufwelelo  lwaYowano. Hakuwana nge tuli nakuyoyela mulwola luze chili nakutesamo chakumwenesa kana, shikaho chatela kujikijisa chikuma lufwelelo lwetu. Tuli nakumona omu vali nakukungulula mayevuyevu avatu vaze navakayovoka haluyando lwalunene nakukayoya haya myaka yosena hano hamavu. Muchihande chino, natulinangula omu Yehova nasolola hatoma liyongomena kaneli lyalinene kuli vatu jenyi hamyaka yakuhambakana 80 yinahichimo. Kaha natushimutwila vishina vivali halizavu kana. Chatete, kutohwa chaliyongomena kana, kaha chamuchivali, okwo vafuma vatu vamuliyongomena kana. Vishina kanevi vyatela kujikijisa lufwelelo lwavaze vatwama mulizavu kana.

4. Muchano muka wamuVisoneka uze vahona kutachikiza vaka-Kulishitendomu, kaha vyuma muka vatachikijile Vaka-Kulinangula Mbimbiliya?

⁴ Kulishitendomu kayanangula muchano wamuVisoneka wakusolola nge vatu vakwononoka navakatwama hano hamavu haya myaka yosenako. (Koli. 2, 4:3, 4) Makumbi ano, mauka amuKulishitendomu eji kunangulanga ngwawo vatu vavilinga vyamwaza veji kuyanga mwilu nge vanafu. Oloze Vaka-Kulinangula Mbimbiliya vaze vaputukile kulovola Kaposhi Kakutalila mu 1879, kavanangwilenga ngochoko. Vatachikijile ngwavo Kalunga mwakakindulwisa Palachise hano hamavu, kaha vatachikijile nawa ngwavo mayevuyevu avatu vakwononoka navakayoyela hano hamavu keshi mwiluko. Chipwe ngocho, chambachile lwola numba jino vatachikize ava vatu vakwononoka vatwama mulizavu kana.—Mateu 6:10.

5. Vyuma muka vafwelelele Vaka-Kulinangula Mbimbiliya kutalisa kuli vaze 144,000?

⁵ Vaka-Kulinangula Mbimbiliya vatachikijile kweseka naVisoneka ngwavo, vatu vamwe ‘navakavalanda hamavu’ mangana vakayule hamwe naYesu mwilu. (Kuso. 14:3) Lizavu kana nalikapwa navatu vakuheta ku 144,000, vaze vazachilile Kalunga nakashishi omu vapwile hano hamavu. Jino vyuma muka vafwelelele kutalisa kuliyongomena lyalinene?

6. Vyuma muka vafwelelele Vaka-Kulinangula Mbimbiliya kutalisa kuliyongomena lyalinene?

⁶ Muchakumwenesa kana, Yowano amwene lize lizavu ‘linemana kulutwe lwalitanda, nakumeso aMwanamukoko.’ (Kuso. 7:9) Mazu kana alingishile Vaka-Kulinangula Mbimbiliya vakukulule ngwavo liyongomena lyalinene nalikapwa mwilu hamwe kaha navaze 144,000. Jino nge vaze 144,000 naliyongomena lyalinene vosena navakapwa mwilu, kaha chihandwa muka nachikapwa hali awa mazavu avali? Vaka-Kulinangula Mbimbiliya vashinganyekele ngwavo, muliyongomena lyalinene mwapwile vatu vaze kavononokelenga Kalunga namichima yavo yosena halwola vapwilenga hano hamavuko. Numba tuhu vatu kana vapwilenga navilinga vyamwaza oloze vamwe pamo vapwilenga lika mujichachi jaKulishitendomu. Shikaho, vakukulwile ngwavo vatu kana kavazangile chikuma Kalungako ngocho kavatelemo kuyula naYesuko. Hakuwana nge kavazangile chikuma Kalungako, ngocho vatu kana navakaya mwilu nakwimana kulutwe lwalitanda lyaKalunga oloze kaveshi kukatwama hamatandako.

7. Uno Vaka-Kulinangula Mbimbiliya vashinganyekele ngwavo vatu muka navakatwama hano hamavu muChiyulo chaYesu chaMyaka Likombakaji, kaha vyuma muka vafwelelele kutalisa kuli vangamba jaKalunga vakushishika vakushikulu?

⁷ Jino veya navakatwama hano hamavu? Vaka-Kulinangula Mbimbiliya vafwelelele ngwavo, omu vaze 144,000 naliyongomena lyalinene navakaya mwilu, nakukapwa vatu veka vavavulu chikuma vaze navakalivwisa kuwaha kuyoyela hano hamavu muChiyulo chaKulishitu chaMyaka Likombakaji. Vashinganyekele ngwavo ava vatu navakayoyela hano hamavu muChiyulo chaKulishitu, kavazachilililenga Yehova mukuyoya chavoko. Shikaho vashinganyekele ngwavo vatu kana navakavanangula jijila jaYehova muChiyulo chaKulishitu. Kufumaho vaze navakakavangiza jishimbi jaYehova navakavakisula nakukapwa nakuyoya  chahaya myaka yosena hano hamavu, kaha vaze navakalikanga navakavanongesa. Vaka-Kulinangula Mbimbiliya vashinganyekele nawa ngwavo, pamo vatu vamwe vaze navakapwa “vilolo” hano hamavu muChiyulo chaYesu kuhakilako vene navangamba jaKalunga vakushikulu vaze navakasanguka (malunga vakushishika vaze vafwile shimbu kanda Kulishitu), navakapwa nakutokwa chakukaya mwilu hanyima yaChiyulo chaYesu chaMyaka Likombakaji.—Samu 45:16.

8. Mazavu muka atatu aze Vaka-Kulinangula Mbimbiliya vashinganyekele ngwavo atwamako?

⁸ Vaka-Kulinangula Mbimbiliya vashinganyekele ngwavo kwatwama mazavu atatu: (1) lizavu lyavaze 144,000 vaze navakayula naYesu mwilu; (2) liyongomena lyalinene lyavaka-Kulishitu vaze kavazangile chikuma Yehovako, vaze navakemana kulutwe lwalitanda lyaYesu mwilu; (3) lizavu lyavatu vavavulu vaze navakapwa hano hamavu nakukavanangula jijila jaYehova muChiyulo chaKulishitu chaMyaka Likombakaji. * Oloze omu lwola lwahetele, Yehova aputukile kusolola muchano uvene hachihande kana.—Vishi. 4:18.

9. (a) Mujila muka liyongomena lyalinene lyeji kwimananga “kulutwe lwalitanda, nakumeso aMwanamukoko”? (b) Mwomwo ika ulumbunwiso wamukanda waKusoloka 7:9 uze valumwineko wapwila wakwoloka?

⁹ Mu 1935 Vinjiho jaYehova vatachikijile jino lize liyongomena lyalinene amwene Yowano muchakumwenesa. Vatachikijile jino ngwavo, liyongomena lyalinene kalyatela kuya mwilu nakukemana “kulutwe lwalitanda, nakumeso aMwanamukoko[ko].” Oloze veji kwimananga kulitanda mujila yachifwanyisa. Numba tuhu navakatwama hano hamavu, oloze liyongomena kaneli ‘nalikemana kulutwe lwalitanda’ hakwitavila ngwavo, Yehova ikiye muka-kuyula vyuma vyosena nakwitavila avatwaminyine. (Isa. 66:1) Veji kwimananga ‘kumeso aMwanamukoko’ hakufwelela mundando yakusokola yaYesu. Chochimwe nawa hamukanda waMateu 25:31, 32 vavulukaho ngwavo “vaka-mafuchi osena” kuhakilako navaka-kuhuka “navakavakungulwila” kulitanda lyaYesu lyaupahu. Ava vaka-mafuchi osena kavatwama mwiluko, oloze hano hamavu. Chikupu vene, vyuma valumwineko mu 1935 vyapwa vyakwoloka. Valumbunwine ngwavo, Mbimbiliya kayahanjika ngwayo liyongomena lyalinene nalikaya mwiluko. Oloze lizavu lyavaze 144,000 likiko kaha nalikaya mwilu nakukayoyelamo haya myaka yosena. Ava vatu vamulizavu kana vakiko “navakapwanga vamyangana nakuyula mavu” hamwe naYesu.—Kuso. 5:10.

10. Mwomwo ika chapwila chakutamo kunangula liyongomena lyalinene jijila jaYehova shimbu kanda Chiyulo chaKulishitu chaMyaka Likombakaji?

¹⁰ Kufuma vene mu 1935, Vinjiho jaYehova vatachikiza ngwavo liyongomena lyalinene lize amwene Yowano muchakumwenesa lyapwa lyavaka-Kulishitu vakushishika vaze navakayoyela hano hamavu haya myaka yosena. Vatu kana vatela kuvanangula shimbu kanda Chiyulo chaYesu chaMyaka Likombakaji numba vakayovoke haluyando lwalunene. Kaha vatela kusolola lufwelelo lwakukola numba ‘vakahase kuchina vyuma vyosena vize navikasoloka’ shimbu kanda Chiyulo chaKulishitu chaMyaka Likombakaji.—Luka 21:34-36.

11. Mwomwo ika Vaka-Kulinangula Mbimbiliya vamwe vashinganyekele ngwavo pamo vatu vamwe navakaya mwilu hanyima yaChiyulo chaYesu chaMyaka Likombakaji?

¹¹ Nyi ngachilihi vishinganyeka vyakwamba nge malunga vakushishika vamwe hano hamavu navakaya mwilu hanyima yaChiyulo chaYesu chaMyaka Likombakaji? Chihande kana vachivulukile kunyima muKaposhi Kakutalila waFebruary 15, 1913. Vashinganyekele ngwavo, ‘Mwomwo ika malunga vakushishika vakushikulu navakatwamina hano hamavu, oloze vaka-Kulishitu vaze kavapwile vakushishikako vakaye nakuyoyela mwilu?’ Chuma chavalingishile vashinganyeke mujila kana shina mwomwo yavyuma vino vivali: Chatete, vashinganyekele ngwavo liyongomena lyalinene nalikaya  mwilu. Chamuchivali, vashinganyekele ngwavo liyongomena lyalinene nalikapwa lyavaka-Kulishitu vaze kavapwa vakushishika chikumako.

12-13. Chuma muka vatachikiza vawavisa naliyongomena lyalinene kutalisa kuwana navakatambula?

¹² Nganomu tunashimutwila, kufuma vene mu 1935, Vinjiho jaYehova vatachikiza ngwavo vatu vaze navakayovoka haAlamangetone vakiko vapwa liyongomena lyalinene lize amwene Yowano muchakumwenesa. Navakafuma “muluyando lwalunene” hano vene hamavu, kaha navakatambakananga “nalizu lyakukanguka ngwavo: ‘Ulwilo wetu wafuma kuli Kalunga ketu ou atwama halitanda, nakuli Mwanamukoko.’” (Kuso. 7:10, 14) Kaha nawa Visoneka vyahanjika ngwavyo, vaze navakasanguka nakuyoyela mwilu vavahana “vyuma vyamwenemwene” kuhambakana malunga vakushishika vakushikulu. (Hepe. 11:40) Ngocho vandumbwetu vaputukile kunangula vatu vavavulu vaze navakazachila Yehova hano hamavu.

¹³ Vatu vaze vatwama muliyongomena lyalinene vapwa vakuwahilila halutalililo lwavo. Vatachikiza ngwavo, Yehova ikiye eji kusakwilanga vangamba jenyi okwo vatela kumuzachila, mwilu chipwe hano hamavu. Vawavisa naliyongomena lyalinene vatachikiza ngwavo navakatambula wana wavo mwomwo yalikoji lyaYehova lyalinene lize avasolwela kuhichila mundando yakusokola yaYesu Kulishitu.—Loma 3:24.

14. Mwomwo ika vatu vahuhwasanyinyine kutesamo chaupolofweto wakuvuluka liyongomena lyalinene?

¹⁴ Numba tuhu vatu jaYehova vevwishishile chakumwenesa kana mu 1935, oloze vahuhwasanyine mujila navakavulilamo vaze vatwama nalutalililo lwakukayoyela hano hamavu nakupwa liyongomena lyalinene. Chakutalilaho, halwola valumbunwine kanawa vyaliyongomena lyalinene, Ronald Parkin apwile kaha namyaka yakusemuka 12. Ambile ngwenyi: “Halwola kana mukaye kosena mwapwile vaka-kwambulula kafwe 56,000, kaha vavavulu pamo vapwile vakuwavisa. Ngocho chasolokele nge lize liyongomena lyalinene kalyapwile navatu vavavuluko.”

15. Uno vatu vamuliyongomena lyalinene vanavulilangako ngachilihi?

¹⁵ Mumyaka yakavangijileho, vamishonali vavatumine kumafuchi amavulu, ngocho Vinjiho jaYehova vaputukile kuvula. Kufumaho, mu 1968 vaputukile kunangula vatu Mbimbiliya kuzachisa mukanda wakwamba ngwavo, Mucano Uli Nakutetekela Kumwono Wamyaka Yosena. Vatu vavavulu valinangwile muchano, mwomwo muchano wamuMbimbiliya vaulumbunwine mujila yayashi mumukanda kana. Omu mwahichile myaka yiwana, vatu vakuhambakana hachimbwa chamiliyoni vavambapachishile. Omu ngolo jaliuka lyaKatolika japutukile kukeha chikuma mumafuchi amuLatin  America namafuchi eka, nomu nawa mulimo wetu vawitavishile mumafuchi akumututuko waEurope namafuchi eka amuAfrica, vatu vavavulu vavambapachishile. (Isa. 60:22) Mumyaka yakalinwomu liuka lyaYehova linalovolanga vinoma vyeka vyamwaza vyakukafwa vatu valinangule Mbimbiliya. Chakuzeneka kukakasana, liyongomena lyalinene vanalikungulula, kaha vatu vanavulu kuhambakana jimiliyoni 8.

16. Uno vatu vamuliyongomena lyalinene vanakuvakungulula kufuma kulihi?

¹⁶ Omu Yowano apwile nakusoneka chakumwenesa vamumwenesele, asonekele ngwenyi vatu vamuliyongomena lyalinene navakafuma kumafuchi “osena, nakumiyachi yosena, nakuvatu veka naveka vosena, nakumalimi osena.” Kapolofweto Zekaliya naikiye ahanjikilile chimweza vyuma vyakufwana nganevi ahanjikile Yowano. Asonekele ngwenyi: “Hamakumbi aze, malunga likumi vakumalimi akumafuchi osena navakakwata kuchikuto chakaYuleya nakwamba ngwavo: ‘Natuya nayove mwomwo tunevu ngwavo Kalunga ali nayove.’”—Zeka. 8:23.

17. Vyuma muka lili nakulinga liuka lyaYehova mangana likafwe vatu vakumafuchi osena navakumalimi osena?

¹⁷ Vinjiho jaYehova vatachikiza ngwavo, mujimbu wamwaza vatela kuwambulula mumalimi amavulu numba vahase kukungulula vatu  vakumalimi amavulu. Hamyaka yakuhambakana kafwe 130, tunalumunanga vinoma vyakuzachisa hakunangula vatu Mbimbiliya, oloze oholyapwa tuli nakuzata mulimo waunene chikuma wakwalumuna vinoma kana mumalimi amavulu. Chikupu vene, Yehova ali nakulinga chuma chakukomwesa makumbi ano, hakukungulula vatu vamuliyongomena lyalinene vakufuma kumafuchi osena. Twawahilila chikuma hakupwa navyakulya vyavivulu vyakushipilitu mumalimi amavulu, echi chalingisa vatu vamuliyongomena lyalinene valinunge hamwe nakulemesa Kalunga numba tuhu vafuma kumafuchi akulihandununa handununa. Vatu vamuliyongomena lyalinene vavatachikijila hatwima vatwama nayo yakuzata mulimo wakwambulula nahazangi yavo yakuzanga vandumbwavo. Chuma kana cheji kujikijisanga lufwelelo lwetu.—Mateu 24:14; Yowa. 13:35.

18. (a) Kweseka namukanda waIsaya 46:10, 11, mwomwo ika kutesamo chaupolofweto wakuvuluka liyongomena lyalinene kachatulingisa tulikomokeleko? (b) Mwomwo ika vatu vamuliyongomena lyalinene kavashinganyeka ngwavo vavamona kupwa vamokomokoko?

¹⁸ Twapwa vakuwahilila chikuma haupolofweto wahanjika haliyongomena lyalinene. Katweshi kulikomokela hakumona omu Yehova anakutesamo upolofweto kanou mujila yakukomwesako. (Tangenu Isaya 46:10, 11) Vatu vamuliyongomena lyalinene vawahilila chikuma halutalililo kanelu avahana Yehova. Vatu kana kavashinganyeka nge vavamona kupwa vamokomoko hakuwana nge kavavawavisa nashipilitu yaKalunga mangana vakayule naYesu mwiluko. MuMbimbiliya tweji kutangangamo mijimbu yavatu vakushishika vaze vatwaminyinyine nashipilitu yajila, oloze kavatwama halizavu lyavaze vawavisako. Chakutalilaho, Yowano Muka-kumbapachisa naNdavichi kavatwama halizavu kaneliko. (Mateu 11:11; Vili. 2:34) Malunga kanava, navatu veka vavavulu navakavasangula nakukatwama mupalachise hano hamavu. Vatu vosenava hamwe kaha naliyongomena lyalinene, navakapwa nalisesa lyakukasolola kushishika chavo kuli Yehova nakumwitavila akavayule.

19. Uno kumona chakumwenesa vamwenesele Yowano omu chili nakutesamo makumbi ano, chatela kutulingisa tulinge ika?

¹⁹ Kufuma vene kushikulu, Yehova kanda akungululengaho lyehi vatu vakumafuchi osena valinunge hamwe nakumulemesa nganomu nalingi makumbi anoko. Chamokomoko nalutalililo twatwama nalwo, tuvosena twatela kukafwa vatu vavavulu valiweze kumukana waliyongomena lyalinene ‘lyamikoko veka.’ (Yowa. 10:16) Kalinwomu Yehova anehe luyando lwalunene luze nalunongesa jifulumende namauka akwitava chamakuli mwomwo vikiko vinanehenga ukalu kuvatu. Vatu vaze vatwama muliyongomena lyalinene navakalivwisa kuwaha kuzachila Yehova haya myaka yosena hano hamavu.—Kuso. 7:14.